Mit́ṭen oṛaḱre barea Capṛa kin tahẽkana. Unkin do ona oṛaḱ reaḱ isin basaṅ metaḱme daka-utui oṛakregekin tahẽkana. Ado unkin do ona daka-utu oṛaḱ khonge jomaḱ jom katećkin tahẽnkan tahẽna. Mit́din unkin dokin tạṅkhikeda, oṛaḱ reaḱ fridge re ạḍigan mońj mońj jomaḱ doho menaḱa. Nonkate unkinaḱ monre laloc se lob hećena.

Khange unkin Capṛa kin guni bhạbiyena, ceckate onko hoṛaḱ mẽthã danȧnkate fridge re bolokate jomaḱkin kombṛoea mente. Nonka kurumuṭu kurumuṭute mit́din ạt́ ńamkate fridge rekin boloyena. Bolo tayom ona bhitrirekin eset́ tahẽyena. Ado Fridge bhitrire reaṛte ekalkin ruạ utạrena. Menkhan ńelme inạko dinrege oṛaḱren hoṛko thoṛa din lạgit́ peṛaḱko sen akan tahẽkana. Onate fridge hõ bondge tahẽyena. Okoe hõ bạnuḱko khạtir fridge bako jhićlet́te bhitrire Oxygen reaḱ ṭonṭa paṛaoena. Ar baḍaeabon cele jib janwar hõ Oxygen begor bańcao bako tahẽ daṛeaḱa. Inạkate ona Oxygen ṭonṭatege unkin Capṛa do bhitriregekin goć hapeyena.

Cecet́aḱ: Jãhãnaḱ jinis cetanre Lob se laloc lekhan kại hoyoḱa Ar kạilere gujuḱ lekan dosare paṛaoḱ hoyoḱa.

“Jisui menkeda, mit́ hoṛren barea hopon kin tahẽkana. Ar unkin modre huḍińić do apate metadea, E baba amak dhon durib reak ińre paṛaokoḱ bakhra den em kạtińme. Ado acaḱ tahẽkan taeaḱe hạṭińat́kina. Khange thoṛa din tayomte uni huḍińić hopon do sanamaḱ ko samṭao kate mit́ṭeć sạṅgiń disomteye oṅḍoḱ calaoena .” Luke 15: 11-13.

Jisu noa golpo hotete okaṭaḱ  sikhạuna emoḱe menet́kan ona do hoyoḱ kana, kạite pereć akan jion ar sarthoporota, Isorak’ dulạr , helmel ar Uniaḱ ektiạri khon pharaḱ sect́bo senoḱkana. Kạian hoṛ okoe do uni  juạn koṛa leka heseć sekreć ar rạskạ jion khemao  karonte, Isor okaṭaḱe emakade jotowake nosṭokeda. Ar mucạt́re uniaḱ jion do  ạḍi haron kosṭo ar dukre paṛaoena. Isor tuluć jopoṛao baṅ tahẽlen khan jion do baṛijoḱa.

 “Ado cetaoenteye menkeda…” Luke 15:17. Mit́ṭen kạian hoṛ Isor ṭhen hijuḱe menlekhan, khạṭige kại reaḱ golam khon ruạṛ hijuḱ hoyoḱtaea. Ar Isor khon begar tahẽlenkhan cet́ko muskil hoe daṛekoḱa, ona lạgit́ hõ hudis tahẽn jạruṛa. Mãhĩr monte Baba ṭhen ruạṛ hijuḱ, kại lạgit́ kastao ar ikạ khojoḱ ar Baba okaṭaḱe khojoḱ kan ona leka calaḱ monsubạ tahẽn jạruṛa.

“Khange beret́kate ać apat́ ṭhene hećena. Menkhan sạṅgińreye tahẽkanrege apat́ doe ńel ńamkedea ar mãyã hećadea…..Luke 15: 20, Joto kristan go-baba noa do bujhạu jạruṛa, akoren gidrạko at́ len khan cet́ leka ńam lạgit́ko dhaoṛa-dhạuṛi baṛaea, onkage Isor hõe sendra kana. Onate at́ akan gidrạ rukhiạko lạgit́ pạtiạu salaḱ koejoṅ jạruṛa, tin dhạbić uni gidrạ serma Baba then ạurie seṭeroḱ .

