Chin reaḱ mit́ atore haṛam casa hoṛe tahẽkana. Cas lạgit́ uni hoṛren mit́ṭen Sadome tahẽkana. Mit́ din uni sadom do buru disom seće calaoena. Ado uni haṛam hoṛaḱ duk ńelte, oṛaḱ pheḍren mit́ hoṛe mengot́keda, cet́ arem mena. Amaḱ moloṅ do bạṛićgea.

Khange uni casa hoṛe menkeda, ‘moloṅ do bhage se bạṛićgea, ona do okoe baṅe baḍae. Mit́ hapta tayom sadom doe ruạṛ hećena. Uni sadom sãote mit́ pal bir sadom hõko hećena. Niạ dhao uni oṛaḱ pheḍren hoṛe menkeda, sạrige amaḱ moloṅ do ạḍi bhagegea. Uni casa hoṛ do niạ dhao hõ inạ kathage roṛ ruạṛkeda, ‘moloṅ do bhage se bạṛićgea, ona do okoe baṅe baḍae.

Inạkate uni hoṛren hopontet́ do onko sadom ko khon mit́ṭen sadom hataoe reaḱe kurumuṭukeda. Menkhan sadom aḱ dea khone ńurhoyente jaṅga rạput́entaea. Ona ńelte ḍher hoṛge bạṛić moloṅ reaḱ kathageko hudiskeda. Eken uni haṛam casa hoṛaḱ hudis tahẽkana, ‘moloṅ bạṛić se bhagea, ona do okoe baṅe baḍae.

Mit́ go̠ṭe̠ć kisạ̃ṛren gạiko ar maraṅ utạr mit́ṭen sãnḍe tahẽkana; bir seć idileko khać kul do̠e me̠na, Uni sãnḍ iń jo̠mle khan, ạḍi bạṛiće itil akana, ạḍi din iń tahẽ̠koḱa. Ar mit́ go̠ṭe̠n kombṛoe me̠njoṅa, Nui sãnḍ iń kombṛole khan ạḍi utạr ṭakateń ạkrińkea. Bhado̠r din jo̠khe̠ć tahẽ̠kana; kul hõ̠ ona dine nenḍa ṭhikana, ar kombṛo hõ̠. Ado̠ kul tinre co̠ṅ jonḍra gajaṛreye bo̠lo̠ thir akan tahẽ̠kana, are me̠njoṅ kana, Jạpit́legeko ho̠ṛ, ado̠ nãhãḱ iń kombṛo oḍokea. Khange uni kombṛo do̠e ńe̠lkedea uni kul, ado̠e me̠nket́a, Tinre co̠ṅ sãnḍe oḍok akan, kombṛo reaṅ jạruṛ do̠ baṅ hoelentińa, aćtet́geye he̠ćadińa. Ado̠e to̠lkedea. To̠lkede khan ado̠ cur mare piṭau idiyededa; khange setaḱ dela dili munḍu sećgeye ṭanaoḱ kana; khange bo̠ho̠ḱ cur mare piṭạu are mandaokedea.

Khange marsalena; ayoge, kul kanae! Raṛa go̠t́kedeae; ać mit́ se̠će dạṛket́a, kul do̠ bir se̠će dạṛket́a ahaṕ cahaṕ. Khange toyo do̠ kule metae kana, Okate, mamo̠, nunạḱ ãṭ do̠ ahaṕ cahaṕem dạṛet́a? Kule me̠nket́a, Bhạgnạ, cet́ iń me̠na? teheń do̠ mit́ ńindạ moḍ ṭhoṭkae saṕlidińa, mit́ ńindại moḍ ṭhoṭkakidińa. Cet́ lekanae, mamo̠, moḍ ṭhoṭka do̠? Delaṅ se̠ uduḱạńme. Ado̠ kule me̠nket́a, O̠ho̠ge bạbuń se̠nlena, moḍ ṭhoṭka ṭhe̠n do̠. Hạni ńe̠leme, do calaḱme. Bhala, mamo̠ń ńe̠legea. Ado̠e calaoena. Nui kombṛo ado̠e duṛuṕ akana, bhabnaḱ kanae, Jo̠mkińae ho̠ne̠ć kul do̠, cet́ iạte co̠ṅ bae jo̠mledińa? Khange toyoe ńe̠l ocoyen khan do̠e gitićena uni kombṛo do̠ oyo po̠ṭo̠mkate. Toyo do̠ beṛhaeteye  ạcuroḱ kana, are me̠njoṅ kana, Cet́ lekan moḍ ṭhoṭka kanae, bhalań ńe̠lea. Ado̠e ạcur idiḱ kanae bo̠ho̠ḱ se̠ć. Khange bại bạite kombṛo do̠ tiye husiạret́taea; khange phe̠ḍ canḍbolre saṕkate cun lekae ạcurkedea; ạcur ạcurteye laṅgayen khane capat́ go̠t́kadea. Ạḍi bạṛiće̠ bo̠to̠rena toyo do̠, are dạṛket́a le̠ṅge̠t́ sopot́; kule tioḱkede khane me̠nket́a, Baṅ kanae, mamo̠, moḍ ṭhoṭka do̠, ghur pãk kanae, ińgem e̠ṛe̠kidińa. Khange dạṛ dạṛte banatikinkin ńapamena; ado̠e metae kana, Okate, bhạgnạ, nunạḱ ãṭ do̠m dạṛet́a?

