Mit́ṭen birre sạpạri dare latar re mit́ hoṛe tahẽkan tahẽkana. Sanam hoṛ uni do kuṛhiạ hoṛ ko metaea. Joto hoṛge uni do noa ńutumteko hohoae kan tahẽkana, ente uni do ạḍi kuṛhiạge tahẽkana. Uni do aćaḱ jionre tis hõ kạmige bae kạmi akada. Uni do jom lạgit́ hõ bae cas bas leda. Uniaḱ do eken mit́ṭen kạmi tahẽkana. Din bhor uni do sạpạri dare latar re duṛuṕkate tạṅgikaḱa, tinre ona jo do aćaḱ moca pheḍre ńuroḱa mente. Hoṛko do uni ạḍi bạṛićko ruhet́ede kan tahẽkana ar iṭạ, dhiri teko capat́ede kan tahẽkana. Menkhan onako katha bae luturaḱkan tahẽna. Uni do aćaḱ rukhiạḱ lạgit́ oka kạmi jạruṛaekan tahẽkan, inạḱ hõ bae kạmia.

Mit́ din kajak hoete ona dare reaḱ sạpạri jo do oṭaṅkate thoṛa sạńgiń re ńurena. Unre Raj ren bhạgnạt kuṛi do daḱ ṭhenge duṛuṕ akan tahẽkana. Hoete oṭaṅ heć akan mit́ṭen sạpạri jo halaṅkateće jomkeda. Nonkan bhage jo do tis hõ bae jom akada. Uni do ona sạpạri dare okoeaḱ kana, uni baplaḱ reaḱe goṭakeda. Uni do aćaḱ katha Raje lại sodoradea. Raj do uni ase emadea je, sạpạri dare ren mạlike sendra ńamea mente. Ona disomre okoe koaḱ sạpạri dare menaḱtako, onko do mit́ṭen kate sạpạri jo raj dorbarte idi ocoko lạgit́ hukume emadea. Raj ren bhạgnạt kuṛi do ạgu akat́ joto hoṛaḱ sạpạri jojome ehoṕena. Menkhan enhiloḱ reaḱ hoete oṭaṅ heć akana sạpạri leka do okoeaḱ hõ baṅ sebel kana. Raj doe kulikeda, arhõ jãhãeaḱ sạpạri dare menaḱa se baṅ, menkhan sạrige baḍae ńamkeda, eken mit́ hoṛaḱge menaḱa. Menkhan ona dareren mạlik do nonkae kuṛhiạgea je, ańjom katet́ se baḍae katet́ rehõ raj dobarre jo bae idileda.

Raj ren bhạgnạt kuṛi doe goṭakeda, ona dareren mạlik sãoiń ńapama ar jo hõń jom legaea. Ona sạpạri jom torage bujhạukeda je, noa do ona enhiloḱ reaḱ jo kangea. Uni do ruaṛ senkate raje metadea je, iń do uni kuṛhiạgeń baplayea. Raj do ar cet́e mena, aćaḱ goḱ katha lekage kuṛhiạ hoṛ sãote aćren bhạgnạt kuṛi bapla kadea. Kuṛhiạ koṛa do raj ren bhạgnạt kuṛi bapla tayom dare buṭarege suluk nirạite girobasoḱ kin ehoṕena. Uni kuṛhiạ hoṛ do aćren bạhu ṭhen ạḍi dulạṛe ńam kan tahẽkana. Aćren bạhu do oka kạmi jạruṛae kan tahẽn, onakoe kạmi idiet́kan tahẽkana. Menkhan ackage mit́ din onkin aḱ jionre bạṛić dosa heć paṛaoena. Sạpạri dare do jo emoḱe bondkeda. Uniren bạhu hõ ạḍi akal sakale ruạyena. Kuṛhiạ hoṛ hõ ać bạhu ạḍi ãṭe dulạṛedekan tahẽkana. Noa lahare okoe hõ kuṛhiạ hoṛ são bhage bako beohar akada, ar joton hõ bako joton akadea.