At́ hopone ruạṛ hijuḱ ar Babawaḱ ataṅ daram Jisu okalekae men ocoyet́, noa ghoṭna khon sikhạuna do hoyoḱ kana:

• At́ akan manwako lạgit́ Babawaḱ mãyã
• Isoraḱ dulạṛ onko lạgit́ ạḍi khạndrińa ar onko at́ akanko ruạṛ hijuḱ lạgit́ ghane ghuṛiće cintạyeda, are bhabnaḱ kana.
• Tinre onko kạian hoṛ Isor ṭhenko ruạṛ kana, Isor do onko ikạ kako kana , mãyãwako kana, dayawako kana ar aćren gidrạ hoyoḱ lạgit́ ạidạri emako kana. Ar sạrige okoe Isorko ńam baṛaeyede Mạsiaḱ gujuḱ hotete Sonot Jiuaḱ daya, Isoraḱ dulạṛ onkore tahẽna.
• Kạian hoṛko ruạṛ hećlen khan Isor do asambheṛ rạskạḱa.

“Ente nui ińren hopon do goćgeye tahẽkana are jiwet́ ruạṛ akana, at́ geye tahẽkana are ńamakana.” Luke 15 : 24. Isor ṭhen khon calaḱ mane bhiḍiko okalekako adoḱkan. Isoraḱ helmel khon okaṭaḱ jion pharaḱge, ona do goćgea. Ar Isor ṭhen ruạṛ hećlen khan jaejug jion ńamoḱa.

Meskoć

Barea guṅgṛạ hoṛkin ropoṛ kana:

Pạhilić: Hạṭiạ sećem calaḱ kana se cet́?

Dosarić: Baṅ, hạṭiạ sećiń calaḱkana.

Pạhilić: O, iń doń hudiset́ kana, paseć hạṭiạ sećem calaḱ kan.

Dosarić: Baṅ, enan khoniń metam kana tho hạṭiạteń calaḱ kana.

Sombar (26 June) setaḱ 9 baja khon goṭa din metaḱme 72 ghonṭa se pe din bhitrite hoe-daḱ ḍher daṛeaḱa mente Abohaoa Odhidaptor-e menet́ kana. Ente bar-pe din khonaḱ ńeloḱ kana sermare hende rimil hoete oṭaṅ baṛae kana. Daḱ rimil rakaboḱkan rehõ hoete kaṭaoḱ kana. Onate Abohaoa Odhodaptor-e meneda, pe din bhitrite hoe-daḱ bạṛti daṛeaḱa. Cedaḱ je,nit do bạrsạ din paṛao akana.

Onka leka teheń (Robibar 25 June) reaḱ Abohaoa re menakana, Khulna, Borisal, Chottogram ar Sylhet ṭoṭha reaḱ adom adom jaega ar note Rangpur, Rajshahi, Mymensingh, Dhaka bibhag reaḱ adom adom ṭoṭhare hoe-daḱ heć daṛeaḱa.

Mit́ṭen birre Tạruṕ ar Gadha kin tahẽkana. Ạkin ạkin talare ạḍi gatekin tahẽkana. Mit́din Gadha Tạruṕe  metae kana,  “ghãs reaḱ ro̠ṅ do̠ lilgea.” Tạruṕe menkeda, “ baṅ ghãs reaḱ ro̠ṅ do̠ hạriạṛ gea.” Ado noa karonaḱte rapṭa rạpṭikin ehoṕena. Khange noa reaḱ roṛ ruạṛ ńam lạgit́te bir ren raja dhạcri kul ṭhenkin senena. Gadha dạṛ idikate, ạḍi kikiạuate Dhạcri kule metadea, “ hujur, ghãs reaḱ roṅ do̠ lilgea. Dhạcri Kule metadea, ‘hẽ ghãs reaḱ roṅ do̠ lil gea.’ Gadha do̠ Dhạcri kul aḱ moca khon noa katha ańjom kate khusite, dạṛ kucuṛate ghãs reaḱ roṅ lilgea lại lạite birte boloyena. Ar bir ren raj Dhạcri kul do̠ uni Tạruṕ  bar bochor lạgit́ sạsti emadea.

Inạ tayom taruṕ Kul-e metadea, “ hujur ghãs reaḱ ro̠ṅ do̠ hạriạṛgea.” Kule menkeda , hẽ ghãs reaḱ ro̠ṅ do̠ hạriạṛgea. Tạruṕe menkeda, “ Enḍekhan cedaḱ sạsti do̠m emạń kana?”unre bir ren raj Kul-e menkeda, amaḱ do̠  bud ạkil ar daṛe menaḱtama ar Gadha sãotem rapṭa rạpṭi kana ar am do̠ ạuṛiaḱte ińak daman somoy em nosṭokeda. Eken noa karonaḱtege sạsti do̠ń emat́mea.

