Meskoć
Mit́ṭen maejiu ar pasṭor
Maejiu: Pastor heć daṛeaḱạń,
Pasṭor: Hẽ
Maejiu: Pastor goṛoaleme.
Pasṭor: go home.
Maejiu: hẽ pasṭor gohom hõ emalem,
Pasṭor: jao
Maejiu: hẽ pastor, jao hõ emalem,
Pasṭor: Calaḱme oṛaḱte.
Maejiu: hẽ pasṭor cala hõ emalem baṅ khan do gohom ar jao do cet́tele calaya.
Ado̠ onka onkate uni chuṭkiren gidrạ hõ̠e harayen khan, uni pạhilić gidrạ do̠ edregeye ńe̠lea; ado̠ pạhilreye hara akan iạte mocate do̠ bae ro̠ṛ ho̠t́ daṛeaḱ kana; ar uni rajaḱ mo̠n ma jo̠to̠e saṕ cabaket́taea, ar uni tuluć mo̠n hõ̠ mit́entakina, ar je̠ge uni chuṭki rạniye hukum, onage raj hõ̠e ańjo̠ma, uniaḱ katha do̠ bae ne̠hõ̠t daṛeaḱa. Ado̠ tahe̠n tahe̠nte uni chuṭki rạni do̠ ać mo̠ne̠ mo̠ne̠teye hudisa, baṅma, nui pạhil gidrạ do̠ cet́ lekateń laga tot́ ocoyea? Ona kathage din hiloḱ uni do̠e hudisa. Ado̠ uni koṛa gidrạ do̠ uni pusi ạḍiye dulạṛea; jãhã se̠n dãṛã baṛaeye calaḱa, ado̠ o̠nte̠ khon he̠ć tora pusigeye kho̠j maraṅea, ar uni ho̠bo̠r baṛale̠ e̠ne̠ć daka hõ̠e jo̠ma.
Ado̠ mit́ din do̠ oka se̠n co̠ṅ dãṛã baṛaeye se̠nlena. Ado̠ o̠nte̠ khon he̠ć torage uni gidrạ do̠e me̠nket́a, Henda go̠, pusi do̠e okayentińa? Ado̠ uni kạkit eṅgat do̠ ạḍi garte te̠rge̠ń marteye ro̠ṛ go̠t́ket́a, Pusige jo̠me kantama, siń sạṭuṕe pusi pusiḱa! Ado̠ uni gidrạ do̠ onkae te̠rge̠ńade khane tiruṕena, ado̠ mo̠ne̠ mo̠ne̠te cet́ko co̠ṅ bujhạu baṛakateye raḱket́a. Ar un jo̠khe̠n uni raj do̠ oṛaḱre do̠ bae tahẽ̠kana, oka se̠n co̠ṅ dãṛã baṛaeye se̠n akan tahẽ̠kana. Ado̠ uni kạkit eṅgat do̠ gidrạ bae hapeḱ kan ńe̠lte uni pusiye ńamkedeteye capat́ oḍok go̠t́adea, ado̠e metae kana, Hunitam pusi; nui pusi lạgit́ jivi lo̠ḱ kantaea. Ado̠ onkae metade khan uni gidrạ do̠ arte̠t́geye raḱket́a. Ado̠ uni pusi saṕkate jo̠rmo̠ṭgeye ho̠bo̠rae kana. Ado̠ uni gidrạ mo̠n bạṛićentaete arte̠t́geye kikiạuket́a. Ado̠ bae hapeḱ kante uni kạkit eṅgat do̠ pho̠rphundiye lagaoket́a, ado̠ uni pusiaḱ jaṅga aćtege tikore jaṅgakore goṭae raboṛ khal ocoyena. Ado̠ siro̠ so̠ro̠ mãyãm jo̠ro̠yen khan do̠, ado̠ aćge bogeteye raḱket́a, ar gidrại e̠ge̠re kana ar kạumạue raḱet́a.
