Kaṭ Baḍohi Ar Daḱren Puri

Sedae reaḱ katha. Jãhã mit́ atore reṅgeć nacar kaṭ baḍohi hoṛe basoḱkan tahẽkana. Aćaḱ mit́ṭen mẽ̠ṛhẽ̠t́ ṭeṅgo̠ć tahẽkantaea. Jao hiloḱge gaḍa aṛekore dare maḱ baṛaea. Ar onako ạkhriń kateć jome jogaṛjoṅkan tahẽkana. Menkhan ackage mit́ din hiloḱ dare mamaḱkan jokhenge daḱre ṭeṅgo̠će paskaokeda. Ạditet́e sendrakeda, o̠ho̠gey ńamlaḱa.

Enḍekhan bhabnate dayage duṛuṕente raraḱe dhurạuena. Menkhan ackage daḱ khonaḱ mit́ṭen puri rakaṕ hećena. Ado̠ kaṭ baḍohi khonaḱ sanam kathae ańjomket́a. Khangey metadea, alom raga amaḱ ṭeṅgoćiń ạguama nahaḱ. Nonka men torage uni puri daḱrey unum go̠t́ena. Thoṛa ghạri khange puri do̠ mit́t̠en sona ṭeṅgo̠ćantey rakaṕena. Kaṭ baḍohi ńelket́ khane menkeda, noa do̠ baṅ kana. Khan puri arhõ daḱre unumena.

Inạkate mit́ṭen rupạ reaḱ ṭeṅgo̠će ạgukeda. Onka lekage kaṭ baḍohie roṛgo̠tkeda, baco̠, noa hõ baṅ kantińa. Enḍekhan arhõe unumena ar mit́ṭen mẽ̠ṛẽ̠het́ reaṅ teṅgo̠će ạgukeda. Noa ńelte kaṭ baḍhi usạrae menkeda, hẽ̠, noakangea. Kaṭ baḍohi ṭeṅgo̠ć ńamkate ạḍitet́e rạskạyena. Kaṭ baḍohi aḱ nonkan khulạsa ar bhage mon iạte puri asambheṛe rạskạyena. Ado̠ mẽ̠ṛhẽ̠t́ ṭeṅgo̠ć são rupạ ar sona reaḱ hõe emadea. Inạ tayom enhiloḱ khonaḱ kaṭ baḍohi ạḍi napae ar sulukte din khemaoe ehoṕena.

Ạdibạsi Hoṛaḱ Oṛaḱko Jeret́keda Lạṭkuṭạ Banḍhej Hoṛko

Naogaon Reaḱ Porsha re nijhum guṛum ńindạ mit́ ạdibạsi hoṛaḱ oṛaḱko jeret́keda lạṭkuṭạ bandhej hoṛko. Un jokhen oṛaḱren hoṛko diḱsạket́ khan jiwi ṭonṭa botorte harephareko ńir oḍoḱena. Oṛaḱre tahẽkan lakh ṭaka reaṅ jinispạti ekal rapaḱ roṅgo cabayena. Calaoen Sokolbar (15 April) noa ghoṭna ghoṭao akana. Upạjilạ reaḱ Tetulia union porisod Murulia ạdibạsi ṭola ren Shree: Monil hopon Modon aḱ oṛaḱre noa ghoṭao akana.

Oṛaḱ mukhiạ Modon baḍae ocokeda, Jao hiloḱ lekage kedoṕ jom tayome jạpit́ maṛaṅkeda. Aćaḱ gharońjre bạhu, bar gidrạ ar mit́ boehatae menaḱkoa. Jotoge galasaṅko jạpit́ akat́ tahẽkana. Ackage nijhum guṛum ńindạ aḍepase hoṛkoaḱ kạumạute ebhengo̠tena. Ado̠e tạṅkhiket́ma seṅgel joloḱkan, khange sanamko oṛaḱ khonaḱko dạṛ oḍokena. Enhiloḱ amdaj mit́ karoṛ bar gel hajar kạuḍi laksan akantea.

