Go̠ṛo̠m Baba

Tahẽ̠ kanae go̠ṛo̠m baba

Ńe̠lo̠ḱ te̠ma ạḍi taja

Dinạm setaḱ beret́ tora

Onḍoṅoḱae dãṛã baṛa

Jo̠mae dinạm araḱ sakam

Bạnuḱtaea jahan beram.

Suṅkạl Cẽṛẽ Ar Hako

Mit́din mit́ṭen banḍhej suṅkạl cẽṛẽ lil roṅ hakoe saṕkedea. Hako do ạḍiye botorena. Aćaḱ jiwi bańcao iạte lil hako do suṅkạl cẽṛẽ metadea, “Daya kate aṛaḱkạń baṛe.” Baṅkhan iń do dareń benaomea. Unre do ar cele hako hõ bam jom daṛeakoa.

Menkhan ona kathate cet́ kạ̣mige baṅ hoelena. Suṅkạl cẽṛẽ do lil roṅ hako jome lạgit́te hudiskeda.

Lil hako doe menkeda, “am do bam baḍaea amaḱ aṛaṅ do liṭhur aṛaṅ kana? Amaḱ aṛaṅte sereń ańjom lekhan ạḍi bhage hoyoḱa. Mit́ṭen sereń me! Sereń ańjomte enḍekhan pukhriren joto hako ko hijuḱa ar mit́ dhaote ạḍi utạr hakom saṕ daṛeakoa.”

Ona katha ańjomte suṅkạl cẽṛẽ doe kusiyena. Khange suṅkạl cẽṛẽ do sereń lạgit́ mocae jhićket́ torage, budan hako do uniaḱ moca khon pukhrire donkeda ar paera paerate ạḍi sạṅgińe calaoena.

Doṅ Sereń

Eden ma bagwanre

Tokoe manwakin tahẽkana

Unkin tahẽkan bhor do

Eden bagwankin maḍaoleda.

Soetan bulạuket́kin

Kại bojha ladeat́kin

Calaoenakin boeha norok ḍahar.

Kạṭić Lutur

Ạkil ko̠m kạṭić lutur okam ańjo̠m

Serma baba menae tabon

Ạḍigey dulạṛ bon

Ạkil ko̠m kạṭić lutur okam ańjo̠m.

Ạkil ko̠m kạṭić moca okam me̠n

Ạkil ko̠m kạṭić mẽt́ okam ńe̠l.

Jakob Esao Tuluće Dapramoḱ Kana

Jakob Kanan disome sorenre Esao ṭhen hoṛe kol lahaket́koa jãhã lekate uni ṭhen dayae ńam. Onko hoṛ heć ruạṛkateko metadea, Dadam do 400 hoṛante am upạrteye hijuḱ kana. Onate Jakob do ạḍitet́ botorente nońjor mente mĩhũ merom Esao ṭhen kolket́kote ạḍi nehõrkate Isor ṭhene koeket́a

Khange Probhu hoṛ chinte uni ṭhen upelente uni tuluće tapamena; menkhan Jakob do bae aṛaḱledea ạuriye bhorae dhạbić. Khange Isor bhoradete Isrạyel metaḱme Isor tuluć lạṛhạiyiće ńumkedea. Jakob Esao tuluć dapramenre 7 dhao otre ombaḱkateye ḍoboḱadea; menkhan Esao do uni ṭhen ńir senente uni hạṛuṕkateye coḱadea, ar banar boehakin raḱket́a. Isạhak do 180 serma umerreye goćena. Ar aćren hapṛamko tuluće gateyena, ar Esao ar Jakobtekinkin topakedea. (Gen. 32, 33, 35.)

Kul Raj

Iń do̠ kạnạń kul

Jo̠to̠ kore̠n Raj

Dạbi pe̠re̠ć uṕ tiń

Ona ińaḱ saj.

Oṛaḱ tiń bir gajaṛ re̠

Bir buru aṛe̠ re̠.

To̠rjo̠ma: Adori Tudu

Serma Setoṅ

He̠ṛe̠m setoṅ setaḱ tora

Kajak setoṅ tikin tora

Laṅga setoṅ ạyuṕ bela

Ạyuṕ tora nijhum ńindạ.

