Niạko dinre disom reaḱ amdaj jo̠to̠ jilạrege ạḍi lo̠lo̠-setoṅ calaḱkana. Setaḱre cando rakaṕ são sãote setoṅ rãt do̠ seṅgel aṅgra leka ḍigḍigạuḱ kana. Khange bại bạite tinạḱ ber rakaṕ calaḱ kana setoṅ hõ unạḱge sạrdi idiḱ kana. Ado tikin tarasiń reaḱ rãt do̠ artet́ge lo̠lo̠. Nunạḱge elaṅ se lo̠lo̠ kana je, barhete hoṛko oṅdokoḱre ạḍi muskilreko paṛaoḱ kana. Un jokhen Kulhi ḍaharkore hoṛ komko ńeloḱ kana. Menkhan enrehõ reṅgeć nacar pạṭ khaṭaoḱ hoṛko lo̠lo̠ setoṅ sahao katet́ hoṛmo khon udgạr daḱ joroḱkan tuluć rehõ bogeteko kạmijoṅ kana.

Nonkage arhõ thoṛa din calao idiḱa. Setoṅ reaḱ lo̠lo̠te noa okte ḍairia selet́ nanan parkan rogte hoṛko jạbunoḱ kana. Bạṛtikaete kạṭić gidrạ ar umerte laha akan haṛam-buḍhiko bạṛtiko jạbunoḱ kana. Abohaoa office khon emakan ḍhạrwạḱ hotete lại laha akana je, adom adom ṭoṭhakore do̠ tapmatra se setoṅ rãt do̠ 42 degree Celsius rakaṕ daṛeaḱa.

Nes bo̠cho̠r reaḱ HSC ar ona man reaḱ biḍạu do̠ July cando hoyoḱ reaḱ goṭalena. Menkhan College kore silạbas bako purạu akat́te HSC biḍạu arhõ mit́ cando tayomena. Darakan August cando noa biḍạu hoyoḱa mente Ant:sikha board ren somonoyok ar Dhaka sikhnạt board ren Chairman Professor Topon Kumar Sarkare baḍae ocokeda.

Ar note 2023 sermaren HSC pạṭhuạ koaḱ test biḍạu do̠ darakan 30 May khon ehoṕ lạgidoḱ kana. 2010 serma khonaḱ February cando ehoṕ seć SSC biḍạu ar April cando reaḱ ehoṕ sećge HSC biḍạu-e hatao ạ̣guyet́ kana Sikhnạt Montronaloy. Menkhan ko̠ro̠na virus karonaḱte 2020 serma khonaḱ biḍạu ko okte nạpitre baṅ hoyoḱ kana.Ente ko̠ro̠na karonte amdaj mit́ serma tala leka sikhnạt ṭhãonako bond tahẽkana. Onate biḍạu do̠ oktere baṅkate thoṛa bilomte hoyoḱ kana.

Chapainawabgonj reaḱ Amnura Mission re Rotary Club of Dhaka Kawran Bazar ar RCC-Amnura, NAGR (National Agency for Green Revolution) aḱ bondoboste Concrete block tear ehoṕena. Moṅgol hiloḱ (11/04/23) setaḱ 11:00 baja jokhen Amnura Mission compound re noa concrete block tear kạmihora uḍhạuena. Noa okte seṭere tahẽkana Dhaka Rotary Club of Kawran Bazar ren past President Ahmed Faruq, Bangladesh Northern Evangelical Lutheren Church ren GS Rev.Soban Kisku, Trust Board Hingu Murmu, RCC-Amnura upodesta ar NAGR ren ạyurić Mn.Stephen Soren, ar RCC-Amnura sompadok Promila Hasdak.

