Ạḍi din laha reaḱ katha. Mit́ disomre mit́ṭen Raj ar Rạni kin tahẽkana. Uni Raj do ạḍi dukre tahẽkana. Mit́ leka ma disomre suluk bạnuḱ ar note Raj ren gidrạ pidrạ hõ bạnuḱkotaea. Mit́din Raj aḱ dorbarre mit́ṭen sạdhu hoṛe hećena. Uni doe menkeda, “Maharaj, amaḱ duk iń baḍaea. Ona menkate mit́ṭen golap bahae emadea, inạkate arhõe menkeda, noa baha mõṛẽ din daḱre doho tayom rit́ gunḍạ kate amren Rạni dumur rasa são mesal katećem jom oco lekhan enḍekhan joto duk dạndi cabaḱtama. Niạ menkate ona baha Raje emadete dorbare senena.

Raj do uni sạdhu aḱ katha lekage ona baha mõṛẽ din daḱre dohokeda ar rit́ gunḍạkate dumur rasa são Rạni jom ocokedea. Inạkate Rạni ren jawa koṛa gidrạkin hoyentaea. Unkinaḱ ńutum mit́ṭen do Khelan ar mit́ṭen do Dolan ko dohokeda. Noa ńutum reaḱ karon menaḱa. Ente Khelan do jao ghuṛige eneć khilạḍre tahẽna ar Dolan do jao oktege jhilo jhiloi jạpida. Unikinaḱ kạmi chaḍa jotoge mit́getakina.Unkinaḱ mẽt́ãhã, hoṛmo reaḱ roṅ jotowaḱ do ekal mit́ge. Menkhan inạ phãḱre cet́ hoyena, ona Raj bakholre mit́ṭen Rakas aḱ nońjor paṛaolena. Raj bakhol ren joto Sadom ar Hạti Rakase jom cabaket́koa, inạkate joto sipạhi ar montriko hõ. Inạ tayom Raj ar Rạni hõe jomket́kina.

Unre Khelan ar Dolan do bhagekin hara buru akana. Unkin do cạuki latarre bolokate oko okokin gateḱkan tahẽkante Rakas do bae ńam daṛeaḱkina. Cạuki latar khon oḍok katekin meneda, haere cet́ cekayena! Aboaḱ Raj bakhol ren joto hoṛge Rakas aḱ laćreko boloyena! Jãhã lekatege ona reaḱ sạjạilaṅ emaea. Ado Khelan ar Dolan do tire baber meṛaokate cạukirekin gitićena ar Rakas tạṅgirekin tahẽyena. Khange Rakas do hoṛaḱ sõe bujhạu ńamkeda are hećena. Tinre enege Khelan jojome sengot́ akana Dolan do usạra ti reaḱ babere pasnaokeda, ar ona baberte Rakas doe tol eset́ena. Nonkate Rakas doe jhạliyena. Khelan do ạḍi bese gate daṛeaḱa, uni do Rakas lạṭum lekae ạcurkedea. Rakas do ạcur ạcurte bohoḱ ko sanam ạcur cabayenteae. Un jokhen Dolan do uni saṕkedea ar jhilo se jhilokedea. Khange Rakas doe beć got́keda ar uniaḱ lać khon Raj, Rạni, Montri, Sipạhi, Hạti, Sadom jotoko oḍokente lahate lekage tạṛam bạṛaeko dhurạuena.    

Chapainawabgonj sodor upajila, Jhilim union reaḱ 2024-2025 kạuḍi serma reaḱ budget sodorena. Budhbar setaḱ union porisod re Chairman Golam Lutfol Hasan aḱ ạḱyurte budget doe lại uduḱkeda, union porisod ren socib Mrinal Kanti Pal. Jhilim Union reaḱ aema ward se ṭoṭharen hoṛko akoaḱ khojoḱa se dạbi ko lại sodorkeda. Ona okte Chairman Golam Lutfol Hasan do joto ward se ṭoṭharenkoge lahanti reaḱ mit́ṭen as doe emaḱkoa.

