Sokolbar 20 January 2023 setaḱ 10:30 baja okte Nozipur Mission Girls Hostel re turui gel (60) goṭen haraḱkan kuṛi gidrạko talare ńele dumur rasa em hạṭiń akhṛa hoe purạuena. Noa em hạṭiń akhṛa doe bondobosleda Amal Foundation ar goṛo gopoṛore tahẽkana (NAGR) National Agency for Green Revolution ar Marico.

NAGR ren ạyurić Mn.Stephen Soren doe menkeda, noa niron reaṛ-rabaṅ dinre kuṛi gidrạko talare ńele dumur rasa emoḱ reaḱ tạṅkhi se motlob do kana, noa rasa do hoṛmo lạgit́ ạḍi upkạr ar bhạlạianaḱ kana. Cedaḱ je, noa rasa ńulere hoṛmo do urgum se lologe tahẽna. Ar onkate hoṛmo niropon tahẽna. Onatey udgạuket́koa jemon din hiloḱ setaḱ jokhen lolo daḱ são thoṛagan dumur rasa mesal katećko ńui ma. Ar nonkate sanam ko niropon hoṛmo ko ạidạrijoṅma.

Inạ chaḍa hõ seṭere tahẽkana Nozipur Girls Hostel ren Manager Minoti Murmu, Nozipur Mission Primary School ren maraṅ mahasoe Romesh Hembrom ar ona sãote seṭere tahẽkana Adompur Lutheren Mission Clinic ren Manager Rusel Hembrom. Nozipur Lutheran Girls Hostel do 2013 serma khon NAGR hotete ạyur idiḱ kana ar nonḍe khon kuṛi gidrạko thoṛa khorcate napae tahẽkate mońj ạkil bidiạko hameṭjonkana. Niạ 2023 serma re 63 goṭen kuṛi gidrạ kodo noa hostelre menaḱkoa.

Nẽḱe thoṛadin lahare mucạt́ akan HSC (Higher Secondary School Certificate) bidạu reaḱ jo̠ do̠ darakan mạhna 12 February bhitrite so̠do̠ro̠ḱa. Biḍạu reaḱ jo̠ so̠do̠r lạgit́te tạrik ko nenḍa bahkra An:Sikha board somonoy komiṭi khon file ko kol akat́a Sikhnạt Montronaloy te. Dhaka sikhnạt board ren Chairman Professor Topon Kumar Sarkar-e baḍae ocokeda, HSC biḍạu reaḱ khata ko ńel reaḱ kạmihora do̠ mucạt́ akana. Nit do̠ eken biḍạu so̠do̠r reaḱ kạmi calaḱ kana.

Ente ạn lekate biḍạu mucạt́ 60 din badre jo̠ so̠do̠ro̠ḱa. Ona iạte 8-12 Eebruary bhitrite jo̠ so̠do̠r lạgit́ roṛ oḍok akana. Menkhan pạhilte jo̠ reaḱ summary do̠ maraṅ monti aḱ tire soprotoḱa. Onate Maraṅ montri tise oposoroḱa se dine nenḍaea enhiloḱge biḍạu reaḱ jo̠ so̠do̠ro̠ḱa.

17 January Moṅgolbar bela 11 baja okte Chapainawabgonj sodor reaḱ Amnura Mission re mit́ sae (100) goṭen reṅgeć nacar hoṛko talare rabaṅ nirạn kićrić em hạṭiń hoyena. Rotary Club Dhaka reaḱ bondoboste ar nonḍen ko metaḱme sthanio Amnura Rotary Community Core (RCC) ar NAGR (National Agency for Green Revolution) aḱ goṛo gopoṛote noa rabaṅ kićrić em hạṭińena. Em hạtịń akhṛare seṭere tahẽkana NAGR ren maraṅ ạyurić Mn.Stephen Soren, RCC-Amnura sabha mukhiạ Prodip Hembrom, Sompadok Promila Hasdak, 3 no.Jhilim Union Porisod ren 1,2,3 no. ward ren maejiu member Johra Begum, 2no. ward ren member ar Panel Chairman-01 Md.Masud Parvez ar ona sãote seṭere tahẽkana ato mạńjhi Silip Soren.

