Teheń do̠ Sombar (15 August) Baṅgladisom jạti ko ren ạyurić Bo̠ṅgo̠bo̠ndhu Shekh Mojibur Rahmanaḱ  47 serma gur mãhã. Baṅgladisom reaḱ itihãs re tehenáaḱ din do̠ mit́ṭen bises din se mãhã mente lekha akana. Cedaḱje gel are sae eyae gel mõṛẽ serma (1975) reaḱ gel mõṛẽ August do̠ tahẽkana ạḍige duk reaḱ cando. Ona ńindạ reaḱ katha do̠ eken onoṛhẽ kore do̠ baṅ sereń durạṅ kore hõ disạḱkana abo niạ Baṅgladisomre. Enhiloḱ serma re rimil tahẽkana, baṅe tahẽkana ńindạ cando. Murubbi ko mena, ona ńindạ Dhaka reaḱ sermare hende rimil tahẽkana, baṅ tahẽkana jaṛi daḱ, ḍig ḍig terdeć marsal. Ar niạ ńindạ rege itihãs reaḱ bạṛić utạr ghoṭona do̠ ghoṭaolena.

Aćren gharońren sanam koko ńet́ket́koa. Niạ do Baṅgladisom reaḱ itihãs re mit́ maraṅ ghoṭona kana. Ona ńindạ do uniaḱ oṛaḱ ren mit́ hoṛ hõ bako sarećlet́koa bańcaoḱ lạgit́. Gogoć ko do̠ ko hudis leda noko oṛaḱren do̠ ar tis hõ niạ disom calao lạgit́ akoaḱ ektiạri bako calao daṛeada. Menkhan Isoraḱ moneteaḱ do̠ manwa tis hõ bako hudis daṛeaḱa. Bo̠ṅgo̠bo̠ndhu 21 serma goć tayom niạ disomre ar hõ Awamilig do̠l disom calao reaḱ ektiạri ko ńamakada. Simraḱ reaḱ marsal ạuri phuṭạgoḱ rege ko goć kedea niạ Baṅgladisom ren baṅgali jạtren jonom data ar Baṅgladisom Phurgạl (sadhinota) chingạu ạguić maraṅ ạyurić Bo̠ṅgo̠bo̠ndhu Shekh Mojibur Rahman.

Uni sãote arhõko goć sãoket́ koa aćren era, pea hopontet́, barea bạhukuṛi, boehatae ar hõ aćren peṛako niạ gel mõṛẽ hoṛ. Barhe disomre tahẽkante nun maraṅ muhim khonkin bańcaoena boeha kuṛi. Nit menae disomren Maraṅ montri Shekh Hasina ar Shekh Rehena. Noa hoyenaḱ ghoṭona do̠ tis hõ bako hiṛińa niạ disom ren hoṛ. Niạ disomren mimit́ goṭen hoṛkoaḱ ontor talare jiwet́ tahẽna Bo̠ṅgo̠bo̠ndhu Shekh Mojibur Rahman. 1975 serma reaḱ 15 August reaḱ ńindạ niạ disomren militare cetan mukhiạkoaḱ hukumte niạ disomren hoṛ ko bako hudis daṛeaḱ tahẽkana je, noko ar hõ jãhãtis niạ disom ko calaoa. Ar niạge hoyena hoṛ oka bako hudis daṛeaḱ. Nit niạ disom sạdhin tayom 30 bochor paromen okte Bo̠ṅgo̠bo̠ndhu Shekh Mojibur Rahman ar uni ren gharońj ren ko goćlet́ko reaḱ bicạr ehoṕena.

Ar niạ bicạr re onko gogoćko lạgit́ phạsi reaḱ rai hoyena. Shekh Mojibur Rahman ar ać gharońj ren koaḱ niạ bicạr hõ ar mit́ sạri itihãs kangea. Niạ dhạrti ṭunḍạṅ jionre tinạḱ nonkanaḱ kạiko menaḱa sanamaḱ reaḱge bicạr hoyoḱa mit́din. Sạri sonot Isor do̠ joto hoṛaḱ bicạre bicạrgea.

