Isor Abrahame Biḍạukedea

Isore goḱlet́ jokhećre Sarae hirikedete, Isạhake ńutumen mit́ṭen koṛa hopone janamkedea, Abraham do un jokheć 100 serma umer tahẽkantaea. Ḍher ńõḱ serma tayom Isor do Abrahame biḍạukedea, metadeae Am do uniyem dulạṛe kan amren sadher hopon idi torayem, ar Morio disomte senkate mit́ṭaṅiń uduḱam buruko modre uni teṅgenem. Khange Abraham ạḍi setaḱre beret́ente aćren gadhae palanadea, ar barea guti ar aćren hopon Isạhak soṅgeteye idi torawana; jeredoḱ samaṅoḱ lạgit́ sahan paṛaḱket́te onae idi torawana, ar Isore metade ṭhạ̃iteye calaoena.

Pe mãhã hiloḱre Abraham do beṅget́kate ona jaega sạṅgiń khon ńalaḱ ńalaḱe ńel ńamket́a. Ado aćren gutiye metat́kina, Aben do nonḍe tahẽ hataṛoḱben, koṛa ar iń sewae lạgit́liń sen hećlenge. Sahan do Isạhake goḱadea, ar ać do seṅgel ar churiye saṕket́te bana hoṛkin calaoena. Khange Isạhake metae kana, Henda Baba, noḱõe seṅgel ar sahan dãṛẽ do ukurićtalaṅ? Abrahame roṛ ruạṛadea, Beṭa, dãṛẽ do Isor aće ńel bachaojoṅa. Ado bana hoṛkin calao idiyena. Ona jaega tioḱkate Abraham do mit́ṭeć pinḍ benaoket́te sahane sajaoket́a, ar Isạhak tolkedete ona cetanreye ladekedea. Ado ti tiạrkate churiye saṕket́a aćren hopon teṅgene lạgit́. Khange Isor serma khone hohoadea, E Abraham, E Abraham! Hat alom calaoa koṛare do, ar cet́ hõ alom cekayea; ente nitoḱ doń baḍaeket́a, am do Isorem botorae kan, ar amren sadher hopon iń ńutumte bam mãyãwae kana mente. Khange Abraham do beṅget́kate ać tayom sećre jạnum jhạuạre dereńte baḱ akan mit́ṭaṅ bheḍae ńel ńamkedea. Uni saṕkate aćren hopon bodolteye teṅgenkedea.

Isor arhõ Abrahame galmaraoadea, metadeae, amem nonkaket́ ar iń ńutumte amren sadher hopon bam mãyãwade teṛoṅ bhorgeń bhorama, ar amren bõs do sermaren ipilko ar jalapuri aṛe reaḱ gitil lekań saṅge ocokoa, amren bõsre do dhạrtiren joto jạtko bhoranko hoyoḱa. Khange Abraham aćren hopon tuluć gutikin ṭhen ruạṛente onko jotoante oṛaḱteye calaoena. (Gen.22.)

Lagṛẽ Sereń

Mạńjhiko chaṭkare, jogmạńjhi chaṭkare

Rại tuṛi dare akan, ḍanḍa jokhate

Dạnḍa jokhate.

E bạbu mạndạṛiạ tokoe koren parwa

Rại tuṛi ko cạṭićeda saraṛe saraṛ

Saraṛe saraṛ.

OṚAḰ AḌEPASERE SẠBJI CAS

Ho̠ṛmo̠ reak̕ jo̠m lạgit̕ ar ho̠ṛmo̠ ạḍi din bahaoḱ ar mo̠ńj dohoe lạgit̕ aboak̕ dinạm jo̠m re aema lekan jom ńuak̕ jinis bon jomet̕ kana. Nit do̠ Baṅladisạm reaḱ ạḍi maraṅ muskil do̠ hoyoḱ kana ạḍi jạruṛan jom-ńu, menkhan abo do̠ jom-ńu reaḱ́ apnar ạidạri/khusi bon ńam akada.

