Duṛuṕ duṛuṕ tehõń laṅgayena

Teṅgo teṅgo tehõń laṅgayena,

Ḍanḍa judi hasome khan

Hante nahte hilạḱme,

Jaṅga judi hasome khan

Banar jaṅga kolsaeme,

Mone judi hasome khan serma don me.

Nes bochor reaḱ HSC biḍạu do calaoen 26 June ehoṕ kate, 13 August mucạt́ reaḱ katha tahẽkana. Menkhan thoṛa bisoeko karonaḱte biḍạu routine do bodolente 19 August mucạt́ena. Nit HSC biḍạu ko emakat́ pạṭhuạko do jo ńam reaḱ tạṅgire menaḱkoa.

HSC bidạu reaḱ jo darakan mahna reaḱ 19 October bhitrite sodoroḱa. Dhaka sikhnạt borad ren biḍạu ńel jujutić S M Kamal Uddin noa khobore lại lahakeda.

Uni do arhõe baḍae ocokeda je, Sikhnạt board reaḱ sarkari niạm lekate biḍạu mucạt́ tayom turui gel (60) din bhitrite biḍạu jo do sodoroḱa. Onka leka biḍạu jo sodor reaḱ kạmihora calaḱ kana. Ạḍi usạra sodoroḱ reaḱ kurumuṭu menaḱa. Onate 19 October din nenḍa akana.

Niạ dhao gel mit́ (11)  goṭen sikhnạt board reaḱ tabere 12 lakh 51 hajar 111 goṭen pạṭhuạ form ko purunleda. Menkhan onko modre koṛakoaḱ soṅkha do tahẽkana 6 lakh 18 hajar 15, ar kuṛikoaḱ soṅkha do 6 lakh 33 hajar 96. Ar goṭa disomre moṭre 2 hajar 797 goṭen centre re biḍạu do hoe purạu akana.

Mit́ atore miṭ́en haṛam hoṛe tahẽkana. Uniren barea kuṛikin tahẽkana. Unkinaḱ do bapla hoeakan tahẽkana. Mit́din uni haṛam hoṛ do aćren kuṛikinaḱ oṛaḱ ńapamoḱe senena. Pạhilre aćreń maraṅ kuṛi aḱ oṛaḱe sen lahaena. Ado uni maraṅ kuṛi doe metadea, “Baba, koeme jemon usạra serma daḱe jạṛi. Baṅkhan sanam phosolko nosṭo cabaḱtińa.” Khange ać baba doe menkeda, “Acha ṭhikgea.”

Inạkate uni hoṛ do hudińić kuṛi ṭhene senena. Uni kuṛi hõ ać babae metadea, “Baba hasa reaḱ tụkuć celaṅ rohoṛ lạgit́ ạḍi ãṭ setoṅ jạruṛạṅ kana. E ba, koeme jemon serma dak aloe jạṛi.”

Nonkate uni hoṛ do ạḍi muskil dosare paṛaoena. Barea kuṛiaḱ bar lekkan khojoḱaḱ, okoe lạgit́e koea! Ado ạḍigan hudis ganḍonkate aćren huḍiń kuṛi metadea, “E go, amaḱ ṭukuć celaṅ do culhạ pheḍre dohokaḱme. Enḍekhan setoṅ reaḱ ãc bae ńamlere hõ ạḍi usạra algatege rohoṛoḱa. Are metadea, “koe me jemon usạrate serma daḱe jạṛi. Baṅkhan am didiaḱ joto phosol ko nosṭoḱtaea.”

Ado uniren huḍiń kuṛi doe menkeda, “Ṭhikgea baba. Onkage hoekoḱma. Nonkate unkinren babawaḱ goṭa lekate banar boeha kuṛiaḱge bhạilại hoyena.

Sikhnạt:  Bud ar akel tahẽlen khan joto lekan muskil dosa reaḱ algatege mimạṅsa hoyoḱa  

Asolre Dãsãe do ojha cecet́ koaḱ mucạt́ okte kana. Ojha guru do aćren celako bochor bhor ojhaḱe cet́ akoa ar Bhador cando mucạt́ redo Side emakoa. Ona okte okoeko ojhaḱko cet́ket́ onko do akoaḱ bidiạ udug lạgit́ ato atoko daṛana, sereńako arko bakhẽṛa. Ona okte mimit́ oṛaḱ khon Dãsãe koṛa do koe ko emakoa. Onako niạte guru oṛaḱko hijuḱa ar onḍe arhõko sereńa arko eneća. Noage Dãsãe porob do.