Rabaṅ kićrić em hạṭiń akhṛare NAGR ren maraṅ ạyurić ar RCC ren Adviser Mn. Stephen Soren do noa Chapainawabgonj re Rotary reaḱ kạ̣̣̣mihora babotre lại hạṭińat́koa. Uni doe menkeda je, noa jilạ reaḱ sodor upạjilạ, Jhilim union re Rotary Club Of Dhaka Kawran Bazar ar Rotary Club Of Dhaka aḱ goṛote reṅgeć nacar hoṛkoaḱ jion-jingi lahanti, maejiukoaḱ toa re cancer (breast cancer) ar Uterus Cancer babotre sontor ko, Bin kạuḍite Hepatitis B ar gidrạ kukhi reaḱ (Uterus) Cancer khon rukhiạ se ona rog birud teṅgo daram lạgit́te ṭikạ hõ emako hoyoḱ kana.

Inạ chạḍa hõ NAGR aḱ goṛote upạjilạ reaḱ noa aḍepase ṭoṭhare sikhnạt goṛo ar niropon hoṛmo se sãota cehaona babotre kạmi kana. Mucat́re as doho kateće menkeda je, Darakan dinre noa songstha do tayom akan reṅgeć nacar hoṛkoaḱ jion-jingi lahantire arhõ nonkan bhạlạianaḱ kạmi ko naepete kạmi idia mente.    

Junior School Certificate (JSC) ar Junior Dakhil Certificate (JDC) biḍạu ar baṅ hoyoḱ reaḱe goṭa akada Sarkar. Jatiya Sikhakrom ruprekha lekate, Public se board bidạu hatao reaḱ onkan bebostha banuḱanaṅ.

Enḍekhan nẽs khonaḱ JSC ar JDC biḍạu bo̠nd lạgit́ suparis Maraṅ montri ṭhen kol hoyen re ona do̠e hẽḱ akada. Sombar (16 January) Sikhnạt Montronaloy ren madhomik ar Uchosikha bibhạg ren Deputy Secretary Akter Unnecha Shiuli aḱ suhiat́ mit́ dhạrwạḱ talate noa kho̠bo̠r lại laha akana.

Sombar (16 January) Chapainawabgonj jilạ reaḱ Amnura Mission reaḱ Tabitha Kinder Garten School re gidrạ ko korona reaḱ ṭikạ ko ńamkeda. Noa lahare 5-11 umer ren gidrạ okoe do pạhil dose ko ńamlet́, eken onko gidrạkoge teheń korona reaḱ dosar dose ko ńamkeda.

Pea School ren gidrạ noa dosar dose ṭikạ ko hataojoṅana. Tabitha Kinder Garten School ar ona sãote Amnura Mission Primary School ar Madrasa School. Noa pea School ren amdaj moṭre bar sae gidrạ korona reaḱ dosar dose ko ńamkeda. Botor salaḱ rehõ ạḍi jhũk monte mimit́ gidrạko ṭikạ ko hataokeda. Heć seṭerlen joto gidrạge napaete noa ṭikạ ko ńam purạukeda.

Aṭhwar hiloḱ (15 January) Chapainawabgonj Sodor upạjilạ, Jhilim union reaḱ Fhiltipara Skul maṭhre kolhe jạtigosṭhi koaḱ pusna-sakrat porob hoe purạuena. Ar noa sakrat porob manao akhṛa doe bondobosleda Rajshahi Khudro Nrigosthi Cultural Academy.  

Rajshahi cultural Academy ren Research ạpiser Benjamin Tudu aḱ ạyurte akhṛare manotan peṛa lekate seṭere tahẽkana Premtoli Degree College ren Professor Mn.Jogendronath Soren, National Agency for Green Revolution (NAGR) ren maraṅ ạyurić Mn.Stephen Soren, Program Officer Prodip Hembrom, SIL International ren Area Manager Nikolas Murmu ar atoren mańjhi haṛam Lacham Kol. Inạ sãote seṭerko tahẽkana aḍepase ato ṭolaren eṭaḱ ạyurko ar kolhe jạtiko.