Toyoe ro̠ṛ ruạṛket́a, Cet́ baṅ, mamo̠m me̠nte, mit́ go̠ṭe̠n ghur pãke ghur pãkkidińa se, gujuḱ lekań ạikạu akat́a. Ado̠ banae me̠nket́a, Cet́ lekan bae bhạgnạ? Onkanko do̠ ko̠to̠ń jo̠m akat́koa. O̠ho̠ mamo̠m jo̠mlea ho, ińiń baḍaeyet́a; do e̠nte̠m jo̠me khać. Khangeye calaḱ kana. Uni ho̠ṛ do̠ ado̠e duṛuṕ akana, banae ńe̠lkedea, hijuḱ kanae iń sećte. Khangeye me̠nket́a, Jo̠meńae, darereń de̠joḱa, baṅkhan khạṭigeye jo̠meńa. Ado̠e de̠ćena, uni tayo̠mte bana hõ̠e de̠ćena. Khange le̠ṅge̠t́ sopot́ co̠ṭteye de̠ć idiyena ho̠ṛ do̠, bana hõ̠e de̠ć idiyena; ḍher laphaṅen khan nanha ḍạrte khange hamalte rạput́ena, ńũr go̠t́enakin; bana do̠e latarena ar ho̠ṛ do̠e bana cetanre; oṛgo poṛgo chaḍaoenteye dạṛket́a bana do̠. Khange toyotikinkin ńapamena, ado̠e me̠net́a, Am do̠, bhạgnạ, ạḍim pago̠la, iń do̠m e̠ṛe̠kidińa, baṅma, ghur pãk kanae. Baṅ kanae ghur pãk do̠, upo̠r cap kanae.

Mit́ṭaṅ ạn purkhạ Jisu ṭhen hećkate biḍạue lạgit́e metadea, Henda guru cet́ iń cekalere jaejug jivet́ iń ạidạrijoṅa? Jisui metadea, Ạnre do cet́ ol akana? Ạn purkhại roṛ ruạṛadea, Probhu amren Isor amaḱ goṭa ontorte, ar amaḱ goṭa jivite, amaḱ goṭa monte ar amaḱ goṭa ontorte dulạṛem, ar am pheḍren hoṛ do apnar leka dulạṛem. Menkhan uni ạn purkhạ do dhorom dekhaoḱ sanaye kante Jisui metadea, Ar iń pheḍren hoṛ doe okoe kana? Jisui metadea, Mit́ṭaṅ hoṛ Jirusalem khon Jirikhoteye ãṛgo calaḱ kan tahẽkana, ar ḍạkuko talareye paṛaoena. Onko do uni dalkedeteko calaoena, uni admạruạ oṭokate. Khange mit́ṭaṅ naeke hoṛ ona horteye ãṛgo calaḱ kan tahẽkanre, uni ńelkateye sa parom calaoena. Onka leka mit́ṭaṅ Levi hoṛ hõ ona jaega ṭhen senente ar uni ńelkedeteye sa parom calaoena.