Union porisod ren socib Mrinal Kanti Pal doe baḍae ocokeda, sodoren budget reaḱ khajna se mạhsul ae do doho hoe akana 49 lakh 69 hajar 976 ṭaka, ar khoroć do doho hoe akana 49 lakh 49 hajar 976 ṭaka. Lahanti hisạbte ae ar khoroć doho hoe akana 2 karoṛ 52 lakh 46 hajar 600 ṭaka. Budget re tayom akan hoṛkoaḱ lahanti khạtirte aema lekan prokolpo do hatao akana. Inạ chaḍa hõ totho projukti (Information Technology), manobsompot (human resources), ar sikhnạt khat laha seć idi reaḱ hõ goṭa akana. Budget sodoren akhṛare adom adom sikhnạt ṭhãonaren maraṅ mahasoe, rajnitik, samajik, cultural, khudrojatisotta ar NGO ren kạmiạko seṭerko tahẽkana.

Mit́ṭen atore casa hoṛe tahẽkana. Uni do toa khon dahe ar makhon benaokateće ạkhrińet́ tahẽkana. Mit́din casa ren oṛaḱ hoṛ metaḱme ać bạhu do makhon benao kate ạkhriń lạgit́ casae emadea. Inạ tayom casa do ona ạkhriń lagit́ ato khon sohorte mohnḍayena. Makhon do ekal gol gol mońjge cake akan tahẽkana. Ona mimit́ goṭen reaḱ ojon do tahẽkana 1 kegi kate. Sohore seṭeren khan jao bar leka niạ dhao hõ niṭ akat́ dokanrege makhon bodolte ca, cini, sunum ar gharońj reaḱ jạruṛaḱ emanteaḱ jiniskoe hataokeda. Teheń do casa hoṛe senen tayom dokandar do onako makhon freez re dohoe jokhene hudiskeda noa reaḱ ojon do ṭhika se baṅ thoṛań biḍạu legaea. Tinre onae ojonkeda, sạrige makhon reaḱ ojon do 1 kegi  baṅkate 900 gram kate menaḱa.

Inạ dosar haptage casa hoṛ do makhon ạkhriń lạgit́ ona dokane calaoena. Tinre uni casa hoṛ dokane seṭerena soṅge soṅgete dokandar do kikiạuate menkeda, men oḍokoḱme ińaḱ dokan khon, niạ dhao khon onkan eṛe se ṭhok hoṛ sãote do bạń bạnij bepara. Ińaḱ dokanre ar tis hõ alogem hijuḱa, ente 900 gram reaḱ makhon 1 kegi menkate ạkhrińić hoṛaḱ mẽt́ãhã do ohogeń ńelkea. Ado uni casa hoṛ do ạḍi mạ̃hĩr salaḱ dokandare metadea, dada dayakate alogem raṅgaoḱa, khạṭige iń do ạḍi nacar hoṛ kạnạń, baṭkhara kiriń soman kạuḍi hõ bạnuḱtińa, onate tinạḱ dhao oka 1 kegi kate cini am ṭhen khon iń kiriń idiet́ tahẽn, onage baṭkhara mit́ aṛere dohokate eṭaḱ aṛe re do makhon dohokateć iń soṅet́ tahẽkana.

Sikhạuna:Am eṭaḱ hoṛ okam emae, onage tayomte arhõ am ṭhen ruạṛ hijuḱa. Ona do manot hoyoḱ se kurud.      

Birbão hoe remal do ḍher khon kom akan rehõ noa reaḱ khemota nit hõ baṅ kom akana. Remal khạtirte teheń goṭa disomre arhõ daḱ heć daṛeaḱa mente abohaoa office doe baḍae ocokeda. Ona são sãote teheń titkin bhitrite disom reaḱ bargel (20) goṭen ṭoṭhare ghonṭare 60-80 kilomeṭer toṛte daḱ selet́ hoe hõe hoe daṛeaḱa.

