Budhbar (8 March) goṭa dhạrti maejiu mãhã kana. Noa bises mãhã do̠ NAGR (National Agency for Green Revolution) reaḱ hall room re manot́ hoyena. Maejiu mãhã manot́ akhṛare manot́ peṛa lekate seṭere tahẽkana Australia ren manot́ peṛa Elsabeth Bakker, NAGR ren ạyurić Mn. Stephen Soren, Tabitha kinder Garten School ren mahasoe Sujonti Murmu, Nilufa Parvin, Jhilim union ren 1,2,3 no.ward ren maejiu member Johra Begum. Ona sãote seṭerko tahẽkana noa aḍepase ren ạḍi utạr maejiuko. Ar noa maejiu mãhã akhṛa ạyur re tahẽkana Silvia Hembrom.

Manotan ko do maejiu mãhã babotre selet́ akan ko talare maejiu mãhã reaḱ mul jos katha  “DigitALL:Innovoation and Technology for Gender Equality” mul jos katha reaḱ manetet́ do Digital Projukti O Udvabon, jendar boisomo niroson’ cetanre puaṭạuteko lại sodorkeda. Noa maejiu mãhã cet́ iạte manotoḱ kana se herel ar maejiu aḱ mit́ ạidạri menaḱ noako sanamaḱ ko galmaraokeda.

Onka leka maejiu mãhã babotre kathae roṛkeda Mn. Peṛa Elsabeth Bakker. Uni doe menkeda, maejiu ko do̠ somaj disom ren dil daṛean hạtiạr kana ko. Onkan kạmi bạnuḱa oka do̠ maejiu bae daṛeaḱ. Gharońj ar disom lahantire maejiu ko ạḍiko laha akana. Maejiu do̠ gharońj ren marsal kanae. Maejiu ge mit́ṭen gidrạ mẽt́ marsale uduḱ daṛeaea. Cedaḱje pạhilte gidrạko do̠ mimit́ gharońjre akoren gogo ṭhenko hara buruḱa. Unre aćren gidrạ cet́lekae haraea, cet́lekae sikhạu paṛhaoea onkage haraḱa. Onate udgạu selet́e roṛkeda, jemon maejiuko thir tahẽ baṅkate herel ar maejiu mit́teko kạmite mit́ ạidạriko hameṭ daṛeaḱ.

Inạkate Nilufa Parvin hõ jarwaḱ akan ko talare maejiu mãhã reaḱ mul jos katha babotre kathae roṛkeda. Uni hõe menkeda, herel ar maejiu aḱ mit́ ạidạri menaḱtakoa. Baḍaeabon maejiu ko do̠ noa disomre gharońj jionre ạḍi lekako koclon ocoḱ kana. Menkhan noa do̠ baṅ ṭhika. Ente maejiu begor cet́ lahanti hõ baṅ hoe daṛeaḱa. Mit́ṭen herel do̠ ać eskar cet́ge bae ceka daṛeaḱa. Baṅdo gharońj jionre baṅ do̠ disom lahantire. Cetat́rehõ baṅa, Onate bana hoṛge mit́te kạmi jạruṛkan takina.  Maejiu ar herel talare oka begar se pharak menaḱ noa ocog hoyoḱa. Onkage mahasoe Sujonti Murmu hõe menkeda, maejiu ko do̠ somaj ar disom lahantire maraṅ nạmuna kana ko. Maejiuko apnarte lahanti hoyoḱ jạruṛkantabona. Jemon ạuṛi pạthạuṛi okto ko baṅbon khemao giḍikaḱ. Okte nạpitre jotowaḱ bon kạmia. Cet́lekate mońj jion jingi ar gharońj jion  khemao hoyoḱa, ona babotre udgạuket́koa.

Inạ chaḍa hõ kathae roṛkeda, 1,2,3 no.jhilim union porisod ren maejiu member Johra Begum hõ maejiu mãhã manot́ cetanre aćaḱ daman katha mimit́ko lại hạṭińat́koa. Noa dhạrti re joto lekan kam-kajre maejiu ko lahaḱ kana. Onate selet́ akan koe udạuket́koa jemon jhũk mon salaḱ kạmireko pheḍoḱ. Enḍekhan sanamaḱre jit́ko hameṭ daṛeaḱa. 