Menkhan mit́ṭaṅ Samariạren hoṛ daṛanreye sen ńamkedea, ar ńelkedete mãyã hećadea, ar sen sorkate uniaḱ ghạlko bạdhiket́te sunum ar darkha rasae dulat́a, ar aćren janwarre dećkedete mit́ṭan ḍera oṛaḱte idikateye jotonkedea. Dosar hiloḱ calaḱ jokheć barea siki oḍokkate ḍera kisạ̃ṛ emadeteye metadea, Nui do bhage leka jotonem, ar jãhãnaḱ bạṛtim khoroćle khan, ruạṛoḱreń emkatama. Am bujre do onko pe hoṛ modre ḍạkuko talare paṛaolenićren pheḍ hoṛ do okoye hoyena? Uni ạn purkhại roṛ ruạṛadea, Dayawadeićge. Khange Jisui metadea, Am hõ senkate onka lekaeme.

Noa eneć do oko eneć hõko metaḱa. Aghãṛ jokhen khạṛikore eneć do ạḍi jutoḱa. Eṭaḱ oktere hõ kulhikore eneć ko mod khon mit́ṭen sẽṛa gidrạ do mukhiạye hoyoḱa menteko bachaoea. Mukhiạ oka jaegareye duṛuṕ tahẽna onḍege enećkoaḱ eneć gạḍi do.

Eneć-mukhiạ do aćaḱ ti se jaṅga kạṭuṕ mit́ṭene ṭhoćkaḱa ar enećko do bae baḍae ocokoa. Enećko aćaḱ ti ar jaṅga kạṭuṕe saṕ ocokoa. Jãhãege ṭhoćaḱ kạṭuṕe sab unigeye ḍomena. Mukhiạ do uni ḍomen gidrạye bedeya. Jotokote bohoḱ se deyare bạibạite nonka bakhẽṛteko ṭuṕ ṭuṕ oṭokaya, bhela ṭuṕ ṭuṕ sarać suruć. Ṭuṕ ṭuṕkate gidrạko do apan ạpin hante nate dạṛteko okoḱa; oko cabalen khan kuhu menkate ạḍi garteko kikiạu got́kaḱa. Ar uni chakaowea mente arhõ kuhulet́ khon eṭaḱ jaega seć dạṛteko okoḱa.

Kuhu tayom mukhiạ do uni ḍom akan gidrạye aṛaḱgot́ kaya. Uni gidrạ do ṭamak reaḱ saḍi, kuṛum ḍubu ḍubu wate sesendraye oḍok calaḱa. Kuṛi gidrạ koṛa gidrạko eneć mit́ daṛeaḱgea. Bae ńam daṛeako khan oko akan gidrạko do ạḍiko rạskạḱa ar kuhu kuhu wate biḍ biḍko dạṛa ar eneć gạḍi ṭhenko ńir hijuḱte mukhiạko joṭedea. Eneć gạḍiko seṭerlen khanko rajayena. Jãhãe gidrạ gạḍi ạuri tiogreye joṭet́ daṛeako khan pạhil gidrạge ḍome tahẽna. Nonkage eneć do calao idiḱa ạuri ko ạṛisoḱ hạbić. Niạ eneć reaḱ bogeaḱ do: Ńir baṛaete hoṛmo reaḱ sanam hĩs ko tińạuḱ kana. Noa enećte do lutur reaḱ aḱańjom daṛe sadhaoḱ takoa.

Baṅladisom ạḍi mońja

Ńaloḱ bagan leka

Ona talare menaḱbona

Abo baha leka.

Menaḱbona hindu camar

Arhõ muslạ ar hõ kamar

Arhõ aema jạti.

Hiskạ bạḍại bạgikate

Tahẽnabon mit́ sate

Mońjge milạuate

Jomabon ńuyabon

Disạm talarege

Disạm tabon dulạṛtabon

Mone jiwitege.

