Gạ̃ṛĩ Aḱ Go̠lpo̠ - The Santals Times

Mit́ atore ạḍi utạr gạ̃ṛĩ ko tahẽkana. Mit́ dhao mit́ṭen ho̠ṛe lại jạhirkeda je, uni do̠ Gạ̃rĩ kiriń koa ar mimit́ goṭen Gạ̃ṛĩ aḱ dam gel (10) ṭaka kateće emo̠ḱa. Ado̠ atoren ho̠ṛ hõko tạńkhikeda aḍepasere ạḍi utạr Gạ̃ṛĩ menaḱkoa, enḍekhan noa katha hõ ạḍi bạṛićaḱ do̠ baṅ kana. Khange atoren ho̠ṛko bir-gajaṛ ko senente Gạ̃ṛĩ sasaṕ kạmiko dhurạuena. Ado̠ ro̠ṛ saḍe akat́ katha lekage atoren ho̠ṛko ṭhen khonaḱ gel ṭaka kateć mit́ hajar (1,000) goṭen Gạ̃ṛĩ kirińket́koa. Inạkate arhõe jạhirkeda, nit khon do̠ mimit́ goṭen Gạ̃ṛĩ aḱ dam bargel (20) ṭaka kateć.

Atoren ho̠ṛko noa katha ańjomte arhõ ạḍi kurumuṭu salaḱ Gạ̃ṛĩ sasaṕko onḍoṅena. Onate ạḍi usạra aḍepasere Gạ̃ṛĩ koaḱ soṅkha hõ kom cabayena. Hoṛko hõ apan ạpin oṛaḱ ruạṛoḱ ko ehoṕena. Khange uni ho̠ṛ do̠ niạ dhao Gạ̃ṛĩ aḱ dam bargel mõṛẽ (25) ṭaka kateće goṭakeda. Note Gạ̃ṛĩ ko hõ nunạḱ ko komena je, Gạ̃ṛĩ sendra ńańamge ạḍi muskil.

Inạkate onkage arhõ mõṛẽgel (50) ṭakae ḍherkeda. Uni ho̠ṛ do̠ noa nawa dam jạhir katet́ aćaḱ bạnij bepar kạmi khạtirte so̠ho̠r bajarte senena. Ado̠ aćaḱ kạmi reaḱ dạyik do̠ aćren soṅge ho̠ṛe emadea. Niạ dhao uni ho̠ṛren são go̠ṛo̠ić do̠ khańca pereć Gạ̃ṛĩ oḍoḱket́kote ato ho̠ṛkoe ńel ocoket́koa. Are metat́koa, nit noko mimit́ goṭen Gạ̃ṛĩ iń ṭhen khon pegel mõṛẽ (35) ṭaka katećpe kiriń daṛeakoa. Ente nit́ ma ar bir-gajaṛre cele Gạ̃ṛĩge bạnuḱko. Enḍekhan mahasoe-e ruạṛ hećlen khan mõṛẽgel (50) ṭaka kateć uni ṭhenpe ạkhriń daṛeakkoa. Khange onko bebuj lelha ho̠ṛ do̠ ạḍi usạra uniaḱ kathateko mạluṅena ar jo̠to̠ Gạ̃ṛĩko kirińket́koa. Inạkate dosar hiloḱ khon uni ho̠ṛ hõe aṅgenena, inạ tayom nit dhạbićte unkin ho̠ṛ ona atore bạkin ńel ńam akana.