Akhṛare Benjamin Tudu doe lại saḍekeda, Sakrat porob kolhe koaḱ mit́ṭen maraṅ porob se parbon kana. Noa do nokoaḱ legcar/ạri cạli reaḱ mit́ hạṭiń kana. Sarkar do ạdibạsiko lahantire kạmi idi kana, onka leka noko jạti koaḱ legcar, ạri-cạli jogao jotonre Rajshahi cultural Academy hõe kạmi kana. Inạ chaḍa katet́ rehõ pạṭhuạko talare sikhnạt goṛo hõe emoḱ kana. Ar ona sãote apnaraḱ krisṭi, legcar jogao ar sap dohoere kurumuṭu lạgit́e udgauket́koa. Mucạt́re noa porob akhṛare jit akan dolko manotan koaḱ tite siropa ko ataṅkeda.

Gaibandha  reaḱ Gobindogonj upạjilạ re are (9) bochor paromen rehõ Abhidiya Mardi ńutuman hoṛe goć oco akan reaḱ jahan bicạr phanḍaoge baṅ hoe akana. Khan ona iạte Abhidiya Mardi Sriti rokha komiti koaḱ goṭa lekate teṅgo daram bạisi se michil ko hoe ocokeda. Budhbar (11 January) tikin tarasiń jokhen Gobindogonj Dinajpur  reaḱ maraṅ ḍahar khon michil ehoṕkate aḍepase hoho hohote Bagda Farm Katamor reko mucạt́keda.

Sahebgonj Bagda farm Bhumi Udhar Songram Komiti ren sabha mukhiạ Dr.Philimon Baskey aḱ  ạḱyurte bạisi re kathae roṛkeda, Aceland Abhidiya Mardi ren maraṅ boeha Father Shamson Mardi, Bangladesh Christian Association Rongpur bibhạg ren sabha mukhiạ Mathias Mardi, Bagda Farm ren Bhumi Udhar komiti ren Jahangir Kabir Tonu, Golam Rabbani Musa, Hasan Morshed  Dipon, Swapon Sheikh, A.K.M Monir Sweet. Sawaliạ (bokta) ko menet́ kana, ạdibạsi santalko modren pạhil Prosason cadrebhukto se cadre re tahẽkan Aceland Abhidiya Mardi goć akade reaḱ jahan bicạrge baṅ hoe akana. Prosason reaḱ gạphlạti kakhante bicạr reaḱ tojbij nit dhạbić oho mucạt́lena. Noa tojbij do mit́ten ato-ṭola laṭa phanḍa reaḱe kurumuṭuet́ kana.

Ona bạisi re heć seṭerakan sanam hoṛko ar biliom baṅkate ạḍi usạra uni goć oco akan reaḱ bicạrko khojkeda. Bạisi mucạt́re oka thạ̃ire Abhidiya Mardi gur/goć oco akan onḍe baha mala ar mombạti jeret́ talateko manot keda.

Gel mit́ (11) aḱ kelas re bhurtiḱ lạgit́te dosar dhap reaḱ ardas teheń Sombar (09 January) khonaḱ ehoṕena. Setaḱ khonaḱ ehoṕ akante gapa Moṅgolbar (10 January) ńindạ 12 baja dhạbić calaḱa. Darakan 12 January noa ardas reaḱ jo sodoroḱa mente Dhaka sikhnạt board doe lại laha akada.  

Sikhnạt board são  jopoṛao menaḱko kạmiạko baḍae ocoakada, jo sodor tayom noa reaḱ khạṭitet́ se paka pạkitet́ do 13-14 January hạbić calao idiḱa. Ar onka leka tesar dhap ardas reaḱ tạrik do darakan 16 January ar jo sodoroḱ tạrik do 18 January niṭ akana. Noa ardas ar jo sodoroḱ reaḱ paka pạkitet́ hõ 19-20 January hạbić calao idiḱa.Tinạḱ do bhurti lạgit́ko bachao ocoḱ onko ko do 22-26 January bhitrite bhurtiḱ hoyoḱtakoa. Ente darakan mahna February khonaḱge kelas do ehoṕ lạgidoḱ kana.