Iṭạ bodolte noa concrete block beohar lạgit́ hoṛko bạṛti cehao ar udgạuko lạgit́te tear ehoṕena. Sarkar do poribesh rukhiạ lạgit́te iṭạ bhaṭa bond lạgit́e goṭa akada, inạ chaḍa hõ nit iṭạ reaḱ dam dinke din arhõ ḍher idiḱ kana. Onate iṭạ bodolte concrete block te oṛaḱ tearge maraṅ hạtiạr do. Bisesoggo se jarnaha ko menet́ kana Concrete block beohar re 30% khoroć komoḱ kana. Noa aḍepase ṭoṭhakore Concrete iṭạ bodolte Concrete block beohar re hoṛko udgạu ko lạgit́te noa kạmihora do ehoṕena.

Gonosastho kendro ren kạrigo̠l se benaoić ar birbanṭa Dr. Zafrullah Chowdhury do̠ noa dhạrti bạgiada. Moṅgolbar (11/04/23) April ńindạ Rajdhạni reaḱ Dhanmondi gonosastho haspatal re raran oktege jiwi do̠ calaoentaea. 81 serma umeran Dr.Zafrullah Chowdhury do̠ ạḍi din khonaḱ kidney reaḱ muskilre jạbun akan tahẽkana. Thoṛa din khon arhõ bạṛti muskilre paṛaoena. Onate calaoen Budhbar haspatal reko bhurti kedea. Gonosastho Nogor haspatal ren Maraṅ raranić metaḱme kidney ren raranić Proffesor Mamun Mostafi teheń nindạ 11:35 baja jokhen Zafrullah aḱ gujuḱ khobore lại jạhirkeda.

Zafrullah Chowdhury do̠ mit́ṭen Vascular surgeon kanae. Bạṛtikaete hoṛ koaḱ hoṛmo babotre ḍhere guni bhạbiḱkan tahẽkana. 1982 sermare ehoṕ akan Osud niti ạn ren maraṅ kạrigo̠l do̠ kanae Zafrullah Chowdhury. Uni do̠ jao ghuṛige disom ar disomren hoṛko lạgit́e hudis ganḍonoḱkan tahẽkana. Onate kurumuṭure tahẽkana disomre bhageaḱ kạmi lạgit́. Menkhan sạrige aćaḱ kurumuṭu do̠ purạu akantaea.

Zafrullah Chowdhury do̠ 1941 serma reaḱ 27 December Chottogram jilạ reaḱ  Raujan upạjilạ reaḱ Koypara atore janamlena. Ać baba aḱ ńutum do̠ Morshed Chowdhury ar gogo Hachina Begum. Ać baba do̠ polis officer-e tahẽkana . Gogo-baba ren Gel goṭen gidrạko modre Zafrullah Chowdhury do̠ pạhil gidrạ metaḱme jo̠to̠ boeha khon maraṅ utạriće tahẽkana.

Rajshahi jilạ reaḱ Godagari upạjilạre ãoṛa gãoṛẽte (Accident) Bibiron Hembrom (47) ńutuman santal maejiu gurena. Noa ghoṭnate arhõ bar hoṛkin akham akana. Sombar (10/04/23) amdaj cando hạsur 6:00 baja jokhen Lolitnogor-Kakonhat ḍahar reaḱ Sundorpur Juktipara atore noa ghoṭna ghoṭao akana.

Bibiron Hembrom (47) do Sundorpur atoren Jotin Soren ren oṛaḱ hoṛ kanae. Baḍae ńam akana, Bibiron Hembrom do ḍahare paromoḱ kan tahẽkana. Un jokhen ona ḍaharte Kakonhat calaḱkan mit́ṭen honḍar gạḍite tạkićena. Khange uni maejiu do tạkićen soṅge soṅgete onḍege gurena.

Rajshahi reaḱ Godagari upạjilạ re ro̠ho̠e akat́ horo khe̠tre dak baṅ ńam khạtirte Santal Casa bise jomkeda. Ado ona dosare Rajshahi Medical College haspatal idikedeteko bhurti kedea. Uni do̠ Ona haspatal reaḱ 14 no. ward re bhurti menaea. Uni santal casawaḱ ńutum do̠ Mukul Soren (35). Godagari upạjila Deopara union reaḱ Borshapara atoren Gopal Soren ren hopon kanae.