Mucạt́re NAGR ren ạyurić Mn.Stephen Soren hõ maejiu mãhã babotre maejiu ko talare mit́bar daman kathae lại so̠do̠rkeda. Nonkae menkeda, ńeloḱ kana goṭa disomre maejiu ko ạḍi ko lahanti akana. Abo noa disom sećbon beṅget́lere ńelet́ kanabon noa goṭa disom maejiu-e ạyureda. Onka leka aema disomge maejiu hotete ạyuroḱ kana. Onate herel aḱ cet́ ạidạri menaḱa maejiu hõ ona ạidạri ńam lek kanae. Inạ chaḍa hõ udgạuket́koa jemon mimit́ maejiu ko akoren gidrạ mońj solha mońj cecet́aḱ ko emakote sikhnạt sećteko hara buru daṛeako. Onkate darakan dinre maejiu ar herel talare oka begar menaḱ ona ar baṅ tahẽna. Jemon do̠ herel ar maejiu inạ mit́ ạidạriko hameṭ daṛeaḱ. Ạḍi napaete noa maejiu mãhã manot́ akhṛa hoe purạuena.

8 March goṭa dhạrti maejiu mãhã. Maejiu ar herel mit́te nawa dhạrti benao rakaṕre as doho kateć goṭa dhạrti jao sermage noa maejiu mãhã ko manoteda. 1857 serma reaḱ noa dinre Markin Juktorastro New York naṅgraha reaḱ horoḱ bande se kićrić kạrkhanare maejiuko do ạḍi ghạrić ko kạmikan, gidrạ umer re khaṭaok,  mạńjri emoḱ re begar nonkanaḱ birudre teṅgo daram ar hike hok ạidạri, voṭ emoḱ reaḱ ạidạri, kạmi reaḱ okte 8 ghonṭa nonkanaḱ dạbi ko babotre kulhi ḍaharkoreko ńir oḍoklena. Enhiloḱ mạliki ko onko cetanre ạḍi bạṛićko beoharlet́ rehõ baṅko hape daṛeat́koa. Inạ tayom 1910 serma Kopenhegen re hoyen maejiu koaḱ jarwaḱre somajtantrik maejiu ạyurić Clara Zetkin noa din do goṭa dhạrtire maejiu mãhã mente manot reaḱe nenḍa keda. 1911 serma reaḱ 8 March pạhil dhao noa maejiu mãhãko manotkeda Austria, Denmark, Jarmany ar Swizerland. Un khonaḱge goṭa disomre maejiu ar herel mit́ ạidạri ar maejiukoaḱ lahanti lạgit́te noa mãhã manot hijuḱ kana. Baṅgladisom hõ ạḍi man manot selet́ noa mãhã manotet́ kana.

Baṅgladisom re calaoen mit́ jug re maejiu ar herel talare jãhãn begar se pharaktet́ alo tahẽn ar bana hoṛ talare mit́ ạidari bạisạu lạgit́ maraṅ kạmi hoe akana. 2022 serma chapa sodor akana Bisso orthonoitik Forum (WHF) ‘Boisik jender boisomo Protibedon’ lekate 146 goṭen disom modre Baṅgladisom do 71 aḱ hudạre rajoḱ kana. Dạkhin Asia joto disomko modre maejiu ar herel hoṛkoaḱ ạidạri se soman re Baṅgladisom do cetan utạr ṭhạ̃ie ńam akada. Prathomik ar Madhomik sikhnạt seć tạṅkhi lekhan ńeloḱ kana koṛako khon kuṛiko ạḍi ko lahagea, oka do lahanti akan disomkore baṅ ńeloḱkan. Baṅgladisomre gidrạ janam okte maejiu koaḱ gujuḱ soṅkha 100 hajar hoṛko modre 176 goṭen, lahanti disomre one oka do 232. Nebetar jugre 62% maejiu ge gidrạ janam reaḱ aema lekan horko pańjaeda. Oka do lahanti disomre eken 53%. Menkhan noa hameṭ do maejiu ar gidrạko cetanre ạḍi bạṛić aḱ kana, ente lahatire noa do maraṅ akoṭe ạgueda. Gidrạ umer re bapla noa sećte Baṅgladisom do ponaḱ hudạre rajoḱ kana ar Dạkhin Asia redo pạhil.