Menkhan mucạt́re ać bạhu jiwet́ dohoye lạgit́ kạmi ehoṕena. Uni do ạḍi ḍher sạpạri dare rohoekeda. Onako joto dare reaḱ jo jomte ar seba jotonte ać bạhu doe bogeyena. Kuṛhiạ hoṛ do kạmie ehoṕ akada ona khobor raj ṭhen seṭerena. Inạkatet́ hõ aćren bhạgnạt kuṛi hõe boge akana, ona khobor ańjomte raj do onkin raj bakholte ạguket́kinạ. Khan kuṛhiạ hoṛ do raj bakhol re sulukte jingi khemaoe ehoṕena. Laha leka do ar kạmige baṅ lagaoaekan tahẽkana. Adoe menkeda, tinre reṅgeć ar kuṛhiạgeń tahẽkan joto hoṛge ạḍi kajak ko ruhet́ akadińa. Menkhan nitoḱ doń kisạ̃ṛ akante joto hoṛko manotediń kana. 

Meskoć

Mit́ din juripạrikin gapalmarao kana-

Bạhu: Cet́ hoyoḱ kana, ạrsi samaṅre teṅgo kate, cet́em ńeńel kana?

Jãwãe: Nui hoṛ do ạḍi oporomgeń ńele kana, menkhan okareń ńel akadea ona do bạń disạ daṛeaḱ kana. 

Dulạṛiạ Gate,

Mit́ ńindạ bạń jạpit́ daṛeada, raḱtegeń aṅgakeda. Bhagete apnargeń ruhet́ena ente am sãote bạń roṛleda. Monre cet́ leka co ạḍi perećiń ạikạuet́ tahẽkana. Aema katha lạiam sanaledińa, menkhan bạń, daṛeada. Paseć am hudiseda bạń puchạuet́mea mente se am reaḱ iń do mone-hõ-lagena.

Dayakate baḍaekam je amem hećente nunạḱ ãṭiń rạskạyena je roṛge bạń roṛ daṛeada. Ińren do am chaḍa celege bạnuḱkotińa.

Noage Amren

Pạtiạr gate

Amdaj Mõṛẽ gel bochor laha reaḱ katha. Mit́ṭen atore jawa koṛakin tahẽkana. Unkin do ńeloḱte mit́ge, ạkinren eṅgat-apat chaḍa okoe hõ bako orom daṛeakin kan tahẽkana. Ado onko oṛaḱ pheḍre mit́ṭen hạṭiạ tahẽkana. Ona hạṭiạ do haptare 2 din duṛuṕa, Sokolbar ar Sombar hiloḱ. Mit́ din onkin jawa koṛa modre maraṅić do hạṭiạte kanṭhar kirińe sen akana. Goṭa haṭiạ daṛakate mit́ṭen lạṭu macha kanṭhaṛe kusiada.Ado mone monete hudiskeda, noa kanṭhaṛ joṛateń kiriń lekhan oṛaḱ ren sanamkole jom anṭaoḱa. Onate bepariạ kanṭhaṛ dame kulikedea.

Bepari: Noa kanṭhaṛem kusiaḱ kana besge, menkhan ạḍi damangea. Mimit́ goṭen kanṭhaṛ reaḱ dam bar adha ṭaka ar joṛate do mõṛẽ ṭaka paṛaoḱa. Khan uni koṛa doe mengot́keda, noa kanṭhaṛ eken iń eskarteń jom daṛeaḱa.

Bepari: Nonkan eṛe eṛe katha do alom roṛ baṛaea. Dam hõ jạstigea. Ar noa kanṭhaṛem jom daṛeaḱ khan, arhõ barea kanṭhaṛ maṅnateń emama. Ado uni koṛae mengot́keda, sạrigeń meneda, jom daṛeaḱgeạń.

Bepari: Baṅ, noa do baṅ hoe daṛeaḱa. Ma enḍekhan,nonḍe iń samaṅrege duṛuṕkateć jom me. Judim jom daṛeaḱ khan, arhõ barea kanṭhaṛ bin kạuḍiteń emama.

