Baṅgladisom 30 lakh korona ṭikạ emadea Pfizer. Sastho ar Poribar kollan montri Zahid Malek-e baḍae ocokeda noa ṭikạ do buster doge hisạbte hoṛko talare emogoḱa. Niạ haptage buster doge emoḱ do ehoboḱa.

Sombar (29 May) sastho montronaloy reaḱ mit́ dupuṛuṕ re uni do noa khobore lại saḍekeda. Arhõe baḍae ocokeda je, turui  gel (60) cetan umer ren hoṛko ponaḱ doge ar gel irạl (18) khon cetan umer ren ko do tesar doge korona ṭikạ ko ńama mente lại sodor keda.

Rajshahi jilạ, Tanor upạjilạ reaḱ Munḍumala Mission re Sokolbar (26 May) Lajarus Moti Mardi (20) ńutuman mit́ ạdibạsi koṛae pạsi goćena. Aḍepase hoṛko ṭhen baḍae ńamena je, thoṛa din laha khonge uni koṛa doe at́ akan tahẽkana.

Sendra katet́ rehõ bako ńamledea. Menkhan ackage Sokolbar setaḱ 7:00 baja jokhen oṛaḱ aṛe mit́ṭen mat́ gajaṛ re pạsi akan dosare aḍepase hoṛko ńel ńamkedea. Ado uni ńam torage Munḍumala poils phạṛi ko baḍae ocoket́kote polis hećkate uniaḱ goć mạ̃ṛĩ ko udhạrkeda.

Rajshahi reaḱ Tanor re mit́ ạḍibạsi santal hoṛ birud re phaka check niye 52 hajar ṭaka sahar dam bạki menaḱa mente adalotre 6 lakh 92 hajar ṭaka reaḱ eṛe mambla em akada sahar bạnij-beparić. Uni Santal hoṛ do Rajshahi reaḱ Tanor upạjilạ reaḱ Talondo union Mohon ạḍibạsi santal atoren Sushil Hembrom ren hopon kanae. Ar noa mambla akat́ić doe hoyoḱ kana Tanor upạjilạ reaḱ Chanduria UP ren Chanduria atoren Ashraf Ali Khan ren hopon Milon Khan. Uniaḱ do Chanduria bajar re sahar dokan menaḱtaea. Calaoen bar serma khonaḱ noa mabla lạgit́te Roton Hembrom do jaoge adalot re hạjiroḱ hoyoḱkantea.

Din mạńjri reṇgeć hoṛ bạhu ar barea kuṛi, barea koṛa gidrạ salaḱ ạḍi haron talate jiṅgi ko khemaoet́ kana. Roton Hembrom doe baḍae ocokeda je, 2017-18 serma seć Chanduria bajar ren sahar bạnij beparić Milon ṭhen khon phaka check niye ạlu cas lạgit́te 92 hajar ṭaka sahar bis bạkiteń hataoleda. Menkhan inạ serma eṭaḱ hoṛko lekage ạḍigeń loksanlena. Enrehõ ạlu rakaṕ kate 40 hajar ṭakań emleda. Menkhan sahar bạnij beparić Milon ona phaka check niye 2018 serma iń ńutumte 6 lakh 90 hajar ṭaka reaḱ adalot re mambla keda. Arhõe baḍae ocokeda je, maraṅ koṛa Sobuj Hembrom do College re paṛhaoḱ kana, kuṛi Beauty Hembrom hõ College re paṛhaoḱ kana, ar mit́ koṛa Sojib Hembrom do darakan serma SSC biḍạu-e ema, ar huḍiń utạr kuṛi do dosar kelas re paṛhaoḱ kana. 52 hajar ṭaka bodolte 6 lakh 90 hajar ṭaka reaḱ mambla bohoḱre dipilkaḱ do ạḍige kosṭo bujhạuḱ kana. Note tahẽn lạgit́ jãhãn bhiṭạ hõ bạnuḱte khas hasare rạput́ rạput́ jhạnṭi oṛaḱre ạḍi haron talate menaḱlea. Gidrạ ko hõ Iskulte bạń kol daṛeako kana. Nunạḱgan ṭaka cekateń ema onate ạḍi cintạ bhabnare menaḱlea.

