Ũṭ Ar Toyo Aḱ Go̠lpo̠ - The Santals Times

Aḍi din laha reaḱ katha. Mit́ṭen Toyo ar Ũṭ ạḍikin gatelena. Jao ghuṛige mit́ sãorekin tahẽnkan tahẽkana. Ar Jom ńu daṛa baṛae, gitić sanamaḱ mit́re. Bochor ke bochor nonkage parom calaḱkan tahẽkana. Onkage mit́ din hiloḱ jomaḱ sendrakin oḍokena. Ado ackage mit́ṭen tormuj bagwan re nońjor paṛaoentạkina. Onḍe mit́ṭen casa pahra se hohorhoić tahẽkan iạte bakin sen daṛeada. Ado̠ unkin do̠ ona tormuj bagwan aṛere gajaṛrekin oko tahẽyena ar ńindạ koyoḱ horrekin tahẽkana. Ńuhum hijuḱkan re uni casa do̠ oṛaḱ sene mohnḍayena. Uni casa hoṛaḱ oṛaḱ do̠ khet́ pheḍrege tahẽkana. Ado̠kin hudisena jãhãnaḱge ạḍi nirạitekin cekaea mente. Enka menkateć banar gate mit́te ona tormuj bagwankin bo̠lo̠yena. Bo̠lo̠ torage ạḍi heseć sekreć rạskạte tormuj jojomkin dhurạuena. Bakin jom bhagaoḱ kana, arhõ jojom sanayet́kina. Menkhan lać do̠ perećentakina ar mit́ aṛe hõ phaka bạnuḱanaṅ.

Noa oktere Toyo aḱ bo̠ho̠ḱre mit́ṭen cintạ hećena, are kikiạuate huka hũa-huka-hũa raraḱe ehoṕena. Toyo aḱ ona raḱ ańjomte Ũṭ-e menkeda, E gate cedaḱem raraḱ kana. Amaḱ raḱ ańjomte Casa do̠e ebhenoḱa, are ebhenlen re alaṅaḱ ạḍi bạṛić dosa hoyoḱa honaṅ. Toyo do̠ landawate mengot́keda-alom bo̠to̠ro̠ḱa uni casa do̠ kạmite laṅga akana unạḱ algate ohoge ebhenlena. Baḍaeam ińaḱ mit́ṭen rog hoe akana-jom tayom huka-hũa-huka-hũa baṅ sereń lekhan jom baṅ hajamoḱtińa. Ona men torage arhõ kikiạue dhurạuena. Note Toyo aḱ onkan kikiạu ańjomte casa do̠e ebhen got́ena. Ar maraṅ utạr ṭheṅga saṕ kateć unkin sećge dạṛ hećena. Toyo ma mon monte noage khojoḱ kan tahẽkana. Khange uni casa ńelte Toyo do̠ jhạnṭi phãkte riạḱ riạḱe dạṛkeda. Menkhan becariạ Ũṭ do̠ unạḱ maraṅ hamal ho̠ṛmo̠ ante bae dạṛ daṛeada. Casa do̠ uni Ũṭge saṕkedete ạḍi ãṭe dalkedea. Ado̠ dal akhamakade dosare enkatege aćaḱ tahẽn ṭhạ̃ite calaoena. Khange Toyo do Ũṭ ńelte mengot́keda haere gate iń karonaḱte nonka dalem jomkeda. Ar emanteaḱko—

Ado Ũṭ hõ Toyo aḱ calaḱ cạtur bude aṭkar daṛeada. Onate onkan ạt ńańam horare tahẽyena. Mit́din ạḍi lolo din tahẽkana. Aḍepase ekal nisun jãhãn hoege banuḱa.Ado Ũṭ do Toyo metadea E gate dela hana jalapuri ritić reaṛ daḱre hoṛmolaṅ reaṛ ńõḱlege. Enḍekhan hoṛmo ko thoṛa Mońjge reaṛoḱa. Khange Toyo do ạḍi usạrae hẽḱ got́keda. Are menkeda, E gate paeraḱ man bạń baḍae cekateń paeraḱa? Ũṭe mengot́keda, alom bhabnaḱa iń nahaḱiń goṛowama. Inạkate banar gate tala daḱrekin pheḍena. Ũṭ aḱ katha leka Toyo hõ uniaḱ dea re deć hapeyena. Ar note Ũṭ do̠ khạndriń sećge mohnḍa calaoena. Ona ńelte Toyo do̠e memenkana, E gate cedaḱ nunạḱ bhitri sećem sen idiḱ kana nonka macoń unum gujuḱ.

Ado Ũṭ do̠ nonkae roṛ ruạṛadea, ińaḱ rog hoe akana, bhitri sećre bạń unumlen khan paeraḱ lekage bạń ạikạua. Inạkate tinre daḱ khonkin rakaṕena un jokhen Toyo aḱ do̠ ạḍi bạṛić dosa hoe akan tahẽkana. Enhiloḱ khonaḱ Toyo do̠ Ũṭ são ar bae khilḍuḱa. Ar nonkage Ũṭ do Toyo ṭhen badla hataoleda.