Khange uni koṛa do kanṭhaṛ jojome lagaoena. Adha jom tayom uni doe menkeda, daḱ thoṛań ńũia, nõḱõe nonḍe ale oṛaḱ, thoṛań ńũ ạgulege. Bepariạ hõe rạjiyena. Ado oṛaḱe senen khan aćren huḍiń boeha joto ghoṭna pusṭạute baḍae ocokedea, are metadea, do usạrate calaḱme. Aćren boeha hõ uniaḱ katha lekage usạra dokane senena ar kanṭhaṛ jojome lagaoena. Mit́ duṛuṕre jom cabaket́te, bepariạ do ekalte uni koṛa sećge koyoḱ hape akada. Ente ar jãhãn katha roṛ reaḱ jaega bae ńamleda. Adoe roṛlet́ katha lekage barea kanṭhaṛe emadea. Enrehõ bepaṛi do ona ghoṭna reaḱ khạndrińtet́ babotre cet́ge bae aṭkar daṛeada. Adoe metae kana, am dom rakas kana se cet́?

Probhu do Jona nạbiye metadea, Am do Ninive maraṅ naṅgrahate ma calaḱte porcarakome, baṅma, iń do onań marao utạra mente; ente onkoaḱ kạige ạḍi maraṅa. Menkhan Jona do mit́ṭeć jahajreye dećena Tạrsis disomte dạṛa mente. Khange Probhu maraṅ okoć birbãoe kolket́te jahaj do unum bạṛijoḱ kan tahẽkana. Ado lạuṛiakoko mepenena, Delabon gulibãṭoḱa, jãhãlekatebon baḍae ńam okoe gunạḱte noa ghoṭna paṛao akawat́bona mente. Gulibãṭ do Jonare paṛaoente jalapurireko capat́ khańjokedete nijhum thir got́ena. Khange Probhu mit́ṭaṅ maraṅ okoć hakoe kolkedea Jona ude lạgit́, ar Jona do uni hako reaḱ lạćre 3 siń 3 ńindại tahẽkana, Khange Probhu hakoe hukumadete uni do Jona ghuṭureye ulạkedea. Khange Probhu dosar karte Jonae metadea, Am do Ninivete senkate oneń men akawat́meaḱ porcarakome Jona do naṅgrahate senente hohoateye metat́koa, 40 mãhãre do noa naṅgraha jalao maraoḱa. Niniveren hoṛ onako ańjomket́ khan mon ạcurenteko nẽo dhoromket́a, ar onkoren raj do raj kicrić giḍikate gõṛẽ kicrićte oyo poṭomente toroćreye duṛuṕena. Khange Probhui  kastaoena, ar cekako lạgit́e roṛ akat́aḱ bae onkalaḱa. Onate Jona karać kurućkate Probhui metadea, Nõḱõe coṅ iń disomre tahenreń menwan lekage hoyena; ona teṛoṅ Tạrsisteń dạṛet́ tahẽkana; enteń baḍae kan tahẽkana, am do daya ar sombhuri kại iḱkạ Isor kanam mente.

Jona do naṅgraha bahrere senkate onḍeye tahẽyena, cet́ leka hoyoḱe ńela mente. Probhu do mit́ṭeć eraḍom dareye dare ocoket́a Jona reaḱ bohoḱ umultae lạgit́, ar Jona do onate ạḍi bạṛiće rạskạyena. Menkhan eṭaḱ jokheć Probhu do mit́ṭeć tejo maṅgaokate uni do daretet́e gerket́te gosoyena. Siń candoe rakaṕen khan, puruạ khon lolo hoe hećena, ar siń cando reaḱ setoṅ nạbi reaḱ bohoḱre paṛaoente uni doe jhãeyena ar gujuḱgeye koeana, khange Probhui metadea am do eraḍom darerem mãyãḱ kana, one ona ńutumte bam kurumuṭu akat́, ar ona bam hara oco akat́re hõ, ar iń do Ninive maraṅ naṅgrahare bạń mãyãḱa, one onare etom końe bako pachnao daṛeaḱ 1,20,000 khon bạṛti hoṛ menaḱko? (Jona puthi)                        

Bangladisom ren Manotan Onoliạ Timon Hasdak aḱ ạḍi aema soros sereń menaḱa. Onako modre teheń ińaḱ olok reń tumạl hatao keda; “Pạtiạrge Lonbonić, Pạtiạrge: Sạrige, Lonbonić, Kạmire pạtiạr” Santali sereń puthi Seren#579. Sạrige teheń abo sanam santalko lonbonić re pạtiạr ar kạmire pạtiạr, menkhan cedaḱ santal jạtiạriko reṅgeć hoṛ cedaḱ arhõ ko reṅgecoḱ kana.

