Ho̠po̠n Bạbuwaḱ Iskul Reaḱ Pạhil Din

Paitapukur atore̠n mit́ṭe̠n kạṭić gidrạ kanae ho̠po̠n bạbu. Ho̠po̠n bạbu do̠ dinạme ńe̠lkoa ako atore̠n gidrạko do̠ dinạm iskul teko calaḱa. Onko ńe̠lte̠ ać hõ iskul calaḱ sanakedea. Uni do̠ ać go̠go̠-babatạkine metat́kina, iń hõ iskulteń calaḱa. Uniaḱ sana lekage ho̠po̠n bạbu iskulreko bhurti kadea.

Pạhil pạhil ać go̠go̠ iskulte̠ye̠ ạgu oṭo kadea. Iskul ạgukate̠ jo̠to̠ ạnạṛi ho̠ṛ ńe̠lte ać go̠go̠waḱ ańcar saṕkate bhẽ-bhẽ raraḱe eho̠ṕena aṛaḱge bae aṛago̠ḱkana. Ho̠po̠n bạbure̠n nawa didimuni sorre̠ he̠ćkate̠t́e metadea, ho̠po̠n bạbu hijuḱme̠ amaḱ kelasteń idimea, o̠nḍe̠ aema gatekom ńamkoa. Didimiaḱ dulạṛ salaḱ kathate ho̠po̠n bạbu go̠go̠aḱ ańcar aṛaḱkate̠ kelaste̠ye̠ calaoena.

Didimuni do̠ uni kelasre̠ye̠ duṛuṕkedea are metadea-“ńe̠lkom am lekan tinạḱ gidrạ niạ kelasre̠ko paṛhaoḱkana. Onko jo̠to̠ge amre̠n gate kanako. Jo̠to̠ am sãote̠ choṛako me̠na, sereńako, e̠ne̠ćako tinạḱ rạskạ hoyoḱa”. Pạhil hilạḱ didimuni do̠ Ḍiṅ Ḍo̠ṅ cho̠ṛae cet́at́koa. Uni sãote jo̠to̠ ho̠ṛ Ḍiṅ Ḍo̠ṅ cho̠ṛako me̠nkeda. Me̠nkhan ho̠po̠n bạbu do̠ lajaote̠ ar bo̠to̠rte cho̠ṛa bae lại daṛeada, arhõ bhẽ bhẽ raraḱe dhurạuena. Raḱ ańjo̠mte eṭaḱ gidrạko do̠ cho̠ṛa lại thirkate̠ cahaṕkate̠ unigeko ko̠yo̠ḱkadea. Alo̠m raga am hõ bại bạite̠m ceda, are̠m me̠na. Didimuni do̠ ho̠po̠n bạbu sorre̠ bại bạite̠ lạikate̠ jo̠to̠koe cet́at́koa. Nonkate̠ din dintege uni hõ cho̠ṛae cet́keda ar lại hõe lại daṛekeda. Nito̠ḱ uni do̠ gateko sãote dinạm iskulte̠ye̠ calaḱa ar cho̠ṛa, sereń, e̠ne̠ćte̠ ạḍi ãṭe rạskạḱa. Ho̠po̠n bạbu ṭhe̠n iskul do̠ nito̠ḱ ạḍi rạskạwanaḱ jaega kana.

Tumạl: Ańjo̠m jo̠ṅ jạṛ