Baḍaeabon je, calaoen serma reaḱ March cando ona sor ṭola Nimghutu atore nonkan ghoṭna ghoṭaolena. Horo khe̠tre dak baṅ ńam khạtirte Avinath Mardi ar uniren kaka khuṛa boeha Robi Mardi ńutuman boeha koṛa bis jomtekin gur akana. Unkin oka Borendro Unnoyon gạhir no̠l se ḍip rekin cas abadet́ tahẽkan, ona mit́ ḍip ren casa kanae Mukul Soren hõ. Menkhan Mukul Soren aḱ lać khon bis ko oḍoḱket́ tayom nit́ thoṛa mońj menaete kathae roṛ daṛeaḱ kana.  Uni doe lại sodorkeda je, horo khe̠t́re daḱ baṅ ńam khạtirtege bise ńu akada mente. Arhõe menkeda, dak khạtirte mit́ hapta khone ạcuroḱ kana, menkhan enrehõ ḍip ren operator Hasem Ali (Babu) do̠ daḱge bae emaekana.

Calaoen Aṭhwar hiloḱ (09 April) tikin ber daḱ hataoa mente arhõ mit́ dhao ḍip-e calaoena. Ado babu do̠ Mukul bise emadete aćaḱ metaḱme babu aḱ khe̠tre chiṭạue batlaokedea. Unre Mukule roṛ ruạṛkeda, dak bae ńamlere noa bise ńuia mente. Enhõ dakge bae ńamleda. Khange sạrige raṅgaote Mukul do̠ ona bise ńukeda. Serma daḱ tayom mit́ hoṛge bar-pe dhao daḱe emat́koa. Menkhan Hasem Ali do̠ nit́ dhạbić daḱge bae ńam akada. Mukul Soren ren apat́tet́ hõ daḱ hatao lạgit́ Hasem ṭhene senlena. Uni hõ daḱ bae emakadea. Inạkate Aṭhwar hiloḱ (09 April) tikin jokhen-e ańjomkeda koṛatae do̠ bis jomkate ḍahar aṛere ńurho akana. Ado ene unre harephare Haspatal ko idikedea. 

Sombar (10 April) jila prosasok aḱ kạmi ṭhaõna then 8 goṭen dạbi niye manwa tonol ar sarok sakam DC ṭhen ko jimạkeda Uttar Bongo Adivasi Forum. Ạdivasi ko lahantire khudro-nrigosṭhi Unnoyon nitimala -2012 reaḱ ạn ko jạri selet́ ạdivasi koaḱ jumi-jaega, topa ṭhạ̃i ńam ruạṛ, rastrio odhigrohon ar projasotto ạn 1950 reaḱ 97 dhara jạri selet́ dạbi ar manwa tonol kedako Uttar Bongo Adivasi Forum ren kendrio komiṭi ar Chapainawabgonj jilạ-upạjilạren ạdivasi gãotako. Noa olakan 8 goṭen dạbi doe roṛ sodorkeda jogajog ar procar sompadok Prodip Hembrom.

Noa Manwa tonol akhṛae ạyurkeda Uttar Bongo Adivasi Forum ren sabha mukhiạ Hingu Murmu. Akhṛare ona okte selet́ akan eṭaḱko modre kathae roṛkeda Adivasi ạyurić Monika Soren, Daniel Hasda, Sontosh Tudu, Advocate Probhat Tudu, Rumali Hasda ar Ronjona Bormon. Ạyurko do inạ chaḍa hõ akoaḱ kathate pusṭạuteko roṛ rakaṕkeda jemon, ạdivasi gidrạko oloḱ paṛhaoḱ lạgit́ joto lekan sikhnạt goṛoko ńamte paṛhaoḱ seć jhũk monko lagao daṛeaḱ. Ente reṅgeć nacar ḍher gidrạge kạuḍi begorte oloḱ paṛhaoḱ khon ko begaroḱ kana. Ona iạte jemon goṛo lekate paṛhaoḱ lạgit́ bin sudte loan se rinko ńam. Nonkan khojoḱaḱ ko roṛ rakaṕkeda. Inạ tayom jila prosasok AKM Galiv Khan ṭhen ạdivasi mukhiạ se ạyurko olakan sarok sakam ko jimạkeda.