Brian Tracy doe hoyoḱkana Canadian-America ren udgạu emoḱić ar maraṅ onoliạ hõ kanae. Uni do irạl gel cetan puthi doe ol akada, ar onako puthi do aema pạrsite chapa sodor akana. Sanam puthiko khon soros puthi do hoyoḱ kana; What You’re Really Worth, Eat That Frog!, No Excuses!

Brian Tracy aḱ katha lekate,“amak ae umạ̃ṛ ḍher hoyoḱtama, gạkhuṛoḱ hoyoḱtama ar bud ạkil hameṭ hoyoḱtama.” Enḍekhan, onkoaḱ ae ḍherem menet́ khan, noa sạriaḱ lạgit́ am do thoṛa kạmihora do hatao hoyoḱtama. Amaḱ ae ḍher lạgit́ lagan (biniyog) ar gạkhuṛoḱ reaḱ bud ạkil lekate kạmi hora do hatao jạruṛ kana. Noa lạgit́ lekha, jhũki hatao ar ṭaka paesa reaḱ jạruṛ hoe daṛeaḱa, menkhan onako do bại bạite ḍher dinte purạu do bạṛti bhạlạianaḱ hoyoḱa. Amaḱ ae roṅ-beroṅ se rosanjon lekate benao rakaṕ são sãote, noa do amaḱ ae reaḱ onoṛ do sạrdi ar dhurpạure goṛo daṛeama.

Am do cet́ arhõ ṭaka paesa arjao ar amaḱ kạuḍiko lahanti lạgit́ soros utạr hor se upại em sendra kana? Arhõ bạṛti ae ar ae bạṛtiḱ lạgit́ cet́ lekate hameṭoḱa ona babotte nonḍe latarre thoṛa kạmi hora do ol caṛhaoena.

Pe lekate Ae hoe daṛeaḱa:

1. Akṭiv kạmi
2. Nisạm kạmi
3. Pọrṭfolio reaḱ kạmi

1.Akṭiv kạmi; Akṭiv kạmi reaḱ manetet́ do kana nonkan ae oka do am khaṭaokate ar okto khemao kateć em arjaoet́ kan. Jemon, nukri, bạnij-bepar, se nonkanaḱ jãhãn kạmi, am tin ghạṛić okto khemao kateć em ae daṛeaḱ.

Nạmuna lekate, amaḱ mit́ṭen dokan menaḱa, ona dokanre tin ghạṛićem duṛuṕa in ghạṛićge amaḱ ae do; menkhan dokanre bam duṛuṕ len khan, amaḱ ae do baṅ hoyoḱtama. Nonkan ae do ḍher hoṛge alga ar usạrate ae lekako hudisa. Noa do joto hoṛ ṭhen oprom hora kana, ar ḍher hoṛge akṭiv kạmi sećko laha calaḱ kana. Nạmuna lekate, nukri ńam, candore niṭ akan kuṛại/beton ńam, se jãhãn onkan huḍiń macha bạnij-bepar. Menkhan nonkanaḱ ae do simạ bhitrire menaḱa, entet́ tinạḱem khaṭaoḱa, unạḱgem ae daṛeaḱa. Ar mit́ hoṛ din hiloḱ kom se kom 10-12 ghonṭae khaṭao daṛeaḱa, inạ khon bạṛti do baṅ.

Jãhãtin maraṅ Ḍaktar, Engineer se kạḱmiyićem hoyoḱ, akṭiv kạmi te tinạḱem ae daṛeaḱa? Noa reaḱ soṅkha do niṭ akan, ar mit́ okte ona simạrem jhạliḱa. Onate, akṭiv kạmi do ḍher din reaḱ dhon-dạulat benao rakaṕre baṅ ṭhika.

2.Nisạm kạmi; Nisạm kạmi do noako metaḱ kana, oka do begor kạmite hõ ṭaka paesam arjao daṛeaḱa. Jemon, amem jạpit́eda, se eṭaḱ jãhãnaḱem kạmi kana, enre hõ amaḱ ae do hoyoḱ kana. Okoe do Nisạm kạmi ko benaoet́ kan, onko do aema okte acel pacel ko kisạ̃ṛoḱ kana, cedaḱ je, nisạm kạmi reaḱ maraṅ subita do kana, noa do okte nạpitre ḍher idiḱa ar tis hõ baṅ thiroḱa.