2023 serma ren SSC pạṭhuạ koaḱ biḍạu jo̠ do̠ darakan cando̠ reaḱ mucạt́ hapta so̠do̠r daṛeaḱa. Onate July reaḱ 28, 29, ar 31 tạrik nirik akana. Noa pe din talate jo̠ so̠do̠r lạgit́ Maraṅ montri ṭhen nehõr ko do̠hoet́ kana. Lukhibar (22 June) Anto:sikha board ren somonoy sub-komiṭi ren sabha mukhiạ ar Dhaka sikhnạt board ren Chairman Professor Topon kumar noa khobore lại lahakeda.

Arhõe baḍae ocokeda je, khata ko do̠ mit́ leka ńel purạu akana, sikhnạt board nit do̠̣ eken jo saṕṛao reaḱ ko kạmi kana. Anto:sikha board do̠e menkeda, jao sermage turui gel (60)  din bhitrite biḍạu reaḱ jo so̠do̠r baṛaḱa. Onka leka July 30 tạrik hećlen khan 60 din purạuḱa. Menkhan Sokolbar ma hapta reaḱ sarkari chuṭi kan, onate ona din badkate 28, 29 ar 31 July niạko pe din ko nirik akada.

Joypurhat re reṅgeć nacar ạdivạsi hoṛ koaḱ jion jingi lahanti khạtirte Pranisompot prokolpo seć khon bin kạuḍite Bhiḍi, Bhiḍi jomaḱ, Geḍe ar onko jinis lạgit́ oṛaḱ tear bakhrate joto lekan hạtiạr ko ńamkeda. Ona em hạṭiń akhṛare maraṅ peṛa lekate seṭere tahẽkana Jila Prosasok Salehin Tanver Gazi.

Moṅgolbar (20) June setak bela Akkelpur Upajila Pranisompot daptor ar Veterinary Haspatal reaḱ bondoboste Upajila porisod reaḱ holl room re Pranisompot kormokorta  Dr. Md. Mahfuzar aḱ ạyurte noa akhṛa hoyena. Em hạṭiń jokhen selet́e tahẽkana, Upajila Porisod Chairman Abdus Salam Akondo, Nirbahi Officer Tahmina Aktar, Pouro mayor Sahidul Alom Chowdhury, Upajila Pranisompot Officer Dr. Rasheduzzaman Rashed, Upajila Awami League sadharon sompadok Ahsan Kabir. Ona em haṭiń akhṛare Pongel (40) goṭen hoṛko talare barea kate bhiḍi, bargel eyae (27) kg kate bhiḍi jomaḱ, barea kate ṭin, ponea RCC pilar ar mõṛẽ goṭen kate aṭet́ aḱ (mat) ko emat́koa. Ar mõṛẽ gel (50) goṭen hoṛko talare do bargel (20) goṭen kate Geḍe ar Geḍe doho ko lạgit́ mit́ṭen kate ṭin oṛaḱ hõko emat́koa.

Kunạmi am menama sạṅgińre

Khoj me rehõ bam ńamoḱa jạruṛre,

Hẽ! Am dom tahena eken amaḱre

Tinre hoyoḱa okte amaḱ unre.

               Jaogeń khojme iń monete

              Tobe okareń ńelme iń mẽt́te.

              Dinạmge sanań am são ńapam

              Baṅ purạuḱ ona as tisge baṅ

Jao candogeń ńamme eken mit́ dhom

Roṛ kathage baṅ cabaḱ tahena adom.

Okado oktere bam ńeloḱ tahenam poṭom

Mẽt́ daḱ joroḱ leka sermae daga jokhon.

                Niạko dinge ińaḱ monem rạskại

                Ona tisge baṅiń hiṛiń jaogeń disại.

                Dulạṛ am do judi baṅem batao

               Cedaḱem ńel ocoń amaḱ rãttam.

Dulạṛiạ bạń hiṛiń mea tis hõ

 Jao candoń koyoḱ baṛae ńel meạń arhõ.

Am begor iń nãhãk mạnmi

Sanam ko lạgit́ tahẽnam amge KUNẠMI.

Mit́ ho̠ṛ ren ạḍi mońj seta ar gadhakin tahẽkana. Seta do̠ jao ghuṛige uni ho̠ṛaḱ jaṅga pheḍrey ạcur baṛaea. Kisạ̃r do̠ uni seta ạḍi kajaḱe dulạrede kan tahẽkana. Ar opsor kin ńam lekhan mit́tekin khiloḍa. Kisạ̃r do̠ bahre seće calao lenkhan ar ruạr oktere uni seta bakhra jomaḱkoe ạgu toraea.