Jug ar oktoko bo̠do̠l idiḱkan são sãote soman ilạka se otre basoḱkan hoṛkoaḱ pạrsi ar lae-legcar, ạri-cạli sanamaḱ do̠ ado̠go̠ḱ sećge mohnḍa akana. Ado̠k kan pạrsi ar legcar rukhiạ dạbite Naogaon reaḱ Dibordighire mit́ṭen jarwaḱ se sabha ko hoe ocokeda Urao, Santal, Munda, Mahle selet́ eṭaḱ eṭaḱ jạtren hoṛko. Ạdivạsi Mãhã ńutumte hola (13 August) besarkari Unnoyon Songstha Caritas reaḱ Asha Prokolpo Dascho koaḱ goṛo gopoṛote noa jarwaḱ se sabha hoyena. Setaḱ 11 baja okte jhạnḍi (jatiyo potaka) rakap se ṭaṅgao talate ona akhṛae uḍhạukeda Nozipur Pouro Meyor  Rezaul Karim.

Inạkate tikin ber do̠ Dibor Dighi Dakbanglo re gapalmarao akhṛa hoyena. Ạdivạsi ạyurić Sudhir Tirki aḱ ạyurte akhṛare kathae roṛkeda, Nozipur Pouro Meyor Rezaul Karim, Awami League ạyurić Harunor Rashid, OC todonto Orpon Kumar Das, Chabdpukur Mission ren Father Bell Sario, Upạjilạ Mohila Vice Ċhairman Khatijatul Cobra Mukta, Caritas Kormosuci ren kạmiạić Fuljan Secuss Maranḍi, bahre daṛanić (math kormokorta) Hosanna Hasda, Dascho upajila Coordinator Rabeya Sorkar Elin, Khoboriạ (sangbadik) Azadul Islam Azad, Jotin Toppo, ar Luis Soren hõ seṭere tahẽkana.

Manotanko do̠ ạdivạsikoaḱ ạri-cạli lae-legcar rạkhi jogao ar saṕ do̠hoe babotre sarkar ṭhen ko dạbikeda. Inạ chaḍa hõ gapalmarao mucạtre rạskạ eneć sereń joṅ reaḱ akhṛa hõ hoe purạuena.

Dinajpur reaḱ Phulbari upạjilạ, Rangamati ato reaḱ mit́ṭen kạhni. Shree Mohon Soren ńutuman mit́ṭen santal hoṛ, Ać gogo Sorola Murmu aḱ jumi ńam ruạṛ lạgit́te 36 bo̠cho̠r khonaḱ sarkar são ạn-ạri lekate lạṛhaikate jumi ńamket́ rehõ, aḍepase hoṛkoaḱ jala jońjalte nirạite bae do̠kho̠l hatao daṛeaḱ kana. Onate arhõ nãwãte lạṛhại ehoṕ akana.

Ente aḍepase hoṛko ona jumi cetanreko dạbi kana, ar enḍete jumire baṅko cas-abad ocoae kana. Jumi ńam ruạr lạgit́te nunạḱ din khonaḱ ạn lekate lạṛhại lạṛhạite mit́ leka oṛaḱ reaḱ sanamaḱ metaḱme ḍaṅgra, merom sanamaḱte do̠e eken tiyena. Noa do̠ eken mamla reaḱ khoroć emte. Nunạḱ din khon tạṅgi tạṅgite nit́ jo̠kho̠n jumi ńamkeda, enhõ niạ okte nãwãte jumi khạtir eṭkeṭõṛẽ ehoṕkeda upạjilạren Khajar atoren Mostafizur Rahman Dulal ńutuman mit́ hoṛ.

Shree Mohon Soren do̠e lạikeda je, Mostafizur Rahman Dulal do̠ Jao ghuṛige khetre pheḍoḱe mana akadea. Mohon Soren do̠ arhõe menkeda, upạjilạ reaḱ Boliharpur mouja SA 57 khotian re 322 ar 323 dag re 138 so̠to̠k ren mul mạlik-e tahẽkana upạjilạ reaḱ Shamsher Nogor atoren Jonaku Rai Bormon ren ho̠po̠n Shree Horimohon Rai Ar Bolihar atoren Chunku Pathari ren ho̠pon̠ Shree Kunjulal Pathari. Onko ṭhen khonaḱ, 1965 sermare Mohon Soren ać gogo Sorola Murmu do̠e kiriń hataoleda, ona reaḱ dạlil nomber tahẽkana 182, 1986 sermare joma khạrij keda, khạrij no.590.