Nạmuna lekate; am mit́ṭen oṛaḱ bhaṛa bạisạume, enḍekhan jao candore bhaṛam ńama, ar ona seć jãhãn bises dekbhal baṅ lagaoama. Inạ chaḍa hõ puthi oloḱ, You Tube channel calao, Website talate ae, Facebook page se instagram khonaḱ ae, YouTube sećte noako do nisạm kạmi reaḱ nạmuna kana.

Nisạm kạmi etohoṕ do baṅ algawa, entet́ noa lạgit́ pạhilte thoṛa okto emoḱ reaḱ jạruṛ menaḱa ar kạmi hoyoḱa. You Tube channel jhićem mone lekhan, pạhilte thoṛa cando bam ae daṛeaḱa, menkhan mit́ okte ńeloḱa je, tinre amaḱ video joto hoṛ ṭhen porcaroḱa arko kusiaḱa, unre amaḱ ae do ehoboḱa. Aema okte nonkanaḱ income ehob lạgit́ thoṛa ṭaka paesa hõ jạruṛoḱa. Ona karonaḱte ḍher hoṛge nisạm kạmi do bako kusiaḱa, ar onko do Akṭiv kạmi re lobdhao akanko tahẽn kana. Enrehõ okoeaḱ do nisạm kạmi tahẽn, onko do tis hõ ṭaka paesa reaḱ okulạnre bako paṛaoḱa, ente onkoaḱ ae do bond baṅ tahẽna. Onate, jion jingirem jitkạroḱ khan, Akṭiv kạmi khon thoṛa ṭaka paesa bańcao kate nisạm kạmi reaḱ onoṛ benao hoyoḱa.  

3.Pọrṭfolio reaḱ kạmi; Pọrṭfolio reaḱ kạmi do kana oka ae lagan se (biniyog) lekate hijuḱa. Okoe aḱ do ṭaka paesa menaḱtako, onko do aema jaegakoreko ae daṛeaḱa. Nonkan ae re do jãhãn haron bạnuḱa.

Nạmuna: Share bajar re se mutual funds re lagan (biniyog) daṛeaḱa. Inạkate, jahae karbạriạ aḱ goṛo hatao me, menkhan ona karbar khon ae em ńama, onḍe tahẽn reaḱ jahan jạruṛ bạnuḱtama.

Kisạ̃ṛ hoṛ do nonkan investment se laganre ṭaka paesa ko dohoea. Entet́ bank re ṭaka paesa ko doho lekhan, asol ṭaka paesa reaḱ dam din dinte komoḱa. Okte calaḱ são sãote amaḱ ṭaka paesa hõ  share bajar re, mutual fund re se jarkhar daṛeaḱa. Enḍekhan ona ṭaka paesa share bajar re, mutual fund re se mońj karbạriạ aḱ goṛote lagan ako, nonkate amaḱ ṭaka paesa hõ ḍheroḱa ar am hõm kisạ̃ṛoḱa.

20-80 system ar amaḱ tayom daram: nisạm kạmi se Pọrṭfolio reaḱ kạmi bam kusiaḱ khan, enḍekhan am hõ paseć ona 20-80 system regem aṭkao tahẽna. Noa system lekate, 20% hoṛko kisạ̃ṛoḱa, ar 80% hoṛko reṅgecoḱ kana. Dhạrtire joto khon dhon dạulat reaḱ maraṅ hạṭiń do 20% hoṛko ṭhenge tahẽna. Onate am oka kạmire menama, kurumuṭuime nisạm kạmi. Eken inạ Akṭiv kạmi re lagao akanem tahẽlen khan, enḍekhan amaḱ ae do mit́ okte simạre hijuḱa. Ar nisạm kạmi se Pọrṭfolio reaḱ kạmi baṅ tahẽlen khan, am hõ onko 80% hoṛko taberem paṛaoḱa, okoe do goṭa jion ṭaka paesa reaḱ obhab okulạn reko tahẽnkan. Onate, teheń khonge amaḱ income hõ ḍher reaḱ ganḍonoḱ hoyoḱa ar Akṭiv kạmi khon thoṛa ṭaka paesa bańcaokate nisạm kạmi se Pọrṭfolio reaḱ kạmi benao rakaṕme. Nonkate amaḱ tayom daram dinko mońjem khemaoa ar kisạ̃ṛ hoṛem hoe daṛeaḱa. 

