Ko̠ro̠na mahamạ̃ri kabja re do̠hoe lạgit́ nãwãte Sikhnạt gãota ko reaḱ chuṭi ḍheroḱ kana se̠ 6 February tayo̠m kelas ehoboḱa ona baḍae joṅ lạgit́ dhãoṛa dhạuṛi re menaḱkoa pạṭhuạ gidrạ ar baba-gogo ko. Cedaḱ je̠, niạ lahare hõ mit́ lagamte mit́ serma tala sanam skul-College ko bond tahẽkana. Skul- College bond menaḱ khạtir noa babotre aema lekan gapalmarao ko calaḱ kana. Noa gapalmarao talatege cinhạ ńamakana, calaḱkan noa chuṭi do̠ arhõ mit́-bar hapta ḍher daṛeaḱa. Ar Pạṭhuạ gidrạko ko̠ro̠na ṭikạ ạḍi usạra emako lạgit́ Sarkar do̠ ṭikạ hapta do̠hoe reaḱe guni-bhạbiḱ kana. 

Co̠lo̠nti (bisesoggo) ko meneda, Noa rog do̠ arhõ bar hapta ḍher chạplạu daṛeaḱa. Noa babotre Montronaloy ar Madhomik ar Uccho sikkha Odhidaptor (Mausi) kho̠n baḍae ńamoḱ kana, ko̠ro̠na reaḱ ne̠betar reaḱ hal se̠ dosa Sarkar do̠e ńel jut́et́ kana. Ko̠ro̠na ajar baṅ ko̠m ńõḱlen khan calaoen serma leka nẽs hõ dhap dhapte ḍher idiḱa Sikhạt gãotako reaḱ chuṭi hõ.

Madhomik ar Uccho sikkha Odhidaptor ren ạḱyurić (Madhomik Biddaloy) Oddhapok Belal Hosen do̠e menkeda, Nonkan muskil dosa metaḱme ko̠ro̠na baṅ ko̠m ńõḱlen khan Skul-College do̠ o̠ho̠ jhićlena. Onate Online te kelas ehoṕ akana. Hoṛmo hạṭiń reaḱ sanamaḱ ạn-ạriko manao ganao selet́ Assignment kạmi hora arhõ ehoṕ lạgido̠ḱ kana. 2022 serma ren SSC ar HSC pạṭhuạ gidrạ koaḱ assignment ehoṕ lạgit́ maṭh porjạire batlao kol hoeakana.   

Chapainawabgonj reaḱ Nachol re mandhas metaḱme khe̠mota menaḱtako nonkan hoṛko hotete mõṛẽ gọtẹn (5) hindu gharońj ren hoṛko laga ńir ocoḱkana. Oṛaḱ-duạr rạput́ se̠ dhaṅdhaser ar laga ńir ocoḱkan mõṛẽ goṭen gharońj ren hoṛko se̠ć kho̠n Mithun Mahali ren koṛa Meghu Mahali calaoen 31 January Nachol thanarey nạlis akat́a.

Nachol ṭoṭha reaḱ Konnanogor Hindu ṭola reaḱ bapa phurkạ okto kho̠naḱ girobas akan mõṛẽ gharońj ren hoṛko se̠ć khonaḱ Sri Meghu Mahali, aḍepase ren gur akan Rashid Singh ren koṛa Lutu Singh, Gur akan Muharram Singh ren koṛa Biren Singh, ar aćren boeha Dhiren Singh do̠e baḍae ocokeda, Konnanogor mouza hal 1 no: khotian reaḱ 140 dag reaḱ 0.12 akor jumire onko pe̠a baba hoṛ do̠ oṛaḱ- duạr benao katećko girobasoḱ kana. CS ar SA record re oṛaḱ do̠ ulek menaḱ akada.