Nonḍe do 18 bochor lahare 52% kuṛi gidrạkoaḱ bapla hoyoḱ kana. Covid se korona khonaḱ bạṛtikaete 10 milion gidrạge gidrạ umer re baplako re reaḱ muskil dosare menaḱkoa. Goṭa disom konać ar maejiu julum ko reaḱ ghoṭna ghoṭaoḱ kana. Ạn ar sạlis centre reaḱ khobor lekate 2022 sermare moṭre 936 goṭen  maejiu ko konać oco akana. Ar note Hoṛko lạgit́ foundation reaḱ khobor lekate 2021 serma re moṭ 818 goṭen gidrạ konać reko paṛao akana. Konać reaḱ sạjaitet́ do gujuk enrehõ konać (dhorson) do nase hõ baṅ kom akana. Nunaḱ maejiuko neṅghao ocoḱkan rehõ adalot re bicạr ńam lạgit́ko senlenre jãhãn porman begorte jãhãn bicạr bako ńamet́ kana. Eken 3% maejiuge apnarte bicạrko ńamjoṅ kana. Goṭa dhạrtire platform maejiu ko talare nawa matra do joṛao akana. Jatisongho reaḱ women jender slapshot khobor lekate 2022 re chapa sodor akana 51 goṭen disomre online platform beoharet́kan maejiu koaḱ 38% ge Cyber oprad reko paṛaoḱ kana. Ulek kana Baṅgladisomre platform beoharet́ kan maejiuko amdaj 53 % Cyber oprad reko paṛaoḱ kana.

Noa serma maejiu mãhã reaḱ mul jos katha do “DigitALL:Innovoation and Technology for Gender Equality” mul jos katha reaḱ manetet́ do Digital Projukti O Udvabon, jendar boisomo cabaea niroson (maejiu ar herel talare begartet́ cabae). Niạ dhao aḱ mul jos katha do 67 aḱ Commission On The Status Of Women (CSW) aḱ mul jos são mit́gea; okare maejiu ar herel hoṛ talare samajik ar orthonoitik joto sećre maejiu ko bạṛti dam ko emako kana. Niạ serma maejiu mãhã reaḱ campaign theme #EmbrancrEquity. Thoṛa serma lahare Baṅgladisom sarkar do kuṛi gidrạ ar maejiu ko lahatire aema lekan ạn-ạri ko odoḱ akada, jeleka Nari ar sisu domon ain 2000, paribarik sohingsota ain 2010, Joutuk nirodh ain 2018, Gidrạ umer re bapla birud teṅgo daram (Ballobibaho nirodh ain) 2017, Ballobibaho nirodh bidhimala 2018, Ballobibaho ar nari ar gidrạ julum ocoḱkan birud teṅgo daramoḱ lạgit́te National Plan Of Action 2018-2030.

Baṅgladisomre maejiu koaḱ soṅkhage ḍhera. Onate maejiu ko nirại tahẽn ar lahanti begor disom do ohoge laha daṛekea.  Maejiu ko do nana parkanteko koclon ocoḱkana. Jạruṛ kana nonkan bin lekan ghoṭna babot teṅgo daram. Cedaḱje mit́ten gharońj bandhao, nawa dhạrti benao ar lahatire maejiu ar herel mit́te kạmi ạḍi jạruṛ kana. Maejiu ar herel talare jemon onkan begar do baṅ tahẽn. Jotowaḱre mit́te kạmite mit́ muńjri ńamte gharońj são disom jemon lahanti hameṭ daṛeaḱ. Sãota se somaj kore kạṭić umer khonge koṛa gidrạko mońj mon subạ benao rakaṕ hoyoḱtakoa. Onkoaḱ beohar, cạl colonre bodol ạgui hoyoḱa. Enḍekhan goṭa disom se Baṅgladisom rehõ maejiu ko eṭaḱ mẽt́te bako ńelkoa. Nonkate herel ar juạnko bạṛti keṭejoḱ ar dilan hoyoḱ jạruṛkantakoa. Enḍekhan maejiu ko ohogeko koclon se ko neṅghao ocoḱa.