Meskoć

Sahil ńutuman mit́ṭen huḍiń gidrạe tahẽkana. Ạḍitet́ ạḍi badmas ar chaṭpaṭ machae tahẽkana. Ado mit́din eṅgat́tet́e kuliyede kana, E go cekate amaḱ bohoḱ reaḱ adom adom uṕ do pạnḍugea? Khange eṅgat́tet́ doe bhạbitena, nitge nahaḱiń jobdo mea. Ado nonkae roṛ ruạṛdea, noa do eken am karonaḱtege pạnḍu akantińa. Tinạḱem chaṭpaṭaoḱ unạḱge ińaḱ uṕ hõ pạnḍuḱa.

Ado niạ dhao Sahil-e menkeda, noa karontege enḍekhan iń lạṭu gogo aḱ uṕ hõ pạnḍu akana?Ente iń khonaḱ amge ḍherem badmas arem chaṭpaṭgea. Khange eṅgat́tet́ doe thir got́ena. Cedaḱ je, aćaḱ phãndre aćtet́ge jhạliyena.Gidrạ jobdo jaegare nit aćtet́ge jobdo akana.   

Lo̠lo̠ setoṅ din. Aḍepase ekal nisunge muć hõ muć bako ńeloḱ kana. Lo̠lo̠ setoṅ din setoṅ reaḱ ãć se elaṅ hoṛmore bạṛtige aṭkaroḱa. Ado setoṅte mit́ṭen Tạruṕ do̠ daḱ tetaṅte kạluṅ dạbuṅe daṛa baṛaekan tahẽkana. Nunạḱ maraṅ bir gajaṛ okare daḱge banuḱa, jo̠to̠ pukhri ar nala ko ro̠ho̠ṛ caba akana. Khange disạ got́keda noa bir gajaṛre mit́ṭen pukhri menaḱa mente. Nonkan lo̠lo̠ setoṅ jokhen ona pukhri senlenre paseć daḱe ńama honaṅ.

Ado pukhri ṭhene senenre maraṅ utạr bir Sukri daḱ ńũi lạgit́ pukhri pheḍoḱe ńel ńamkedea. Tạruṕ do̠ pukhri seće koyoḱket́re cehel cepel ạḍigan daḱe ńel ńamkeda. Khange Tạruṕ ạḍi gaṛte aḍraoena. Uniạḱ aḍrao ańjomte bir Sukri do̠e hape got́ena, menkhan bae bo̠to̠rlena. Tạruṕ do̠ riạuḱ riạuḱ pukhri ṭhene dạr idiket́te memenkana, noa birren Raj kạnạṅ. Enḍekhan noa daḱ do̠ pạhilte ińgeń ńam lek kana. Bir Sukri hõe mengot́keda, am khonaḱ lahageń pheḍ akana. Nonkate rapṭha rạpṭhikin ḍhurạuena. Thoṛa ghạṛitege lạṛhại kin sạrdiyena. Lạṛhại lạṛhạite mit́ okte Sukri aḱ sunḍạ ḍaṭa do̠ Tạruṕ aḱ hoṛmore bo̠lo̠yena. Ar Tạruṕ aḱ gerte bir sukri hõ sahẽt́ bondentaea. Khan thoṛa ghạṛi tayom bana hoṛaḱ hoṛmo khon mãyãm jo̠ro̠ḱ ehoṕena arkin goć hapeyena. Noa ghoṭna mit́ ghạṛi badre daḱ sendra sendrate mit́ṭen Toyo nonḍe heć seṭerena. Inạkate Tạruṕ ar bir Sukri goć akane ńel ńamket́kina. Unkin ńelte bogete kusiyena ente nonkan maraṅ maraṅ jib janwar aḱ jel tisre hõ bae jom akada. Ado uni Toyo do̠ heseć sekreć lać pereć jomkate daḱe ńũkeda are mohnḍayena.

