O̠ko̠e Kanae Maraṅić Do̠

Mit́ dhao ti reaḱ mõṛẽ goṭen kạṭuṕ bhitrire re̠ṭe̠pe̠ṭe̠ ehoṕena, o̠ko̠e kanae maraṅić do̠? Pạhilre kạṭić kạtuṕ do̠e menkeda, “ińge maraṅić do̠. Tinre jãhãn sabha, galmarao akhṛa hoyoḱa, unre o̠ko̠e do̠ samaṅre duruṕa? O̠ko̠e do̠ ạkilan ar namḍak ho̠ṛ kanko, onkoge ko duṛuṕa. Se cet́? Tinre banar ti mit́kate jãhãe ho̠ṛ johare emae, un jokhen o̠ko̠e do̠ samaṅre tahẽna? Iń do̠ń kạṭićgea, enrehõ jo̠to̠ kho̠n lahareń tahẽna. Enḍekhan ińge maraṅić do̠. O̠namika hõ̠e mengot́keda, “baplare okaṭaḱ kạṭuṕre mundạmko ho̠ro̠ga? Mundạm ma ạḍi daman, ar mońja. Noa daman mundạmge ho̠ṛ do̠ ińreko ho̠ro̠ga. Enḍekhan ińge maraṅić do̠.

Inạkate tala reaḱ kạṭuṕ teṅgo kate eṭaḱko metaḱkoa, “iń do̠ mocate maraṅić reaḱ cet́ge bạń meneda, Tinre sabha, se onkan dupuṛuṕ ko hoyoḱa, hajar hajar ho̠ṛko talare kathako ro̠ṛ o̠kte o̠ko̠e do̠ko udugea? (Uduḱ kạṭuṕ) Ińge. Hajar hajar ho̠ṛko ńeleńa, am do̠ bako ńelmea.

Mucạt́re buḍhạ kạṭuṕ hõ̠e menkeda “Iń do̠ń haṛamgete alope nisrạuińa. Menkhan ape lekage mit́ din dil daṛe tahẽkantińa, ar nit do nonkań nacar akana, onate ińaḱ gạkhuṛ se baḍaeteaḱ do̠ alope nisṛạua. Eken mit́ṭen iń kulipea, jãhãn onkan hamal se moṭa jinis iń begor o̠ko̠e pe tul daṛeaḱa? Jãhãepe daṛeaḱa? Baṅ, o̠ho̠gepe daṛelena. Ińaḱ go̠ṛo̠ apeaḱ jạruṛ menaḱa, ar apeaḱ goṛo ińaḱ jạruṛ menaḱa. O̠ko̠e hõ̠ o̠ko̠e aḱ go̠ṛo̠ begor babon laha daṛeaḱa. Noa kangea jion do̠. Go̠ṛo̠ go̠po̠ṛo̠te abon do̠ bon laha calaḱ kana. Onate nonka katha menaḱa, Abo bon mit́ lenkhan khạṭigebon jitạuḱa, ar bon begar lenkhan bon bạṛijoḱa.

Hoe-daḱ Heć Daṛeaḱa

Teheń Sombar (17.03.25). Ho̠la ńindạ khonge ho̠e-daḱ reaḱ sombhabna tahẽkana. Daḱ rimil rakaboḱkan rehõ̠ hotete daḱ do̠ kaṭaoḱ kana. Enrehõ̠ teheń setaḱ do̠ siń cando mit́ ghạṛiće ńellena. Inạkate arhõ diso̠m do̠ ńutena. Onkate ńeloḱ kana je teheń aḱ abohaoa do̠ bạṛićgea.

Abohaoa ạpis-e meneda, Dhaka selet́ pe jilạre ar ado̠m ado̠m ṭoṭhare ho̠e-daḱ heć daṛeaḱa. Dhaka, Khulna,Sylhet jilạre huḍur bijliate ho̠e-daḱ heć daṛeaḱa. Ente bạṛtikaete setaḱ khonge hoe-daḱ reaḱ sombhabna do̠ ńeloḱ kana ar onkage daḱ rimil daḱ rimil ạikạuḱ kana ar kajake ho̠e baṛaeda.

Pạtiạr Gate

Mit́ dhao kelas re Mahasoe pạṭhuạkoe kukliket́koa, haro̠n ar muskil o̠kte o̠ko̠e cetanre bạṛtipe bhorsaḱa? Ado̠ amdaj jo̠to̠ko kikiạuate ko roṛ ruạṛkeda gogo cetanre, ar ado̠m do̠ko menkeda baba cetanre. Khange mucạt́re duṛuṕ akan mit́ṭen pạṭhuạ gidrạ do hapege tahẽyena, cet́ge bae roṛ ruạṛleda. Mahasoe do̠ uni gidrại kulikedea, ado̠e roṛkeda, iń do̠ ińren gate cetanreń bhorsaḱa. Uniaḱ ro̠ṛ ruạṛ ańjomte jo̠to̠ ko thir cabayena. Khange Mahasoe onko jo̠to̠ko bujhạuakoe ehoṕena, haro̠n ar muskil o̠kte abo do̠ aboren joto khon pạtiạr gate cetanre bon bhorsaḱ kana.

