Day: September 24, 2025 - The Santals Times

Dhaka EPZ (Export Processing Zone) re̠aḱ mit́ṭaṅ ńutumanaḱ garments factory kana Diamond Group do̠. Surujmoni ar Sonaton do̠ noa garments rege mit́te̠kin kạmia, calaḱ-hijuḱ ar tahẽn hõ ato gãotare̠n sãote̠ sor sorge. Tho̠ṛa din tayo̠m bana ho̠ṛge ạkinaḱ dulạṛkin so̠do̠r ke̠da, gulạp bahage tahẽkana so̠do̠raḱ do̠. Nalha kạmi le̠ka do̠ calao akan diso̠m re̠aḱ ae̠ma jilạ kho̠n jo̠to̠ koge nonkan rạskạ re̠aḱ so̠mbat ańjo̠mte̠ suluk ko ạikạule̠t́a. Ḍhe̠rkin rạskạle̠na kuṛi Surujmoni re̠n go-babage.

Bapla do̠ oṛaḱ kho̠nge hoe purạule̠na me̠nkhan jo̠m-ńu do̠ bar do̠m bar jaega re̠kin purạule̠da. Dhaka EPZ aṛe santal ho̠po̠n ko tahẽn ato sećre̠ mõṛẽ ṭhạ̃ire̠n hoṛko do̠ tumdaḱ-ṭamak re̠aḱ raṛaṅ saḍe ar rạskạ re̠aḱ gaḍare̠ko buhe̠l bo̠lo̠le̠na. Haere̠ santal ho̠po̠n naco̠niạ, haere̠ santal ho̠po̠n mạndạṛiạ, tumdaḱ saḍe te̠ko bul akana. Santal ato baṅkan re̠hõ lucut́ duṅgut́ ho̠ṛ ho̠po̠nko ko̠le̠r so̠nawante̠ ko kạmi kana lạṭu-kạṭić. Se̠dae go̠ṛo̠m babatako ko me̠n baṛaḱ mõṛẽ siń mõṛẽ ńindạ akhṛa rege ko aṅgale̠da. EPZ ṭeṭhãṭre̠n de̠ko pusi sanamkoge ko baḍaele̠t́a santal ko do̠ e̠ne̠ć sereń re̠ do̠ ko so̠ro̠sgea. Surujmoni ar Sonatonaḱ bapla re̠ Somresh do̠ bogete̠ye̠ do̠n le̠da, e̠nte̠ bapla to̠no̠l joṛao re̠ Somresh do̠ raibariće tahẽkana.

Tho̠ṛa din tayo̠m baḍaena baṅma sae mõṛẽge̠l le̠ka ho̠ṛ eṭaḱ diso̠mte̠ kạmi calaḱ re̠aḱ ạtko ńama. Somresh ge Sonaton do̠ noa kho̠bo̠re̠ se̠ṭe̠r ade tahẽkana. Surujmoni ar Sonatonaḱ gharo̠ńj do̠ e̠ke̠n turui cando hoe akana, mõṛẽ din lahage Sonaton do̠e aṭkar akat́a pase̠ć Surujmoni do̠ concept akada. Do̠sar hiloḱ se̠taḱre clinic te̠kin dukạna, ṭesṭre̠ baḍaena Surujmoni do̠ go̠go̠ hoyoḱ lạgit́e̠ sapṛaoḱ kana, noa ańjo̠mte̠ rạskạte̠ Sonatonaḱ mẽt́daḱ do̠ sokoć onḍokle̠na. Ce̠daḱ bae rạskạḱa e̠nte̠ to̠a dare e̠ṅgat́te̠t́ do̠ e̠nan kho̠ngeye̠ kho̠j akada, dhạrti bạgiaḱ lahare̠ do̠ je̠mo̠n Sonatone he̠o ho̠bo̠rjoṅ. Sonaton ar Somresh do̠ mit́ jilạre̠n kin tahẽkante̠ me̠pe̠n enakin, pạhil do̠ Sonaton ge Qatar diso̠mte̠ calaḱ lạgit́e̠ kurumuṭuke̠da. Kurumuṭule̠t́ae gidrạ hara buruḱ lahare̠ge̠ tinạḱ iń kạmi daṛeaḱ do̠ń kạmia, ar Somresh do̠e tạṅgia tayo̠m ńoḱ calaḱ lạgit́te̠. Sạṅgiń diso̠m kante̠ banar gate te̠ge̠ ḍher kạuḍi kin jogaṛ jo̠to̠nkeda. Mo̠lo̠ṅ re̠aḱ jo̠ste̠t́ do̠ noageko me̠taḱa, Sonaton do̠ pạhil do̠pha re̠geye goṭa ocoena. Ṭaka paisa upjạu re̠aḱ ạt ar Surujmoni aḱ kukhire gaṛhaoḱ kan gidrạ o̠ka seće laha calaḱa! Surujmoni soṅge, aćre̠n go-baba ar Sonaton soṅge hõ riti riti ye̠ po̠ramo̠ske̠t́a, laha tayo̠m, ạt-beạt emante̠aḱ khondroṅ kate̠ge Qatar diso̠m calaḱ lạgit́ uḍạuḱ jahaj re̠aḱ ṭickeṭe kiriń ke̠t́a.