Sikhạuna: Ạuṛiaḱ kạphạriạu baṅkate apnarte muskilaḱ ko mimaṅsae hoyoḱa. Ente Tạruṕ ar Sukri mit́ sãote daḱkin ńũ lekhan nonka gujuḱ dosare o̠ho̠kin paṛaokoḱa ar Toyo hõ o̠ho̠ge jom daṛeakinkea. Onate huḍiń hapṛaḱ muskilaḱ ko apnarte mimaṅsa se phanḍ̣ao jạruṛ kana.

Isại dho̠ro̠m ren hoṛkoaḱ maraṅ po̠ro̠b Easter Sunday se Paska po̠ro̠b. Aṭhawar hiloḱ (09 April) goṭa disomren hoṛko noa po̠ro̠b ko manaokeda. Paska po̠ro̠b do noa karonaḱte isại dho̠ro̠m ren sanam boeha misera ko manoteda, ente noa din se Easter Sunday do Jisu Mạsi aḱ jiwet́ beredoḱ din kana.Cedaḱ je, Jisu Mạsi do kại hoṛ lạgit́ge noa dhạrtiye hećlena. Ar kại manwa iạte ạḍi haron kosṭoe sahaokeda. Pe̠ siń pe̠ ńindạ upạs metaḱme reṅgeć tetaṅe tahẽyena, eken dhạrtiren hoṛko lạgit́te.

Inạkate Good Friday metaḱme sokol hiloḱ thoṛa bạṛić hoṛko metaḱme Jihuda sostor badaeko Jisu Mạsi krus kaṭreko khil jalat́kedeteko goć kedea. Gujuḱ tayom pe din badre goćko khone jiwet́ beret́ente isại hoṛko nawa janame emat́koa. Jisu Mạsi goć khone jiwet́ beret́en noa dinge Easter Sunday se Paska po̠ro̠b mente manatoḱ kana.

Onka leka noa maraṅ Rạskạ po̠ro̠b ńutumte Chapainawabgonj jilạ reaḱ Amnura Mission reaḱ iskul maṭhre BNELC reaḱ simraḱ (Sunrise) girjạ hoe purạuena. Noa Simraḱ se Sunrise girjạe ạḱyurkeda BNELC ren GS Rev. Soban Kisku Ar Rajshahi circle pasṭor Rev.Noresh Hasdak. Simraḱ girjạ do 5:00 baja khonaḱ ehoṕlena. Rạskạ Paska Po̠ro̠b girjạre Amnura manḍer ren ar aḍepase ṭotha (Mirjapur, Jolahar, Sakoṭola, Phạgupaṛa) khon heć seṭerakan amdaj 200 cetan isại boeha miserako selet́lena. Ona saõte noa girjạre selet́ akan sanamko johar em talate Jisu Mạsi aḱ jiwet́ beredoḱ babotre mit́bar kathae roṛkeda, BNELC Rajshahi circle Chairman Robindronath Hembrom, BNELC-Trust Board secretary Mn. Hingu Murmu,  TF/NAGR ren Director Mn. Stephen Soren, Amnura Mission ren manḍer member Mn.Horidas Hembrom, Mn.Dhavid Dhonae Hembrom. Ạḍi napaete simraḱ (Sunrise)  girjạ do hoe purạuena. Selet́ akan sanam hoṛko mit́ jomkaote Jisu Mạsi aḱ jitạu din ko manot́keda.