Disạ dohoe hoyoḱa 5 lekan hoṛko são gateć baṅ bogea.

Eṛe ro̠ṛo̠ić: O̠ko̠e do̠ morcha jinis leka hoṛkoe thokami daṛeako.

Lelha hoṛ: O̠ko̠e do̠ amaḱ bhạlạire bae hijuḱa.

Pocra hoṛ: O̠ko̠e do̠ amaḱ muskil ńelte dạṛ pharaḱ.

Konṭet́ hoṛ: Goṛom khojle o̠ko̠e do̠ ame bạgi giḍiam

Apnar ektiạri reaḱ: O̠ko̠e do̠ jaoge aćaḱ ektiạri se ạidạri reaḱe kurumuṭui.

Onate onkan gateko khon pharaḱre tahẽnge bogea. Pạtiạr gate do̠ tis hõ am são bạṛić bae beohar daṛeaḱa.

Jisu Jaeroren Hoponerae Jivet́kedea

Mit́ṭaṅ seḱwa oṛaḱren mukhiạ do Jisu ṭhen hećkate uniaḱ ti jaṅgare giḍiyenteye metadea, Ińren kuṛi gidrạ gujuḱ dạkhil menaea, jãhã lekate senkate tikinem capoae, jemone bańcaoḱ ar jivet́e tahen. Jisu uni tuluće calaoena.

Horre uni seḱwa oṛaḱ mukhiạ reaḱ oṛaḱ khon hećkateko metadea, amren hoponerae goćena. Jisu do apate metadea, Alom botoroḱa, eken pạtiạuḱme. Jisu oṛaḱreye boloyen khan, jotoge raraḱ kane ńelket́koa. Metat́koae, Caḱpe raḱet́ kana? Khange uniren eṅgat apat ar Peter, ar Jakob ar Johan soṅgekate kuṛ̣iye gitić akan ṭhene boloyena, ar gidrạ reaḱ ti saṕkateye metadea, Mạ̃i metam kạnạń, beret́me! Khange uni do beret́ got́enteye dãṛã baṛaket́a. (Mark 5, 22-42.)

Teheń Kho̠n Ehoṕena Jạtiạri Vitamin A plus Ran Jo̠m

Teheń do̠ Sạnicar (15.03.25). Teheń khonge goṭa disomre gidrạ koaḱ jạtiạri Vitamin A Plus ran jom kạmihora do̠ ehoṕena. Noa Vitamin A Plus ran do̠ 6-11 cando umer ren gidrạko ar 12-59 cando umer ren gidrạ ko jo̠m ńama.

Onka leka 6-11 cando umer ren ko do̠ lil ran ar 12-59 cando umer ren do̠ araḱ ran ko ńama. Gidrạre ạndhuạḱ ro̠g ar gidrạ umerre gujuḱ soṅkha ko̠mao lạgit́ge noa Vitamin A Plus ran jo̠m reaḱ kạmihora do̠ calao idiḱ kana. Vitamin A Plus ran jo̠m karonaḱte bochor re bar dhao 98% Vitamin A ran jo̠m iạte Vitamin ‘A’ reaḱ ṭonṭate oka ạnḍhuạ ro̠g ona do̠ 1% khon hõ latar re ko̠m akana ar gidrạkoaḱ gujuḱ soṅkha hõ aema ko̠m akana.

Tumạl: Bangladesh Pratidin

21 lakh gidrạko Vitamin A plus capsule ko ńama

Rajạri Vitamin A Plus’ Capsule em kạmihora do̠ gapa (15.03.2025) din khon goṭa diso̠m re e̠ho̠ṕ akana; Ona reaḱ latar re 22.6 lakh gidrạko ‘Vitamin A Plus’ capsule ko em ocoḱa. Noa capsule do̠ 6 khon 59 cando umer ren gidrạko em ocoḱa, jemon gidrạkoak̕ ạḍi jạruṛok̕ kạmi khon bańcao ar gidrạkoak̕ acka gujuk̕ kom hoyok̕. Mõ̠ṛẽ̠ ge̠l bar 120 hajar gạḍi ạkhriń kendra kore noa gạḍi ạkhriń reaḱ bebosta hoe akana. Sastho Se̠rvice General reaḱ mit́ṭen kho̠bo̠r sakam re̠ menaḱa je, Jilạ, Upazila ar union level re̠ 6-11 cando umạr ren gidrạko lil ar 12-59 cando umạr ren gidrạko araḱ capsule ko emakoa.