Santal union banadhaoak̕ ho̠ho̠ kumiṭi benaoena: Baṅladisạmren santal ho̠po̠nko talare kạuḍiạri, rajạri, somajiạ ar ạricạli babo̠tkore so̠so̠nto̠r saṅge ocoe ar ho̠k ạidạri hameṭ lạgit̕ Santal Union ńutuman mit̕ banadhao benao hoyakana. Santalkoak̕ jạtiạri babo̠tko niạte banadhao lekate laṛaok̕ lekan Santal banadhao bạnuk̕te, aema bạpuṛic̕ do̠l mo̠t bapak̕ – begar sirjạu katet̕ santal ạdibạsiko ạidạri kho̠nko eṇḍak̕et̕koa. Bhinạ-bhini , bapak̕- begar reak̕ go̠bo̠lre paṛaokatet̕ apnarak̕ ạidạri reak̕ so̠so̠nto̠rko din ke din thoṛa idik̕ kana . Maraṅ banadhaoko talare be-miljhul ar nakha banadhaokoak̕ mit̕mo̠t reak̕ okulạnte santalko apnarak̕ ạidạri reak̕ laṛanao baṅko benao rakap̕ daṛeak̕kana. Noṅkan halo̠tre Santalkoak̕ jạtiạri babo̠tko niạte banadhao lekate jạtiạri jaegakore laṛanao lạgit̕ mit̕ṭen banadhao benao rakap̕ reak̕ galmarao 2018 serma kho̠n hoy hijuk̕kana. Oka hotete disạmren aema nakha ar maraṅ banadhaoko talare mit̕ mo̠t tear katet̕ jạtiạri laṛanaoe kajak ocoea. Lại do̠ho̠kat̕ do̠ noage je, disạm reak̕ pạṭhuạ banadhaoko kho̠n ạyuric̕ko tear hijuk̕kanre hõ̠ pạṭhuạ okte paro̠m lenkan tayo̠m daramte banadhao mo̠ńco̠ reak̕ okulạnte aema mo̠j mo̠j ạyuric̕ko harago̠do̠k̕regeko ado̠go̠k̕kana. SANTAL STUDENTS UNION -SASU 30 serma leka aema serma santal pạṭhuạko kho̠n ạyuric̕ko benaore maraṅ e̠ne̠me̠ do̠ho̠ ạguakat̕re hõ̠ , pạṭhuạ tayo̠m reak̕ banadhaoan mo̠ńco̠ bae benaoakada. SASU saote sanam santal pạṭhuạ banadhaoren mo̠j ạyuric̕ko sap̕ do̠ho̠ko lạgit̕ ar lahanti banadhao laṛcaṛ reak̕ mo̠ńco̠ lekate tear lạgit̕te benao hoyakana SANTAL UNION. Santalism, dho̠ro̠m niro̠po̠kkho̠, boeha sạgại, miljhul ar lahanti noa banadhao reak̕ mul niti lekatei kạmia. Noare Mamun Hembrom mukhiạ ar Modhu Murmu rạsiạ socib do̠ho̠katet̕ 11 ho̠ṛte̠ kumiṭi reak̕ ńutum so̠do̠r hoyakana. Santal Union ren ho̠ho̠ kumiṭiren rạsiạ do̠ ko hoyok̕kana:- (1) Mamun Hembrom – Mukhiạ ho̠ho̠ic̕ ; (2) Modhu Murmu – rạsiạ socib; (3) Senas Marḍi – Go̠ṛo̠ ho̠ho̠ic’; (4) Milon Soren – Go̠ṛo̠ ho̠ho̠ic̕; (5) Ruhul Amin kisku – Go̠ṛo̠ ho̠ho̠ic̕; (6) Suit Marḍi – Go̠ṛo̠ ho̠ho̠ic̕; (7) Polash Kisku – Go̠ṛo̠ ho̠ho̠ic̕; ( Robindronath Soren – Go̠ṛo̠ ho̠ho̠ic̕; (9) Shimul mạrḍi – Go̠ṛo̠ ho̠ho̠ic̕; (10) Agosṭin Murmu – Go̠ṛo̠ ho̠ho̠ic̕ (11) John Hembrom – Go̠ṛo̠ ho̠ho̠ic̕; Daraekan 6 cando modhre mit̕ṭen purạ kumiṭi benao lạgit̕e kạmia noa ho̠ho̠ kumiṭi.