 Arhõ thoṛa nạmuna:

-Puthi oloḱ: mit́ṭen puthim ol chapa sodor lekhan, onḍe khon thoṛam ae daṛeḱa, oka do calaḱtege tahẽna.

–Investment: Stock market, Real estate se Crypto market re lagan (biniyog) lekhan nonkate hõ nisạm kạmi tem arjao daṛeaḱa.

-Online course reaḱ bebostha: Onkan jãhãnaḱ babotre gạkhuṛoḱ me, enḍekhan Online course reaḱem bebostha daṛeaḱa, oka do hoṛko kirińa ar nonkate amaḱ ae hõ hoyoḱtama. Jionre jitkạr hoyoḱ ar kisạ̃ṛoḱ reaḱ sana menaḱtam khan, Akṭiv kạmi chaḍa hõ nisạm kạmi ar Pọrṭfolio reaḱ kạmi re mon gaḍaotam.

Mucạt́ re niạ oloḱ sećte sanam santalko udgạu et́ bon kana je, arhõ bạrti kạmi lagao abona, bud ạkil ḍahar jhić katet́ nawa hor oḍok lagao abona, jemon santalko babon reṅgejoḱ. Bickom bon kisạ̃ṛoḱ bud ạkilte ar ṭaka paesate. Onate cetanre ol akan bisoko arhõ bạrti bon ganḍonoḱ ma ar bon hudis te reṅgeć do baṅ bickom bon kisạ̃ṛoḱ.  

Mit́ṭen Raje tahẽkana. Uni Raj do mit́ din bir gajaṛ aṛe aṛete taṛam idiyet́ tahẽkana. Sãote aćren montri hõe tahẽkana. Ackage Raj do montri kulikedea, mase lạiańme, teheń aḱ abohaoa do cet́leka menaḱa? Raj do thoṛa sạṅgińe senena. Raj samaṅte mit́ṭen kićrić saphaeiće (Dhopa) calaḱkan tahẽkana. Ado uni hoṛ do Raje metadea, E Raja mahasoe, calaḱ kanam noa ma bhagege, menkhan kajak hoe-daḱ hijuḱa. Khange uni hoṛaḱ katha lekage, Raj do hoe-daḱe eset́kedea. Unre Raj do aćren montri bad kedete, kićrić saphaeićge aćren montri benaokedea.

Onkage mit́ din Raj do bagwanrey ạcur baṛae kan tahẽkana. Ackage monre kukli janamadea, montri do cekate baḍaekeda enhiloḱ reaḱ hoe-daḱ khobor do? Ado montri hohoadete metadea, am do cekatem baḍaekeda hoe-daḱ hijuḱa?

Montri:Tinre hoe-daḱ leka ạikạuḱa, unre ińren Gadhawaḱ lutur laṛaḱtaea. Onateń lạiat́me tahẽkana, teheń do hoe-daḱ menaḱa. Unre Raj do uni kićrić saphaeić montri hoṛ hõe bad kedete Gadha ge aćren montri benaokedea. Ado unre asol muskil do hoyena. Goṭa naṅgraharen Gadha ko heć jarwayena ar Raj ko metae kana, ale hõ amren montri benaoleme.