Bibhag ren ko meneda, Vitamin A Plus capsule em kạmihora hotete 98% gidrạko bochor re bar dhao Vitamin A ko em ocoḱa, ona iạte Vitamin A reaḱ komjoṅ iạte ạḍi jạsti ko ńel ńam reaḱ ḍhertet́ do 1 pạrsi khon hõ latar re kom akana ar gidrạkoaḱ goć reaḱ ḍhertet́ hõ kom akana. “Noa jitạu dohoe lạgit́ 6-59 cando umer ren sanam gidrạko Vitamin ‘A’ capsule em lạgit́ Rajạri Vitamin ‘A’ Plus Abhiyan calao idiḱ kana.” Gidrạko do̠ ạḍi jạruṛ gea ạḍi jạruṛ gea ạḍi jạruṛ gea ạḍi jạruṛ gea Vitamin A Plus capsule emako lạgit́. Vaccination centre re mit̕ṭen saset̕ kạmiạ se volunteer do̠ capsule reak̕ mo̠ca kạpci te kạṭić kate gidrạ bhitri renak̕ jo̠to̠ jinis jom ocokoa. Gidrạko rạskạte se jor-jorao kate capsule do baṅ em jạruṛa.

Vitamin ‘A’ Plus kạmi hora reaḱ biḍạu lạgit́ kạmi dinre sanam upazila, jilạ ar kendra re 24 ghanta control room do jhić tahena.

-BD News khon Tumạlaḱ

Kạmi

̣Kạmi begorte dhạrtire jãhãn lahanti baṅ hoyoḱa. Begor kạmite moloṅ reaḱ jorte lak ṭaka hoyoḱtama noa do tis hõ alom hudisa. Dhạrti jionre jãhãnaḱgem asoḱ kạmi do lagaoamgea. Apnar hoṛmo bańcao lạgit́ hõ kạmi do lagaoamgea. Kạmi talatege jionre suk-sạnti menaḱa. Ạṛiste jãhãe bań kạmi katei duṛuṕkoḱ uni doe nosṭoḱ gea. Eṭaḱko dos emkate cet́ porho? Okoe hõ abo do bako kạṭić bona. Abo do apnartege nosṭoḱ reaḱ hor bon tearjoṅa. Ạṛiste baṅ kạmikate eken duṛuṕ tahẽlen khan okoe hõ tis hõ jomaḱ se ṭaka-poesa do bako ạgu oṭoabona. Noa dhạrtire reṅgeć orećko geko kạmia ona do tis hõ baṅ hoe daṛeaḱa. Din hiloḱ jomaḱ jogaṛ khạtir kạmi do lagaoakoa ona do besgea. Menkhan okoe koaḱ aema dhon sompod ṭaka menaḱtako se ko kisạ̃ṛge onko hõ kạmi do lagaoakoa. Ṭaka poesa sećte bam ṭonṭaoa, nijaḱ dhon-sompotti bes menaḱtama bickom jãhãn kạmi reaḱ jạruṛ bạnuḱtama noa do tis hõ alom hudisa.

Noḱoe oka ṭaka poesa ar dhon sompotti menaḱtam noako jogaṛ khạtir am apat tinạḱ kạmi lagao akadea noako jãhãtisem hudis akada? Am gharońj, Manḍer se disạm mukhiạm hoe daṛeaḱa, apnar lạgit́ baṅ rehõ gharońjren, manḍerren se disạmren hoṛ lạgit́ kạmi lagaoama. Jãhãe judi eṭaḱ koaḱ dhon sompotti kombṛo kate bańcaoḱ ko kurumuṭui onkoaḱ do kạmi reaḱ jạruṛ bạnuḱtakoa. Sạriaḱ horte jion khemao lạgit́ kạmi do jạruṛ kangea. Sạriaḱ horte tahẽkate bhageaḱ kạmi idime amaḱ duk cabaḱtama. Amaḱ noako kạmiko ńelte aema hoṛ am kạṭić monan hoṛ men kateko nisṛạu daṛeama. Menkhan okoe amko nisṛạuet́me onko ṭhen amaḱ duk hiloḱre mit́ bar poesa koekom ńelkoam am ṭhen khon ko ńir pharakoḱa.