Menkhan thoṛa serma tayom ńelena je, Noa jumi VP (Vested Property) hisạbte lekhayena. Tayom daram arhõ orpito (assigned) hisạbte tạlikayena. Khan inạ tayom khonaḱge Mohon Soren do̠ ać gogowaḱ jumi ńam ruạr khạtir ạn (aini) lekate lạṛhại-e ehoṕkeda. Mit́ lagaote 36 bo̠cho̠r lạṛhai kate 2022 serma reaḱ 8 February jo̠to̠ kagoj-pạti, jumi ko ruạṛe ńamket́te lạṛhại khone jirạuena. Menkhan lạṛhai hapeyen rehõ nãwãte jumi cetanre dạbi calaoeda Mostafizur Rahman Dulal. Ona iạte jumi ruạr hatao lạgit́ dạṛ baṛae hoyoḱkantaea.

Mohon Soren do̠ arhõe lại so̠do̠rkeda je, Mostafizur Rahman Dulal do̠ jao ghuṛige khetre pheḍoḱe baro̠n se mana akadea, ar jiwi ṭonṭa reaḱ bo̠to̠r hõe uduḱ akadea. Onate uni do̠ jopoṛao akan kạmiạko (songsilisto kotripokho) ṭhen nehõre doho akada.

Noa babotre Mostadizur Rahman Dulal do̠e menkeda baḍae ocokeda, uni do̠ Rekodio mạlik ren ho̠po̠ntet́ Ammoktar nama mente noa jumie ńamakada. Nit hõ noa reaḱ Dinajpur Jorj Adalot re mamla calaḱ kana mente dạbi akada.

Tumạl:gnewsbd24.com

15 August do̠ goṭa disomre ạḍi duk ar bhabna din kana. Ona dinre Baṅgladisom jạtkoren baba Boṅgobondhu Shekh Mujibur Rahman do̠ mit́do̠l ulbuliạ bạṛić hoṛkoaḱ gulite t̠hu goć ocolena. Ado̠ niạ dhao ona din se mãhã manao re Korona khạtir jo̠to̠ lekan niropon hoṛmo reaḱ ạn-ạri (sasthobidhi) manao lạgit́ batlao em akana. Enhiloḱ dinisạ mãhã akhṛare hijuḱ ko do̠ korona ṭikạ reaḱ certificate soṅge darae hoyoḱa.

Teheń Lukhibar (11 August) Sarkari kho̠bo̠r lekate lại lahayena. Inạ chaḍa arhõ thoṛa hukum batlao babotre latarre emena:

1.      Akhṛare seledo̠ḱko mask ho̠ro̠ḱ hoyoḱa.

2.      Akhṛare ti ạruṕ saphae lạgit́ sạbun se sanitizer reaḱ bebosthae hoyoḱa.

3.      Gapalmarao se Milad Mahfil re ko̠m hoṛko selet́ daṛeaḱa.

4.      Eṭaḱaḱ niạm ko kajakte manao hoyoḱa.

5.      Khub, manda, ruạ, sahẽ̠t́ re muskil tahẽn khan akhṛare baṅ seledo̠ḱge bogea.

6.      Khub, ạchim jokhen rumạl se tissue te mũ-moca eset́ hoyoḱa. Ar beohar akat́ tissue ko jãhãtãhã giḍi baṅkate dustbin re giḍikaḱ hoyoḱa.

Eken inạ do̠ baṅ, aḍepsae calao (sthanio prosason) sastho bibhag, ạn rukhiạ bạhini koaḱ jo̠to̠ lekan hukum batlao ko ṭhikte manao ganao hoyoḱa.

Utạrboṅgo Adivasi Forum aḱ bo̠ndo̠bo̠ste Chapainawabgonjre (9 August) ạdivạsi mãhã ko manaokeda. Ạdivạsi Mãhã ńutumte galmarao sabha, michil, rạskạjoṅ akhṛa selet́ aema lekan kạmihora talate noa mãhã ko manaokeda. Ona jo̠khenge ạdivạsi hisạbte akoaḱ ạri cạli, hok aidạri (sangbadhanik sikriti) babot selet́ turui (6) goṭen katha se dạbi ko lại sodorkeda.