Manwa do dhạrtire bạḍen saṅgeyenako. Set bõsrenko do Kạyin bõsrenko tuluć ghar ghạrạiko joṛaoket́te dhạrtire do kại chabaoena, ar Isor doe kastaoena manwae benao akat́ko iạte. Menkhan Noah do Isor samaṅre dayae ńamket́a. Ona iạte Isor do Noahe metadea, Am do 300 moka jeleń, 50 moka osar ar 30 moka usul mit́ṭaṅ jahaj benaome, ar bhitri bahre alkatra hasate ona lasraome, ente iń do pirthimire ḍubạ daḱiń heć ocoea, sanam jạtrenko maraoko lạgit́, Noah do Isor reaḱ hukum leka ona jahaj benaokateye boloyena, ar uni tuluć aćren oṛaḱ hoṛ ar Sem, Ham ar Japhet metaḱme aćren pea hopon ar onkoren bạhuko, ar daḱre bako tahẽ daṛeaḱ joto jivianko joṛ joṛge. Khange Isor do 40 siń 40 ńindại daḱ ocoket́a, ar athantar reaḱ sanam jharna phoṛ oḍokena, ar usul utạr buruko khon 15 moka cetanre daḱge se rakaṕena. Ar rohoṛreko tahẽkan joto jiviankoko mohor meṭaoena; eken Noah ar uni tuluć jahajre tahẽkanko doko bańcao sarećena.

Khange Isor do Noahe disạkedea, ar dhạrti cetan cetanteye hoe idi ocoket́a, ar daḱ do ohraoena, ar jahaj do Ararat burure ḍhaṅ tahẽyena. Khange Noah do khiṛki duạr jhićkate mit́ṭaṅ bhonḍa kạhũi aṛaḱ got́kadea. Uni do onte noteye uḍạu baṛae kan tahẽkana dhạrti cetan khon daḱ ạuri ańjedoḱ dhạbić. Onakate Noah do mit́ṭaṅ potame aṛaḱkedea; menkhan uni do aboḱ reaḱ thol bae ńamlet́te jahajteye ruạṛena, ar Noah do ti tiạrkateye ataṅ aderkedea. Noah 7 mãhã jivi hataṛkate arhõ uni potame aṛaḱkadea. Uni do ạyuṕ ber ṭhonṭare mit́ṭeć ṭuṅgeć akat́ jạit dare reaḱ berel sakamanteye ruạṛena. Noah arhõ 7 mãhã jivi hataṛkate arhõ uni potame aṛaḱ dohṛakadea; ar bae ruạṛlente Noahe bujhạuket́a, baṅma, ot teṅgolen tahẽkana.

Khange Noah do jotokoante jahaj khone oḍokena, ar mit́ṭeć pinḍ benaokate jeredoḱ samaṅoḱko Isore samaṅadea gun manao joharae lạgit́. Ar Isor do ać monreye menket́a; Manwa gunạḱte ot ado bạń sarapaḱa; ente manwa reaḱ bundisjoṅ do gidrạ jokheć khonge bạṛićgetakoa. Pirthimi tahen bhor eroḱ ar iroḱ, reaṛ ar lolo, niron din ar rabaṅ din, ar siń ar ńindạ do baṅge cabaḱa. Khange Isor liṭạḱ-aḱ sermareye dohokat́a mit́ṭaṅ cinhạ lạgit́, ać goḱaḱe purạua mente. Noah do 950 serma umerreye goćena, ar maraṅ ḍubạ daḱ tayomren manwakoren janam datae hoyena.(Gen.6-9.)

Hiskạ do mit́ṭen maraṅ abeg (Emotion) kana oka do mit́ hoṛ ar mit́ hoṛak gunman, sarhao, hameṭ, baḍaeaḱ, cecet́aḱ menaḱ khan onako ńelteye Hiskạḱa. Ar hõ Hiskạ do janamoḱa apnar obhab (okulạn) khon, apnar raṅgao, apnar tạkićaḱ, samajik, kạuḍi okulạn, bạḍại mon, man manotko hiṛiń selet́ aema lekan eṭketõṛẽkote hoyoḱa. Nonkate Hiskạ do etohoboḱa ar ạḍi maraṅ te pasnaoaḱa.

Ạḍi aema din lahare Norway disom ren Santali pạrsi cet́ akat́ mit Saheb hor soṅge aema lekan daman gapalmarao do hoyoḱ kana Santal hoṛaḱ lahanti, sikhnạt, ạri-cạli, hoṛmo hạṭiń ar emanteaḱ bisoeko cetanre. Ado Saheb doe lạiạń kana aema din khon ale hõ ape santalko lahanti lạgit́ le kạmi kana; Menkhan bhitri bhitrite ạḍi aṭ Hiskạ doe kạmieda ape santalko talare. Ar hõe menet́ kana je, eken Santal hoṛ hopon do baṅ bickom Bangladisomre basoḱ kan sanam jạtrenko talare noa Hiskạ do menaḱa. Metaḱ me goṭa dhạrti ren Manwako talarege kom ar dher. Onate teheń ińaḱ olokaḱ doń goṭa keda HISKẠ babot.