 Aḍepase 137 no: dag do̠ 0.36 akor khanḍ se̠ poriman sompot do̠ pukhri hisạbte CS, SA ar RS record rehõ tahẽkana. Menkhan Sarkar bhul kho̠bo̠r e̠mkate ar eḱṛe katha jạhir kate oko okte 1981 serma re Konnanogor ato ren Abdul Korim ren koṛa Ershad Ali bo̠ndo̠bos jo̠ṅana. Me̠nkhan un okte hõ Ershad Ali do̠ be̠cas se̠ be̠jaega hoṛ do̠ bae tahẽkana. Barabar 137 no: dag hõ pukhri tahẽkana. E̠ḱre goha katećge ona ṭoṭha reaḱ 68 no: dag reaḱ ḍahar hõe bondobosket́a. Tayom daram 68 dag re Karigori Skul benao okte e̠kkal ḍher okoć kạuḍi do̠e hataoket́a. Nebetar ma e̠kkal oko okote 140 dag reaḱ 0.12 akor jumi bo̠ndo̠bo̠s hatao khạtir 100 serma kho̠n ko basoḱ kan mõṛẽ goṭen hindu (adibạsi) reṅgeć-nacar gharońjren hoṛko ackage akoaḱ bhiṭạ kho̠n laga ńir reaḱe kurumuṭueda.     

Sri Meghu Mahali calaoen 31 January jumi eḱṛe bạṛić hoṛkoaḱ dho̠mo̠ḱ ar jiwi ṭonta bo̠to̠rte Konnanogor ato ren gur akan Abdul Korim ren koṛa Akbor Ali Master ar Abdul Latif, Gur akan Ershad Ali ren koṛa Ashraf Ali ar Alomgir Honer birudre Nachol thanarey nạlis akat́a. Ar no̠te aḍepase Ancer Ari jumi eḱṛe bạṛić hoṛkoe manalet́kote nui hõ gujuḱ reaḱ bo̠to̠r ko uduḱakadea. Noa birudre Ancer do̠ Nachol thanarey GD akada. Arhõ no̠te bo̠to̠r dosare menaḱko gharońjren hoṛko se̠ć khonaḱ jilạ prosasok ar bạṛti (otirikto) jilạ prosasok Chapainawabgonj, Upạjilạ nirbahi Officer Nachol barabar bo̠ndo̠bo̠sto̠ bạtil lạgit́ eardas akada.

Meskoć

Skulte seṭeroḱ bilo̠m reaḱ karontet́-

Mahasoe: Cekate am do̠ Skulte hijuḱem bilo̠m keda?

Bablu: Sign khạtirte Mahasoe.

Mahasoe: Cet́ reaḱ sign?

Bablu: Hane̠ je̠ ol akan tahẽkan, ‘Lahare Skul, Bại bạite calaḱme’.

Mit́din hiloḱ albudạha metaḱme be̠buj Sujon mit́ṭen Be̠le khạclạḱ bo̠ho̠ḱre dipil kate oṛaḱ se̠ne calaḱkan tahẽkana. Oṛaḱ calaḱ okte mo̠ne mo̠netey hudiset́ tahẽkana, Noa bele ạkhriń kateć ạḍi kisạ̃ṛ se̠ daman hoṛe hoyoḱa me̠nte.

Uni do̠ arhõe hudiset́ tahẽkana, Oṛaḱ idi tayo̠m noa be̠le kho̠n sim ho̠po̠nko hoyoḱa, onko ho̠po̠n ko haraḱa. Onko sim arhõ aema ko be̠lea. Un okte ona bele ko ạkhriń kateć ạḍi kisạ̃ṛ ho̠riń hoyoḱa. Inạ tayo̠m ạḍi maraṅ oṛakiń benao rakaba. Onḍe do̠ aema golam-golamini ko tahẽnoḱa. Okoe do̠ aćaḱ oṛaḱ reaḱ sanamaḱ ko kạmia arko ńel juta. Inạ tayo̠m jãhã maraṅ oṛaḱ ren kuṛi ńelte rajan-bajane baplayenge nahaḱ.  

Be̠le ạkhriń koṛa Sujon do̠ arhõe hudisket́a, bapla tayo̠m uni do̠ ponea gidrạren babae hoyoḱa. Inạ tayo̠m onko gidrạ koe hara-burukoa. Oloḱ-paṛhaoḱe cet́ ocokoa. Onko do̠ lạtu lạṭu ko cạkri-bạkriya. Inạ tay̠om onko aćren gidrạko do̠ maraṅ cato̠r se̠ oṛaḱ ren kuṛiye bạnij ạguakoa. Onko ren mit́ okte gidrạko hoyoḱtakoa. Un okte uni do̠ onko gidrạkoren go̠ro̠m babaye hoyoḱa. Aćaḱ ho̠bo̠rre duṛuṕ kate go̠ṛo̠m gidrạkoe jo̠m ocokoa. Un okte uniaḱ do̠ ạḍi rạskạwanaḱ jion hoyoḱtaea.