So̠do̠r, Nachol ar Gomostapur upạjilạ reaḱ mimit́ atoren ạdivạsi ko Chapainawabgonj reaḱ Fire Service moṛ re ko heć samṭaoena. Inạkate onḍe kho̠naḱge mit́te hoho ko ehoṕket́te (rally) ona so̠ho̠r ạḍepase ạcurkate Nawabgonj Sarkari College ṭhenko mucạt́keda. Inạkate thoṛa ghạṛi eneć sereń baṛakate galmarao ko ehoṕkeda.

 Khan Utạrboṅgo Adivasi Forum aḱ chapa so̠do̠r ‘Madol’ puthi-e uchạnkeda Nawabgonj College ren Professor Shankor Kumar Kundu.Utar Bongo Adivasi Forum, Chapainawabgonj jilạ ren sabha mukhiạ Cornelius Murmu aḱ ạyurte akhṛare katha ko roṛket́ manotako, Nawabgonj Sarkari College re professor Mn.Shankar Kumar Kundu, Shibgonj Adina College Sorkari Fazlul Hoqe College ren bharapon professor (Odokho) Mn.Mazharul Islam,Forum ren central Mn.Hingu Murmu, Adivasi ren ạyurić Mn.Jotin Hembrom, Kutila Rajowar, Subash Kerketa selet́ arhõ eṭaḱko.Noa akhṛare turui goṭen dạbi se khojoḱaḱ cetanre kathae roṛkeda Bangladesh Communist party ren Chapainawabgonj jilạ bibhạg ren sạbik Sayedul Islam, Jilạ jaskoren sạdại sompadok Moniruzzaman Monir,Jilạ pujạ udjapon porisod ren Dablu Kumar Ghose, Adv.Yasmin Sultana.

Noa akhṛa sawaliạ ko do roṛ saḍekeda je, sạrige Baṅgladisomre ạdivạsi ko ạḍi leka ko koclon ocoḱ kana. Akoaḱ hok ạidạri baṅko ńameda. Jumi jaega kho̠nko eḱṛe ocoḱ kana. Nonkanaḱ muskil do ạdivạsi ko talare menaḱa.Onate hok ạidạri ńam babotre dạbiko dohokeda.

 Noa sabha se akhṛare turui goṭen dạbi lại saḍekeda Prodip Hembrom. Ona do̠ nonka kana:

1. Ạdivạsi mente baṅ lekhaḱ lạgit́te okaṭaḱ lại sạde akan ona hukum se sarkari ạn lekate rakaṕ.
2. Ạdivạsi hisạbte sangbadhanik sikriti metaḱme hok ạidạri
3. .Soman ilạkaren ạdivạsi lạgit́ judạ Commission bandhao lagaḱa.
4. Soman ilạkaren Ạdivạsi ko seć khon soṅsod re dohoko hoyoḱa.
5. Minority Commission bandhao hoyoḱa.
6. Utạrboṅgo ren Ạdivạsikoaḱ jion jingi lahantire okulạnaḱ ko jạtiya budget (National Budget) ḍher ṭakae do̠ho̠e lag̕aka.

Moṅgolbar (9 August) Chapainawabgonj jilạ reaḱ Amnura Mission re The Santals Times reaḱ dosar serma dinisạ mãhã ńutumte mit́ akhṛa hoe purạuena. Ńel ńelte mit́ serma paromente hola din do̠ The Santals Times bar sermae purạukeda. Noa din do̠ ạḍi mońj ar jomokte manao hoyena. Santals Times reaḱ dosar serma dinisạ ńutumte pạhilre rally hoeyena. Inạkate  galmarao, cake get́ ar mucạt́re rạskạ eneć sereń reaḱ akhṛa hoeyena. Noa akhṛare amdaj irạl ge̠l (80) cetan hoṛko selet́lena.

Noa akhṛare Manotan ko santal pạrsi , lakcar rạkhi jogaore ạḍi mońj ar daman daman kathako lại saḍe akada. Metaḱme santali ạri-cạli saṕ doho cetanre selet́ akan hoṛko udgạuket́koa. Ar inạ chaḍa hõ apnar pạrsi metaḱme santal pạrsite golpo, onoṛhẽ oloḱ babotreko udgạuket́koa. Jemon nãhãḱ jugren oloḱ paṛhaoḱ kan gidrạko apnar pạrsite ol arko paṛhao daṛeaḱ. Sạrige selet́ akan hoṛko akhṛa talate santali babotre besko aṭkar daṛeada.

