DẠVID REAḰ KẠI

Dạvid palṭonren maraṅ sordar Joab do Amon hoṛko tuluće lạṛhại kan tahẽkanare, Dạvid do mit́din ạyuṕ ber jokheć aćaḱ dolan coṭ khon umoḱkan Uriyạren oṛaḱ hoṛ Batsebae ńel ńamkedea. Khange ạgu ocokedete uni tuluće loṭghuṭiket́a, ar Joab ṭhen ciṭhiye kolket́a, jãhãlekate Uriyạ lạṛhại reaḱ bạṛti mũhĩn ṭhạ̃ireye dohokae, jemon Amon hoṛko reaḱ titeye guroḱ. Joab do aćren kisạ̃ṛ reaḱ kathae bataoket́te Uriyại goć ocokedea. Dạvid ona reaḱ khobor ńamkateye menket́a, Cekaeam, tarwaṛe do jãhãtis baṅ huni, jãhãtis baṅ uniye gugurgea. Homor din cabayen khan, Dạvid do Batsebae saṅghakedea. Menkhan Dạvid oneye kạmilet́aḱ joto do bạṛićge.

Probhu do Nathan nạbi Dạvid ṭhene kolkedea ar uni do Dạvide metadea, E Maharaj! Bar hoṛ mit́ naṅgraharekin tahẽkana; mit́ hoṛ do kisạ̃ṛ ar mit́ hoṛ do reṅgeć. Uni kisạ̃ṛ hoṛren do aema mĩhũ meromko tahẽkana; menkhan uni reṅgeć hoṛren do sadherre mit́ṭaṅ bhiḍi hopone tahẽkantaea, ar uni do aćaḱ piṭhạ reaḱe joma, ar aćaḱ bạṭi reaḱe ńũia, aćaḱ hoborreye gitića, ar hoponera lekae tahẽkantaea. Mit́din mit́ṭaṅ daṛan hoṛ uni kisạ̃ṛ ṭhen hećente, uni kisạ̃ṛ do aćren mĩhũ meromko tahẽ ocoat́kote uni reṅgeć hoṛren sadher bhiḍi hopon ạgukate uni daṛan hoṛ lạgit́e isin aroadea.

Khange Dạvid pit caṛhaoentaeteye menket́a, Uniye nonka akat́ hoṛ do khạṭige gujuḱ sạjạiye ńama ar uni bhiḍi hopon hõ pon ḍobol lagaoaea. Nathane roṛ ruạṛadea, Amge coṅ hoṛtet́ do! Uriyạ do Amon hoṛko reaḱ tarwaṛete com goć oco akade, ar uniren oṛaḱ hoṛ com am rinić akade. Khange Dạvid Probhu samaṅre bạpuṛićenteye menket́a, E, Isor sapha mon baṛe sirjạuańme, ar iń ontorre urić jiu baṛe nawa aroeme; teṅgenoḱaḱ do bam hạ̃saḱ kana, baṅkhan iń emkea; jeredoḱ samaṅaḱaḱ bam khusiaḱ kana. Isor lạgit́ teṅgenoḱaḱko do rạput́ jiuge; rạput́ ar gejer mon, E Isor, bam nĩhạ̃ta. Probhu do Dạvid reaḱ kạiye ikạket́taea; menkhan Betsebae janamade hopon do Dạvid Probhu ạḍiye nehõradere hõe goćena, ar haṛam jivire Dạvid reaḱ ạḍi duk hoyentaea. (2 Sạm.11-12.)