Noako hudis hudisteye calaḱ kan tahẽkana. Mit́ okte ackage ḍahar lo̠so̠t́re jaṅga ma leńjet́entae. Uni ma e̠kkale bhindạṛ go̠t́ena. Bhindạṛ são sãote aćaḱ bo̠ho̠ḱre dipil akat́ khạlạḱ reaḱ be̠le ma ńurhạ rạput́ metaḱme e̠kkal ge̠je̠r cabayena. Bele ạkhrińić Sujonaḱ kukmu hõ rạput́ cabayentaea.   

Juktorastro do̠ ko̠ro̠na virus reaḱ arhõ mit́ karoṛ doge Pfizer reaḱ ṭikạ Baṅgladisom sandes hisạbteye emaekana. Hola Sombar (31 January) Dhaka re menaḱ paṭhaona (dutabas) noa khobore baḍae ocoakada.

Paṭhaonae baḍae ocokeda, noa ṭikạ Baṅgladisạm ren pạṭhuạ gidrạko ar okoe do̠ nitoṅ hõ pạhil doge hatao reaḱ tạṅgire menaḱko, onko ko ṭhen seṭerkaḱ thoṛa alga ńõgoḱa. Inạ chaḍa hõ nãwã virus Omicron kho̠n pharak se̠ aḍ ar rukhiạ tahẽn lạgit́ Pfizer reaḱ Buster doge ṭikạ bon hatao daṛeaḱa.

Nit́ dhạbićte Juktorasṭro do̠ Baṅgladisom pe̠ karoṛ irạl ge̠l lakh ṭikạ sandese e̠m akadea.

Meskoć

Bijli bạti (Current) baṅ tahẽ okte Tv ńel reaḱ upại:

Mit́ hoṛ do̠ Tv kiriń ạgukeda. Ackage uni hoṛ do̠ mit́ṭen bisoi disạ hećadea. Onate Tv sṭeson rey phone keda-

Kirińić: Iń ma hola am ṭhen kho̠n mit́ṭen Tv do̠ń kiriń ạguakada.

Sṭeson: Jahan muskil se̠ cet́? Cet́ lekateń goṛo daṛekema?

Kirińić: Baṅ menet́ tahẽạń cet́, bijli bạti baṅ tahẽn okte hõ Tv ńel ńamkoḱa se̠ baṅa?

Sṭeson: Cedaḱ baṅ! Mombạti jeret́ katećem ńela.

Bir-gajaṛ ren Raj Dhạcri kul do̠e tahẽkana ạḍi lelha ar asaṅ poḍa. Jo̠to̠waḱrege ạḍitet́e ạṛisoḱa. Mit́ din hiloḱ do̠ jo̠maḱ sendrae oḍoḱena. Ackage mit́ okte uni do̠ mit́ṭen kulạiye ńel ńamkedea. Ar note kulại ma kul ńelte dạdạṛe dhurạuena. Mit́ ghạṛite dare aṛe se̠ aḍepasey dạṛ ạcuroḱ kana, arhõ mit́ ghạṛi do̠ e̠kkal sojhe dạdạṛe ehoṕena. Kulại tin okte dare aṛete dạdạṛe dhurạuen un okte Kul do̠e hudisket́a iń do̠ ạuṛiaḱte kulại tayomte dạṛ se̠ khudạu baṅkate dare danaṅreń okoḱ khan enḍkhan kulại ekkal iń tayomgey dạṛ ạguya nahaḱ. E̠nḍekhan ạḍi algeteń saṕ daṛekea.

Kul do̠ onkageye kạmikeda. Mit́ṭen ạḍi maraṅ dare danaṅrey teṅgo tahẽyena. Ma ńelme kulại sạrige uni Kul ṭhengey dạṛ hećen. Ar ạḍi algateye saṕgolkedea ar aćaḱ oṛaḱteye idi kedea. Oṛaḱ calao tayom kulại do̠ ạḍi kajak hudis-ganḍon kateće menkeda, E̠ boeha Kul, iń ma e̠nte ạḍitet́geń huḍińge.