Abo do̠ o̠ṛaḱ ạḍepasere alga tege ạḍi lekan sạbji cas kate aboaḱ hoṛmo reaḱ́ jạruṛoḱ aḱ kobon ńam purạu daṛeaḱa. Aboak̕ se ho̠ṛkoak̕ hasa/jaega-j́umi do̠ ạḍi tho̠ṛa gea, onate gharońj reak kuḍạm aṛe ar oṛak̕ reak̕ sorkore ạḍi jạruṛok̕kan anaj se sạbji reak̕ algatege bon cas daṛeak̕a. Noa lekate apnar gharońjren sanam ko lạgit́ ạḍi bhage ar ạḍi mońj hoṛmo ar mon bon ńam daṛeaḱa.

FAO reaḱ katha lekate dinạm mit́ hoṛ lạgit́ 220 gram sạbji ạḍi jạruṛa. Menkhan abo disomre do ona reaḱ adha hõ baṅbon jom ńamet́ kana. Onate noa reṭ bạṛti lạgit́ oṛaḱ aḍepasere sạbji cas ạḍi jạruṛaḱ.

Disom ren aema reṅgeć nacar hoṛkoaḱ pusṭi jom-ńu purun lạgit́ te oṛaḱ aḍepasere nana hunạr sạbji cas reaḱ ạḍi jạruṛ menaḱa. Ente sanam lekan sạbjire aema khandan buluṅ ar Viṭamin kodo menaḱa, one oka do aboaḱ hoṛmo mońj ar niropon dohoe lạgit́ ạḍi jạruṛa.

Oṛaḱ sor reaḱ khạli jaegakore aema lekan sạbji ạḍi algate cas kate aboaḱ hoṛmo reaḱ pusṭi apnar tebon purun daṛeaḱa. Nonkate upjạu sạbji do bis/kiṭnasok se jahan tejo gujuḱ ran chaḍa upjạuḱte aboaḱ hoṛmore sapha se nirapod jomaḱ lekatebon jom-ńu daṛeaḱa. Ente niạ okte rebon ńel lekhan bajarre aema lekan bis/ ran/kiṭnasok lagao sạbji hoṛko kiriń kateko jom-ńueda ar onkate hoṛmore aema lekan rogteko jạbunoḱ kana. Noa obostare oṛaḱ aḍepasere sạbji casge sanam khon bhage utạr pontha kana.

Abo hõ̠ ato reaḱ o̠ṛaḱ sor re kạṭic̕ kạṭic̕ jaega kore aema lekan sạbji bon cas daṛeak̕a, eken aboak̕ hoṛmo reak’jạruṛ purun lạgit̕ do̠ baṅ, bajar re ạkhriń kate aboaḱ gharoń reaḱ kạuḍi reaḱ eṭaḱ jạruṛoḱaḱ́ kobon goṛo daṛeaḱa

Noa Bhador Cando do thoṛa sạbji cas reaḱ ạḍi bhage okte kana. Noa cando rege agam rabaṅ din reaḱ thoṛa sạbji jeleka: Sakam kopi, baha Kopi, Ol kopi, beṅgaṛ, Ṭamaṭol,Hotot́,Malhan aṛaḱ, Mulạ emanteaḱ.sạbji reaḱ itạ bon rohoe daṛeaḱa.

Ona iạte sanam boeha miserako pe uskur ocoḱ kana delabon abo koaḱ oṛaḱ aṛete jạruṛanaḱ aṛaḱ sakam se sạbji bon rohoe joṅa ar aboaḱhoṛmo reaḱ mimit́ jạruṛaḱ kobon puruna ar mit́ bar bạṛtiaḱ ạkhriń kate kạuḍibon jogaṛa.

Hopon Mạ̃i

Hopon mạ̃i aḱ jaṅgarema

Bãk menaḱ bạṅki menaḱ,

Hopon mạ̃i aḱ luturrema sona menaḱ

Kulhi dhuṛire, gaḍa gitilre,

Hopon mạ̃i aḱ jaṅga pańja lilibici.

Sim Sạnḍi Ar Kulại

Sedae mit́ṭen sim sạnḍi ar kulại ạḍi gatekin tahẽkana. Ado unkin do birrekin gateḱ kan tahẽkana. Sim sạnḍi do dare coṭre jạpida, ar kulại do dare latarre jạpida. Ado mit́din oka seć khon co mit́ṭen toyo hećena. Uni do kulại jom sanayedikan tahẽkana. Inạḱtege sim sạnḍi doe ebhenena ar Toyo hijuk kane ńel ńamkedea. Aćren gate kulại jome lạgit́.