Modon do̠e dạbi kana, baṅma Lahateaḱ benebạiri khạtirtege ṭola paṛaren hoṛko seṅgelko dhurạu akada. Ghoṭna babotre mit́ṭen olaḱ ijhạr re jomaḱ akada. Porsha thanaren ạpisar In Charge Jahural Islam hõe menet́kana, lahateaḱ benebạiri karonaḱte paseć nonkan ghoṭna ghoṭaoena. Enterehõ nitoṅ hõ ghoṭna tojbij calao idiḱkana.

Tv re Teheńaḱ Eneć Khilạḍko

Crikeṭ

IPL

Locknow-Bengalore

Ńindạ 8:00 baja khonaḱ ehoṕa

Star sports 1 channel re porcaroḱa.

Phuṭbol

English Premier League

Liverpool-Maneu

Ńinda 1:00 baja khonaḱ

Star sports select HD2 channel re porcaroḱa.

Spanish La Lega

Villarreal-Valencia

Ńindạ 1:30 miniṭ

T sports channel re.

Bangladesh Northern Evangelical Lutheran Church-re Paska Girjạ;

Isại hoṛkoaḱ maraṅ dhorom po̠ro̠b Easter Sunday se paska porob ńutumte Chapainawabgonj jilạ reaḱ sodor upạjilạ Amnura Mission iskul maṭhre BNELC reaḱ maraṅ Simraḱ Paska (Sunrise) Girjạ do̠ hoe purạuena. 17 April Aṭhwar hiloḱ aṅga simraḱ 5:00 am baja okte khonaḱ niạ girjạ do ehoṕlena. Jisu Mạsiaḱ jiwet́ beredoḱ diḱsạ ruạṛ ńutumte noa bises girjạre Niạ diso̠m ar goṭa dhạrti reaḱ suluk ar jạt jạtko talare dupulạṛ tahẽn babot hõ koejoṅ hoyena. Simraḱ Paska girjạre Amnura Mission manḍer ar ona aḍepase ṭoṭharen (Mirjapur, Jolahar, Sakoṭola, Jhinạkhor, Phạgupaṛa, Sanjra) 300 cetan isại boeha miserako selet́lena.

Isại hoṛkoaḱ biswạs lekate, Jisu Mạsi gujuḱ tayom tesaraḱ din do̠e jiwet́ beret́ akana. Ado̠ Jisu Mạsiye jiwet́ beret́ hotete dhạrtiren manwa kại khon bańcaoko ńamkeda ar nonkate Jisu Mạsi Jiwet́ beredoḱ Aṭhwar do̠ Paska se Easter Sunday hisạbte manao hijuḱ kana. Jisu Mạsiaḱ jiwet́ beret́ metaḱme jitan din mimit́ diso̠mren isại hoṛko aema lekan ạn-ạri talate noa dinko manao ganaoeda.

Niạ Maraṅ Simraḱ Paska po̠ro̠b girjạe ạḱyurkeda BNELC ren mare GS Rev. Suban Kisku. Girjạre arhõ selet́kate johar katha ko lạe pasnaokeda BNELC-Rajshahi circle Chairman Mn Rabindronath Hembrom, National Christian Fellowship of Bangladesh(NCFB) ren Program Coordinator ar onoliạ Mn. Mithusilak Murmu, BNELC-Trust Board secretary Mn. Hingu Murmu, TF/NAGR ren Director Mn. Stephen Soren. Ạḍi rạskạ salaḱ napaete noa Simraḱ Paska (Sunrise) girjạ hoe purạuena ar darakan bochor hõ sanamko niạ ar hõ noa Simraḱ se Sunrise girjạ hoyoḱa menteko sodorkeda ạyur komitte ko. Ona selet́ Manotan ko arhõ ko menkeda, nonkage jemon tayom daram dinre BNELC reaḱ mimit́ manḍerre simraḱ paska girjạ metaḱme cando ạuri rakaboḱrege (Sunrise) girjạ hoyoḱma.