Inạ chaḍa hõ Rajshahi, Dinajpur, Putuakhali, Rangpur, Bogura, Noakhali, ar Sylhet ṭoṭhakore dạkhin-purub/dạkhin nakha khon 60-80 kilomeṭer toṛte hoe daḱ heć daṛeaḱa.

Birbão hoe Remal do gel turui (16) goṭen jilạre hạn daṛeaḱ mente hoe-daḱ ạpis (Abohaoa Odhidaptar) -e baḍae ocokeda. Teheń Robibar Bangladesh Abohaoa Odhidaptor ren abohaobid Kho.Hafizur Rahman aḱ em akan ḍhạrwạḱre noa khobor lại laha akana.

Ona ḍhạrwạḱ re menakana, noa birbão hoe do Khulna, Satkhira, Bagerhat, Pirozpur, Jhalkhathi, Borguna, Barisal, Putuakhali, Feni, Comilla, Noakhali, Lukhipur, Chandpur, Coxsbazar noako jilạre 8-12 phuṭ khon hõ bạṛti cetan reaḱ gheola hoe-daḱte ḍubạ daṛeaḱa.

Onka leka Rajshahi, Mymensingh, Dhaka, Khulna, Barisal, Rangpur, Chottogram, Sylhet jilạre hõ hoe-daḱ heć daṛeaḱa.

Mit́ṭen hoṛ ạḍi ãṭe bhabnaḱ kana ente ać bạhu luturte kome ańjom ńameda. Uni doe hudiskeda aćren bạhu do jạnić lutur reaḱ muskil karonte kome ańjomeda. Onate mit́ṭen ḍaktar ṭhene senena. Ḍaktar do uni hoṛe metadea tinạḱ sạṅgiń reaḱe ańjoma ar tinạḱ sạṅgiń reaḱ do baṅ ona thoṛa biḍạu lagaoḱa. Onate biḍạu ạikạu reaḱ mit́ṭen bhańj se dhara hõe lạiadea.

Dosar hiloḱ uni hoṛ do aćren bạhu bidạue lạgit́ 40 moka sạṅgiń khone metaekana, teheń ńindạ do cet́em isin basaṅa? Aćren bạhu do daka-utu oṛaḱre bhiṛe tahẽkante jãhãn bae roṛ ruạṛleda. Uni hoṛ do onate thoṛa sore senena, 10 moka laha seć sen kateće metaekana, teheń ńindạ do cet́em isin basaṅa? niạ dhao hõ uniren bạhu do jãhãn roṛ ruạṛge bae emleda. Onate uni hoṛ arhõ 10 moka lahae senena are metaekana, bam ańjomeda cet́ema isineda? Niạ dhao hõ cet́ge bae roṛleda. 10 moka pharak khon hohokate rehõ jãhãn porho bae ńamlet́te niạ dhao do ać bạhu tayomre senkateće kulikedea ńindạ bakhra do cet́em isineda? Niạ dhao ać bạhu do ạcurente raṅgaote menkeda, niạ ghaloḱ mõṛẽ (5) dhao iń roṛkeda sim jel iń utuiet́ kana.

Sikhạuna:Aema okte abo hõ eṭaḱ hoṛkoaḱ dos se bhul bon sendra baṛaea. Jãhãnaḱ dosarege hoṛbon dusi koa. Menkhan ona dosa lạgit́ je abo hõ bon daege ona do tis hõ babon manaoa. Aboaḱ jion reaḱ joto dosage joto seć khon tojbij jạruṛa. Ente bin baḍaete jãhãe hoṛ dusiye do baṅ ṭhika. 