Ado̠e metadea, Ma ro̠ṛme. Cet́teń ko̠m akante bań emama? E̠nḍe̠khan nui seta reaḱ damge o̠ho̠ń e̠m daṛelea. mase̠ bhala ro̠ṛme. Ado̠ uni koṛae me̠nket́a, Nui seta reaḱ dam do̠, baba, lak pońcas rabaṅe jo̠met́a. Ado̠ lak pońcas ṭakam e̠moḱ khan do̠ń emama, ar baṅkhan do̠ o̠ho̠ń e̠mlema. Inạ khusire khusi, baṅre baṅ. Ado̠ judi uni setam hataoe khan, ma inạḱ ṭakam emańme ar nui setań emama; ar baṅkhan e̠mte̠t́ge baṅ emama. Ma ado̠ cet́em me̠net́a? Ar baṅkhan iń do̠ń calaḱ kana. Ado̠ uni haṛame me̠nket́a, Acha, hataogeań. Delaṅ oṛaḱreń emama, ar nui seta hõ̠ idi torayem. Ado̠ sạri uni koṛa do̠ setae to̠lkedete uni haṛam tay̠o̠m tayo̠mteye idikedea, ado uni haṛam oṛaḱreye to̠lkedea. Ado̠ lak pońcas ṭakako lakhawadea. Ado̠ ona ṭaka moṭeamkate oṛaḱteye ruạṛena.Ado̠ oṛaḱre se̠nkate dadattikine metakin kana, Ma iń lạgit́ bạhubon ńamkoa. Ado̠kin metadea, Am kuṛhiạ ho̠ṛ do̠ o̠ko̠e re̠be̠nama? Ar ạliń do̠ ṭaka poesa hõ̠ bạnuḱtalińa. Ma amte baṛe̠ ńamkom ar bạhujoṅme.

Ado̠ uni kuṛhiạ koṛae me̠nket́a, Henda ya,aben do̠ unạḱben kạmi kanre hõ̠, okor tinạḱben arjao akat́a, ar okor tinạḱben ṭaka akat́a? Sedae khon tho̠ mit́ talaoge kuṛhiạ kuṛhiạgeben ruhet́ediń kana. Ma aben leka teṅgonben; je kichu baplare kho̠ro̠coḱ, ona do̠ ińtegeń e̠ma, aben do̠ o̠ho̠ń e̠m ocolebena. Ado̠kin me̠nket́a, Henda ya, ṭaka do̠ menaḱtama? Ado̠e me̠nket́a, Hẽ̠ ya, nõ̠ḱõ̠e ńe̠ltińben; tinạḱ kho̠ro̠coḱ, unạḱgeń e̠ma. Ado̠ khange dadattikin ạḍikin hahaṛayena; ado̠kin gatekedea ona ṭaka ńe̠lket́te; ar baṅkhan pạhil do̠ ạḍikin ruhet́ede kan tahẽ̠kana. Ado̠ tayo̠mte do̠ ruhet́tet̠́ge bakin ruhet́ledea. Ado̠ bạhuko ńamkedeteko bạhuadea; ado̠ mit́regeko tahẽ̠yena. Ar uni setae kirińlede haṛam do̠ ạḍiye rạskạḱ kana, ar uni seta hõ̠ khub dakae emae kana. Ado̠ kathae,ạyuṕen khan,guti koṛae metae kana, E̠ yoi phalna,ma nui seta do̠ khạrạite idi torayepe ar kumbạ duạṛ ṭhen to̠lkaepe, ar setaḱ jo̠khe̠n manḍape laḱgaoa; unre do̠ nui seta hõ̠ tiạḱ ạcurepe, ar un jo̠khe̠n do̠ oyon kićrićko do̠ jo̠to̠ do̠ho̠kape, nui setage nãhãḱ apeaḱ rabaṅ do̠e jo̠ma. Uni seta kisạ̃ṛe metadińa, baṅma, nui seta do̠ lak pońcas rabaṅe jo̠ma. Ona iạte iń do̠ nui setań kiriń akadea; ado̠ onate apeń metape kana, kićrić do̠ho̠kate manḍa do̠ laḱgape; onka biḍạuepe, bhalae jo̠ma se̠ baṅ. Ado̠ sạri kisạ̃ṛ onkae hukumket́ khan do̠ khạrạiteko idi torakedea uni set do̠. Ar o̠ne̠ye metat́ko lekage uni seta do̠ kumbạ duạrreko to̠lkadea, ado̠ e̠nre hõ̠ bogete rabaṅko. Ado̠ko me̠net́a, Henda ya, okore jo̠m daramet́a?Pạhil leka rabaṅ kan do̠. Ado̠ ado̠m ho̠ṛko me̠net́a, O̠ko̠ baḍae;iạ setage, bhagete humạge ma tho̠! Arhõ̠ ado̠ ho̠ṛ do̠ko me̠net́a, Baṅa ya,kisạ̃ṛe ruhet́bona,babo dalea.

