Miruwaḱ Mẽt́ Daḱ

Hola tikin khon Bạblu eṅgat Miru Kisku do dhãoṛa dhạ̃oṛi goṭa ṭola daṛa daṛate sanam hoṛko ṭhen goṛo lạgit́e nehõroḱ kana ar jao ghuṛigey homor halaṅeda. Miru Kisku tako oṛaḱ do parwa bir cetan ṭola re, sanamko lekage uni hõ mit́ṭen mońj sajao akan baha bagwan lekan mit́ gharońj ge tahẽkantaea. Bạblu apat Sona Murmu do eṭaḱ hoṛaḱ khet re kạmi kate aćaḱ huḍiń gharońje sajaoleda. Ar ona iạte uni do ạkin juri pạriaḱ dulạṛ ren jo Bạblu Murmu lạgit́ aćaḱ rojgar reaḱ thoṛa thoṛate doko jarwa kate mit́ bighạ jumi hõe kirińkeda. Ar dulạṛiạ hopontae oloḱ paṛhaoḱ cet́ ocoye reaḱ sanam lekan bebostha lạgit́ hõ saṕṛaogeye tahẽkana. Onatege uni do sur School re paṛhaoḱe ehoṕket́te bhage result salat́ jao serma ge cetan class te rakaṕ calaḱe ehoṕena. Ar nonkatege mit́din do high school pas kate thoṛa sạṅgiń reaḱ bajar college reye bhurtikedea.

Monre ạḍi as tahẽkantaea beṭa tae do mit́din ạḍi maraṅ lek manan hoṛe hoyoḱte ona ṭoṭharen sanam hoṛko do uniko Manot arko sarhaoea, netar khonge ato ṭola ar aḍe paseren hoṛ kodo hạṭiạ kore ńapam kateko metaea, am doya Sona ạḍi bhage moloṅ tam, amren koṛa do nãhãḱ ạḍi maraṅ daman hoṛgeye hoyoḱa. Onako katha ańjomte Sonawaḱ koṛam do rạskạte cehel cepeloḱ kantaea. Ṭhik onkage Bạblu hõ sohor college re aćaḱ oloḱ hõe calao idiyet́ kan tahẽkana, college reaḱ hostel re tahẽn khạtir te netar do Bạblu khoroc kohõ bạṛtigeye khojogoḱ kana, ona iạte ać baba do nalha kạmite gharońj ar Bạbluwaḱ oloḱ khoroc ar bae kulạu daṛeaḱ kana, onate Sona do nit do aḍe ṭolare mit́ṭen kisạ̃ṛ ṭhen gutiye boloyena.

Menkhan uni do umer sećte ḍhere lahaḱ kan tahẽnte laha leka do ar bae kạmi daṛeaḱ kana. Jaoge hana nawa ruạko ńam gode kana, enrehõ Bạbluwaḱ darakan jion napaete benao rakaṕ lạgit́ do ãṭ kurumuṭu do bae thiroḱ kana. Onka onkate din, mạhnạ, cando parom calaḱte bochor mucạt́ hõ heć seṭeren khan Maraṅ din reaḱ chuṭi hõ hećena, ar Bạblu hõ chuṭi bikạua mente thoṛa din lạgit́ oṛaḱteye hećena. Bạblu ać go-baba do hopon tạkin jemon oṛaḱre tahẽn bhor jãhãlekan eṭkeṭõṛẽ alo hoyoḱtae ona reaḱge jao gekin bhạbitoḱ kana. Thoṛa din paromen tayom mit́din setaḱre Bạblu eṅgat do Bạbluwaḱ aṭet́ samṭao jokheć aṭet́re mit́ṭen araḱge khạli botole ńamkeda. Benet́ jhićkateye ji laga keda bogete jhãj ar ran-ran machage so kana. Ado baskeaḱ ko jom oktere Bạbluye kulikedea, henda bạbu aṭet́re cet́ botol coń ńam akat́a ekal ran range so kana. Bạbluye roṛ ruạṛkeda, “hẽ go rankangea. Hola mander khan ceka coṅ bohoḱ hasu hasuń ạikạuet́kan tahẽkana to, onateń kiriń leda”. Nonḍe lại tora ganoḱa je netar do Bạblu college hostel re tahẽte mit́bar bạṛić gateko são ona botol reaḱ do ạḍi ãṭe sẽṛãwakada. Jao ńindạge ona baṅ khan jạpit́ge baṅ hoyoḱtaea. Eken ona moto do baṅ aćren gateko são sanam lekan bạṛić kạmikore hõe seledoḱ kana.