Dulạṛiạ boeha,

Niạte eken iń baḍae ocokam kana je ińaḱ oṛaḱ calaḱ jatra do besge tahẽkana. Thoṛa baṅ khan be-bạṛić bes. Menkhan ona reaḱ do tayomteń lạiama. Pạhil prothom doń gun manao joharam kana atma jion lạgit́ amaḱ goṛo ńutumte.Nitoḱ doń aṅgocam kana am ṭhen seṭeroḱge iń lạgit́ do kom som cesṭa do baṅ tahẽkana. Onkae reaḱ sanage baṅ tahẽkantińa. Menkhan am ṭhen seṭeroḱ ar ńapam, ona do kuṭhingeń ạikạukeda.

Oka lekań asoḱ kan tahẽkana ona khon do ekalte jotoge begargea. Am do tis hõ noa hudisjoṅ do bam emadińa je mit́ṭen hạkim samaṅreń teṅgon kana. Bickom nonkage enkathae mit́ṭen boeha tuluć iń duṛuṕ akana okoe do ać hõe kại hoṛ kan. Am do amaḱ ńũroḱ guroḱ reaḱ phaṅka phayaṛem lạikeda amaḱ noa kathatege iń apnar reaḱ khulạ khuli lại lạgit́ dil baḍhaoentińa. Pạhil do iń hõ uni casa hoṛ okoe aćren Pasṭor ṭhene aṅgoćket́ je babergeye kombṛo akada, uni lekań menwan tahẽkana. Ḍher hapta paromkate Pasṭor do uni casa arhõe ńapamkedea. Casa do un hõ udạsgeye ńeloḱ kan tahẽkana. Onate Pasṭor do uniye kulikedea: “Cet́ ona baberte jãhãnaḱ tol tahẽkana?”“Hẽḱ”, uniye roṛ ruạṛkeda,“mit́ṭen gại.”Bạń baḍaea cekate nonka hoyena, menkhan ackage “gại” reaḱ galmarao hõ aosangeń ạikạukeda. Tis hõ noa do bạń hudisan tahẽkana je mit́ bar nonkan bisoe reaḱ eken roṛ sodorte tinạḱ aosan ạikạuḱa. Ona do nonkanaḱ kangea oka tin hạbić ạurim “biḍạua” un hạbić do bam baḍae daṛeaḱa.

Abhagiạ “gại” one uni ińaḱ pạhilạḱ ciṭhi am ṭhen ol reaḱ karon tahẽkan inạ eskar do baṅ tahẽkantińa. Ona sodoram lạgit́te ạḍi ãjhãṭ kurumuṭu hoelentińa. Menkhan hahaṛage am ar iń onako babot galmaraote balaṅ asketlena. Bickom artet́laṅ rạskạ idiena.Landa hõ boroṅlaṅ landakeda. Sesre batabotonge rạskạwanaḱ hoyena. Paseć onkanaḱ gapalmarao dhạrtire rạskạ utạraḱ kana. Iń hõń oromkeda je ińaḱ ńũroḱ ona do asolaḱ do baṅ tahẽkana, bickom ona khon ińaḱ rakaṕ ruạṛoḱge; ińaḱ kạiko do baṅ, menkhan onako kại ikạḱ reaḱge. Ṭhikgem meneda. Apnar ṭhen apnaraḱ do cet́ lekam aṅgoca. Ińaḱ bhage utạr ạt opsorkore jorãeiń pạtiạu legat́a je sisirjạuić do ińe akadińa. Jãhãtis noa biswạsoḱ do kuṭhingea je iń oka sạjạiyiń ńam lek kan ona do Jisuye goḱkeda ar se nonkan hudis do iń suluke em daṛeạńa. Jãhãtis nonkań hudisa je harkhet sahaotege sulukiń ńama-ḍher baṅre hõ thoṛa gan-ińaḱ kạituk gunạḱtege; ikạyiń kamao se do baṅ, bickom ińaḱ kạmite ińaḱ kastaoḱiń sodor. Menkhan ,amem menet́ leka, noa do eken bạḍại hoe botećkoḱa. Noa biswạsoḱiń kurumuṭuia je Sisirjạuić do iń lạgit́ sanamaḱe ceka akada.