Hiskạ reaḱ maraṅ machine ńutum do hoyoḱ kana misribạt (Sorojontro). Am laha seć rakaboḱ em kurumuṭui khan tayom sećko or pheḍ mea, maraṅ jahan kạmiem etohoṕ lekhan am reaḱko oktaea, maraṅ kukmuiem ńel lekhan bam daṛeaḱ menteko nisṛạu mea. Nunạḱ eṭketõṛẽ modre am do bańcaoḱ tahen lagaoama, ehrar tahen lagao ama, kukmu purạu lagaoama,entet́ manwa do eṭaḱ hoṛaḱ jaṅgatedo bako taṛama, apnar jaṅga tege taṛam jạruṛa, dạr jạrura. Am cetan seć rakaṕ me lạgit́ do okoe hõ bako kurumuṭuia. Apnarte siń ar ńindạ bam kurumuṭu lekhan do okoe hõ am goṛowam lạgit́ do bako kurumuṭuia. Dhạrti do ạḍi aṭ geye eṭaḱa, nonḍe do sanam geko eṭaḱgea, Apnarte bańcaoḱ reaḱ hor ar as do apnartege benao jạruṛa. Tin hạbić bhageaḱ kạmite bam sodoroḱ hạbić do okoe hõ bako orom mea, bako koyoḱ ama ar bako ńel mea. Noa hõ hoyoḱa je, am katha em katet́ hõ katha bako dohoea. Ar hõ am ńapamoḱ lạgit́ ghonṭa ghonṭa ko koyoḱ laṅga ocomea. Jahan kạmire ạuriem jitạḱ hạbić am doko hudisa mit́ṭen lelha se boka hoṛ kanam.  

Dhạrti redo sanam hoṛge jo ńeńel ko as jonȧ. Am do tinạḱ ghonṭam paṛhaoḱ kana, tinạḱ ńindạm kạmi kana, tinạḱ em kurumuṭu kana; ona do okoe hõ bako ńel tama ar bako hudisa. Cricket ren mahasoe Sochin Tendulikar tinạḱ 6 turui chokkaeye dal akada ona do maraṅ bisoe do baṅ kana menkhan tinạḱ chokka dal katet́ aćren dole jitkạr akat́ koa onage maraṅaḱ bisoe kana. Football ren maraṅ khiloḍiạ Mesi do tin ghạṛić aćaḱ katạ re bole doholeda, se tinạḱ dhom gol reye ṭuṭi leda ona do maraṅaḱ do baṅ kana; football khilạdiạ ńeńel kan hoṛ doko ńela Mesi tinạḱe goal keda ar aćren dol doko jitkạrena se baṅ. Entet́ Jo kangea maraṅaḱ bisoe do.

Sisirjạuić do abo sanamko mit́ṭen enejoḱ lạgit́ khilạḍ maṭh doye em akat́ bona. Ona khilạḍ maṭh okoe tinạḱe la ghaḍlaḱ daṛeaḱ kana; ạḍi thoṛa ganem la ghaḍlaḱ lekhan do ghaḍluḱ hoyoḱa, ar thoṛa bạṛti khạndri khan do pukhri hoyoḱa, ar hõ bạṛti ghaḍluḱ len khan do maraṅ dighi hoyoḱa, am okam kusiḱa onage hoyoḱa. Sisirjạuić do am dil ar daṛeye em akat́ mea, bud akile em akat́mea, baṛge se maṭh hoye em akat́mea; Menkhan amaḱ ona daṛete cet́ em benaoa ona do amgem baḍaea, ghạḍluḱ, pukhri se dighi amaḱ cetan rege nirbhoroḱ kana. Onate Hiskạ do baṅ bickom apnar daṛete bon kurumutui ma apnar lahanti lạgit́.

Onate Bill gates do nonkae men akada; “Okoe ame edrewama uni do alom hirkhạwaea, Ente uni do emon mit́ hoṛ kanae okoe doe sikạra, uni khon am dom soros gea”.