Sonaton do̠ Qatar diso̠mte se̠ṭe̠r katege Surujmoni phone adea, lại adeae mońjtege noa diso̠mteń se̠ṭe̠r akana ar kạmi rehõń bhiṛạu akana. Sonatonaḱ nonkan mońj so̠mbad ańjo̠mte̠ gate koṛa Somresh, go-baba ar atore̠n pe̠ṛa ko hõko rạskạle̠na. Tho̠ṛa din tayo̠mge Surujmoni do̠ mit́ṭaṅ koṛa gidrại janamkedea. Sạṅgiń diso̠mre̠ye̠ tahẽkante̠ apat́te̠t́ do̠ video te̠ge̠ ho̠po̠nte̠t́aḱ mẽt́ãhãe ńe̠lan tahẽkana ar jiwire̠ juḍạsiye̠ ạikạule̠t́a. Sonaton do̠ aćre̠n pạhlạuṭhạ ko̠ṛa Surju ge̠ye̠ bahna ledea. Pase̠ć re̠co̠e asle̠n Surju do̠ siń cando le̠kage so̠maj re marsale bambe̠ra. Sonaton do̠ arhõ mo̠ne̠ lagaokate̠ jhũk salaḱge kạmire̠ye̠ dhurạuena. Tisre̠ pe̠ se̠rma paro̠mena bae dislạle̠t́a e̠nte̠ uniaḱ mo̠n do̠ diso̠mte̠ ruạṛ ar sadhe̠r ho̠po̠n ńe̠le̠ lạgit́ khadbadaoḱ kantae tahẽkana. Aema kurumuṭu kate̠ company kho̠n chuṭiye jo̠gaṛke̠t́te̠ diso̠m te̠ye̠ so̠ho̠r se̠ṭe̠rena. Kusienae Surujmoni, kusienae go-baba, hońhar-hanharte̠t́ ar Somresh hõ e̠nte̠ uniaḱ hõ calaḱ re̠aḱ jo̠to̠ do̠ ṭhik akana.