Mit́ṭen Budan Kulại

Mit́ṭen bir re kule tahẽkana. Uni do din hiloḱ mit́ṭen kate janware sikạret́ ko tahẽkana. Enhiloḱ do mit́ṭen calak se budan kulại sikạr reaḱ katha tahẽnkantaea. Kul ṭhen hećen tora kulại do mit́ṭene hudis ńamkeda. Uni do ạḍi ãṭ aṛaṅ ar kajakte sahẽt́e dhurạuena. Khange kulại aḱ sahẽt́ ńelte kul doe hudiskeda, nui do paseće dạṛ ạgukeda. Adoe kulikedea, “Cekayenam? Amaḱ oṛaḱ ma sorre, enḍekhan cedaḱ bam taṛam ạguleda.”

Kulại doe menkeda, “E raj, thoṛa laha iń do mit́ṭen kul aḱ phãndreń paṛaolena. Onḍe khon jãlãlekateń bańcao ruạṛena. Uni kul do aćge noa bir ren raj mente dạbi kana. Menkhan iń do am tahẽn tuluć eṭaḱ hoṛ ren sikạr do tis hõ bạń hoyoḱa.

Khange kul doe menkeda, “Iń nonḍe tahẽn tuluć okoe do noa bir ren raje dạbi kan, den saṕ ạguyepe. Ado kulại do uni kul mit́ṭen kuń ṭhene idikedea are metadea, noa kuń re uni kul do menaea. Kulại aḱ katha lekage kul do kuń bhitri oyoṅ ket́ khan aćaḱ mẽt́ muṭhạne ńel ńamkeda.

Khange lelha kul aćaḱ mẽt́ muṭhạn ńelte eṭaḱ kul menaea mente hudiskeda. Onate kul do uni são lạṛhại lạgit́ kuń re don khańjoyena. Nonkate uni calak ar budan kulại do banḍhej kul aḱ phañd khon eken ać eskar do baṅ, bickom bir ren joto jib-janware bańcaoket́koa.

JOBA BAHA

Sakam Hạriạṛ Baha araḱ

Hisit́ hoete likit́ laṛaoḱ,

Talare ḍuriạ onare jhạriạ

Ńamtem kusiḱ am dulạṛiạ.

Joba baha araḱ sakam hạriạṛ

Aṛete lilibici ạḍige ḍariạ,

Cando rakaṕ sãote phuṭạḱen jeṅget́

Beret́ toram rạskạḱ juḍạsim beṅget́.

Oṛaḱ raca aṛere baṅkhan simạre

Hoṛ doko rạskạḱ baha dare jotonre,

Baṅ do ḍạṅguạ baṅ do bạhu kuṛi

Sut́re bahae do sanam koge lạuṛi.

Sona Santal baha sohrae

Rạskạ joṅbon sãota asrae,

Santal atore jãhã taha,

Tãhe kana joba BAHA.

Jo̠bamuniaḱ Go̠lpo̠

Ińaḱ ńutum do̠ Jo̠bamuni, aleaḱ ato ńutum do̠ Mirjạ. iń do̠ kuṛi gidrạ kạnạń, ińaḱ umer do̠ pon (4) serma. Ińren bar boeha menaḱkina ńutum tạkin do̠ Asa ar Bhorsa. Unkin dinạm setaḱ to̠ra jo̠maḱ lạgit́kin raga.

Ale oṛaḱre̠ aema bhiḍi me̠naḱkoa. Ar iń do̠ jo̠to̠ bhiḍi ńutum iń do̠ho̠ akat́takoa ar ńutum ńumkate iń ho̠ho̠ lekhan iń ṭhenko dạṛ ạguia ariń coḱakoa. Ar iń baba do̠ dinạm cẽṛẽ ṭuṭi goćkoa ar iń do̠ jel utu ạḍiń kusiaḱa.

Iń do̠ MLE isulreń paṛhaoḱa ar dinạm iskulteń calaḱa. Iń do ińaḱ iskul ạ̣ḍi aṭiń kusiaḱa. O̠lo̠ḱ paṛhao do̠ ạḍi mojiń ạikạua, lạṭu kate didi muniń hoyoḱa.