Khange sim sạnḍi doe uihạr baṛa got́ket́a cekate aćren gate bańcaoea mente. Khange sim sạnḍi doe kukṛucut́ got́keda. Ar ona kukṛucut́ ańjomte hạ̃ṛũ hõe beret́ena,Tạruṕ hõe beret́ena. Ar birren sanam cẽṛẽ ciprut́ko ebhenena. Khange toyo do botorte dạṛkeda ar ạḍi sạṅgińe calaoena. Nonkate sim sạnḍi do aćren gate bańcao kedea.

Ale Ato

Hane gate ńalaḱ ńalaḱ ale ato

Dela gatem calaḱ khać ale ato,

Parkom reń duṛuṕ mea

Jomam guhum piṭhạ,

Tale biniteń ewer mea

Gitić palak parkom.

Kạhũ ar Gunḍri Cẽṛẽ

Mit́din barea gate, Kạhũ ar Gunḍri mit́ sãotekin uḍau baṛaekan tahẽkana. Uḍạuḱ jokhećkin ńelkeda, mit́ṭen hoṛ dahe ṭukuć dipil katet́e calaḱ kana. “Dahe do ạḍi heṛem ńeloḱ kana. Delalaṅ jomlege.” Nonka menkate Kạhũ do uḍạu calaoente dahe ṭukućre duṛuṕena ar dahe jojome lagaoena.

Kạhũ do dahe jojomkan jokheć hante nate hạrić pạsiroḱ kan tahẽkana. Uni hoṛ do cedaḱ nonka hoyoḱ kana ńel lạgit́ dahe ṭukuće pheḍkeda. Kạhũ do nit muskil dosare paṛaoḱa bujhạuket́te ạḍi sạṅgińe uḍạu calaoena. Menkhan Gunḍri cẽṛẽ do usạra bae uḍạu daṛeaḱa, onate tayomre paṛaoena.

Uni hoṛ do cetan seće koyoḱket́re Gunḍri cẽṛẽ ńel ńamkedea. Adoe hudiskeda, Uni Gunḍri cẽṛẽ un khon ṭukuć reaḱ dahe jomet́ tahẽkana.

Onate uni do Gunḍri cẽṛẽ seć iṭạ capat́e dhurạuena. Gunḍri cẽṛẽ aḱ noa dosa ńelte Kạhũ do sạṅgiń khon ạḍi ãṭe landa keda.

Sikhnạt: Bạṛić gate ko sãote tahẽn khon ekla tahẽn do bhagea.

Doṅ Sereń

Otma lolo serma setoṅ

Taṛam taṛam ben iskul kuṛi,

Delań idibena Kạlikandor MLE iskul

Ińiń cet́ abena oloḱ paṛhaoḱ.

Bapla

Nimghuṭu atore setaḱ kho̠n koṛa kodo̠ sokol takoaḱ racare manḍwae lạgit́ ḍạrko ạguko lagaoena. Sokol hõ onko so̠ṅge ạḍi rạskạte kạmie lagaoena. Gapa do̠ Sokol ać dadawaḱ bapla. Ạyuṕ bela Nimghuṭu atoren kuṛi koṛa kodo̠ tumdaḱ ṭamak ru ar manḍwa latarre eneć sereńko lagaoena. Ạḍi sạṅgiń kho̠n Tumdaḱ Ṭamak sạde gubuḍ gubuḍ ańjo̠mo̠ḱ kana.

Do̠sar hiloḱ bạriạt kodo̠ bạhu ạguko calaoena. Ạyuṕ jo̠kheć nãwã bạhu so̠ṅge kateko ruạṛ hećena. Ona rạskạte Sokol do̠ naconiạko talare sogoeye lagaoena.

Aḍepase Oṛaḱ

Bhador mạhnạ paṛaoen

Ạḍi ãṭ daḱ mae jạṛiet́

Teheń ma go aḍepase oṛaḱ ren

cet́ hõ bako benao akat́

calao lenạń gate oṛaḱ

reṅgeć teko raraḱ kan

Bhador jạput́ jạṛi akat́

Jomaḱ ge bạnuḱ go gate oṛaḱ

Aboaḱ ma menaḱ ge go

Den go emạńme thoṛa jomaḱ

Gate takoń goṛo ako

Jom teko ạikạua mońj thoṛa.