Ado̠ khange atoren ho̠ṛ do̠ko ańjo̠mket́ khan do̠ko me̠net́a, Chuṭki rạni do̠e cekayente baṅ teheń do̠ kạumạue raḱet́ kan? Delabon se̠bo ńe̠l ạguyea. Ado̠ sạriko calaoen khan ado̠e uduḱ baṛawakoa je̠, Nõ̠ḱõ̠e ńe̠lpe, nui gidrạ pusi ṭhen teheń do̠ bogeteye raboṛ khal ocokidińa. Ar cet́ko co̠ṅ bogete hirkhạgeye e̠ge̠rkedea. Ado̠ onka hirkhạ ro̠ṛ ańjo̠mte onko ato ho̠ṛ do̠ko calao baṛayena apan ạpin oṛaḱte. Ado̠ onko ho̠ṛko ro̠ṛ idijoṅ kana, baṅma, Kạkit gaṛhan do̠ baṅ bogea. E̠n netar do̠e me̠nket́a, apnar ho̠po̠n lekań do̠ho̠yea. Okor ado̠e do̠ho̠ daṛeae kana? Inạ pusi raboṛ karo̠ntege hape̠n nui gidrạ do̠e lagayea. Ado̠ enka ro̠ṛ baṛakateko thir baṛayena. Ado̠ tin ghuṛire co̠ṅ, kathae, raje he̠ćen khan uni samaṅre hõ̠, kathae, onka kạumạue raḱet́a, uni chuṭki do̠. Ado̠ uni raj do̠e kuli baṛayede kana, Teheń do̠m cekayente unạḱ ãṭte do̠m raḱet́a? Cet́ko hasoyet́mea? Ma lạime.
Ado̠e raḱet́a are ro̠ṛet́a; ado̠ o̠ne̠ gidrại te̠rge̠ńade lekage nui hõ̠e te̠rge̠ń go̠t́adea. Ado̠e me̠n go̠t́ket́a, Hẽ̠, joloḱ pusim ạsul akawadea, bogeteye raboṛ ocokidiń do̠ baṅ? Nõ̠ḱõ̠e ńe̠lme, goṭae raboṛ khal ocokidińa, nui gidrạ do̠. Unạḱ iń jo̠to̠ne reaḱ nõ̠ḱõ̠eye gun akawadińa. Iń do̠ bạń tahe̠na am ṭhen do̠. Tahe̠n khan hape̠n nonkage nui gidrạ do̠e santaoińa. Bam pạtiạuḱ kan khać ato ho̠ṛ kulikom, onko h̠õko̠ ńe̠l akadińa.
1. São Roṭege Bạruḍaṅoḱa.
Bhed: Mit́ sãote duṛuṕ teṅgon hoṛge apnaraḱ jãhãne bạṛićletam khan un okte nonka ko roṛa:-São Roṭege bạruḍaṅoḱa.
2. Deku peṛa jạnum jhạnṭi.
Bhed: Abo hoṛ hopon do Birre bosotoḱ hoṛbo tahẽkana ar onate aboaḱ mon hõ sapha-soṛagea. Ar aboaḱ niạ sapha soṛa mon ńelte ạḍi sedae khonge noko aḍe paseren Deku pusiko peṛa akana ar aboaḱ ko sorbonas akada. Onate nonka mare hapṛamko sạri cehaona katha ko menakada-Deku peṛa jạnum jhạnṭi.
3. Lại cal katha ar areć cal daḱ ạḍi hasua.
Bhed: Eṭaḱ hoṛaḱ lại katha do sạri se nase ạḍige edre ạikạuḱa, cet́leka jãhãe aḱ areć daḱ hoṛmore paṛaolen khan raṅgaoge bujhạuḱa.
4. Isiṛ simpiṛge sạriagoḱa ar rosom ruạge gogoća.
Bhed: Oka abo babon hetaoaḱa onage sạriaḱgoḱa ar oka ruạ se hasu rugum tahẽn ona do gujuḱ reaḱ karon hoyoḱa.