Menkhan nitoḱ do ińaḱ ruạṛ jatrare cet́ hoyentiń onam ańjoma. Bohoḱge ạcuroḱ kantińa. Ekkalteń gulmal cabayena. Rạskạtemań koṅkayen. Iń do cet́ co, ohoń men daṛelea……khaṭote do, mit́ṭen kuṛi sãoteń cinhạpena! “Kuṛi” katha do bhulgea. Boroṅiń mena, “rạni” Ar “cinhạpoḱ” ona reaḱ mane do cet́ kana? Eken ninạḱ iń men daṛeaḱa: ińaḱ jibonre pạhil dhao mit́ṭen kuṛiyiń ńel akadea, mit́ṭen manwa kanae, hoṛ kanae. Onkanaḱ ńapamte je mit́ṭen hoṛ ekalteye pherao utạr daṛeaḱa! Ona pạtiạuḱ do baṅ hoe daṛeaḱa .Ona do iń nije hõ bạń baḍaea. Uni kuṛiyiń bornone paseć bạń daṛeaḱa. Ohotet́ge lại daṛelena je tinạḱe mońja ar tinạḱe nichorawa. Katha do phikagea, beroṅgea, bedamanaḱgea. Jãhã lekage roṛogoḱ jotoge chewoḱa. Eken ninạḱ iń mena:Uni kuṛigeń ńapamkedea okoe do iń bạhuye hoyoḱ. Nitoḱ do amaḱ mẽt́ãhã ńeńel sanakińa! Enhõ mit́ṭeć kukli menaḱtińa. Noageye bhaṛo ocoyedińa je am são ńapam tayomge noako do unạḱ usạra hoe baṛagot́ena. Cet́ noa hõ daṛeaḱa je Sisirjjạuićge noa aṭkar ńamjoṅ lạgit́e ạyurkadińa?Je gateḱre ar ińaḱ aṅgoćre jãhãn jonoṛao menaḱ boteća? Bhorsam em akawadińa je “telephone layen” meramotlenre Sisirjjạuić do nawa horreye ạyurińa.Menkhan unạḱ usạra?Cet́ Sisirjjạuić do unạḱ sorre menaea? Thartharao utạroḱ kạnạń……..

Arhõ lạiam reaḱ aema menaḱa. Menkhan iń ninạḱkaḱa. “Uni” ṭhen do arhõ oloḱ sanań kana.  

Noage

Amren Biswạsi,

Gate

Meskoć

Mit́ dhao ato-ṭolaren mit́ṭen hoṛ rel gạḍi reaḱ ṭikiṭ get́ lạgit́ isṭesonte calaoena. Ado  ṭikiṭ ạkhrińiće kuliede kana ṭikiṭ reaḱ dam do tinạḱ? Ado ṭikiṭ ạkhrińkan hoṛ doe lạiadea bargel (20) ṭaka. Khane metaekana, gel mõṛẽ (15) ṭakate bam emoḱa? Baṅ ṭikiṭ reaḱ dam do nunạḱge nenḍa akana, onate dam kom reaḱ jãhãn ạtge bạnuḱa. Khange uni hoṛe mengot́keda, am bam emạń khan eṭaḱ dokan iń calaḱa. Ado ṭikiṭ ạkhrińić doe landakeda are menkeda, ṭikiṭ counter do mit́ṭengea. Ar oka dokanrege noa ṭikiṭ do baṅ ńamoḱa. Unre uni hoṛe menkeda, mit́ṭengea dokan. Onatege dam do bam komeda ar mit́ṭen dokan tahẽlen khan jãhã lekategem komkea.

