JISU 5,000 HOṚE JOM BI OCOYET́KOA

Jisu Genesaret doreão mit́ṭeć nicol jaegateye parom calaoena, ado hoṛko onako ańjomket́ khan, hako pako otteko pańjakedea. Ạyuṕ beren khan, uniren celako uni ṭhen sorkateko metadea, E Probhu, noa jaega do hãhãkar kana, ar ber hõ bạnugićan, hoṛ baṛe bidạkakom, jemon gãoalekote senkate jomaḱko kirińjoṅ, Jisui roṛ ruạṛat́koa, Ape baṛe emakope jom lạgit́. Onkoko roṛ ruạṛadea, 5 goṭeć piṭhạ ar 2 kạṭić hako chaḍa ado bạnuḱtabona; ona do unạḱ hoṛ lạgit́ cet́ hoyoḱa?

Menkhan Jisu do ghãsreye duṛuṕ ocoket́koa, ar onako 5 goṭeć piṭhạ ar unkin barea hako ataṅkate serma seć beṅget́ rakaṕkateye bhorat́a ar kecaḱkate celakoe calat́koa, ar celako do onko duṛuṕ hoṛkoko em idiat́koa. Jotoko jom bien khan, Jisu aćren celakoe metat́koa, Sareć akan kecaḱaḱko samṭaope, jemon cet́ hõ alo bharabhaṭoḱ. Khange 12 uḍli perećko halaṅ samṭaoket́a. Onkoko jomket́ hoṛ do, maejiu ar gidrạ chaḍa 5,000 ganko tahẽkana.