Ado̠ uni kuṛiye me̠nket́a, cekate co̠ṅ bako re̠be̠n kan? Iń khan do̠ jạnić iń re̠be̠n go̠t́koḱa. Ado̠ko metae kana, Henda na, e̠nḍe̠khanem re̠be̠nkoḱa? Ado̠e me̠nket́a, Hẽ̠ e̠nte ko khusiań khan do̠ń gankoḱgea. Arhõ̠ko me̠nket́a, Henda na, gidrạ do̠m jo̠to̠nketaea? Ado̠e me̠nket́a, Hẽ̠, ać eṅgat khon bạṛtiń dulạṛkea. Cet́ e̠nte, iń ma rạniń hoekoḱa, iń tho̠ kạmi do̠ bạnuḱtińa, ini gidrạge kurumuṭute bań jo̠to̠nea? Ado̠ko me̠nket́a, Hẽ̠ ma hẽ̠ge, uni ṭhen jãhãe re̠be̠nlen khan, ạḍi sukko jo̠mkea. Ado̠ inạ tayo̠m khange uni kuṛiye ro̠ṛlet́ ona kathage pasnaoena. Ado̠ khange mit́ṭaṅ ho̠ṛ raebare dhurạuena; ado̠ noa kathage rajko lạiadea, baṅma, Mit́ṭaṅ rạnḍi kuṛile siṛi akadea, ado̠m khusilen khan do̠le raebarkea. Ado̠ uni raje me̠nket́a, Gidrạ do̠ḱho̠ge tho̠ o̠ko̠e hõ̠ bako re̠be̠n kana- inạge jala do̠ń metaḱ kana. Ado̠ uni raebar ho̠ṛe me̠nket́a, Baṅa raj, onako katha do̠ jo̠to̠ń sutrạu akat́a, sanamle ṭhik ṭhak akat́a, ado̠ amem khusilen khange nãhãḱ, katha do̠ gulạ̃nḍ go̠do̠ḱa.
Ado̠ raje me̠nket́a, Acha e̠nḍe̠khan iń ńe̠lea. Ma niạ phalna dinre no̠nḍe̠ ạguyepe, ar iń khusilen khan do̠ iń samaṅre nãhãḱ nui gidrạ jo̠to̠ne reaḱ katha kuliyem, sạri se̠ naseye me̠net́a me̠nte, onabo ańjo̠ma, ar iń hõ̠ apnar luturteń ańjo̠mjoṅa. Ado̠ uni ho̠ṛe me̠nket́a, Acha bogege, e̠nḍe̠khan ma inạ dinre do̠ khạṭigele hijuḱa. Ado̠e me̠nket́a, Ma hijuḱpe baṛe̠. Ado̠ sạri ona din tioḱen khanko he̠ćena; ado̠ raje ńe̠l baṛakedea. Ado̠ uni raebar ho̠ṛe metadea, baṅma, Ho̠ṛte do̠ń khusiyena, ado̠ aćge cet́e me̠net́a, khusia se̠ye baṅa? Ado̠ uni ho̠ṛe kulikedea uni kuṛi, Cele, mạ̃i, raj do̠e khusiat́mea, ado̠ amge cet́ leka? Ado̠ kuṛiye me̠nket́a, Iń hõ̠ khusige.
Ado̠ mạ̃i, rajren gidrạ do̠m jo̠to̠n daṛekea se̠ o̠ho̠a? Ado̠e me̠nket́a, Hẽ̠, jo̠to̠n baṅkhaniń cekayea? Ać eṅgat khon bạṛtiń jo̠to̠nea, Ado̠ sạrigem jo̠to̠nea, se̠ e̠ṛe̠ge pase̠m ro̠ṛet́? Ado̠e me̠nket́a, sạrigeń me̠net́a, e̠ṛe̠ do̠ baṅ. Cedaḱ ạuṛi do̠ń ro̠ṛa? Tayo̠mte co̠ṅ hape̠n arhõ̠pe ro̠ṛań, je̠ pạhil do̠ nonkae me̠nket́a, ar ne̠tar do̠e ạrisoḱ kana. Onka hape̠n bape ro̠ṛeńa? Ado̠ko me̠nket́a, me̠n ạikạ, nõ̠ḱõ̠e am mocatege nonkam ro̠ṛket́a, bam jo̠to̠ne khan do̠ ạikạ tayo̠mtele saṕmea. Ado̠e me̠nket́a, Acha bogege, sabeńpe. Ado̠ enka ro̠ṛ baṛakatege inrege bapla reaḱko nenḍaket́a, niạ din hiloḱbo ạguyea me̠nte.