Noa babotre mobile hotete sahar bạnij beparić ko kulikedere uni doe menkeda, jãhãn bạkige bạnuḱa. Noa ṭaka do Roton iń ṭhen khon dhar se pańca lekate hataoleda, Unạḱ unạḱ din paromena, menkhan nit hõ bae em ruạrạń kanteń mambla akada. Phaka check kagojre ṭaka reaḱ poriman begor bisạute check hataoḱa se baṅ onae baḍae hataoket́re, baḍae ńamena check re ṭaka reaḱ poriman bạisạu kate suhi hatao akana.

Meskoć

Mit́ṭen hoṛe tahẽkana ar uni do merom-e ạsulet́ko tahẽkana. Mit́din uni hoṛ do kombolte uyu kateće gitić jirạujoṅ kana. Ado enege dudṛumkedete jạpit́ got́keda, khan ackage uni hoṛ ren bạhu hećkate menkeda, okayenam, aṅjomet́ kanam se baṅ maraṅ utạrić merom khạsi sendrate bae ńamoḱ kana. Noa katha ańjomte uni hoṛ do beret́ente dạdạṛe ehoṕena. Ackgae pinḍạre hećkateće tạṅkhiyet́ kan bandenaḱ ma bạnuḱtae.

Samaṅre ạkinge juri-pạṛi aḱ chobi tol tahẽkana, ado one tol akat́ chubi frame tege thoṛae bandeyena  arhõ dạdạṛe dhurạuena. Dạṛ dạṛte hor birre okoe sãoe ńapam kan onkoge kuliyet́koa ińrem merom pe ńel akadea? Nonka kuli tutluće dạdạṛ kana. Ackage one bande akan frame khon chubi ńurhoyen. Khan eken frame tahẽyena. Ado uni ńelte ato-ṭolaren sanam maejiu ar kuṛi ko lajaote oṛaḱ ko boloḱkana arko bakheṛeda, cekaenae nui hoṛ do. Nui hoṛaḱ nonkan dosa ńelte hor bir do phaka cabayena, metaḱme kuli ko lạgit́ ar cele hoṛge bae ńamlet́koa, ar merom hõ bae sendra ńamledea.

Mit́ dhao mit́ṭen hoṛ sadom kombṛo sen kateće saṕ ńamena. Ado Sadom ren mạlik do uni kombṛoe metadea, kombṛom heć akante maraṅ sạjại iń em daṛeama, menkhan eken mit́ sortote iń khonem bańcao daṛeaḱa.

Kombṛoe menkeda: Ma enḍekhan cet́ sorto emoḱ hoyoḱ tińa thoṛa lại saḍe me, asoḱ kạnạń onań manao daṛeaḱa. Ado uni Sadom mạlik doe menkeda, cet́ lekate Sadom ko kombṛo koa ona cet́ạń me khaniń aṛaḱkama. Noa katha ańjomte uni kombṛo do ạḍi algate hẽḱ got́keda ar ona bhańj uduḱe ehoṕena. Pạhilte uni daṛean Sadom ṭhen senente goṭa hoṛmo thoṛae iskir baṛakedea are menkeda, pạhil dhap kạmi do mucạt́ena. Ente amren Sadomaḱ biswạs doń hameṭkeda. Nit enḍekhan lebet́ se don reaḱ jãhãn sombhabge bạnuḱanaṅ. Ado ma ńelme nit do Sadomaḱ hoṭoḱ baberiń laṛaetaea-inạkate gạkhuṛ tite jhin baber se lagam harephare horoḱae hoyoḱa. Noḱoe noa hõ algateń purạukeda. Niạ dhao ekal thoṛa sontorate Sadomre dejoḱ hoyoḱa. Dećkate nit do banar jaṅgate Sadomaḱ lać lebet́ hoyoḱa jemone raṅgaoḱ are dạṛ. Khange uni Sadom do riạḱ riạḱ dadạṛe ehoṕena.