Ado̠ sim raḱen khan,manḍako laḱga kana; ado̠ mit́ ho̠ṛe me̠nket́am, Kisạ̃ṛe me̠n akat́a, Manḍa laḱga jo̠khe̠n kicrić do̠ho̠kate nui seta tiạḱkate manḍa do̠ lagaepe, bhala ado̠ń biḍạutabona, jo̠ma se̠ye baṅ. Ado̠ sạri kicrić do̠ho̠kate setae tiạḱ akadea ar manḍae laḱga kana, ado̠ kathae, bogete rabaṅkede khane me̠nket́a, E ya, iń do̠ń tiạḱ bhagaoena, ado̠ ni ape se̠ ape pạri tiạḱletabonpe. Ado̠ sạri dosra gutiye tiạḱkedea, ado̠ uni hõ̠e bhagaoena, ado̠e me̠nket́a, Iạ setageń tiạḱ baṛayea! Bogete eṅgate rabaṅediń kana. Ni ya, jãhãepe tiạge khan,ar baṅkhan iń to̠l iạkaea. Ado̠ko metadea, Ma to̠l iạkaeme; rabaṅ hõ̠ eṅgate bae jo̠met́a, cet́ ạuṛi do̠bon tiạḱ baṛayea? Ado̠e me̠nket́a, E̠nḍe̠khan iń to̠lkae kana. Ado̠ko me̠nket́a, O̠ko̠ baḍae e̠nte, tiạḱ sanayet́me khan, ma tiạgem, ar baṅ sanayet́me khan do̠ to̠lkaeme; me̠nkhan ale do̠ o̠ho̠le tiạḱ baṛalea. Ado̠ onkako me̠nket́ khan, arhõ̠ ona kumbạ duạrregeye to̠l dapoṛkadea.Ado̠ setaḱ khange, kathae, uni setae kiriń akade kisạ̃ṛ ho̠ṛ do̠e he̠ć go̠t́ena; ado̠e metako kana, Henda ya, ape do̠ cet́ lekan ho̠ṛ kanape? Seta tiạḱ iń metat́pe khan, ape do̠pe to̠l akadea. Cedaḱ bape tiạḱede kana? Ado̠ko me̠nket́a, Iạ setage, ale do̠ o̠ho̠le tiạḱ baṛalea. Rabaṅ hõ̠ eṅgate bae jo̠met́a, cet́ ajwaṛi do̠le tiạḱaea? Ma amgem kiriń akadea, am baṛe̠ tiạḱ dapoṛem. Ale do̠ enan sim raḱ khonle tiạḱ bhagao akana, ale do̠ o̠ho̠le tiạḱ baṛalea.

Ado̠e me̠nket́a, Dini se̠, raṛa ạguạńpe. Lak pońcas ṭakate eṅgateń kiriń akadea; nahage e̠nḍe̠khan unạḱ ṭakań e̠mket́ do̠. Ado̠ sạriko raṛa ạguadea; ado̠ bhại, kicrićko do̠ho̠ baṛa go̠t́ket́a, ado̠ seta tiạḱkate manḍae laḱga kana. Ado̠ bar pe̠ dhaoe laga ạcurlet́ko khange rabaṅteye thar tharaoena. Ado̠e metako kana, Ni se̠ ya, tiạḱ legalepe. Ado̠ko me̠nket́a, Ale do̠ enanlere tiạḱ bhagao akana, o̠ho̠le tiạḱlea. Ma amge tiạḱ sanayet́me khan, tiạgem, ar baṅkhan do̠ aṛaḱkaeme. Ado̠ uni kisạ̃ṛ ho̠ṛ hõ̠e tiạḱ baṛakedea; ado̠ rabaṅ hõ̠ bae jo̠met́ khan do̠ edreyente humạḱe humạḱkedea. se̠, andhe pathạuṛiye dalkedea. Khange uni seta do̠ kao kaoe garjaoet́a are ciḍiret́a. Khange ado̠ dal dalteye dal go̠ć utạrkedea. Ado̠ onko guti ho̠ṛ hõ̠ko he̠ćena; ado̠ onko guti koṛa do̠ ona kathako lạiako kan khać, onko ato ho̠ṛ hõ̠ bogete uni kisạ̃ṛko landawadea. Ado̠ e̠ne̠ cabayena.