Ado̠ sạri ona nenḍa din tioḱen khan do̠ko ạgukedea, ado̠ bapla hoeyena. Ado̠ tayo̠mte uni gidrạ do̠ ạḍiye jo̠to̠nea-umeae, sunume o̠jo̠ḱaea, ar mit́ he̠ogeye do̠ho̠yea, tin ghạṛire hõ̠ o̠tre do̠ bae do̠ho̠yea, ar jãhãnaḱgeye kho̠j se̠ye huṛso, onageye emaea. Ado̠e harayenre hõ̠e he̠oegea; uni gidrạ bae he̠o ocoḱre hõ̠ jo̠rmo̠ṭge laga saṕkateye he̠oea. Ado̠ tahe̠n tahe̠nte tin din badre co̠ṅ, kathaekin gidrạwana, koṛa gidrạge. Ado̠ banar gidrạge ạḍiye dulạṛkina.
Tumạl: Santal Folk Tales
Meskoć
Mahasoe kilas re mit́ṭen gidrại kuliede kana-
Mahasoe: Monekaḱme mit́ṭen Kule lagayet́mea. Ado ona oktere cet́em cekaea?
Gidrạ:Pạcri don parom kateń dạṛa.
Mahasoe: Uni kul hõ paseć pạcri don paromte ame pańjame?
Gidrạ: Enḍekhan darereń don dejoḱa.
Mahasoe: Kul hõ paseć am ńelte dare dećen.
Gidrạ: Gaḍa daḱreń dona ariń paeraḱa.
Mahasoe: Unre kul hõ paseć daḱre pheḍoḱte paeraḱ?
Gidrạ: Mahasoe, am do iń seć se kul seć kanam?
Sedae jugre, kathae, mit́ṭaṅ raje tahẽ̠kana. Uni raj do̠ mit́ ge̠le̠ gidrạ eṅgat́katege uni oṛaḱ ho̠ṛte̠t́ do̠e go̠ćena, se̠ rạnitae do̠e go̠ćena, ar uni ho̠po̠nte̠t́ do̠ koṛa gidrại tahẽ̠kana. Ado̠ kurumuṭute uni gidrạ do̠e ạsul harakedea. Ado̠ uni gidrại cacoyen khan do̠ rajren mit́ṭaṅ ạsul pusiye tahẽ̠kana. Ado̠ uni gidrạ do̠ uni pusi tuluć e̠ne̠će latayena; siń sạṭuṕ uni pusigeye kho̠jea are ho̠bo̠r baṛayea.
Ado̠ atoren ho̠ṛ se̠ aćren peṛako, sanam ho̠ṛkoge rajko metaea, baṅma, Arhõ̠ bạhujoṅme, noa nun maraṅ bakho̠lre e̠ke̠n he̠re̠l ho̠po̠n tahe̠nte do̠ baṅ sajaoḱ kana, ạḍite̠t́ bạpuṛićge haeta hoetole ńe̠let́mea. Ado̠ uni raje metakoa, Baṅa, bań bạhujoṅa, iń do̠. Tayo̠m era do̠ bako bhagea; tayo̠m era tuluć do̠ katha hõ̠ baṅ juriḱa, ar onka lekate dho̠n hõ̠ ase̠ć tase̠jte sanamko ublạ ḍublạia ar jo̠n kạmiạ hõ̠ ṭhik bako do̠ho̠kote sanamko chir chạturoḱgea; ar tayo̠m era do̠ pạhil era ho̠po̠n gidrạ do ạḍiko ạṛisakogea; ar tayo̠m erań ńamleko khan do̠ nui gidra hape̠n ạḍi bhabnae ńama; siń sạṭuṕ hape̠n te̠ge̠ć te̠ge̠će ro̠ṛaea, ar jãhãnaḱe huṛsole khan do̠ etraṅe metaea. Onkate hape̠n nui gidrạ do̠ ạḍiye hado̠soḱa. Ado̠ nui gidrạ ńe̠lte hape̠n iń hõ̠ ạḍi bhabnań ńama. Baṅa, iń do̠ bań bạhujoṅa, nenkategeń tahe̠na. Ado̠ unreko metaea, Baṅa, raj, jo̠to̠ ạimại do̠ baṅko onkana. Ado̠mko do̠ko bhagegea, andhanko do̠ pạhil era lekageko ạikạuḱa, ar gidrạko hõ̠ bako ạṛisakoa, pạhil era lekage apnar ho̠po̠n lekageko do̠ho̠koa.
