Jakobren Hoponko Josephe Ạkriń Ocoyena

Jakobren 12 hoponko tahẽkantaea; Ruben do maraṅić ar Rahelren hopon Joseph ar Benjamin do joto khon huḍińkin tahẽkana, Joseph do dadatteko tuluće gupia ar onkoaḱ bạṛić colon apat ṭhene sodortako iạte ạḍiko edreaea. Jakob do aćren joto hopon khon Joseph bạṛtiye dulạṛea, ar mit́ṭeć tilpaṅ aṅgroṕe benao ocoadea. Josephren dadatteko onako ńelkateko hiskạ arko kurudaea, ar sulukte uni tuluć bako galmaraoa.

Joseph mit́ dine kukmũket́te ona do dadattekoe lạiat́koa, baṅma, Kukmũte goḍarebon biḱnḍạ kana, ar apeaḱ binḍạko ińaḱ binḍạko ḍoboḱat́a. Arhõ mit́ dine kukmũket́te ona hõe lạiat́koa, baṅma, kukmũte siń cando ar ńindạ cando ar 11 goṭeć ipilko ḍoboḱadińa. Khange uniren dadattekoko metadea, Ale cetanrem rajoḱgea, se hukumem calaoa ale cetanre base? Artet́geko kurudadea. Ar uniren apat doe metadea, Noa do cet́ lekan kukmũ kantama? Baṅ dole hijuḱ iń eṅgam ar dadamteko am ṭhen ombagoḱ lạgit́? Menkhan Joseph do ona kukmũ monereye dohokat́a.

Mit́din Josephren dadatteko do ạḍi sạṅgińreko gupi kan tahẽkana, ar Jakob do Josephe metadea, Do calaḱme, dadamteko reaḱ ar bhiḍi meromko reaḱ boge judạ ạguime, ar katha ạgu ruạṛạńme. Ado Josephe calaoena. Uniren dadatteko sạṅgiń khonko ńel daramkede khanko mepenena, Hạni ya, kukmũ guruge darae kana, delabon gojea, khangebon ńela, uniaḱ kukmũ reaḱ cet́ hoyoḱa! Menkhan Ruben do bańcaoe reaḱ sana tahẽkanteye menket́a, Noa kũirege khańjo giḍikaepe. Josephe seṭeren khan, aṅgroṕko poṭorkedete rohoṛ kũireko khańjokedea. Onakate duṛuṕenteko jojom kanre, ona takre bepar hoṛ Misor disomteko sen paromoḱ kana. Jihudại menket́a, Delabon, noko bepariko ṭhenbon ạkrińkaea, jivi alobon ạguitae ma; ente boeha kantabon doe, khange 20 ṭakateko ạkriń giḍikadea. Ạkrińe jokheć bae tahẽkan Ruben do kũi ṭhen hećkateye hohoket́a. Koṛa do bạnugićan! Khange mit́ṭen bheḍako goćkedea, ar mãyãmre Joseph reaḱ aṅgroṕko topoket́a, ar apat ṭhen kolket́teko roṛ got́kat́a, Noale ńam akat́a, ńel oromme baṛe, hoponme reaḱ aṅgroṕ kana se baṅa. Jakob ona ńel oromket́teye menket́a, Hoponiń reaḱ aṅgroṕ kangea, cele kaṭaha janwar coe jomkede! Ar ạḍi din aćren hopon ńutumteye homoroḱkan tahẽkana. (Gen.37.)