Kombṛo doe menkeda, Noḱoe nonkate Sadom ko kombṛo koa. Menkhan Sadom mạlik samaṅte Sadom kombṛo do sạrige hahaṛa. Kombṛo lạgit́ nunạḱ mońj ạt́em emadiń ńutumte aema johariń emamkana. Khange uni kombṛo nonka memen tulućge usạrae danaṅ got́ena. Ado uni Mạlik hõ eṭaḱ Sadom re dećkate kombṛoe sabea mente lagakede rehõ ohoge tioḱ daṛeadea.

Mit́ṭen lạpite tahẽkana. Uni lạpit́ do̠ ạḍi mońj hoṛe kạpci daṛeako kan tahẽkana. Mit́din mit́ṭen officer kạpciḱ lạgit́ uni lạpitaḱ dokane hećena. Ado kạpciḱ jokhene metaekana, sir am do̠ ghũs ṭakate amaḱ gharońjem calaoeda, hoṛko baḍae keda arko raṅgao akana, paseć amaḱ khobor hoyoḱa. Khange officer-e menkeda, thiroḱme beṭa!

Arhõ onkage mit́din mit́ṭen sarkari officer uṕ kạpci lạgit́e hećena. Ado̠ uni lạpit́ roroṛe ehoṕena, Sir am do̠ ạḍi lạṭu fạkibạji hoṛ kanam. Ente am do̠ hoṛem eṛe baṛakoa. Uni officer do̠e menkeda, lạpit́ moca bond tam, ar baṅ khanem ńela. Khange thoṛa din tayom polis ona dokan ko gherao eset́keda ar uni lạpit́ jerako ehoṕena, E beṭa nonkan baṅ ganoḱ ạuri katha hoṛko cedaḱem metako kana? Uni Lạpit́ do̠ bo̠to̠r bo̠to̠rte menkeda, Sir nonkan kathań metako khan bohoḱ reaḱ uṕ algate usạra teṅgoḱtakoa ar ińaḱ kạpci kạmi hõ mońj hoyoḱtińa. Nonkate mit́ ghạṛite hoṛkoń kạpci daṛeakoa.

Boṅgoposagor re hoyoḱ kan bharnḍo hoe Mokha karonaḱte disom reaḱ adom adom board ko reaḱ ssc biḍạu do bondlena. Metaḱme Robibar ar Sombar (13, 14 May) reaḱ biḍạu do baṅ hoeakana.

Ado noa bond akan biḍạu do darakan 27, 28 May hoyoḱa mente Anto:sikha board ren biḍạu ńel jujut komiṭi ko baḍae oco akada. Moṅgolbar (16 May) Dhaka sikha board ren biḍạu ńel jujutić Professor Md.Abul Basar-e suhi akat́ mit́ ḍhạrwạḱ hotete noa khobor lại lahayena.  

2021 sermaren JSC pạṭhuạko certificate ko ńama. Metaḱme okoe do ona sermare JSC biḍạu reko selet́len onko gidrạko certificate ko em hạṭińakoa. Darakan 21 May khon Dhaka Madhomik ar Uchomadhomik sikha board do certificate emoḱe ehoboḱa. 21 May-darakan 7 June dhạbić certificate emoḱ kạmihora calao idiḱa. Niṭ akan dinre niṭaḱ jilạ ren sikhnạt ṭhãonaren Headmaster ko sikhnạt board khon certificate tumạl lạgit́ men hoyakana. Pusṭạute baḍae lạgit́te sikhnạt ṭhãonaren maraṅić se Headmaster ṭhen Sikhnạt board do ciṭhi kol akada. Sikhnạt board reaḱ 4 no. bhobon reaḱ cetan tala metaḱme turui tala building khon 2021 serma ren JSC pạṭhuạ koaḱ certificate do sikhnạt ṭhãonaren maraṅ mukhiạ koaḱ tire emogoḱa.

Oka din oka jilạre emogoḱa thoṛa bon baḍaelege, 21 May do Kishargonj jilạ re, 22 May do Manikgonj jilạ, 23 May Gopalgonj jilạ, 25 May do Madaripur, 28 May Earidpur jilạre, 29 May do Tangail, 30 May Munshigonj, 31 May Rajbari, 1 June Shariatpur, 4 June Dhaka, 5 June Narshingdi, 6 June Gazipur, 7 June do Dhaka nagraha reaḱ Iskul ko reaḱ certificate em hạṭińoḱa.