Ente baḍaeabon Santals Times do̠ ho̠ṛ hoponaḱ ạricạli,lakcar-paltur rạkhi jogao lạgit́ge  kurumuṭu kana. As menaḱa noa Santals Times bại bạite arhõ hara buruḱa. Sanam manotanko noa as ar bhorsako dohokeda.

Santals Times reaḱ dosar serma dinisạ mãhã akhṛare Manotan peṛa hisạbte selet́ko tahẽkana NAGR ren maraṅ mukhiạ Mn.Stephen Soren, Mn.Markus Murmu,Mn.Soban Kisku, Mn.Hingu Murmu, Mn.Sontosh Tudu, Mn. Subash Baskey, Mn.Subash Hasda. Noa goṭa akhṛae ạyurkeda Prodip Hembrom.

Arhõ selet́ko tahẽkana Emmanuel Mardi, Sumitra Murmu ar Promila Hasda. Khạtige eneć sereń durạṅte akhṛa do̠ andoṛ cabalena. Ạḍi napaete noa akhṛa hoe purạuena.

Teheń do̠ Moṅgolbar (9 August) mit́ṭen bises din kana. Jao serma reaḱ 9 August do Ạdivạsi Mãhã mente manaoḱ kana. 1994 serma reaḱ jatisoṅgho goṭawaḱ lekate, 1995 serma khon 9 August do noa ạdivạsi mãhã mente goṭa dhạrtiren amdaj 30 karoṛ ạdivạsi ko manao ạgueda. Baṅgladisom do̠ 2004 serma khon noa ạdivạsi mãhã ko manaoeda. 

Teheń Baṅgladisom reaḱ mimit́ ṭoṭha se jaegare noa dinko manaoeda adivạsi ko. Baṅgladisom reaḱ utạr-pạchim nakha Rajshahi ar Rangpur bibhạg reaḱ jilạ Chapainawabgonj, Rajshahi, Pabna, Naogaon, Nator, Sirajgonj, Joypurhat,Dinajpur, Thakurgaon, Gaibandha, Bogura eman jilạre Santal, Sing (Gonju), Orao, Mundari,Bedea mahatto, Rajowar, kormokar, Teli Turi, Kol, Paharia, Mahali nonkan aema jạtiko basoḱ kana. Ar Parbotto Chottogram (Rangamati, Bandorban, Khagrachori) Chakma, Marma, Tripura, Lusai, Bom, Mro, Khumi, Khiyang, Pankhoa ar chak jạti-gostiko basoḱ kana.

Onkage Baṅgladisomre menaḱko mimit́ jạti-gosthiaḱ mimit́ lekan pạrsi menaḱa. Metaḱme baṅgla chaḍa hõ 40 goṭen pạrsi do̠ menaḱa. Ạdivạsi Mãhã manao reaḱ motlob do̠ ạdivạsi hoṛkoaḱ mạnmi ạidạri, nijaḱ ạricạli rạkhi jogao se poribes lahanti, sikhnạt se jãhãn eṭketõṛẽ ko khon rukhiạ lạgit́ antorjatik se International lekate goṛo-gopoṛo ńam lạgit́te noa din se mãhã do manao hoyoḱ kana. Cedaḱje, nij pạrsi nij ạricạli jogao joton re abowaḱge maraṅ dạyik kana.

Baḍaeabon je, calaoen Sạnicar (6 August) do̠ Disomre Jo̠to̠ lekan juluḱaḱ sunum reaḱ dam ḍher akana. Ar ona dam ḍheren khạtir nit bajar ghaṭre jo̠to̠ jinis ko reaḱ dam hõ ḍherena. Araḱ sakam sạbji, je̠l-hako, bele, mae-mo̠so̠la emanteaḱ jo̠to̠aḱ reaḱ damge ḍherena. Eken inạ do̠ baṅ hoṛ dejoḱ gạḍi ko reaḱ bhaṛa hõ ḍher akana. Ado̠m ado̠m Gạḍi ko re bạṛti bạṛti bhaṛa ko khoj kana. Bar din reaḱ pharaḱte jo̠to̠waḱ damge nonka ḍher cabayena.