Dãsãe porob do ṭhik Durgạ pujạ hoyoḱ dela dilige hoyoḱte Dãsãe koṛa do akoko cet́ akat́ eneć sereń do Durgạ pujạ mela ṭạnḍi rehõ udug ko ehoṕkeda. Mela ṭạnḍire Dãsãe koṛakoaḱ eneć ńelte deko doko mạluṅoḱ kana ar tayomte do akoge bochor bochor Dãsãe koṛako bhaṛa idikoa, jemon mela ṭạnḍi do andoṛ laṛaokaḱ. Nonkate nahaḱ ren hoṛ do Durgạ pujạge Dãsãe porob ko metaḱ kana. Asolre Durgạ pujạ do Hindu koaḱ porob kana, Santal koaḱ do baṅ, ar Durgạ pujạ do Dãsãe porob do baṅ kana. Tobe Durgạ pujạ oktege Dãsãe porob hõ hoyoḱ iạte noa doko bujhạu gãoṛẽ akada.

Tumạl: Santal Leg-Ạri Reaḱ Bhed

Dorsonte Probhu Jakobe metadea, Misor disomte calaḱ do alom botoroḱa; ente ińge am tuluć iń tahena ar ińgeń ạgu ruạṛmea, ar Josephge amaḱ mẽt́e jạpidtama. Khange Jakob aćren sanam bõsko lekhare 70, ar joto acelante Misor disomteye calaoena. Joseph do apattet́e hijuḱ kane ańjomket́ khan gạḍi sagaṛ joṛao ocoket́teye calaoena Gosenre sen darame lạgit́. Uni tuluć dapramkate apatre kokekate ạḍi ghạṛiće raḱket́a. Jakobe menket́a, Nitoḱ do khusiteń gujuḱa, am jivet́iń ńelket́mete. Pharao hukumte Joseph do aćren apat Gosene emadea bereloḱ lạgit́; ente onḍe do ạḍi bhage cõrõṭ tahẽkana, ar Jakob ar uniren hopon ma gupi hoṛko tahẽkan.

Jakob Misor disomre 17 serma jivet́e tahẽkana, ar 147 serma umerreye goćena. Neye gujuḱ jokheć Josephren hopon Manase ar Ephrayim bhorat́kinteye menket́a, Nukin do Ruben ar Simeon leka ińren hoponkin tahena. Onakate aćren joto hoponko jarwaket́koteye bhorat́koa, ar tayomre cet́ cet́ hoyoḱtako reaḱe jạhirat́koa, suluk raje metade Babańcaoić reaṅe lại lahawt́koa. Joseph do uniaḱ mạ̃ṛĩ Kanan disomte idikate Abraham ar Isạhak reaḱ topa ṭhạ̃ireye topakedea. Ado Josephren dadatteko ạḍiko botorena, baṅma, paseć sedaeaḱe hala hạliabon. Joseph do onae ańjomket́ khan raḱkateye metat́koa, Ape ma iń upạrte bạṛić menkatepe bundislaḱa; Isor ona do boge lạgit́e bundisket́a, ạḍi hoṛ jivet́ dohoko lạgit́ge. Joseph do 110 serma umerreye goćena, ar uniaḱ mạ̃ṛĩre doko joḱgao mosolawat́a, alo lambaoḱa mente, jemon tayomte Kanan disomte onako idi. (Gen. 46-50)

Mit́ dhao mit́ṭen Mahasoe hoṛ mit́ṭen casa hoṛ thoṛa kạuḍi em kateye metadea, noa kạuḍi do ạḍi jotonte dohoeme enḍekhan ạḍiganem lahatiḱa. Casa hoṛ do bohoḱre mathol latarre kạuḍi dohokate oṛaḱe calaoena. Adoe hudiskeda, oṛaḱ calaokate kạuḍi do almạrire jotonte dohoea.