Sonaton do̠ mit́din bardin khe̠mao khe̠maotege candoe par̠omke̠t́a. Huḍiń gidrạ Surju do̠ apat́te̠t́ ṭhen bae soroḱ soroḱ tege̠ye̠ gatele̠na, me̠nkhan jiwi re̠ jiwi do̠ baṅ to̠llen tạkina. Somresh do̠ gatekoṛae riạu uskur le̠de̠re Sonaton do̠ do̠sar do̠m calaḱ lạgit́e̠ mo̠n muruk ke̠da. Gate gatekin calaoena Qatar re̠aḱ kạmi naṅgrahate̠. Ar Surujmoni nitoḱ do̠ gidrạwante̠ arhõ Dhaka so̠ho̠r se̠ćgeye laha he̠ćena, juritae Sonaton do̠ gidrạ oloḱ paṛhaoḱ lạgit́ bhage school re̠ bhurtiye̠ me̠nle̠t́a. Surujmoni do̠ arhõe bujhạuke̠da, Sonatonaḱ ḍanḍa re̠aḱ jo̠ do̠e hijuḱ kana. Ạḍi so̠nto̠r Surju school idi-ạgue ho̠rte̠ taṛame̠t́a. Nonkan rạskạ so̠mbat Sonaton go-baba do̠ baṅkin ańjo̠m oṭole̠t́a. Sonaton do̠ Qatar diso̠mte̠ se̠ṭe̠r tho̠ṛa din tayo̠m ge̠ye̠ baḍaeke̠t́a janam gogo do̠e bạgiadea; duk ce̠tan duk pe̠ cando tayo̠mge apat́te̠t́ hõe boṅga talaye̠na. Sonaton do̠ kạhĩs ńoḱente̠ye̠ me̠nke̠t́a, ce̠t́ ar in calaḱa diso̠mte̠, inre̠n gidrạkin lạgit́ge ora-sorań kạmia, kạuḍiń sõćjoṅa jemo̠n diso̠mteń ruạṛle̠nre̠ suluk re̠ jionle̠ khe̠mao daṛeaḱ.

Kạmi ar kạmite̠ din do̠ gujrạue̠na, bo̠cho̠r paro̠me̠na ge̠lbar bo̠cho̠r hõ taṕena. Nitoḱ Sonaton do̠ diso̠mte̠ ruạṛoḱe lại lahake̠t́a. Phone re̠ galmaraore̠ge Surujmoni do̠ Sonatone so̠do̠radea, ale ṭhe̠n do̠ alo̠m rakaṕa e̠nte̠ ale̠ do̠ bale̠ do̠ho̠mea. Onka le̠kage Surju ar kạṭić koṛa Sujoy hõ eṅgataḱ katha regekin toṅgeada. Metadeakin janam le̠ko khange gidrạre̠n baba do̠ baṅko hoe daṛeaḱa! Am do̠ aleaḱ ce̠t́ kạmirehõ bam lagao akana, e̠ke̠ṇ ṭaka-paisa e̠m kate̠ do̠ dạyik baṅ purạuḱa! Juri ar gidrạkinaḱ kathate̠ koṛam oṛejo̠ḱ le̠kae̠ ạikạu keda. Ce̠tan se̠će̠ ko̠yo̠ḱke̠t́ ma se̠rma ńalaḱ ńalaḱ ar dhạrtima dhiri mõhõr meṭao akana! Company re̠ye̠ lại saphawaḱ ko̠re̠ mo̠n do̠ oṭaṅ baṛae miru le̠kage o̠ka ḍạr reye aboḱa bae baḍaea.

Sonaton do̠ diso̠m re̠aḱ airport re̠ye̠ pheḍe̠nre̠ o̠kate̠ye̠ calaḱa, go-baba ṭhe̠n, bana hoṛ gekin gur akan e̠nan hiloḱre̠. Ańjo̠m akat́ae o̠ṛaḱ duạr do̠ dhaṅdaser akana, eṭaḱ hoṛaḱ jaega kante̠ nito̠ḱ onko hõ tahẽn lạgit́ bako aṛaga! Arjao akat́ sanam ṭaka-paisa ma bạhuaḱ bạnk account regeye̠ ko̠l caba akat́! Teṅgo hapeyenae, o̠kate̠ye̠ calaḱa! E̠ke̠n tite̠ ạćre̠n pe̠ṛa ko hõ bako ataṅe̠de kana. Haere̠ dulạṛ, haere̠ bhalo̠basa; heṛemgea se̠ haṛhat́gea jiṅgi re̠aḱ mucạt́ umer re̠hõ bae aṭkar daṛeada? Polisaḱ goṛote mit́ṭaṅ NGO do̠ akoaḱ safe home te̠ko idikedea. Diso̠m re̠aḱ kho̠bo̠r kago̠j re̠ chapae̠na Sonaton do̠ kạmiye̠ baḍaea, kạmiye̠ kho̠jo̠ḱ kana.

-(Sạri ghoṭna umul pańja kate̠ go̠lpo̠)

Dulạṛ Re̠aḱ Haṛhat́te̠t́