Dinajpur Reaḱ Nawabgonjre Carenṭ Tarte Jhạli Kateće Gurena Mit́ Ạdibạsi

Aṭhwar hiloḱ (17 April) Dinajpur reaḱ Nawabgonjre amdaj setaḱ 7 baja jokhen Bhaduria hindu ṭolare Robi Toppo (52) ńutuman hoṛ carenṭ tar re jhạli kateće gurena. Thana reaḱ kho̠bo̠r lekate baḍae ńam akana je, oṛaḱ khonaḱ amdaj 100 gọj sạṅgiń pạchim dạkhin nakha mat́ gajaṛ seć ṭạnditey senlena, ado̠ daḱ beohar lạgit́ hoṛo khete senen khan hoṛo khet khon goḍo danṭaoko lạgit́te jonoṛao akan carenṭ tar tege jhạli kateće gurena.

Inạ tayom amdaj 10 baja ona ṭolaren Amirul Islam (36) ńutuman mit́ hoṛ uni gurakan Robi Toppo ńelte ekale tharbasaoena are kikiạukeda. Khan ṭolaren hoṛko jarwaen khan Robi Toppo ren bhạgnạtet́ Sanchu Khanko selet́ thoṛa hoṛkoaḱ goṛo gopoṛote oṛaḱko ạgukedea.

Antu Ar Muć

Mõṛẽ serma umeren mit́ṭen huḍiń macha gidrạ he̠ṛe̠m jomaḱ miṭhại (misṭi) bogetey kusiaḱa. Jãhãn kakhante mịthạire muće bo̠lo̠lena. Khan miṭhại jo̠jo̠m jo̠khen muć do̠ Antuwaḱ alaṅe gerket́a. Enhiloḱ khonaḱ mućge bae ńel sahaokoa. Enḍetero̠ṅ muć go̠ćko reaḱ ạt́e ńam baṛaea. Metaḱme badla hataoa mente.

Onate phãnde bandhaokeda baṅma cekate mit́te ạḍi utạr mućiń goćkoa. Ado̠ fridge khon mit́ kuṭrạ miṭhại oḍokkate bahrerey dohokada. Thoṛaghạṛi khange miṭhại reaḱ lithur he̠ṛe̠m lab laloćte ạḍi utạr mućko jarwaena. Un jokhen Antu sanam mućko mit́te goćko reaḱe kuṛumuṭukeda. Ado̠ sạrige seṅgele dhurạuat́koa. Khan seṅgel reaḱ ãćte sanam muć hare phare dạdạṛko ehoṕena. Menkeam jeleka hoṛaḱ oṛaḱre seṅgel dhurạulenre hoṛko dạṛ baṛae, onkage muć hõko dhãoṛãdhạ̃uṛĩ baṛaekana.

Monekedae paseć mućko memenkana, alogem goćlea, bacole laksan akat́tam. Ado hudiskeda, jãhã mit́ muće gerkedińa enḍekhan jo̠to̠ do̠ baco. Mãyã hećadea mućko cetanre. Are hudiskeda nonka kạmi o̠ho̠ge ganoḱ kana. Enhiloḱ khonaḱ Antu do̠ mućko bae goć baṛakoa. Nitoṅ amdaj jao hiloḱge fridge khon he̠ṛe̠m jomaḱ oḍoḱkate mućaḱ bhugạḱ ṭhene dohokaḱa. Monekeam muć sãote tinaḱ din reaḱ sompoktae.

Sohrae Sereń

Girjạ ghonṭa ńurena

Dhuti, sạṛiń bandeyen

Iń do̠n calaḱ girjạ oṛaḱte (2)

Lạṭu lạṭu pasṭor sostor katha menako

Iń do̠ monreń dohoya,

Monreń dohoya (2)

Iń do̠ monreń dohoya.