Bạblu chuṭi cabakate college te ruạṛoḱ okte re ać go-baba takine men oṭowaḱkina, niạ bar do hãḱ ḍhir ńoḱge ṭaka lagawạńa ba, usạraben jogaṛạńa. Bạblu college te calaoen tayom khonge Bạblu apat Sonawaḱ hoṛmo reaḱ ruạ do bại bạite ḍher idiyentaea, mit́din do setaḱre pukhri khon ruạṛ oktere chaṭka tiog tora ackage bohoḱ gul male ạikạuket́ te bhindạṛ got́ena, Bạblu ać gogo Miru do raca regeye jojoḱkan tahẽkana, jãhãnaḱ ńurhạḱ lekae ańjomket́ khan hare phare bahre teye ńir oḍokena. Oḍok torae ńelkede haere Bạblu apatmae bhindạṛ akan, ene ado kạumạu onte note hoṛko hohoakoteye jarwaket́ koa, one ado sanamko mit́ kate oṛaḱ sećko tul idi kedea ar bohoḱ re daḱ ko duladea, mit́ ghạṛi tayom disạ ạcurentaea menkhan mit́ jaṅga ar ti do bae laṛao daṛeaḱ kana. Note Bạblu hõ noa khobor ńamkate ńuhum oktege oṛaḱteye seṭerena, uni ńelte ać baba do arhõ kạumạue raḱateye daram kedea are metadea beṭa gapa ge bajar reaḱ haspatal te idiyińme boge godoḱạń nãhãḱ.

Dosar hiloḱ Bạblu ar ać gogo do setaḱre ać baba bajarte haspatal tekin idi kedea, onḍe ḍaktor hana nawa biḍạu kateye menkeda nui do usạrate inḍia reaḱ bhelor haspatalte idiye hoyoḱa. Bạblu do Ḍaktore kuli kedea ado ḍaktor saheb onḍe do tinạḱ paesa lagaoḱa, ḍaktore lại keda hoe daṛeaḱa amdaj bar lakh lagao daṛeaḱa. Ańjom kate Bạbluwaḱ bohoḱre paseć serma ńurhạ wade lekae bujhạu keda, ente unạḱ ṭaka do okareye ńama. Bạblu apat Sona do noa katha ańjomkate ạḍi ãṭe andesale cabayena, cedaḱ ente bae bhabnaḱa aćaḱ judi jãhãnaḱ hoelen khan tahle Bạbluwaḱ oloḱ do onḍege teṅgo hapeḱ taea, ona iạte sanam bhabna togoć ḍaṭate sahao kate hopon taye metadea, E beṭa do oṛaḱte sen kate ona aboaḱ mit́ bighạ jumi ạkhriń kate paesa ạguime ar inḍiate ran ocoḱ lạgit́ idiyińme. Ṭhik ona katha lekage Bạblu do oṛaḱte senente ako aḍe paseren ṭhen jumi ạkhriń reaḱe lại ket́ khan ṭhik oktere jumi do bar lakh ṭakateye ạkhriń keda. Ar dosar hiloḱ ge ona bar lakh ṭakawante uni do bajar reaḱ haspatalteye monḍayena, calaḱ okterege gạḍi isṭisonreye seṭeren khan aćren mit́ bar gate kodoye ńamket́koa, onko são mit́ bar boge judạ galmarao tege thanaren mit́ bhen pulis hećkate gateko sãote Bạblu Murmu hõko tol idi kedea. Ar onḍe khon do hajot reko bhorao ket́koa.

Becara Bạblu eṅgat apat do haspatal re hopontạkin lạgit́ koyoḱ koyoḱtekin laṅga cabayen rehõ Bạblu do bae seṭerlena. Ar unkin do Bạbluwaḱ jãhãn khoj khobor hõ bạkin ńamleda. Note din dinte Sonawaḱ ruạ hõ ḍher idiyentaea. Khange mit́din do tarasiń okte Bạblu apat Sona Murmu ren khańca miru do hana puritey pharkaoena. Bạblu eṅgat Miru Kisku do haspatalre koṛam oṛejoḱ leka raḱ homorate goṭa haspatal oṛaḱe anduṛ cabakeda. Eskar maejiu nit do cet́e cekaea? Bae bujhạu daṛeaḱ kana. Dhạrtire okoe hõ bạnuḱ kotaea. Jãhã sećgeye koyoḱet́kan sanam sećge ńutge ńelet́a. Note haspatalren calaoić hõ Miru Kiskui metadea, “ E mạ̃i ma nit do mạ̃ṛi idiytam” dukhạli Miru nit cekate aćren dulạṛiạ juriaḱ mạ̃ṛi nonḍe khone iditaya onage maraṅ bhabnatae nit do. Hudis kedae nit do oṛaḱte senkate atoren hoṛko ać goṛowae lạgit́e nehõr akoa. Ṭhik ona lekage mone goṭa kate oṛaḱ seć doe monḍayena, hijuḱ hijuḱte siń cadso do bohoḱ cetan seće gargarao rakaṕ calaoena.

(Ol toṅgeḱa)