Khan oṛaḱ calaḱ horre mit́ṭen pajhar casawaḱ bohoḱ khon mathole idikeda. Ona sãote kạuḍi hõe idi torakeda. Muskilre paṛao akan casa do arhõ Mahasoe hoṛ ṭhene calaoena. Adoe metaekana, “Mahasoe, am oka kạuḍim emadiń tahẽkan ona do ińaḱ bohoḱre mathol latarreń doholeda. Menkhan pajhar do ińaḱ mathol selet́ kạuḍi hõe idikeda.”

Mahasoe do uni casa hoṛ arhõ thoṛa kạuḍi emadea. Adoe metadea, “noa kạuḍite phosol reaḱ itạ kirińme ar onako er me. Ar ṭhikte onako itạ jotonme. Ńelme, ạḍi ḍher phosol hoyoḱa. Arhõe metadea, “onako phosol ạkhriń lekhan ạḍiganem lahanti daṛeaḱa.”

Khange uni casa hoṛ doe bujhạu ńamkeda, Mahasoe do ona kạuḍi jotonte dohokaḱ do bae metadiń tahẽkana, bickom ona kạuḍite itạ kiriń kate jotonte cas base metadiń tahẽkana.

Sikhnạt: Bud ar kạmi beohar lekhan ạḍi bhage lahanti hoe daṛeaḱa

Santali ro̠ṛ bam baḍaea,

Santali o̠lo̠ḱ bam baḍaea;

Santali paṛhaoḱ bam baḍaea,

To̠be̠ amdo̠…,

Ce̠t́ reaḱ Santal?

Santali sereń bam baḍaea,

Santali e̠ne̠ć bam baḍaea;

So̠go̠e pajhẹṛ bam baḍaea,

To̠be̠ amdo̠…,

Ce̠t́ reaḱ Santal?

Tumdaḱ ṭamak ru bam baḍaea,

Tiriọ, Murli o̠ro̠ṅ bam baḍaea;

Banam bam baḍaea,

To̠be̠ amdo̠…,

Ce̠t́ reaḱ Santal?

Santal sạgại bam baḍaea,

Peṛa beohar bam baḍaea;

Ḍo̠bo̠ḱ johar bam baḍaea,

To̠be̠ amdo̠…,

Ce̠t́ reaḱ Santal?

Lạṭu kạṭić man-mano̠t,

Bam baḍaea;

Santal pạris bam baḍaea,

Santal itihas bam baḍaea;

To̠be̠ amdo̠…,

Ce̠t́ reaḱ Santal?

Lajaoḱ kanam,

pạńci pãṛhãṭ ladey lạgit́;

Lajaoḱ kanam,

Ạricạli beohar lạgit́,

Lajaoḱ kanam,

Ạn-ạri pạńjae lạgit́;

To̠be̠ amdo̠…

Ce̠t́ reaḱ Santal?

Teheń do̠ santali pạrsi sãohẽ̠t́ren maraṅ pạrsi guru ar maraṅ ạkilạnić ạḍi mano̠tan Bodxḍiṅ sahebaḱ 87aḱ gur serma kantaea.

Teheńaḱ tạrikge Norway disomren ńutuman miso̠nạri Paul Olaf Bodding do̠ 1938 sermare reaḱ 25 septẹmbor Denmark disom reaḱ Odense ńutumanaḱ jaegare setaḱ jo̠khe̠cye bhindạṛena ar tarasiń 2.30 baje leka aćren dulạṛiạ juri Christine Larsen Bodding aḱ ho̠bo̠rre mucạt́ sahẽ̠t́e sahẽ̠t́leda. Un jo̠khe̠ć uniaḱ ume̠r do̠ eae ge̠l pe̠(73) serma tahẽ̠kantaea. Christine Larsen Bodding do̠ ńutuman ḍakṭo̠re tahẽ̠kana me̠nkhan Isor Babawaḱ hoho hoelen khan calaḱ ho̠ṛ do̠ o̠ko̠e hõ̠ bam ruạṛ daṛewaea.

