Meskoć

Meskoć

Mahasoe kelasre gidrạkoe metat́koa,

Mahasoe: Ḍaṅgra ghãse jojom kana nonkan chobi ãkaope.

Thoṛa ghạṛić tạyom-

Pạṭhuạ gidrạ: Mahasoe, ãkao sạtkedạń.

Mahasoe: Dhamkaoate mengot́keda, Ḍaṅgra ghãse jomeda, nonkan chobi ãkaope ar am do Ḍaṅgra eskarem ãkao akadea.

Pạthuạ gidrạ: Mahasoe, joto ghãs Ḍaṅgrae jom cabakeda.

Gupi Koṛawaḱ Golpo

Mit́ṭen reṅgeć gupi koṛae tahẽkana. Uniaḱ gharońjre do eken ać eṅgat chaḍa okoe hõ bako tahẽkana. Uni do ḍaṅgra gupi koṛae tahẽkana. Aćren do jãhãn ḍaṅgra hõ bako tahẽkantaea. Menkhan eṭaḱ hoṛ ren ḍaṅgarae gupiyet́ko tahẽkana. Ar ạyuṕ bela do joto oṛaḱe laga samṭao ạgukoa. Uni koṛa do aćren eṅgat okae emaea, inạge joma. Cet́ hõ bae roṛa. Jom ńu kate aṭet́re senoḱte jạpit́joṅa. Mit́ din gupi koṛaren eṅgat doe menkeda, beṭa, ar tinạḱ din eṭaḱ hoṛ ren ḍaṅgram gupikoa? Niạ dhao am hõ mit́ṭen ḍaṅgra kirińem.

Ać eṅgat aḱ katha ańjomte uni koṛa do ạḍige rạskạyena. Rạskạte uni do eṅgat́tet́e metadea, amaḱ kathage hoyoḱ ma, jãhã lekatege ḍaṅgraṅ kirińea. Aćren gidrạwaḱ katha ańjomte eṅgat hõ bogete kusiyena. Dosar hiloḱ gupi ṭaṅḍire mit́ṭen ul dare buṭạre duṛuṕena. Adoe gunạnoḱ kana, cekate ḍaṅgrae kirińea. Unre inạ okterege dare khon mit́ṭen ul ńurena. Gupi koṛa do ule halaṅ got́keda. Ado kajak reṅgeć akade tahẽkante mocare idi got́keda. Menkhan Ona ule jomket́re ạḍi ãṭ jojokedea. Ente ona ul do ạḍi jojoge tahẽkana. Gupi koṛa do mit́ dhaoe gerkeda are giḍikeda. Noa ńelte ul dare do duke ńamkeda. Adoe metadea, E, gupi koṛa noa ul do alom giḍia, jom me. Ul dare reaḱ katha lekage gupi koṛa do ona ul arhõe saṕkeda. Adoe metadea, amaḱ ul do ạḍige jojogea. Baṅ jomoḱa. Ul dare doe menkeda, baḍaegeạń.

Ińạḱ ul jom me, enḍekhan aema utạr hirạ moti iń emama. Khange gupi koṛa do ona ul dare reaḱ kathate bhorsayena. Uni do jojo ule jomkeda. Jom tayome menkeda, den niạ dhao hirạ moti emạńme. Khange ul dare menkeda, ińaḱ leṅga aṛere hasa la ghạḍluḱ me. Onḍe eyae goṭen sonạ reaḱ kanḍam ńama. Ona kanḍa do hirạ motite pereć menaḱa. Ado gupi koṛa do ul dare reaḱ leṅga aṛe la keda. La ket́ khane eyae goṭen lạṭu lạṭu sona kanḍae ńamkeda. Ado joto kanḍae rakaṕkeda. Are ńelkeda sạrige hirạ motite kanḍa do pereć akana. Ona Kanḍa ńamkate ạḍi ãṭe rạskạyena.