Mit́ṭen reṅgeć hoṛ hamal bojha liạ hoṛ aṛereye duṛuṕakana. Ona bojha tulem goṛoae khan uniaḱ upkạr hoe koḱa. Noa montem meneda tobe bam kạmi daṛeaḱ kana. Amren bhạṅguạ gateko seć koyoḱ kate ona bam kạmi leda. Onko são ạuṛiaḱ khilḍu enećte somoem nosṭoeda. Onko bhạṅguạ gateko seć baṅ koyoḱ kate uni reṅgeć hoṛ amaḱ dulạṛem sodorae khan bhageaḱ em kạmikea. Kami do kạṭić se lạṭu jãhã lekanaḱ kange mon lagao kate kạmime. Onate amaḱ man do baṅ khatoḱtama boroṅ bạṛtiḱtama. Bhạṅguạ gateko lajaote kạmi do alom ạṛisaḱa. Okte reaḱ kạmi okterege kạmi purạu reaḱ kurumuṭuime. Teheńaḱ kạmi gapam kạmia ona do amaḱ monre ṭhạ̃i alom emaḱa. Baṅ khanem eṛe ocoḱa. Somoe reaḱ dam okoeko emet́kan onko do tis hõ bako eṛe Ocoḱa. Okaṭaḱ kạmite am mońj se rạskạm bujhạua onaṭaḱge kạmi me. Am do din hiloḱ jãhãnaḱge ceka lagaoama. Thoṛa thoṛa kate jao sermam kạmile khan kạmi mucạt́re amaḱ kạmi reaḱ porho ńelte amgem hahaṛaḱa.

Kạmi katege tinre ṭaka poesa, suk-sạnti, man manot́ ńamoḱa tobe cedaḱ bam kạmia? Amaḱ jion jiṅgi ạṛiste baṅ ḍhilạu kate okte menaḱre kạmi reaḱ kurumuṭuime. Apnarte tis hõ reṅgeć alom hudisoḱa. Bạṛti dhon sompot do alom lalocaḱa. Amaḱ okaṭaḱ menaḱtam, inạtege jion khemao reaḱ kurumuṭuime mucạt́re porhom ńama.

MIT́ MONOḰ

Pukhri jalapuri gaḍako eman daḱ

Kạṭić kạṭić ṭhoṕ midoḱte ạtu jarwaḱ

Mimit́ goṭeć akhor koge jaoṛaole khan,

Hajar hajar puthiko cet́ baṅ benaoḱ kan!

Mimit́ goṭeć itạko gathao mit́kate

Hapṛaḱ hapṛaḱ dolan hõ benaoḱ kajakte;

Sutạm lekan sobot́ son ḍherao pãk kate

Moṭa moṭa barahi ạḍi keṭećge.

Manwa hoṛmo jaṅ jel mãyãm ar sirkote

Muṭhạn akante onako mit́ akante.

Uć phạnṭillenre oka eskar bam dhej,

Gel hoṛ mit́te do algatem leṭej.

E gidrạko mit́ monoḱ de kurumuṭuipe,

Mit́ mon hạr joṅ lạgit́ ma jhũkoḱpe.

Mit́ṭen Kuṛi Iń Dulạṛkedea-Bargel Mit́ Aḱ Porbo

Dulạṛiạ Gate,

Alom raga, dayakate alom raga. Amaḱ obosthań bujhạu daṛeaḱkangea, khubiń bujhạu daṛeaḱ kana. Botoroḱ reaḱ cet́ jạruṛge bạnuḱtama. Tinre iń am tuluć minạńa tisge alom botoroḱa. Ona ma joto ińaḱge bhul tahẽkan; Ińge galmarao jạruṛ tahẽkantińa. Jãhãnaḱ kulime jạruṛ tahẽkantińa. Menkhan iń hõ tho bạń daṛeada.

Oka enhiloḱ hoyen onako sanamaḱtege ạḍiń bhaṛoyena: cet́ leka iń panterem duṛuṕena, enkathae eken iń lạgit́ge onka do. Onage co sanamaḱmae lạiạdińa katha khon bạṛtige.

Am dom jạdukedińa arhõ as menaḱgetińa. Teheń do cal reaḱ mãt́ sener batako seć baṅ koyoḱkate iń gogo baganreń goṛoadea. Bhaṛote uni hõ tan mane ńelkedińa.

Noage Amren

Pạtiạr gate

Meskoć

Meskoć

Mit́ṭen Bepari ar sardar hoṛaḱ ropoṛ-

Mit́ṭen bepari hoṛ ḍaharte calaḱkan okte sardar hoṛ sãoe ńapamena. Ado bepari do uni hoṛe metae kana, E sardar, noa pauḍar idi me, dam do eken gel (10) ṭaka.

Sardar: Noa pauḍar hatao kateć cet́ hoyoḱa?

Bepari: Oṛaḱ idikate, amaḱ oṛaḱre tinạḱ mũć, tejo, capṛa menaḱko, onko cetanrem chiṭạua, arem ńela cet́ lekan hahaṛa kạmi ema.

Sardar: Bohoḱ bạṛić akantama! Teheń pauḍar idi lekhan gapa lipsṭik ko khojoḱa!