Ado̠ onko guti koṛako me̠net́a, Noa manḍare do̠m dal ić akadea; ale do̠ busuṕ hõ̠ o̠ho̠le giḍilea;ma am baṛe̠ g̣iḍi iạkam. Ado̠ uni kisạ̃ṛ do̠ cet́ hõ̠ bae ro̠ṛlet́a. Ado̠ enkageko ro̠ṛkat́a, giḍi do̠ bako giḍi ocoledea, akogeko giḍiket́ Ado̠ mucạt́ utạrena katha do̠; in maraṅgea.

Gate cedaḱ co amgeń uihạrme

Siń ńindạ amgeń disạme

Setaḱre kuhuli aṛaṅ

Ańjomte amem hohoạń

Kan lekań bujhạua

Siń candowaḱ setaḱ

Marsal ńelte amem

Landayet́ lekań ạikạua.

Baḍaeam ińaḱ mone bhitrire

Amgeń tunum ńamet́mea.

Am são ńapam lạgit́

Ṭhạ̃i mãhã ińaḱ mone

regeń goṭa ạcura.

Am samaṅre oka lekań

Teṅgona, oka lekań roṛa

Mone moneteń goṭa doho kaḱa.

Paṛhao ar bam paṛhao

Amaḱ muṭhạn ińaḱ

Monereń thapon akada

Jaejug am dulạṛgeń goṭa akada.

Ado̠ onka me̠n baṛakate ona se̠ṅge̠l aṛe aṛeteye kunḍlạṅena. Ado̠ oyon lạgit́ bhagwae raṛayet́ tahẽ̠kana. Ado̠ tisre co̠ṅ, kathae, nạṛi sutạme gocha akat́ tahẽ̠kane ńamket́, ado̠e me̠nket́a, kićrić hõ̠ tho̠ sutạm reaḱgeko benaoet́a; to̠be̠ noa hõ̠ kicrić kangea, iń do̠ noategeń oyona. Ado̠ onka hudis baṛakate uni koṛa do̠e gitićente ona nạṛi sutạm do̠ jaṅga kạṭuṕreye pạsiket́te luturreye baḱket́a; ado̠ ona sutạm ạuri cabaḱ dhạbić onkage banar luturreye baḱket́a, ar sojheteye telńjo akat́a. Ado̠ tinre co̠ṅ se̠ṅge̠l do̠ ĩṛĩćen, bae disạlet́a. Ado̠ ona to̠ro̠ć cetanre okaren seta co̠ṅ he̠ćkateye burum akan, ar uni seta hõ̠ ạnạṛigeye ńe̠loḱ kana.

Ado̠ ona atoren mạńjhi do̠, kathae, khub kisạ̃ṛ ho̠ṛe tahẽ̠kana, ar guti kạmṛĩ hõ̠ aema menaḱkotaea. Ado̠ setaḱ jo̠khe̠n hoṛo e̠n lạgit́ e̠n hiloḱ do̠ aćte̠t́tege kaḍa ḍaṅgrae laga idiyet́koa. Ado̠ kulhi mucạt́re uni koṛa ar seta gitić akan ńe̠lte kaḍa ḍaṅgrako do̠ mit́ se̠nko sahaṛ idiḱ kana. Ado̠e me̠net́a, Ayo, cele ńe̠lte bako bhirkạuḱ kan? Ado̠ko paro̠m cabayen khane ńe̠le kan do̠, mit́ ho̠ṛ ar setakin gitić akan. Khange ado̠ mạńjhi haṛame ho̠ho̠ket́a,Henda ho, o̠ko̠e no̠nḍe̠ do̠pe gitić akana? Khange ado̠ uni koṛa do̠ ãs ũse beret́ go̠t́ena; ado̠e me̠n go̠t́ket́a,Durre̠! Tinre eṅgate aṅga go̠t́ena? Disạ hõ̠ bạń disạlet́a.Ona katha ańjo̠mte uni mạńjhi haṛam do̠ ạḍiye hahaṛayena. Ado̠e kulikedea, Henda bạbu, baṅ rabaṅet́mea? Ado̠e me̠nket́a, Baṅ, baba, rabaṅediń kana, nõ̠ḱõ̠e co̠ṅ oyo akange. Ar se̠ye ńe̠lkedea koṭoge, e̠ke̠n sutạmtegeye ganaḱ baṛa akan. Ado̠ mạńjhi haṛame me̠nket́a, Iń ma, bạbu, ạḍi bạṛić rabaṅediń kana ar am ma koṭoge, onateń kuliyet́mea, Bhala am do̠ rabaṅet́mea se̠ baṅ?