Iń jo̠m kate amaḱ lać hõ paseć o̠ho̠ bilentama. Onate am do̠ iń jo̠m lahare ar mit́ṭen kulại sendra ńam ạguyem. Inạ tayom mit́ tulućem jo̠mket́lińge. Un ghạṛić iń do̠ nonḍegeń tahẽ hataṛoḱa. Kul do̠e hudisket́a, kulại ma sạri kathage co̠ṅe metạń kan. Calaolengeń arhõ mit́ṭen kulại do̠ń saṕ ạguyea. Uni kulại oṛaḱre do̠ho oṭokate Kul ma arhõ sendrae mohnḍayena. Me̠nkhan sendra sendrate ạḍitet́e laṅga cabayena. E̠nre hõ sendrate o̠ho̠gey ńamledea. Ado̠ oṛakteye ruạṛ hećena. Hudiskedae, teheń do̠ mit́ṭengeń jo̠m hataṛea. Inạ tayom eṭaḱaḱ sendra katećiń joma nahaḱ. Noa hudis kate Kul do̠ oṛaḱteye calao maṛaṅena. Me̠nkhan oṛaḱ sen kateće ńelket́ celege bạnuḱ ko! Kulại mae dạṛ akat́.

Sikhạuna: Bạṛti Laloc do̠ e̠kkal baṅ bhagea.

Disạm Reaḱ 21 jilạre reaṛ-rabaṅ bạṛti akana. Noa do̠ gapa hõ tahẽ daṛeaḱa. Ńindạ reaḱ lolo thoṛa ko̠m daṛeaḱa. Me̠nkhan ona kho̠n thoṛa ḍher daṛeaḱa din reaḱ lolo. Disạm reaḱ adom adom ṭoṭha kore serma re rimil tahẽ daṛeaḱa. Noa abohaoa do̠ arhõ mit́ din tahẽ daṛeaḱa. Inạ tayom lolo ḍher daṛeaḱa me̠nte lại laha akada hoe-daḱ bichnạu ạpis (Abohaoa Odhidaptor).

Hola Robibar (30 January) Tangail, Gopalgonj, Faridpur, Madaripur, Rangamati, Feni, Moulvibazar, Jessore, Chuadanga, Kushtia, Barisal, Vela jilạ ar Sitakundo upạjilạ selet́ Rangpur ar Rajshahi bibhạg cetante thoṛa ko̠m ńõḱ hoe se̠ rabaṅ do̠ aṭkaroḱ kana, Ar noa hoe-rabaṅ nonkage tahẽ daṛeaḱa.

Disom re ko̠ro̠na ajar ḍher pasnao akante Sarkare lại jạhirakat́ sikhnạt ṭhãonako bond reaḱ okto do̠ ar eyae din bạki menaḱa. Inạ tayom cet́ goṭa katha hijuḱa, ona khạtir aema gidrạ ren gogo-baba do̠ hudis-bundis re menaḱkoa.

Noa babotre Teheń Robibar tikin okte Rajdhạni reaḱ Bangladesh College Of Physician and Surgeon (BCPS) sonmelon re Sasthomontri Jahid Malek do̠e me̠nkeda, Sarkar pạtḥuạ gidrạko napae hoṛmo ko tahẽ daṛeaḱa, noako hudis-bhabna katege sikhnạt ṭhãonako jhić reaḱe mo̠neyet́kan rehõ, jo̠to̠waḱge ko̠ro̠na poristhiti tabe re menaḱ akada.

5 February dhạbić okto menaḱa. Niako din bhitrirege ale do̠ ko̠ro̠na kabja jatiyo solha committee são gapalmarao kate skul-college jhić se̠ bond tahẽna ona babotrey goṭa kathale baḍae ocodaṛeaḱa.

Ko̠ro̠na virus reaḱ ṭikạ Buster doge hatao reaḱ umer do̠ 40 serma hatao hoeakana me̠nte sasthomontri Jahid Malek do̠e lại so̠do̠r akat́a. Teheń Robibar (30 January) mit́ sombad breifing re noa do̠e roṛ so̠do̠rket́a.

Inạ chaḍa hõ disom re 12 kho̠n cetan umer ren jo̠to̠ hoṛko ko̠ro̠na ṭikạ ko emakoa me̠nte noa hõe lại so̠do̠rkeda.