Mose Midiạnteye Dạṛket́a

Mose do 40 serma umer hoyentae khan mit́din oḍoṅ senkate aćren boehako reaḱ harkhete ńelket́takoa. Mit́ṭen Misorren hoṛ mit́ṭaṅ Ibri hoṛ dale kane ńelkedea. Mose onte note beṅget́ baṛakate, cele hõ bae ńel ńamlet́kote, uni Misorren hoṛe dal goćkedea, ar gitilreye topakedea. Pharao raj ona ańjom ńamkate Moseye goje lạgidoḱkan tahẽkana; menkhan Mose do ona  bujhạuket́te Midiạnteye dạṛket́a ar onḍe Jethro ńutuman mit́ṭeć naeke tuluće peṛayena, ar uni ṭhen 40 sermae tahẽyena.

Mit́din Horeb buru pheḍreye gupikan tahẽkanre mit́ṭeć jạnum jhạuạ joloḱ kane ńelket́a, menkhan baṅ loḱ kana. Moseye soroḱ lạgidoḱkan tahẽkanre jạnum jhạuạ khon Probhui metadea, Kharpa bojtam, entem teṅgo akan ṭhạ̃i do sonot otge. Iń do Abrahamren, Isạhak ar Jakobren Isorge; ińren porja hoṛko reaḱ harkhet saset iń ńel akat́a ar onkoaḱ raḱ do iń ṭhen seṭer akana. Nitoḱ do Pharao ṭhen iń kolmea, ar am do ińren porja Misor khon oḍok ạgukom. Moseye roṛ ruạṛadea, Ińren boehako do ohoko pạtiạlińa, amem kol akadińa mente. Khange Probhui metadea, amaḱ ṭheṅga otre giḍime. Moseye onkaket́ khan, ona do biń got́ente Mose uni botorteye dạṛket́a. Probhu reaḱ hukumte Mose do biń canḍbolreye saṕ kedete ṭheṅga ruạṛena.

Probhu do hahaṛawaḱ kạmi lạgit́ daṛeye emadea; menkhan Mose do ạnḍuṅkateye menket́a, Iń do thotṛageạń. Probhui metadea, Amren boeha Aron iń kolama; am do unim bujhạuaea, ar uni do am lạgit́e roṛa. Khange Mose Misor disomteye calaoena, ar horre Aron tuluć dapramkate bana hoṛ Isrạyel hoṛko ṭhen senente Probhu reaḱ kathakin jạhirat́koa. Onko do pạtiạuente Probhuko sewawadea. (Exod, 2-4.)