Boḍiṅ sahebe calao lahaente santali sãohẽ̠t́ reaḱ ạḍi maraṅ loksange hoyena. Santali sãohẽ̠t́re uniaḱ oka e̠ne̠m menaḱ ona do̠ heṛan maraṅ gea. Uniaḱ noa santalko lạgit́ oka enem do̠ o̠ko̠e hõ̠ pase̠ć tis hõ baṅko jaḱ tioḱ daṛeaḱa.

Uniaḱ irạl ge̠l eaeaḱ gur sermare santalstimes gharońj seć khon ạḍi aema mano̠t johar ar baha malale calae kana.

Dhaka EPZ (Export Processing Zone) re̠aḱ mit́ṭaṅ ńutumanaḱ garments factory kana Diamond Group do̠. Surujmoni ar Sonaton do̠ noa garments rege mit́te̠kin kạmia, calaḱ-hijuḱ ar tahẽn hõ ato gãotare̠n sãote̠ sor sorge. Tho̠ṛa din tayo̠m bana ho̠ṛge ạkinaḱ dulạṛkin so̠do̠r ke̠da, gulạp bahage tahẽkana so̠do̠raḱ do̠. Nalha kạmi le̠ka do̠ calao akan diso̠m re̠aḱ ae̠ma jilạ kho̠n jo̠to̠ koge nonkan rạskạ re̠aḱ so̠mbat ańjo̠mte̠ suluk ko ạikạule̠t́a. Ḍhe̠rkin rạskạle̠na kuṛi Surujmoni re̠n go-babage.

Bapla do̠ oṛaḱ kho̠nge hoe purạule̠na me̠nkhan jo̠m-ńu do̠ bar do̠m bar jaega re̠kin purạule̠da. Dhaka EPZ aṛe santal ho̠po̠n ko tahẽn ato sećre̠ mõṛẽ ṭhạ̃ire̠n hoṛko do̠ tumdaḱ-ṭamak re̠aḱ raṛaṅ saḍe ar rạskạ re̠aḱ gaḍare̠ko buhe̠l bo̠lo̠le̠na. Haere̠ santal ho̠po̠n naco̠niạ, haere̠ santal ho̠po̠n mạndạṛiạ, tumdaḱ saḍe te̠ko bul akana. Santal ato baṅkan re̠hõ lucut́ duṅgut́ ho̠ṛ ho̠po̠nko ko̠le̠r so̠nawante̠ ko kạmi kana lạṭu-kạṭić. Se̠dae go̠ṛo̠m babatako ko me̠n baṛaḱ mõṛẽ siń mõṛẽ ńindạ akhṛa rege ko aṅgale̠da. EPZ ṭeṭhãṭre̠n de̠ko pusi sanamkoge ko baḍaele̠t́a santal ko do̠ e̠ne̠ć sereń re̠ do̠ ko so̠ro̠sgea. Surujmoni ar Sonatonaḱ bapla re̠ Somresh do̠ bogete̠ye̠ do̠n le̠da, e̠nte̠ bapla to̠no̠l joṛao re̠ Somresh do̠ raibariće tahẽkana.