Ado̠ unre raje me̠nket́a, Baṅa, bạń pạtiạuḱ kana; ạimại do̠ sanamko mit́ dharagea. Ado̠ jãhã leka se̠n ńapamlen khan ona bạhujoṅ reaḱ kathageko e̠ho̠ba. Ado̠ uni raj do̠ ạḍi ạṛis ona katha do̠e ạikạua. Ado̠ onka onkate mit́ din do̠e me̠nket́a, Hẽ̠, judi pạhil era leka nui gidrạ o̠ko̠eko jo̠to̠ne khan, e̠nḍe̠khan do̠ń bạhukekogea; ar baṅkhan do̠ o̠ho̠ń bạhulekoa. Ado̠ko me̠nket́a, Baṅa, judi onka mạ̃hĩrkoko ńamlen khan do̠m do̠ho̠kekogea se̠ baṅ? Ado̠e me̠nket́a, Hẽ̠ko ńamoḱ khan do̠ń do̠ho̠koa, ar baṅkhan baṅ. Ado̠ko me̠nket́a, Baṅa, raj, ona katha do̠ pạhilregebo kuli maṛaṅkoa, baṅma, nui gidrạ apnar eṅgat leka o̠ko̠epe do̠ho̠ye khan, e̠nde̠khan raj ṭhenle lại baṛapea, ar baṅkhan baṅ. Nonka kulikatebo ạgukoa.
Ado̠ raje me̠nket́a, Acha e̠nḍe̠khan, ma siṛikope. Ado̠ siḱṛiko dhurạuena; ado̠ ḍher ṭhen onkako siṛiket́koa, me̠nkhan gidrạ do̠ḱho̠ge bako re̠be̠n. Ho̠ṛte̠t́ ma napae napae ar raj ṭhen jãwãeoḱko khusiaḱ kangea; me̠nkhan gidrạ do̠ḱho̠ge bharko metaḱ kana. Kuṛiko ma akotegeko jo̠ṭo̠ḱ kan, raj ṭhen do̠ ińge raebarańpe me̠nte. Ado̠ noa kathako kulileko khangeko pạc go̠do̠ḱ kana. Ado̠ tin din badre co̠ṅ, kathae, mit́ṭaṅ atore mit́ṭaṅ kuṛiye rạnḍi akan tahẽ̠kana. Ado̠ uni kuṛiye me̠nket́a, Henda bhala, raj lạgit́ bạhuko ńam baṛayet́ko tahẽ̠kan do̠ko ńamket́koa se̠ baṅ? Onka ho̠ṛkoe kuli baṛayet́koa. Ado̠ko metadea, Hẽ̠, ńam baṛayet́kogea; menkhan gidrạ do̠ḱho̠ge o̠ko̠e hõ̠ bako re̠be̠n kana, onate bako ńam akat́koa.
Tumạl: Santal Folk Tales
Iń okań khojoḱa caḱ do emoḱ samane
Saham tahẽn bạṛićaḱre okoe undo maname
Oka amaḱ lạlại sana, ińgeń lại lahaea
Ińaḱ gabam katha ate amem sereń rahaya.