Indonesia re ạḍi botor ar kajak hoe-daḱ tayom dhạrti laṛaote 15 goṭen hoṛko gur akana. Ar nit́ hõ ạḍi utạr hoṛko aṅgen akana. Sombar (o6 March) ona disom reaḱ dạkhin Chin doreão aṛe Natuna toṭha re nonkan ghoṭna ghoṭao akana. Ona ṭoṭha re kajaḱ daḱ karonaḱte udhạr kạmiko hape haṭaṛ akana. Indinesia jatio biporjoi prosomon songstha reaḱ (BNPB) sarsadle akan chubi ar video re neloḱ kana Serasan ḍhip reaḱ bir gajaṛ talate dhạrti do laṛao akante oṛaḱ cetankore hasa ar rạput́ dhandhaser akan dosare menaḱa.  Songstha doe menet́ kana, dhạrti laṛao karonaḱte ona ṭoṭha são ḍahar horte calaḱ hijuḱ se jogojog dohoe reaḱ hor hõ chirchạtur akana.

Natuna tojbij ar udhạr songstha ren maraṅić Abdul Rahman doe menet́ kana, dhạrti laṛaote 15 hoṛko gur akana. Menkhan ạḍi utạr hoṛko aṅgen akana metaḱme amdaj mõṛẽ gel (50) goṭen hoṛ. Riau ḍhip ren durjog prosomon songstha ren maraṅ mukhiạ Junainah hõe meneda, nit́ hõ ạḍi kajake hoyet́ kana, ona sãote doreão daḱ hõ ḍheokote bogete sokojoḱ kana.

Indonesia re jaoge bạrsạ jạput́ din do dhạrti laṛaoḱgea. Ar adom ṭoṭhakore do bir gajaṛ mat́ saphae karonaḱte ḍherge nonka dhạrti laṛaoḱ lekan muskilaḱ ko hoyoḱ kana.

Online hotete gel mit́ (11) kelas re bhurtiḱ reaḱ registration ehoṕena. Aṭhwar hiloḱ (05 March) khon ehoṕkate 20 March hạbić calao idiḱa. Dhaka sikhnạt board khon noa babotre mit́ṭen hukum se batlao do jạri akana.

Ona batlaore nonka menakana, apan ạpin sikhnạt board reaḱ tabere disom reaḱ Ucho madhomik porjai reaḱ joto sikhnạt ṭhãonako bhurti (website) www.xiclassadmission.gov.bd ‘college login’ panel re login kateć darakan 20 March ạyuṕ bela 5:00 baja talate registration lạgit́ sikhnạt ṭhãona khon pạṭhuạ koaḱ joto lekan totho se khobor Online re kol kateć kạmi purạu reaḱ nehõr tahẽyena.

Inạ chaḍa arhõ menakana, niṭ akat́ oktere Online hotete bhurtik kan pạṭhuạko registration re jãhãn khạnti metaḱme bhul tahẽlenre ona muskil lạgit́ board kotripokho aḱ jãhãn ektiạri baṅ tahẽntaea.

Aḍi din laha reaḱ katha. Mit́ṭen Toyo ar Ũṭ ạḍikin gatelena. Jao ghuṛige mit́ sãorekin tahẽnkan tahẽkana. Ar Jom ńu daṛa baṛae, gitić sanamaḱ mit́re. Bochor ke bochor nonkage parom calaḱkan tahẽkana. Onkage mit́ din hiloḱ jomaḱ sendrakin oḍokena. Ado ackage mit́ṭen tormuj bagwan re nońjor paṛaoentạkina. Onḍe mit́ṭen casa pahra se hohorhoić tahẽkan iạte bakin sen daṛeada.  Ado̠ unkin do̠ ona tormuj bagwan aṛere gajaṛrekin oko tahẽyena ar ńindạ koyoḱ horrekin tahẽkana. Ńuhum hijuḱkan re uni casa do̠ oṛaḱ sene mohnḍayena. Uni casa hoṛaḱ oṛaḱ do̠ khet́ pheḍrege tahẽkana. Ado̠kin hudisena jãhãnaḱge ạḍi nirạitekin cekaea mente. Enka menkateć banar gate mit́te ona tormuj bagwankin bo̠lo̠yena. Bo̠lo̠ torage ạḍi heseć sekreć rạskạte tormuj jojomkin dhurạuena. Bakin jom bhagaoḱ kana, arhõ jojom sanayet́kina. Menkhan lać do̠ perećentakina ar mit́ aṛe hõ phaka bạnuḱanaṅ.

