Concrete Block Tear Ehoṕena Amnura re

Chapainawabgonj reaḱ Amnura Mission re Rotary Club of Dhaka Kawran Bazar ar RCC-Amnura, NAGR (National Agency for Green Revolution) aḱ bondoboste Concrete block tear ehoṕena. Moṅgol hiloḱ (11/04/23) setaḱ 11:00 baja jokhen Amnura Mission compound re noa concrete block tear kạmihora uḍhạuena. Noa okte seṭere tahẽkana Dhaka Rotary Club of Kawran Bazar ren past President Ahmed Faruq, Bangladesh Northern Evangelical Lutheren Church ren GS Rev.Soban Kisku, Trust Board Hingu Murmu, RCC-Amnura upodesta ar NAGR ren ạyurić Mn.Stephen Soren, ar RCC-Amnura sompadok Promila Hasdak.

Iṭạ bodolte noa concrete block beohar lạgit́ hoṛko bạṛti cehao ar udgạuko lạgit́te tear ehoṕena. Sarkar do poribesh rukhiạ lạgit́te iṭạ bhaṭa bond lạgit́e goṭa akada, inạ chaḍa hõ nit iṭạ reaḱ dam dinke din arhõ ḍher idiḱ kana. Onate iṭạ bodolte concrete block te oṛaḱ tearge maraṅ hạtiạr do. Bisesoggo se jarnaha ko menet́ kana Concrete block beohar re 30% khoroć komoḱ kana. Noa aḍepase ṭoṭhakore Concrete iṭạ bodolte Concrete block beohar re hoṛko udgạu ko lạgit́te noa kạmihora do ehoṕena.

Dr.Zafrullah Chowdhury Do̠e Hana Puriyena

Gonosastho kendro ren kạrigo̠l se benaoić ar birbanṭa Dr. Zafrullah Chowdhury do̠ noa dhạrti bạgiada. Moṅgolbar (11/04/23) April ńindạ Rajdhạni reaḱ Dhanmondi gonosastho haspatal re raran oktege jiwi do̠ calaoentaea. 81 serma umeran Dr.Zafrullah Chowdhury do̠ ạḍi din khonaḱ kidney reaḱ muskilre jạbun akan tahẽkana. Thoṛa din khon arhõ bạṛti muskilre paṛaoena. Onate calaoen Budhbar haspatal reko bhurti kedea. Gonosastho Nogor haspatal ren Maraṅ raranić metaḱme kidney ren raranić Proffesor Mamun Mostafi teheń nindạ 11:35 baja jokhen Zafrullah aḱ gujuḱ khobore lại jạhirkeda.

Zafrullah Chowdhury do̠ mit́ṭen Vascular surgeon kanae. Bạṛtikaete hoṛ koaḱ hoṛmo babotre ḍhere guni bhạbiḱkan tahẽkana. 1982 sermare ehoṕ akan Osud niti ạn ren maraṅ kạrigo̠l do̠ kanae Zafrullah Chowdhury. Uni do̠ jao ghuṛige disom ar disomren hoṛko lạgit́e hudis ganḍonoḱkan tahẽkana. Onate kurumuṭure tahẽkana disomre bhageaḱ kạmi lạgit́. Menkhan sạrige aćaḱ kurumuṭu do̠ purạu akantaea.

Zafrullah Chowdhury do̠ 1941 serma reaḱ 27 December Chottogram jilạ reaḱ Raujan upạjilạ reaḱ Koypara atore janamlena. Ać baba aḱ ńutum do̠ Morshed Chowdhury ar gogo Hachina Begum. Ać baba do̠ polis officer-e tahẽkana . Gogo-baba ren Gel goṭen gidrạko modre Zafrullah Chowdhury do̠ pạhil gidrạ metaḱme jo̠to̠ boeha khon maraṅ utạriće tahẽkana.

Godagarire Ãoṛa Gãoṛẽte Santal Maejiu Gurena

Rajshahi jilạ reaḱ Godagari upạjilạre ãoṛa gãoṛẽte (Accident) Bibiron Hembrom (47) ńutuman santal maejiu gurena. Noa ghoṭnate arhõ bar hoṛkin akham akana. Sombar (10/04/23) amdaj cando hạsur 6:00 baja jokhen Lolitnogor-Kakonhat ḍahar reaḱ Sundorpur Juktipara atore noa ghoṭna ghoṭao akana.

Bibiron Hembrom (47) do Sundorpur atoren Jotin Soren ren oṛaḱ hoṛ kanae. Baḍae ńam akana, Bibiron Hembrom do ḍahare paromoḱ kan tahẽkana. Un jokhen ona ḍaharte Kakonhat calaḱkan mit́ṭen honḍar gạḍite tạkićena. Khange uni maejiu do tạkićen soṅge soṅgete onḍege gurena.