Noa khạtir reṅgeć oreć kiriń jo̠met́kan hoṛko muskilreko paṛao akana. Menkhan bajar são jopoṛao menaḱko sarkari songstha ren aema lekan apiser ko noa babotre bhorsa ko em akana je̠, ạḍi usạrage noa ko dam babotre todarot hoyoḱa. Ar okako jinisko dam ḍheroḱkan ona ko̠mti reaḱ kurumuṭui hoyoḱa.

Dinajpur reaḱ Nawabgonj upạjilạ re khetre kạmikan okte mit́ṭen santal casa ce̠ṭe̠r ńutei goćena. Teheń Sạnicar (06 August) setaḱ 10 baja jo̠khen upạjilạ reaḱ Gopalgonj union reaḱ Khatkhatia Krihnapur atore noa ghoṭna ghoṭao akana mente Nawabgonj thanaren OC Ferdous Wahid do̠e baḍae ocokeda.

Pe̠ gel irạl (38) serma umerren uni santal casawaḱ ńutum do̠ Robin Soren. Uui do̠ ona atoren Baburam Soren ren koṛa kanae. OC Ferdous Wahid do̠e baḍae ocoakada je̠, Robin Soren do̠ oṛaḱ reaḱ khetge lo̠so̠t́et́ tahẽkana. Onate ṭilar te si kan tahẽkana.

Menkhan ackage daḱ hećente huḍur bijlilkeda. Khange Robin Soren ṭhenge ce̠ṭe̠r ńurente soṅge soṅgete onḍege goćena. Inạ tayom aḍepase hoṛko uniaḱ mạ̃ṛĩ udhạrkate oṛaḱteko idikeda.

Tumạl: bdnews24.com

Baṅgladisomre jo̠to̠ lekan juluaḱ sunum reaḱ dam ḍherena. Baṅgladisom sarkar do Sokolbar ńindạ jo̠to̠ sunum reaḱ dam nonkae ḍherkeda. Metaḱme Ḍigel ar Kerosene reaḱ dam liṭer re 34 ṭaka ḍherente 114 ṭaka, ar  Peṭrol hõ onkage liter re 44 ṭaka ḍherente 130 ṭaka kateć paṛaoena. Ar Octane reaḱ dam hõ liṭer re 46 ṭaka ḍherente paṛaoena 135 ṭaka liṭer.

Jo̠to̠ lekan juluaḱ sunum dam ḍherente bus, Launch ar truck ko reaḱ bhaṛa hõ ḍheroḱa. Jo̠to̠ lekan gạḍi ar honḍar gạḍi caḱlaokoaḱ khoroc hõ ḍheroḱa. Baḍaebon je, nit bajar ghaṭre amdaj jo̠to̠ jinis ko reaḱ dam ạḍige ḍhera. Arhõ nonkage jo̠to̠waḱ ḍherlen khan sanam hoṛko ạḍi muskilreko paṛaoḱa.

Cedaḱje, Jalani Protimontri Nasrul Hamid hola Sokolbar (05 August) aćaḱ oṛaḱre khoboriạko são gapalmarao okte lại saḍekeda je, Bijli bạti ar gas reaḱ dam arhõ mit́ dhao ḍher daṛeaḱa.

Onka leka Bhokta Odhikar Songothon Cab-ren sabha mukhiạ Shamsul Alom hõe menakada mit́ ńindạte jo̠to̠ sunum dam ḍherente jo̠to̠ hoṛkoaḱ jionre maraṅ mũhĩn/muskil do heć paṛaoḱa. Ente noa khạtri nit jo̠to̠waḱ reaḱ dam ko ḍher daṛeaḱa. Ar sạrige bạṛtikaete durib se (agricaltural sector)  gạḍiko re ar bajar ghaṭ re  jo̠to̠ ṭhạ̃irege arhõ jo̠to̠waḱ dam ḍher dareaḱa.

Nonkage calao idilen khan reṅgeć oreć hoṛko ạḍi haronre paṛaoḱ hoyoḱtabona.