Noa oktere Toyo aḱ bo̠ho̠ḱre mit́ṭen cintạ hećena, are kikiạuate huka hũa-huka-hũa raraḱe ehoṕena. Toyo aḱ ona raḱ ańjomte Ũṭ-e menkeda, E gate cedaḱem raraḱ kana. Amaḱ raḱ ańjomte Casa do̠e ebhenoḱa, are ebhenlen re alaṅaḱ ạḍi bạṛić dosa hoyoḱa honaṅ. Toyo do̠ landawate mengot́keda-alom bo̠to̠ro̠ḱa uni casa do̠ kạmite laṅga akana unạḱ algate ohoge ebhenlena. Baḍaeam ińaḱ mit́ṭen rog hoe akana-jom tayom huka-hũa-huka-hũa baṅ sereń lekhan jom baṅ hajamoḱtińa. Ona men torage arhõ kikiạue dhurạuena. Note Toyo aḱ onkan kikiạu ańjomte casa do̠e ebhen got́ena. Ar maraṅ utạr ṭheṅga saṕ kateć unkin sećge dạṛ hećena. Toyo ma mon monte noage khojoḱ kan tahẽkana. Khange uni casa ńelte Toyo do̠ jhạnṭi phãkte riạḱ riạḱe dạṛkeda. Menkhan becariạ Ũṭ do̠ unạḱ maraṅ hamal ho̠ṛmo̠ ante bae dạṛ daṛeada. Casa do̠ uni Ũṭge saṕkedete ạḍi ãṭe dalkedea. Ado̠ dal akhamakade dosare enkatege aćaḱ tahẽn ṭhạ̃ite calaoena. Khange Toyo do Ũṭ ńelte mengot́keda haere gate iń karonaḱte nonka dalem jomkeda. Ar emanteaḱko—

Ado Ũṭ hõ Toyo aḱ calaḱ cạtur bude aṭkar daṛeada. Onate onkan ạt ńańam horare tahẽyena. Mit́din ạḍi lolo din tahẽkana. Aḍepase ekal nisun jãhãn hoege banuḱa.Ado Ũṭ do Toyo metadea E gate dela hana jalapuri ritić reaṛ daḱre hoṛmolaṅ reaṛ ńõḱlege. Enḍekhan hoṛmo ko thoṛa Mońjge reaṛoḱa. Khange Toyo do ạḍi usạrae hẽḱ got́keda. Are menkeda, E gate paeraḱ man bạń baḍae cekateń paeraḱa? Ũṭe mengot́keda, alom bhabnaḱa iń nahaḱiń goṛowama. Inạkate banar gate tala daḱrekin pheḍena. Ũṭ aḱ katha leka Toyo hõ uniaḱ dea re deć hapeyena. Ar note Ũṭ do̠ khạndriń sećge mohnḍa calaoena. Ona ńelte Toyo do̠e memenkana, E gate cedaḱ nunạḱ bhitri sećem sen idiḱ kana nonka macoń unum gujuḱ.

Ado Ũṭ do̠ nonkae roṛ ruạṛadea, ińaḱ rog hoe akana, bhitri sećre bạń unumlen khan paeraḱ lekage bạń ạikạua. Inạkate tinre daḱ khonkin rakaṕena un jokhen Toyo aḱ do̠ ạḍi bạṛić dosa hoe akan tahẽkana. Enhiloḱ khonaḱ Toyo do̠ Ũṭ são ar bae khilḍuḱa. Ar nonkage Ũṭ do Toyo ṭhen badla hataoleda.  

Russia-Ukraine lạṛhại tayom goṭa disomre amdaj joto lekan jinis reaḱ dam ḍher akana. Ona reaḱ ãc ạḍige kom akana goṭa disom reaḱ hạṭiạ bajar re. Jatisongho reaḱ Food And Agriculture Organization (FAO) menet́ kana, mit́ lagaote 10 cando goṭa disomre jinispạti reaḱ dam komoḱ kana. 2022 serma reaḱ March khon nit jomaḱ jinis (khadososso) reaḱ dam 18% kom akana. Utu sunum, holoṅ, gunḍạ toa, dạl dam baṅ ḍher akana metaḱme enkage menaḱa. Menkhan noa disom reaḱ hạṭiạre ona reaḱ ulṭạ ńeloḱ kana.