Inạkate ul dare menkeda, ańjomme, niạ dhao cekate ińaḱ ul do nunạḱ jojogea. Heṛem ul do joto hoṛ jojomko mena. Aema hoṛ do ṭheṅga ante otko gutukea. Mit́ okte hirạ moti hõko ńamkea. Menkhan bạń as akana, eṭaḱ jãhãe lubhiạ hoṛko ńama mente. Noako hirạ moti nana parkanteko khoroć giḍikea. Am dom sada sidhạgea. Eṭaḱ hoṛ leka dom baṅ kana ar eṭaḱ hoṛ ren ḍaṅgra gupikate dinem khemaoeda. Onate amge noa hirạ moti doń emam kana. Noako oṛaḱ idime. Thoṛa thoṛate ạkhriń kate ṭaka paesa sõc joṅme. Am lekan reṅgeć nacarko goṛowako kurumuṭuime. Eṭaḱ hoṛaḱ ṭaka paesa alom lalocaḱa. Am do sạri horre tahẽnme. Khange eyae goṭen hirạ moti oṛaḱe idikeda. Ar ona ul dare aḱ katha lekage kạmi keda. Aćren eṅgat sãote sulukte jiṅgi khemaoe ehoṕena.

Pe̠a Phul Ar Bidhi Bidhạnta

Ol toṅgeyena-

Ado̠ unkinkin me̠nlet́ lekakin benaoket́a, ar cẽ̠ṛẽ̠kin me̠nlet́ lekage parko̠mre de̠ćentekin ro̠ṛket́a, Uṛ khạṭlạ uṛ jao, e̠kdo̠m se̠ kãṛã rajake̠ gharme̠ bạiṭh jao. Ado̠ sạrige uḍạuena, e̠kkalte kãṛã rajaḱ oṛaḱte, ado̠ racare ńũrena. Kãṛã raj do̠ ona ńe̠lkate ạḍiye rạskạyena; ado̠ aćren mạli buḍhiye metadea, Am do̠, mạli buḍhi, noa uḍạuḱ parko̠mre de̠ćkate hạni rakas ho̠po̠nera ṭhen calaḱme, ar uni jãhã lekatem de̠ć ạgule khan ạḍi boge hoekoḱa. Ado̠ uni mạli buḍhiye calaoena e̠kkalte uni rạni oṛaḱte, uniaḱ oṛaḱre do̠ bae do̠ho̠let́a; oka darhare uni kuṛiye umoḱ ona darha bhitrireye unum oṭokat́a, ar ać do̠ kuṛiaḱ oṛaḱteye calaoena. Ado̠ uni kuṛiye metadea, Henda mại, am do̠ okarem umoḱ kana? Delalaṅ um hijuḱa.

Kuṛiye me̠nket́a, Dela e̠nte go̠ṛo̠mlaṅ um hijuḱa. Ado̠ uni kuṛi ar uni buḍhi darhate umoḱkin calaoena. Ado̠ oka darhare uḍạuḱ parko̠me do̠ho̠let́a, ona darhategekin calaoena; ado̠ umoḱkin bo̠lo̠yena. Buḍhi do̠ thoṛa bhitri ńõ̠ḱe bo̠lo̠yena; oka ṭhen uḍạuḱ parko̠me unum akat́ bo̠lo̠kate onaregeye duṛuṕena, kuṛi ma aće umoḱ ghaṭreye bo̠lo̠ akan. Ado̠ buḍhiye me̠net́a, Henda mại, no̠te̠ do̠ bam bo̠lo̠ḱa? No̠nḍe co̠ṅ ạḍi mõ̠ńj duṛuṕ jaega menaḱ. Ado̠ uni kuṛiye me̠nket́a, Sạrige, go̠ro̠̠m? Uni buḍhiye ro̠ṛ ruạṛket́a, Hẽ̠, sạrige. Ado̠ uni kuṛi buḍhi menae ṭhene se̠nena. Buḍhi do̠e ro̠ṛ go̠t́ket́a, Noare go̠ṛo̠m duṛuṕkatelaṅ iskiroḱa. Ado̠ napae onare duṛuṕkatekin iskir baṛaḱ kana. Ado̠ uni kuṛi bae baḍaejoṅ kana, je̠ nui buḍhi do̠ kãṛã raj ṭhene idiyiń lạgit́; ado̠ uni buḍhi do̠ bại bạite nonkae ro̠ṛket́a, Uṛ khạṭlạ uṛ jao, e̠kdo̠m se̠ kãṛã rajake̠ pas jakar bạiṭh jao. Ado̠ inạ ro̠ṛtege ona parko̠m do̠ daḱ khon ạḍi coṭ ạpir rakaṕena. Ado̠ e̠kkalte kãṛã raj reaṅ racare se̠nkate pheḍena. Ado̠ uni kuṛiaḱ uṕ do̠ e̠kkalte racare taseyentaea. Kãṛã raj oḍokenteye ńe̠lket́a, uṕ do̠ sạrige ạḍi jeleńtaea. Ado̠ unre rạni do̠ kãṛã raje metae kana, Henda raj, am do̠ cedaḱem ạgu akadińa?