Ado̠ uni koṛae me̠nket́a, Ińaḱ rabaṅ do̠, baba, nui setageye jo̠m horayet́tińa. Nui seta do̠, lak pońcas rabaṅe jo̠met́ kana; onate iń do̠ baṅ rabaṅediń kana. Ado̠ ona katha ańjo̠mte hõ̠ uni mạńjhi haṛam do̠e hahaṛayena. Ado̠ mo̠ne̠ mo̠ne̠te uni haṛam do̠e hudis baṛaket́a, Iń do̠ bo̠cho̠r bo̠cho̠r guti kạmṛĩ kićrićko lạgit́ ạḍi bạṛić ṭakań kho̠ro̠cet́ kana; ado̠ e̠nre hõ̠ rabaṅge bale aṭkao daṛeaḱ kana, bogete rabaṅet́lea. Ado̠ ạkhirge baṅ ạkhir iń di̠ nui setageń kirińea;inạ do̠ jo̠to̠ rabaṅe jo̠m horaetalea. Ado̠ onka bujhạu baṛakate sạri khange uni koṛae metadea, Iạ, bạbu, dini nui seta do̠ e̠moḱme. Khange koṛae me̠nket́a, O̠ho̠ babań e̠mlema; nui seta iạte rabaṅiń bańcaoḱ kana. Ado̠ uni haṛame me̠nket́a,Onkate bam e̠moḱ kan khac, dam iń emama; e̠nre hõ̠ nui seta do̠m e̠moḱgea. Ado̠ ma nui seta reaḱ dam lạime tinạḱem hataoa. Ado̠ uni koṛae me̠nket́a,Iạ bạbu, nui setam hataole khan, ạḍi bạṛićem dusko ocońa. Dam lạlại hõ̠ sanayedińa, ar baṅ hõ̠ baṅ. Pase̠ dam iń ro̠ṛle khan, unạḱ do̠ pase̠ o̠ho̠m e̠mlen. Ado̠ uni haṛame me̠nket́a, Ma e̠nte ro̠ṛme; tinạḱem me̠na, unạḱgeń emama. Ado̠ uni koṛae me̠nket́a, Iń do̠ ạikhạ mit́ dhaoge nui seta reaḱ dam do̠ń ro̠ṛa.Ado̠ unạḱ ṭakam emań khan do̠ń emama, ar baṅkhan do̠ bań e̠moḱa.

Meskoć

Mona pagla ńutuman mit́ṭen koṛa gidrại tahẽkana. Uni koṛa gidrạ ar eṅgat́tet́ aḱ galmarao-

Mona: E go, teheń ińreń gateko oṛaḱ ko hijuḱa, joto gateć se khilạḍ jinisko oṛaḱ bhitrire okokaḱme.

Mona Eṅgat́: Cedaḱ beṭa? Amren gateko do kombṛo kana ko se cet́? Ar cekate kombṛo sãotem gateć kana?

Mona: Baṅ go, am do bhulem bujhạueda! Onko do kombṛo doko baṅ kana. Ente noa gateć jinis bam oko lekhan akoaḱ jinis nãhãḱ ạḍi algatege ko ńel ṭhik daṛeaḱa.  