Goṭa disom reaḱ hạṭiạ bajar seć beṅget́ kateć ńeloḱ kana oka dam ḍherlena, nit onkage menaḱa.  Goṭa disom reaḱ bajar kore jotowaḱ dam thoṛa se kom akan rehõ noa disom reaḱ bajar re ohoge kom akana. Din hiloḱ jạruṛoḱkan jinis reaḱ dam hõ baṅ kom akana. Bisso bank reaḱ khobor lekate, calaoen serma reaḱ April khon June dhạbić utu sunum soabin reaḱ dam amdaj mit́ hajar 900 ḍolar tahẽkana. Nit ona do mit́ hajar 352 ḍolar re pheḍ akana. Onka leka gạḍi reaḱ sunum hõ mit́ hajar 634 ḍolar khon kom kateć 942 ḍolar re pheḍ akana. Un oktere guhum reaḱ dam hõ 492 ḍolar khon kom kateć 380 ḍolar hoe akana. 

Noa ma goṭa disom hạṭiạ bajar reaḱ chubi kan. Niạ dhao do Baṅgladisom reaḱ dosa bon ńel lege. Sarkari songstha Trading Coorporation Of Bangladesh (TCB) reaḱ khobor lekate ńeloḱ kana, calaoen serma muslạ koaḱ roja lahare inạ mit́ okterege amdaj joto lekan jinis dam ḍher akana. Niạko din bhitrire holoṅ reaḱ dam 56-64 % ḍher akana, moeda holoṅ hõ 38-40%, soabin sunum hõ 8%, mạsri dạl 12%, bhuṭ dạl 20%. Onate Bạnij bepariạ ko menet́ kana, ḍolar reaḱ dam hõ ḍher akanate joto jinis reaḱ dam ḍheroḱ reaḱ ko khojet́ kana. Kom dam reaḱ jinis nit dhạbić bajar re ạuri hijuḱa. Noa ạt ar upkạr ńamoḱte okte nạpit reaḱ ạḍige jạruṛ kana. Onate noa ko dinre reṅgeć oreć sanam lekan hoṛkoaḱ gharońj jionre muslik heć paṛao akana. Ar ona muskil talatege jion jingi ko khemao idiyet́ kana.

“ Sara do gidrạ hoyoḱ reaḱ umer parom calaolen taere hõ biswạs iạtegeye bhạrti hoṛmolena. Ente uni do biswạs tahẽkantaea okoye goḱakawade uni doe pạtiạrgea mente. Onate umer sećte goć barag hoṛmo hoe kate rehõ Abraham do sermaren ipil leka ar jalapuri aṛe reaḱ gitil leka ạḍi utạr gidrạ koren apate hoelena .” Ibriko 11: 11-12

Baibel rebo ńama, Sara do ạḍi utạr bõs omon reaḱ daṛe tahẽkantaea. Onate Sara do maejiu hoe kateć rehõ bõs jạsti lạgit́ Isor do khemotae emakadea. Un oktere Ibriko do maejiu kodo bako lekhaet́ ko kan tahẽkana. Un oktere maejiu kodoko neṅghao ocoḱkan tahẽkana. Tobe Sara do maejiue tahẽkan rehõ biswạsi jione khemaoet́ kan tahẽkana. Somaj re maejiu kodo komjorko tahẽkan rehõ Isoraḱ ạsirbad ar daya onko cetan re tahẽkana.

Nawa niạm re maejiu ar herel kodo begar bako uduḱakat́koa. Paule meneda, baṅ doe maejiu kan, baṅ doe kaṛmi kan ar baṅ doe herel kan jotoge Probhu reko mit́gea. Sarawaḱ biswạs ar Abrahamaḱ biswạs do mit́gea. Abraham hõ biswạsi jione khemaoet́ kan tahẽkana.