Tho̠ṛa din tayo̠m baḍaena baṅma sae mõṛẽge̠l le̠ka ho̠ṛ eṭaḱ diso̠mte̠ kạmi calaḱ re̠aḱ ạtko ńama. Somresh ge Sonaton do̠ noa kho̠bo̠re̠ se̠ṭe̠r ade tahẽkana. Surujmoni ar Sonatonaḱ gharo̠ńj do̠ e̠ke̠n turui cando hoe akana, mõṛẽ din lahage Sonaton do̠e aṭkar akat́a pase̠ć Surujmoni do̠ concept akada. Do̠sar hiloḱ se̠taḱre clinic te̠kin dukạna, ṭesṭre̠ baḍaena Surujmoni do̠ go̠go̠ hoyoḱ lạgit́e̠ sapṛaoḱ kana, noa ańjo̠mte̠ rạskạte̠ Sonatonaḱ mẽt́daḱ do̠ sokoć onḍokle̠na. Ce̠daḱ bae rạskạḱa e̠nte̠ to̠a dare e̠ṅgat́te̠t́ do̠ e̠nan kho̠ngeye̠ kho̠j akada, dhạrti bạgiaḱ lahare̠ do̠ je̠mo̠n Sonatone he̠o ho̠bo̠rjoṅ. Sonaton ar Somresh do̠ mit́ jilạre̠n kin tahẽkante̠ me̠pe̠n enakin, pạhil do̠ Sonaton ge Qatar diso̠mte̠ calaḱ lạgit́e̠ kurumuṭuke̠da. Kurumuṭule̠t́ae gidrạ hara buruḱ lahare̠ge̠ tinạḱ iń kạmi daṛeaḱ do̠ń kạmia, ar Somresh do̠e tạṅgia tayo̠m ńoḱ calaḱ lạgit́te̠. Sạṅgiń diso̠m kante̠ banar gate te̠ge̠ ḍher kạuḍi kin jogaṛ jo̠to̠nkeda. Mo̠lo̠ṅ re̠aḱ jo̠ste̠t́ do̠ noageko me̠taḱa, Sonaton do̠ pạhil do̠pha re̠geye goṭa ocoena. Ṭaka paisa upjạu re̠aḱ ạt ar Surujmoni aḱ kukhire gaṛhaoḱ kan gidrạ o̠ka seće laha calaḱa! Surujmoni soṅge, aćre̠n go-baba ar Sonaton soṅge hõ riti riti ye̠ po̠ramo̠ske̠t́a, laha tayo̠m, ạt-beạt emante̠aḱ khondroṅ kate̠ge Qatar diso̠m calaḱ lạgit́ uḍạuḱ jahaj re̠aḱ ṭickeṭe kiriń ke̠t́a.

Sonaton do̠ Qatar diso̠mte se̠ṭe̠r katege Surujmoni phone adea, lại adeae mońjtege noa diso̠mteń se̠ṭe̠r akana ar kạmi rehõń bhiṛạu akana. Sonatonaḱ nonkan mońj so̠mbad ańjo̠mte̠ gate koṛa Somresh, go-baba ar atore̠n pe̠ṛa ko hõko rạskạle̠na. Tho̠ṛa din tayo̠mge Surujmoni do̠ mit́ṭaṅ koṛa gidrại janamkedea. Sạṅgiń diso̠mre̠ye̠ tahẽkante̠ apat́te̠t́ do̠ video te̠ge̠ ho̠po̠nte̠t́aḱ mẽt́ãhãe ńe̠lan tahẽkana ar jiwire̠ juḍạsiye̠ ạikạule̠t́a. Sonaton do̠ aćre̠n pạhlạuṭhạ ko̠ṛa Surju ge̠ye̠ bahna ledea. Pase̠ć re̠co̠e asle̠n Surju do̠ siń cando le̠kage so̠maj re marsale bambe̠ra. Sonaton do̠ arhõ mo̠ne̠ lagaokate̠ jhũk salaḱge kạmire̠ye̠ dhurạuena. Tisre̠ pe̠ se̠rma paro̠mena bae dislạle̠t́a e̠nte̠ uniaḱ mo̠n do̠ diso̠mte̠ ruạṛ ar sadhe̠r ho̠po̠n ńe̠le̠ lạgit́ khadbadaoḱ kantae tahẽkana. Aema kurumuṭu kate̠ company kho̠n chuṭiye jo̠gaṛke̠t́te̠ diso̠m te̠ye̠ so̠ho̠r se̠ṭe̠rena. Kusienae Surujmoni, kusienae go-baba, hońhar-hanharte̠t́ ar Somresh hõ e̠nte̠ uniaḱ hõ calaḱ re̠aḱ jo̠to̠ do̠ ṭhik akana.