Dhaka sikhnạt board-e baḍae oco akada je, sikhnạt ṭhãona reaḱ mul certificate hatao lạgit́ tinạḱ gan gidrạko rakaṕ akan, onako bibioron soṅge kateć certificate hatao hoyoḱa. Iskul ren mahasoe se Headmaster se bharapon Headmaster aćaḱ se protinidhi belare, metaḱme banar oktege Governing body se managing committee koaḱ goṭawaḱ copy selet́ mul certificate ataṅ hoyoḱtakoa. Certificate ataṅ bakhra ardas lạgit́te Governing body ren Chairman se jopoṛao menaḱko upajila nirbahi kormokorta koaḱ suhi ạgui hoyoḱa. Baṅkhan mul certificate baṅ ńamogoḱa.

Lopsa kakaren ạḍi utạr gại ḍaṅgra menaḱkoa, Merom bhiḍi hõ menaḱkoa. Mit́ṭen gupiyiće tahẽkantaea. Uni do beste bae gupiyet́ko tahẽkana, Lopsa kaka do ạḍitet́e ạḍi ãṭe ạṛisena, ar uni gupi koṛae metadea, “ am do ado bạń dohomea, jomaḱ ńuiaḱ lać perećiń emam kana; menkhan ińren gại ḍaṅgra lać pereć do bam ạtiń biyet́koa. Ạḍi diniń sahaoket́mea. Ar gại ḍaṅgra hõko ososgoḱ kantińa.

Lopsa kaka do uni kuṛhiyạ gupi koṛa aćaḱ oṛaḱteye kol kadea. Ar mit́ṭen boge gupi koṛa ńame lạgit́e oḍokena. Mit́ṭen ato teye senena, ona atore mit́ṭen huḍiń koṛae sendra ńam kedea. Uni koṛaren apate kulikedea, ar uni hoṛ hõe rebenena. Ado bana hoṛte koṛa hõkin kuli kedea, Uni koṛa hõe rạskạyena, are hẽḱ got́keda. Uni koṛawaḱ kuṛại reaḱ hõkin galmarao goṭakeda. Uni koṛa do baskeaḱe jom keda ar aćaḱ pãera saṕkate Lopsa kaka sãoteye hećena.

Lopsa kaka do uni koṛawaḱ kạmi ńelte ạḍi ãṭe rạskạyena. Uni koṛa do setaḱ hõe beret́ godoḱa, ar gại ḍaṅgraye aṛaḱkoa. Baskeaḱ jom lạgit́ oṛaḱteye senoḱ khan, eṭaḱ gupi koṛa ṭhene bạgiakoa. Arhõe sen ruạṛ godoḱa, ar eṭaḱ koko senoḱ khan, unre ać hõe horho hataṛ koa. Okare mońj daḱ ńamoḱa, onḍege daḱ ńui laga idikoa. Ạtiń bilen khanko tikin doe aḍakoa, ar baṅ khan oṛaḱteye idikoa, ar goṛare aderkoa. Jom kateye jirạuḱa, ar gại ḍaṅgra hõko jirạuḱa. Tarasiń do arhõe aṛaḱkoa. Ar ạyuṕ do goṛare aderko jokheće lekha koa. Ona atoren do uni gupi koṛawaḱ kurumuṭu ńelte ạḍiko rạskạyena. Lopsa kaka hõ uni koṛa ạḍiye kusi ocoyede kan tahẽkana.

Meskoć

Pạṭhuạ gidrạ ar Mahasoe talare katha hoyoḱ kana:

Mahasoe: Cekate biḍạu reaḱ jo do 15, 20, 25 kateć ḍheroḱ kantama? Nonka bại bạite ḍherlen khan cekate hoyoḱa?

Pạṭhuạ: Mahasoe, iń do tho ar ona traffic jam re aṭkao akan gạḍi leka do duṛuṕ thir bạnuńa. Jaha lekategeń laha calaḱ kangea.