2023 Serma Reaḱ SSC Ar HSC Bidạu Khaṭo Silạbaste Hoyogo̠ḱa

2023 serma reaḱ SSC ar HSC bidạu do̠ khaṭo silạbaste hoyoḱgo̠ḱa mente baḍae ocokeda sikhnạt montri Dipu Moni. Hola Moṅgolbar (12 April) tarasiń beṛa socibaloy reaḱ mit́ dupuṛuṕre noae lại lahakeda.

SSC bidạu do̠ darakan serma April cando ar HSC biḍạu do̠ June cando hataoaḱa mente hõe lại so̠do̠rkeda. Metaḱme nit okoe pạṭhuạ gidrạko ge̠l kelas re menaḱko onkoaḱ SSC bidạu do̠ 2023 serma hoyoḱtakoa. Ar onka leka gel mit́ kelas ren pạṭhuạ gidrạkoaḱ HSC bidạu hõ darakan serma hoyoḱtakoa.

Daḱre Baha Buhel Talate Ehoṕena ‘Biju’ Po̠ro̠b

Parboto Chottogram reaḱ pe jilạre gaḍa se̠ doreão daḱre baha buhel talate teheń Moṅgalbar khon ehoṕena Chakma jạti-gosṭhikoaḱ pe din reaḱ Biju porob. Ado̠m ado̠mko noa po̠ro̠b boisabi ko metawaḱkana.

Teheń setaḱ bela Chakma kuṛi-koṛako baha buhel talate mare sermako bidạkeda ar nawa sermako ataṅ daramkeda. Ado̠ un jokhen sanamkoaḱ bhạlại lạgit́ko koejoṅa. Jemo̠n goṭa serma sanamko napaeko khemao daṛeaḱ ar napaeko tahẽ daṛeaḱ.

Paltur, legcar lekate teheń Chakma gharońjren mimit́ hoṛko bahakoante oṛaḱko sajao-sapṛaoa. Gapa Budhbar po̠ro̠b reaḱ maraṅ din Biju po̠ro̠b reaḱ aso̠ltet́ manaoḱa. Ar pe din matha metaḱme Lukhibar do̠ po̠ro̠b mucạdo̠ḱ dinkantakoa.

Bagmarare Ạdibạsi Pạṭhuạ Kuṛiko Talare Ḍuluṅ Gạḍi Em Hạṭińena

Rajshahi reaḱ Bagmarare soman otre basoḱkan mõṛẽ goṭen ạdibạsi pạṭhuạ kuṛiko talare hola Sombar (11 April) ḍuluṅ gạḍiko em hạṭińat́koa. Maraṅ montriwaḱ prokolpo tabere 2021-2022 kạuḍi serma lekate dosar dhapte noa ḍuluṅ gạḍi em hạṭińena.

Ona lạgit́te tarasiń okte upạjilạ samaṅre sapṛaoakan akhṛare Mn.Peṛa hisạbte selet́e tahẽkana upạjilạ nirbahi ạpiser Faruq Sufian. Ar uni do̠ akhṛare mimit́ gidrạko ḍuluṅ gạdi em calat́koa. Akhṛare selet́ko ́tahẽkana ạdibạsi jạti-gosṭhi unnoyon Foundation ren sạdại sompadok Somores Kumar selet́ eṭaḱ daptarren kạmiạko.

Upạjilạ reaḱ Chanderara Uccho Biddaloy, Chaipara Uccho Biddaloy, Chanpara Adorso Balika Uccho Biddaloy, Taherpur River View Uccho Biddaloy ar Hat-Gangopara Uccho Biddaloy ren madhomik porjairen pạṭhuạ kuṛiko ḍuluṅ gạḍiko ńamket́a. Eṭaḱ eṭaḱ jạti-gosṭhiko leka je̠mon ạdibạsi pạṭhụko hõ oloḱ paṛhao sećteko laha calaḱma nonkan mon subạtege ḍuluṅ gạḍiko emawat́koa.