Oka ińiń uihạra onage caḱem kukmuya
Sạńgiń khonaḱ amaḱ sãhet́ ińaḱ hoṛmoe rumuya
Ińiń bujhạu sebel soṛom, oka amem cakhaea
Sạriaḱ do amgem bachao iń doń tulạ jokhaea.
Amaḱ ontor dulạṛ darha, iń do unum pạuṛia
Ogom dõrea dhoṅga am do, iń do onḍeń soroḱa.
Amaḱ man bhorom nasaḱ, ińge ạḍiń boroḱa
Ińaḱ duk muhimre caḱ, amaḱ mẽt́ daḱ joroḱa
Ińaḱ kusi rạskạ rema, amem suk bujhạua
Amaḱ muluć mẽt́ãhãte, ińaḱ monem rijạua.
Ontor amaḱ heḍejoḱkan, ińaḱ koṛam kecagoḱ
Mone ińaḱ taral basal, amaḱ jiwi tawagoḱ
Amre iń ińre am, monere mon milonen
Hoṛmo begor jiwi sohag dulạṛ topolen.
Chin reaḱ mit́ atore haṛam casa hoṛe tahẽkana. Cas lạgit́ uni hoṛren mit́ṭen Sadome tahẽkana. Mit́ din uni sadom do buru disom seće calaoena. Ado uni haṛam hoṛaḱ duk ńelte, oṛaḱ pheḍren mit́ hoṛe mengot́keda, cet́ arem mena. Amaḱ moloṅ do bạṛićgea.
Khange uni casa hoṛe menkeda, ‘moloṅ do bhage se bạṛićgea, ona do okoe baṅe baḍae. Mit́ hapta tayom sadom doe ruạṛ hećena. Uni sadom sãote mit́ pal bir sadom hõko hećena. Niạ dhao uni oṛaḱ pheḍren hoṛe menkeda, sạrige amaḱ moloṅ do ạḍi bhagegea. Uni casa hoṛ do niạ dhao hõ inạ kathage roṛ ruạṛkeda, ‘moloṅ do bhage se bạṛićgea, ona do okoe baṅe baḍae.
Inạkate uni hoṛren hopontet́ do onko sadom ko khon mit́ṭen sadom hataoe reaḱe kurumuṭukeda. Menkhan sadom aḱ dea khone ńurhoyente jaṅga rạput́entaea. Ona ńelte ḍher hoṛge bạṛić moloṅ reaḱ kathageko hudiskeda. Eken uni haṛam casa hoṛaḱ hudis tahẽkana, ‘moloṅ bạṛić se bhagea, ona do okoe baṅe baḍae.
Mit́ go̠ṭe̠ć kisạ̃ṛren gạiko ar maraṅ utạr mit́ṭen sãnḍe tahẽkana; bir seć idileko khać kul do̠e me̠na, Uni sãnḍ iń jo̠mle khan, ạḍi bạṛiće itil akana, ạḍi din iń tahẽ̠koḱa. Ar mit́ go̠ṭe̠n kombṛoe me̠njoṅa, Nui sãnḍ iń kombṛole khan ạḍi utạr ṭakateń ạkrińkea. Bhado̠r din jo̠khe̠ć tahẽ̠kana; kul hõ̠ ona dine nenḍa ṭhikana, ar kombṛo hõ̠. Ado̠ kul tinre co̠ṅ jonḍra gajaṛreye bo̠lo̠ thir akan tahẽ̠kana, are me̠njoṅ kana, Jạpit́legeko ho̠ṛ, ado̠ nãhãḱ iń kombṛo oḍokea. Khange uni kombṛo do̠e ńe̠lkedea uni kul, ado̠e me̠nket́a, Tinre co̠ṅ sãnḍe oḍok akan, kombṛo reaṅ jạruṛ do̠ baṅ hoelentińa, aćtet́geye he̠ćadińa. Ado̠e to̠lkedea. To̠lkede khan ado̠ cur mare piṭau idiyededa; khange setaḱ dela dili munḍu sećgeye ṭanaoḱ kana; khange bo̠ho̠ḱ cur mare piṭạu are mandaokedea.