Sonaton do̠ mit́din bardin khe̠mao khe̠maotege candoe par̠omke̠t́a. Huḍiń gidrạ Surju do̠ apat́te̠t́ ṭhen bae soroḱ soroḱ tege̠ye̠ gatele̠na, me̠nkhan jiwi re̠ jiwi do̠ baṅ to̠llen tạkina. Somresh do̠ gatekoṛae riạu uskur le̠de̠re Sonaton do̠ do̠sar do̠m calaḱ lạgit́e̠ mo̠n muruk ke̠da. Gate gatekin calaoena Qatar re̠aḱ kạmi naṅgrahate̠. Ar Surujmoni nitoḱ do̠ gidrạwante̠ arhõ Dhaka so̠ho̠r se̠ćgeye laha he̠ćena, juritae Sonaton do̠ gidrạ oloḱ paṛhaoḱ lạgit́ bhage school re̠ bhurtiye̠ me̠nle̠t́a. Surujmoni do̠ arhõe bujhạuke̠da, Sonatonaḱ ḍanḍa re̠aḱ jo̠ do̠e hijuḱ kana. Ạḍi so̠nto̠r Surju school idi-ạgue ho̠rte̠ taṛame̠t́a. Nonkan rạskạ so̠mbat Sonaton go-baba do̠ baṅkin ańjo̠m oṭole̠t́a. Sonaton do̠ Qatar diso̠mte̠ se̠ṭe̠r tho̠ṛa din tayo̠m ge̠ye̠ baḍaeke̠t́a janam gogo do̠e bạgiadea; duk ce̠tan duk pe̠ cando tayo̠mge apat́te̠t́ hõe boṅga talaye̠na. Sonaton do̠ kạhĩs ńoḱente̠ye̠ me̠nke̠t́a, ce̠t́ ar in calaḱa diso̠mte̠, inre̠n gidrạkin lạgit́ge ora-sorań kạmia, kạuḍiń sõćjoṅa jemo̠n diso̠mteń ruạṛle̠nre̠ suluk re̠ jionle̠ khe̠mao daṛeaḱ.

Kạmi ar kạmite̠ din do̠ gujrạue̠na, bo̠cho̠r paro̠me̠na ge̠lbar bo̠cho̠r hõ taṕena. Nitoḱ Sonaton do̠ diso̠mte̠ ruạṛoḱe lại lahake̠t́a. Phone re̠ galmaraore̠ge Surujmoni do̠ Sonatone so̠do̠radea, ale ṭhe̠n do̠ alo̠m rakaṕa e̠nte̠ ale̠ do̠ bale̠ do̠ho̠mea. Onka le̠kage Surju ar kạṭić koṛa Sujoy hõ eṅgataḱ katha regekin toṅgeada. Metadeakin janam le̠ko khange gidrạre̠n baba do̠ baṅko hoe daṛeaḱa! Am do̠ aleaḱ ce̠t́ kạmirehõ bam lagao akana, e̠ke̠ṇ ṭaka-paisa e̠m kate̠ do̠ dạyik baṅ purạuḱa! Juri ar gidrạkinaḱ kathate̠ koṛam oṛejo̠ḱ le̠kae̠ ạikạu keda. Ce̠tan se̠će̠ ko̠yo̠ḱke̠t́ ma se̠rma ńalaḱ ńalaḱ ar dhạrtima dhiri mõhõr meṭao akana! Company re̠ye̠ lại saphawaḱ ko̠re̠ mo̠n do̠ oṭaṅ baṛae miru le̠kage o̠ka ḍạr reye aboḱa bae baḍaea.

Sonaton do̠ diso̠m re̠aḱ airport re̠ye̠ pheḍe̠nre̠ o̠kate̠ye̠ calaḱa, go-baba ṭhe̠n, bana hoṛ gekin gur akan e̠nan hiloḱre̠. Ańjo̠m akat́ae o̠ṛaḱ duạr do̠ dhaṅdaser akana, eṭaḱ hoṛaḱ jaega kante̠ nito̠ḱ onko hõ tahẽn lạgit́ bako aṛaga! Arjao akat́ sanam ṭaka-paisa ma bạhuaḱ bạnk account regeye̠ ko̠l caba akat́! Teṅgo hapeyenae, o̠kate̠ye̠ calaḱa! E̠ke̠n tite̠ ạćre̠n pe̠ṛa ko hõ bako ataṅe̠de kana. Haere̠ dulạṛ, haere̠ bhalo̠basa; heṛemgea se̠ haṛhat́gea jiṅgi re̠aḱ mucạt́ umer re̠hõ bae aṭkar daṛeada? Polisaḱ goṛote mit́ṭaṅ NGO do̠ akoaḱ safe home te̠ko idikedea. Diso̠m re̠aḱ kho̠bo̠r kago̠j re̠ chapae̠na Sonaton do̠ kạmiye̠ baḍaea, kạmiye̠ kho̠jo̠ḱ kana.