Mit́ṭen kuṭhiạ hoṛe tahẽkana. Okoeaḱ do ạḍi maraṅ mit́ṭen bagan tahẽkantae ar ona baganre uni do ạḍi utạr sona ṭukućre bhoraokate hasare topa akat́ tahẽkana. Dinạm din gitijoḱ lahare uni do ona ṭukuće ńel ạguiet́ tahẽkana, oka dinge ṭukuć hiri do bae hiṛińet́ tahẽkana. Mit́din mit́ṭen kombṛo do uni hoṛe tạṅkhikedea, je cedaḱ nonḍe nonkae hiria mente. Ado okte nạpitre joto ṭukuć khon thoṛa sonae kombṛokeda. Dosar hiloḱ setaḱre tinre uni hoṛe ńelkeda nonkan ghoṭna ghoṭao akana, ado bogete hũk hũke raḱkeda.  

Uniaḱ raḱ ańjomte aḍepaseren mit́ hoṛe dạṛ ạgukeda ar jotowaḱe baḍaeket́te kulikedea, “Oṛaḱre doho baṅkate joto dhon dạulạt cedaḱ bahre rem dohoet́ tahẽna? Enḍekhan onako kiriń ạkhriń okte khorcae lạgit́em beohar daṛekea. Ado arhõe kikiạukeda are menkeda tis hõ ińaḱ dhon dạulạt sona do ohongeń khorcakea. Noa katha ańjomte uni aḍepaseren hoṛ doe menkeda, enḍekhan teheń khonge noa dhiriko joma jarwaeme. Noakoge amaḱ sona leka bekam se okaj lekate jarwaḱa. Jãhãn begarge bạnuḱanaṅ.

Sikhạuna: Jãhã lekanaḱ jomawaḱ sompot unre kạmire lagaoḱa tinre onako amaḱ jãhãn kạmire bhạlại  se upkạr hoyoḱ.  

Meskoć

Mit́ṭen Toyo do mit́ṭen Kulại sikạr ạgukate bhugạḱre duṛuṕkateće jome kana. Ackage tạṅkhikeda mit́ṭen Tạruṕ do so ńamkate bhugạḱ sećge hijuḱ kana. Toyo doe hudiskeda, Tạruṕ noa bhugạḱre bololen khan enḍekhane jom rejeńa ar ona sãote iń hõ nahaḱe mocṛaoińạ. Nonka hudis baṛakate Toyo do mit́ṭen phundi oḍokkeda. Danaṅ khonge Tạruṕ ańjom ocoye lạgit́e bakhẽṛeda, teheń mit́ṭen Tạruṕ jãhã lekateń sikạr kedea, jomre tinạḱ sebele ạikạuḱ kana. Nonkanić ar mit́ṭen iń ńam lekhan. Noa katha ańjomte, Tạruṕ do botorte usạrae dạṛkeda.

Mit́ṭen Gạ̃ṛĩ do hoyenaḱ purạ ghoṭna dare cetan khone ńelkeda. Ado noa ńelte hudiskeda, noa kangea mit́ṭen mońj ạt, joto katha Tạruṕ lạiae ar uni ṭhen bhạgạn hoyoḱ reaḱ. Onate Tạruṕ ṭhene senena ar joto kathae lạiadea. Tạruṕ do ona joto katha ańjomkate raṅgaote Gạ̃ṛĩ metadea, ma ińaḱ deare dejoḱme. Ado Gạ̃ṛĩ deare dećkedete ona bhugạḱ sećkin mohnḍayena. Tinre Toyo do unkine ńelket́kinạ bhugạḱ sećgekin hijuḱ kana adoe hudiskeda paseć Gạ̃ṛĩ do jotowaḱ katha Tạruṕe lại akawadea. Nit do cet́iń cekaea? Onkage arhõ mit́ṭen phundi oḍokkeda, ado onkage danaṅ khon bakhẽṛe ehoṕena, mit́ṭen jomkate arhõ bạṛti reṅgećediń kana. Tinre uni Gạ̃ṛĩń menakadea, mit́ṭen Tạruṕ jãhã lekatege bulạu kateć iń ṭhen ạguiem, menkhan nit hõ bae hijuḱ kana. Noa katha ańjomte Tạruṕ do jiwi botorte arhõ usạra onḍe khone dạṛkeda.