Unre kãṛã raj do̠e ro̠ṛ ruạṛket́a, Am do̠ho̠me lạgit́iń ạgu akat́mea; ado̠m tahe̠na se̠ baṅ? Ado̠ uni kuṛiye me̠nket́a, Henda raja, nonka do̠ cet́ leka?Am do̠ raja lekan ho̠ṛ, bapla katege bam ạguyińa? Iń do̠ okate hõ̠ co̠ṅ bạń dạṛet́a; ruạṛkạńme, ado̠ nenḍakate calaḱme. Ado̠e ruạṛkadea. Inạ tayom khange uniren jãwãe do̠ banteko go̠ćkedea. Uni kuṛi do̠ ạḍi bhabnaye ạikạuket́a, ạuriye gujuḱreye lạiadea, Ińaḱ ho̠ṛmo̠ reaḱ tinạḱ to̠ro̠ć nãhãḱ hoyoḱa, ona am do̠ sanam hạr samṭaokate nawa bhajanre do̠ho̠kam. Ado̠ sạrige uniye metade lekae kạmiket́a. Ado̠ ona dinrege unkin pạhilkin se̠nlen Kạmru disom khon ạḍi lekan bidiạ cet́katekin he̠ćena, ar uni rạni ṭhenkin bo̠lo̠yena arkin kulikedea, Henda, rạni, no̠nḍe madhaeren ho̠po̠ne tahe̠kana, ado̠e okayena? Uni kuṛi do̠e ro̠ṛ ruạṛket́a, O̠gni hante kãṛã rajae go̠ćkedea. Ado̠kin me̠nket́a, Acha, jãhãn nisạn do̠ho̠ akat́a se̠ baṅ? Ado̠ uni kuṛiye me̠nket́a. Me̠n oṭoadińae, nawa bhajanre to̠ro̠ć do̠ḱho̠, ado̠ń do̠ho̠ akat́gea. Ado̠kin metadea, De̠n e̠nḍe̠ khan ạguime. Ado̠ oṛaḱre bo̠lo̠kateye oḍok ạguket́kina. Ado̠ kathae,Kạmru diso̠m reaḱ rankin lagaoat́a; ado̠ thoṛa ghạṛi khange ho̠ṛe̠ benaoena pạhil leka, cet́ leka muṭhạn tahẽ̠kantaea onkage. Ado̠ pe̠ne̠ ho̠ṛ mit́ muṭhạngeako, o̠ko̠e hõ̠ bae orom daṛeako kana, metaḱme nui do̠e ińren jãwãe kanae me̠nte. Ado̠ nenḍa din tioḱen khan kãṛã raj do̠ ạḍi utạr phạd ante uni kuṛi ṭhene calaoena; ado̠ un jo̠khe̠nge onkoko me̠nket́a, Bhala kãṛã rajbon ńelea tin maraṅ ho̠ṛ kanae, aboren erae baplaye lạgit́. Ado̠ ghaṭa mạrko lạṛhạiyena ạḍi ghạṛić; onko pe̠ ho̠ṛ sãote baṅko daṛelena, sanamko go̠ć ocoyena; kãṛã raj hõ̠ko go̠ćkedea.

Tumạl: Santal Folk Tales