Juri-pạri tala rehõ biswạsi jion khemao reaḱ jạruṛ menaḱa. Mit́ biswạs, mit́ asa ar mit́ mon tahẽlen khan aema ạsirbad se bhor Isor seć khon ńamogoḱa. Aema manḍer re juri-pạri kodo eṭaḱ eṭaḱ dhorom ar dewa sewako paloneda. Aema oktere onko talare reṭepeṭe hoyoḱ kana. Mạsire mit́ menaḱbon lekate juri-pạri mit́ soṅgete dewa sewa re seledoḱ jạruṛ menaḱa. Onte aben bana hoṛben koea jemon Isor mońje dohoben. Ar  gharońjren joto hoṛ bakhrate koejoṅ jạruṛa.  Onkage Sara ar Abraham hõ mit́ pạtiạu tahẽkantakina .

Juri-pạri talare jawae doe hoyoḱ kana Jisu Mạsi leka. Ar bạhu doe hoyoḱ kana manḍer leka. Onate jawae kodo jemon mander tabereko tahẽn ar maejiu koho menḍer tabereko tahẽn. Maejiu koaḱ dạyik do eken gharońj bandhao moto do baṅ menkhan manḍer bandhao lạgit́ hõ dạyik tahẽntakoa. Isor cet́ leka Abraham ar Sara tạkine  bandhaoket́kin are  ạsirbade emat́kin tahẽkan onkage abo jotokoe bandhaoet́ bona are  ạsirbade emabon kana.

Chapainawabgonj re piknik bas ulṭạute mit́ṭen koching centre ren amdaj mõṛẽ gel (50) goṭen pạṭhuạ gidrạko akham akana. Sạnicar (04 March) setaḱ 10 baja jokhen Chapainawabgonj sodor upạjilạ reaḱ Chapai – Amnura ḍahar reaḱ  Paowel ńutuman jaegare noa aorẽ gãoṛẽ (accident) do hoyena.

Baḍae ńam akana, Shibgonj upạjilạ reaḱ Dadonchok ṭoṭha reaḱ Genius koching centre khon 75 goṭen pạṭhuạ gidrạko piknik lạgit́ bas te Nachole upạjilạ reaḱ Shopnopolli ko calaḱkan tahẽkana. Menkhan calaḱkan jokhen paowel jaega ko tioḱket́re bas reaḱ pạ̃ihạ̃ do ṭhuyente dare são ṭạkićena ar ulṭạuena. Khan bas re tahẽkan ḍiver selet́ kom se kom 50 goṭen pạṭhuạ gidrạko akham akana.

Khobor ńam torage Fire Service ren dolko hećente ghoṭna jaega khon onko akham akanko udhạr kateć Chapainawabgonj jilạ haspatal teko ạguket́koa. Akham akan kodo onḍege menaḱkoa. Chapainawabgonj sodor model thana ren bharapon ạpiser (OC) Sajjad Hossen doe baḍae ocokeda, pạṭhuạ gidrạkoaḱ ona piknik bas do nit police aḱ asrae re menaḱa. Pạṭhuạ gidrạko ran ocoko ar seba jotonre police dol ko goṛo gopoṛo ko emoḱ kana.

Goṭa disomre setoṅ reaḱ lo̠lo̠ se ãć do̠ tho̠ṛagan rehõ ḍher ńoḱge aṭkaroḱ kana. Bạṛtikate goṭa din reaḱ lo̠lo̠ se tapmatra kho̠n ńindạ reaḱ lo̠lo̠ ar elaṅ do̠ ạḍige sahao daṛe leka menaḱa. Enḍete ho̠ṛmo̠re lo̠lo̠ hõ komge bujhạuḱ kana. Menkhan darakan hapta kho̠n goṭa disomre ńindạ reaḱ lolo hõ ḍheroḱa mente abohaoa adhidaptor-e lại sodor akada. Khan goṭa disomre lo̠lo̠ reaḱ ãć do̠ tho̠ṛa ḍheroḱa.

Sokolbar (03 March) abohaoa adhidaptor re lại lahaleda, Sạnicar (04 March) goṭa disomre ar siń ar ńindạ reaḱ tapmatra reaḱ jahan bo̠do̠l baṅ ńeloḱa. Metaḱme enkage tahẽna. Disom reaḱ adom adom nakha senaḱ serma do̠ tho̠ṛa rimil macha ńeloḱa. Menkhan daḱ reaḱ jahan sombhab do  bạnuḱanaṅ. Sombar khon tapmatra thoṛa bo̠do̠l kateć darakan hapta kho̠n do̠ siń ńindạ reaḱ tapmatra do̠ ḍher utạroḱa.