Sedae jo̠khe̠n, kathae, mit́ṭaṅ atore mit́ ho̠ṛe tahẽ̠kana, ar uni ho̠ṛren do̠ pe̠a kuṛi ho̠po̠n ar pe̠a do̠ koṛa ho̠po̠nko tahẽ̠kantaea. Ado̠ bareae bạhuat́kin tay̠o̠mge uni ho̠ṛ do̠e benḍaoena. Ar nukin bạhuat́kin koṛa do̠ khubkin kạmia, ar uni ḍạṅguạ menae koṛa do̠ ạḍiye kuṛhiạgea. Jãhãnaḱko ạcuyea, baṅgeye re̠be̠na, lutur hõ̠ bae ṭhepe̠a, ar jo̠jo̠m ghuṛi khan, unige laha lahae chuṭạuḱa. Onate unkin napṛaḱkin dadattekin do̠ ạḍi bạṛićkin ruhedea, metaeakin, Henda ya, am do̠ cetat aṅgra hõ̠ bam chuṭạuḱ do̠, cekate nonkate do̠m ạsuloḱa? Ar nonkate do̠ cekate bạhu hõ̠ko tahe̠na? Am do̠ nun maraṅem harayena, cet́ge bam laṛaoḱ kan do̠. Begar giḍi dapoṛkamaliń.

Ado̠ onkako ruhedere hõ̠, e̠n hõ̠ uni do̠ bae mo̠ne̠aḱa; luturge bae ṭhe̠pe̠a. Ado̠ onka hẽsa hĩsite kạmi hõ̠ko ḍhil idiket́a; ado̠ pạhil khon do̠ko hạrsuṛenteko re̠ṅge̠ćena, ar uni koṛa do̠ edrete bạhu hõ̠ bako bạhuae kana. Ado̠ khange mit́ din do̠e usạt́ente bidese oḍok calaḱ kana; ado̠ kićrićko hõ̠ bạnuḱtaea, inạ ḍeṅganaḱ eskarge menaḱtaea, ado̠ koṭotegeye oḍok calaḱ kana. Ado̠ bhại, calaḱ calaḱte tin sạṅgiń co̠e calaoen; ado̠e ạyuṕen khan, mit́ṭaṅ atoe ńe̠l ńamket́a, ado̠e me̠nket́a, O̠ko̠e tora ona atoteń rakaṕa, teheń ńindạ do̠ ona atoreń gitić aṅgaḱa. Ar ona jo̠khe̠n do̠ Pus cando tahẽ̠kante rabaṅ hõ̠ ạḍi ãṭ rabaṅ kan tahẽ̠kana, ar uni koṛa do̠ kićrić bạnuḱtaete ạḍi ãṭ rabaṅede kana.

Ado̠ ona atoe tiogtegeye ńuhumena. Ado̠ ona atoren gại gupi koṛa do̠ kulhi mucạt́re se̠ṅge̠l jolkate goḍoko lat́ jo̠met́koe ńe̠lket́koa. Ado̠ rabaṅede kanteye me̠nket́́a, O̠ko̠e tora ona se̠ṅge̠lreń joroḱ ńo̠ḱlenge. Ado̠ onka me̠nkate onko gupi koṛako jol akat́ ṭhene calaoena. Ado̠e metako kana, De̠ bạbu, mit́ se̠n joroḱ ocoạńpe, ạḍi bạṛić rabaṅediń kana. Ado̠ onkae metat́kote mit́ sećreye duṛuṕena, ado̠e metako kana, Henda bạbu, noa do̠ cet́ ato kantapea? Khange ado̠ko lạiadea. Ado̠ goḍoko lat́ rapaḱ baṛaket́koa, ado̠ hạṭiń baṛaket́kote uni hõ̠ko emadea;ar ako hõ̠ko jo̠mket́ khan, apan ạpin akoaḱ oṛaḱteko dạṛ idiket́a; uni do̠ o̠nḍegeko bạgiadea. Ado̠ uni koṛa do̠ o̠nḍe̠geye joroḱ akangea. Ado̠ onko gidrạko idilet́ sahankogeye tiṅgiyet́ kana; ado̠e duṛuṕ akangea. Ado̠ duṛuṕ duṛuṕteye laṅgayen khane me̠nket́a, Nit do̠ ho̠ṛ hõ̠ko jạpit́ket́a, ạuṛi do̠ o̠ko̠e oṛaḱteń calaḱa? Pase̠ pinḍạko hõ̠ bạnuḱtako khan, okareń gitića? Ar oṛaḱ oṛaḱ tinạḱ iń kuli baṛakoa?O̠ho̠ń se̠nlena; ne̠nḍe̠ge niạ se̠ṅge̠l aṛeregeń gitić aṅgaḱa.

Tumạl: Santal Folk Tales