Khange marsalena; ayoge, kul kanae! Raṛa go̠t́kedeae; ać mit́ se̠će dạṛket́a, kul do̠ bir se̠će dạṛket́a ahaṕ cahaṕ. Khange toyo do̠ kule metae kana, Okate, mamo̠, nunạḱ ãṭ do̠ ahaṕ cahaṕem dạṛet́a? Kule me̠nket́a, Bhạgnạ, cet́ iń me̠na? teheń do̠ mit́ ńindạ moḍ ṭhoṭkae saṕlidińa, mit́ ńindại moḍ ṭhoṭkakidińa. Cet́ lekanae, mamo̠, moḍ ṭhoṭka do̠? Delaṅ se̠ uduḱạńme. Ado̠ kule me̠nket́a, O̠ho̠ge bạbuń se̠nlena, moḍ ṭhoṭka ṭhe̠n do̠. Hạni ńe̠leme, do calaḱme. Bhala, mamo̠ń ńe̠legea. Ado̠e calaoena. Nui kombṛo ado̠e duṛuṕ akana, bhabnaḱ kanae, Jo̠mkińae ho̠ne̠ć kul do̠, cet́ iạte co̠ṅ bae jo̠mledińa? Khange toyoe ńe̠l ocoyen khan do̠e gitićena uni kombṛo do̠ oyo po̠ṭo̠mkate. Toyo do̠ beṛhaeteye ạcuroḱ kana, are me̠njoṅ kana, Cet́ lekan moḍ ṭhoṭka kanae, bhalań ńe̠lea. Ado̠e ạcur idiḱ kanae bo̠ho̠ḱ se̠ć. Khange bại bạite kombṛo do̠ tiye husiạret́taea; khange phe̠ḍ canḍbolre saṕkate cun lekae ạcurkedea; ạcur ạcurteye laṅgayen khane capat́ go̠t́kadea. Ạḍi bạṛiće̠ bo̠to̠rena toyo do̠, are dạṛket́a le̠ṅge̠t́ sopot́; kule tioḱkede khane me̠nket́a, Baṅ kanae, mamo̠, moḍ ṭhoṭka do̠, ghur pãk kanae, ińgem e̠ṛe̠kidińa. Khange dạṛ dạṛte banatikinkin ńapamena; ado̠e metae kana, Okate, bhạgnạ, nunạḱ ãṭ do̠m dạṛet́a?
Toyoe ro̠ṛ ruạṛket́a, Cet́ baṅ, mamo̠m me̠nte, mit́ go̠ṭe̠n ghur pãke ghur pãkkidińa se, gujuḱ lekań ạikạu akat́a. Ado̠ banae me̠nket́a, Cet́ lekan bae bhạgnạ? Onkanko do̠ ko̠to̠ń jo̠m akat́koa. O̠ho̠ mamo̠m jo̠mlea ho, ińiń baḍaeyet́a; do e̠nte̠m jo̠me khać. Khangeye calaḱ kana. Uni ho̠ṛ do̠ ado̠e duṛuṕ akana, banae ńe̠lkedea, hijuḱ kanae iń sećte. Khangeye me̠nket́a, Jo̠meńae, darereń de̠joḱa, baṅkhan khạṭigeye jo̠meńa. Ado̠e de̠ćena, uni tayo̠mte bana hõ̠e de̠ćena. Khange le̠ṅge̠t́ sopot́ co̠ṭteye de̠ć idiyena ho̠ṛ do̠, bana hõ̠e de̠ć idiyena; ḍher laphaṅen khan nanha ḍạrte khange hamalte rạput́ena, ńũr go̠t́enakin; bana do̠e latarena ar ho̠ṛ do̠e bana cetanre; oṛgo poṛgo chaḍaoenteye dạṛket́a bana do̠. Khange toyotikinkin ńapamena, ado̠e me̠net́a, Am do̠, bhạgnạ, ạḍim pago̠la, iń do̠m e̠ṛe̠kidińa, baṅma, ghur pãk kanae. Baṅ kanae ghur pãk do̠, upo̠r cap kanae.