Goṭa disomre arhõ rabaṅ ḍheroḱa mente abohaoa odhidaptar ko baḍae ocoyet́ kana. Teheń goṭa din bhor rabaṅ hoe do aṭkaroḱ kana.

Onka leka abohaoa odhidaptar-e menet́ kana, Foridpur, Madaripur, Kishargonj, Dinajpur, Nilphamari, Phoncogor, Kustia, Satkhira, ar Borisal, jilạ selet́ Rajshahi jilạ cetante ạḍi hisit hisit reaṛge hoet́ kana. Ona iạte teheń tala ńindạ khon setaḱ aṅga marsaloḱte kuṛhạ do heć daṛeaḱte adom adom ṭoṭhare do noa kuṛhạ ńut tikin tarasiń dhạbić hõ tahẽ botećkoḱa.

Calaoen bar din laha khonaḱ goṭa disomre ạḍi kajak rabaṅ do aṭkaroḱ kana. Ar kuṛhạ khạtirte setaḱ tora sin cando hõ bae ńel ńamoḱ kana. Ente ona dạriạ kuṛhạ ńutte siń cando do danaṅge tahẽn kana. Khan siń cando ạḍi bilom ńoḱte rakaboḱ kana. Adom adom ṭoṭhako ren hoṛ do siń cando aḱ marsalge bako ńel ńameda.

Onate ḍahar aṛe ato gharońjkore reaṛ-rabaṅ khonaḱ bańcaoḱ se thoṛagan urgumoḱ lạgit́te seṅgel jol kateć hoṛko jorogoḱ kana. Nonkan dosare hoe-daḱ bichnạu officer ko (Abohaobid) menet́ kana Sạnicar (07 January) khon thoṛagan rehõ noa abohaoa do bodoloḱa menteko baḍae ocoyet́ kana. Enrehõ bodol utạroḱa ona do baṅa mit́ bar din tayom arhõ nonkage reaṛ rabaṅ se kuṛhạ hoe daṛeaḱa. Niạko dinre sanam hoṛko ạḍi muskil dosare menaḱkoa. Bạṛtikate reṅgeć nacar hoṛko, okoe do horoḱ lạgit́ lolo kićrić bạnuḱtako nonkan hoṛko ạḍi haron kosṭo talate akoaḱ jion jingi ko khemaoet́ kana. Inạkate hõ kạmi kạsni hoṛko, okoe do mit́ jaega khon ar mit́ jaega calaḱ hoyoḱkantako onkan ko hoṛ hõ niạko rabaṅ dinre ạḍi haron sahao hoyoḱ kantakoa.

Bạṛtikaete haṛam-buḍhi hoṛko okoe do  umerteko laha akan ar kạṭić gidrạko lạgit́ hõ noa rabaṅ din do ạḍi muskilanaḱ kangea. Cedaḱje haṛam-buḍhi hoṛ ar gidrạko setaḱ re rabaṅ khạtir bahre baṅko oḍoḱ daṛeak kana. Niạko rabaṅ dinre sanam gogo babawaḱ jạruṛ kana aboren gidrạko napaete tạṅkhiko. Eken gidrạ moto do baṅ joto umer ren ko lạgit́ge noa rabaṅ do botoranaḱ kana. Ente noa rabaṅ mit́ dhao hoṛmore bololen re muskil dosare paṛaoḱ hoyoḱtabona. Metaḱme aema lekan ruạ hasorebon jạbun daṛeaḱa. Ar ona khon baṅcaoḱ reaḱ jahan horge babon ńama honaṅ. Onate delabon noa reaṛ rabaṅ dinre sanam ko ạḍi sontor rebon tahena. Jemon noa reaṛ-rabaṅ aloe kạbu bon ma. Ar nonkate noa rabaṅ dinre sanamko mońj bon tahen bon kurumuṭui ma. Sanamkoaḱ jạruṛ kana aboaḱ apnaraḱ hoṛmo apnaraḱ gharońjren hoṛko rạkhi jogaoko do aboaḱge dạyik kana.