Gadha do̠ noa ko ńelte seta ạḍi ãṭe hiṅsạwae kan tahẽkana. Mit́din gadha do̠ uni seta leka kisạ̃r aḱ jaṅga ṭhene ạcur baṛae kan tahẽkana. Gadhawaḱ maraṅ okoć ho̠ṛmo̠ante kisạ̃r samaṅrey ạcur baṛae kan ńelte kisạ̃r do̠ ạḍi kajaḱe raṅgaoena. Kisạ̃r do̠ raṅgaote gadhae thạiạ kedea are laga oṅḍok kedea. Ar cakor- bakore hukumat́koa, ‘ ma uni gadha do̠ piṭạuepe ar  khunṭrire tolkaepe.’

Sikhạuna: Jo̠to̠ ho̠ṛ jo̠to̠ jaegare bako jojaoḱa.

Gaḍa aṛe ḍhipre mit́ṭen bir tahẽkana. Ona bir re aema lekan jạtren cẽṛẽ ciprut́ko basoḱ kana. Onko Cẽrẽ ciprut́ do lạṭu lạṭu darereko tukạ akada. Ona birre dare bhugạḱre mit́ dol goḍo hõko tahẽna. Tinre goḍo jom bako ńama unre onko Parwa anaj metaḱme phosol halaṅ ạgukate goḍo ko emako kantahẽna. Mit́din ona birre mit́ṭen Sikạri hećena.  Uni Sikạri do ńel jutkate mońj jaegare jhạli oḍaokeda ar ona cetanre thoṛa hoṛo erkeda. Menkhan Parwa do hoṛo bogeteko kusiaḱa. Hoṛo er se chiṭạu são sãote reṅgećte udạuḱkan Parwa ona hoṛo ko ńel ńamkeda.

Khange onko Parwa do usạra ruạṛente ona rạskạ khobor akoren mukhiạko lạiadea. Parwa dolren mukhiạ do ạḍi bud akelane tahẽkana. Adoe menkeda, noa hoṛo do oka khon hećena? Paseć nonḍe do jahan karon menaḱa. Sạrige paseć jahae Sikạr aḱ kạmi kana. Onate noa jomaḱ cetanre baṅ lalocakge bogea. Menkhan onko Parwa do akoren mukhiạko metaekana, hola mandher khon reṅgećte menaḱlea, cet́ge bale jom akada. Ạḍi aṭ reṅgećetlea. Reṅgećte onko Parwa bogeteko kạluṅ ḍabuṅ cabayena. Onko ńelte dolren mukhiạ doe mengot́keda, “dela enḍekhan bon pheḍlenge.

Ado inạ menkate Parwa do pheḍente jojomko dhurạuena. Inạ mit́ ghạṛi khangeko bujhạukeda je, akoaḱ jaṅga do oḍaoakat́ jhạlire jhạliyentakoa. Ado onḍe khon rukhiạḱ lạgit́ jhạli or ko ehoṕena. Onkate onkoaḱ jaṅga arhõ ḍherge bedhaoena. Ado Parwa do memenko dhurạuena, cet́bon cekaea? Cekate nonḍe khon bon bańcaoḱa. Akoren mukhiạ doe menkeda, nonkan gạr okte thoṛa sạburoḱ hoyoḱa. Hudis ganḍonabon cekate nonḍe khonaḱ rukhiạbon ńam daṛekea. Ado onko Parwa do ako ako talareko mepenkana, sạrige aboren mukhiạ aḱ katha babon ańjomlet́te nonkan dosarebon paṛaoena. Un jokhen dolren mukhiạ do ạcuren khan uni Sikạri hijuḱkane ńel ńamkedea. Ado uni dol mukhiạ doe menkeda, ar bilom baṅkate dela joto mit́te noa jhạli selet́bon udạuḱa. Uniạḱ katha lekage mit́te ona jhạli selet́ko udạu rakaṕena. Ado uni Sikạri ạḍi hahaṛayente coṭte koyoḱ rakaṕket́koa. Uḍạuḱ tuluć Parwa ren mạlik se mukhiạ doe menkeda, dela nit do aboren goḍo gate ṭhenbon calaḱa, onkoge aboaḱ noa jhạliko ger topaga. Onko Parwa do goḍo ṭhenko senente onko goḍo do akoaḱ kạṭić kạṭić ḍaṭate ona jhạli ko ger topaḱket́a. Nonkate onko Parwa ona muhim se gạr khon ko rukhiạyena.

Sikhạuna: Gạr se muhim okte ạṛis baṅkate mit́te kạmi hoyoḱa.