-(Sạri ghoṭna umul pańja kate̠ go̠lpo̠)

Piprạ ato talare̠ ạḍi maraṅ mit́ṭe̠n pukhri menaḱa. Ona pukhri beṛhaetege ona atore̠n ho̠ṛ do̠ko bo̠so̠t akana. Lạṭu kho̠n kạṭić jo̠to̠ ho̠ṛge ona pukhrire̠ko paeraḱa ar kićrić, ṭukuć, celaṅ, emanteaḱko saphaea. Pukhri purub aṛere̠ Sạgun ar Bạjun takowaḱ oṛaḱ. Sạgun bạbuwaḱ umer do̠ 6 serma ar Bạjunaḱ do̠ 4 serma. Ne̠s kho̠nge Sạgun do̠ iskul calaḱe̠ e̠ho̠ṕ akana, ar Bạjun do̠ oṛaḱregeye̠ gate baṛaea. Unkin ać go̠go̠ baba do̠ pạṭ kạmikin kạmia. Dinạmge unkin do̠ Bạjun do̠ho̠ oṭokate̠ kạmikin calaḱa, Kạmi calaḱ lahare̠ unkin ać go̠go̠ do̠e mana kạkina, mạt mạt pukhrire̠ paeraḱ alo̠ben calaḱa.

Mit́ athwar hilạḱ iskul chuṭi tahẽ̠kante̠ Sạgun do̠ oṛaḱ regeye̠ tahẽ̠kana. In hilạḱ setaḱre̠ kạmi calaḱ lahare̠ ać go̠go̠ do sạgune̠ bakhẽ̠ṛ oṭoadea je Bạjune̠m ńe̠l do̠ho̠yea ar eskar eskar pukhrire̠ paeraḱ alo̠m calaḱa.

Tikin o̠kte̠ unkin do̠ bahre̠re̠kin gateḱkan tahẽ̠na, un okte̠ atore̠n lạṭu gidrạko pukhrire̠ko paeraḱkan tahẽ̠na, onko ńe̠lte̠ unkin hõ̠ paeraḱ sanake̠t́kina. Onate̠ unkin hõ̠ pukhri mit́ aṛere̠ ḍạbrạḱ lạgit́kin phe̠ḍena. Ḍạbrạḱ ḍạbrạḱte̠ tinre̠co̠ Bạjun do̠ daḱre̠ye̠ unum at́ena. Sạgun ać boeha bae ńe̠l ńamledete̠ ạḍi ãṭe̠ bo̠to̠rena ar hape hapete̠ daḱ kho̠n rakaṕkate̠ oṛaḱe̠ calaoena. Ać go̠go̠ tạkin do̠ tikin oṛaḱ ruạṛ kate̠ Bạjun bạkin ńe̠lńame kante̠ Sạgunkin kulikedea uni hõ̠ bae lại le̠t́te̠ dhãoṛã dhạ̃uṛĩ sendrakin e̠ho̠ṕena. Me̠nkhan okare̠ hõ̠ bạkin ńamledea.

Ạyuṕ bela atore̠n mit́ṭe̠n maejiu do̠ pukhri ghaṭre̠ thạri gasao se̠nkate̠ ńe̠lkedae je Sạgun bạbu ma daḱre̠ye̠ campel akan. Ona ńe̠lkate̠ uni do̠ kạumạu o̠ho̠e e̠ho̠ṕena. Kạumạu ańjo̠mkate̠ ato ṭolare̠n jo̠to̠ ho̠ṛko jarwaena ar daḱ kho̠n ko owar rakaṕ ạgu kedea. Niạ tayo̠m kho̠n Bạjun do̠ ar tishõ̠ ać go̠go̠ baba tạkinaḱ katha bae be̠bataoa.

Tumạl: Ańjo̠m jo̠ṅ jạṛ