Teheń Lukhibar (15 August). Goṭa disomre teheń khonaḱ SSC (Secondary School Certificate) bidạu do ehoṕ akana. Teheń khon darakan cando 1 October dhạbić bidạu do calao idiḱa.

Baḍaeabon je, Jao sermage February cando SSC bidạu do hoe baṛaḱa.  Menkhan banbạsi se ḍubạ daḱ ar jãhãn karonaḱte biḍạu do ạḍige bilom akana. Unạḱ din khon koyoḱ horreko tahẽkan SSC bidạu emoḱ koaḱ teheń khon bidạu ehoṕ akantakoa.

Niạ dhao gota disomre SSC bidạu ko emet́ kana 20 lakh 21 hajar 868 goṭen pạṭhuạko. Ar inạ chaḍa hõ are (9) goṭen sadharon sikhnạt board, Madrasa ar Karigori sikhnạt board reaḱ tabere goṭa disomre bar gel are (29) hajar, mõṛẽ sae gel are (519) goṭen sikhnạt ṭhãonaren pạṭhuạko pe hajar 790 goṭen centre re Dakhil ar SSC (Vocational) bidạureko selet́ akana.

Niạ bo̠cho̠r reaḱ Higher Secondary School Certificate (HSC) bidạu darakan November cando reaḱ 6 tạrik khon ehoṕ lạgidoḱ kana. Ente madhomik ar Uccho sikhnạt board do bidạu reaḱ routine-e so̠do̠rkeda.

Anto:sikhnạt board ren bidạu ńel jujutić committee ren convener Professor Md.Abul Basar aḱ suhiat́ mit́ ḍhạrwaḱ talate bidạu reaḱ routine ko so̠do̠rena. Aṭhwar hiloḱ (6 November) do baṅgla pạhil potro te bidạu ehoṕa. Bidạu do setaḱ 11 baja khon 1:00 baja dhạbić hoyoḱa. Eken bar ghonṭa talate bidạu do hoe purạuḱa.

Ona iạte ḍhạrwaḱre arhõ lại lahayena je, pạṭhuạ ko akoaḱ apan ạpin admit card ko jogaṛjoṅ ma.   

Sombar (12 September) Rajshahi  khudro Nrigosthi Cultural Academy aḱ ạyurte ạdibạsi koaḱ legcar/ạri-cạli, rạkhi jogao joton babotre cepeć sabha akhṛa hoe purạuena. Noa cepeć sabha akhṛae  ạyurkeda Rajshahi cultural Academy ; Mn kollyan Chowdhury, Deputy Director & additional district commissioner, Rajshahi.Ar akhṛare maraṅ peṛa hisạbte selet́e tahẽkana G S M Zafrullah, ndc District commissioner & chairman Academy executive. Furgạliạ birbanṭa hisạbte selet́k tahẽkana Mahasoe Ruhul Amin Pramanik, Jogendronath Soren ar Cittoronjon Soren.

Akhṛare jo̠s kathae lại sạḍekeda Rajshahi cultural Academy ren Research ạpiser Benjamin Tudu.

Akhṛa etohoṕ lahare maraṅ peṛa do khudro Nrigosthi Cultural Academy reaḱ boloḱ duạr/gate ar auditorium songstha reaḱ pho̠lo̠k-e uchạnkeda. Maraṅ peṛa aćaḱ kathatey roṛ sodorkeda je, nebetar re Sarkar sanam jạtiko lạgit́ge ̣ạḍi jhũk monte kạmi idi kana, ar nonkate noa ṭoṭharen ạdibạsiko akoaḱ ạri-cạli/legcar jogaore maraṅ dạyike dohoea menteń asoḱ kana. Ente eken noa do aboaḱ  Baṅgladisom rege hoe daṛeaḱa. Dhorom do judạ judạ menaḱtabon rehõ porob-parbon do sanamkoaḱ kantabongea.

Onka leka birbanṭ̣a Ruhul Amin Pramanik hõe menkeda, Sona reaḱ disom benao rakaṕre jotokoaḱ goṛo-gopoṛoge jaruṛa. Ạdibạsiko akoaḱ oprom emoḱre ạḍiko ṭanḍhaḱa. Menkhan noko kangeako krisṭi se legcar ren asol utạr rehet́tet́ do. Cedaḱje noko khonaḱge jotowaḱ tumạl kateć teheń abo bon lãhãṭ akana. Abo talare cet́ pharak ar begartet́ hõ bạnuḱa, jotokogebon mit́gea noa hudis bundis katećge lahaḱ hoyoḱa.

Inạkate Jogendronath Soren-e menkeda, aboaḱ krisṭi-legcar babotre khondrond hoyoḱa ar cultural Academy bạṛtikaete ạt upạiko benao hoyḱtaea, jemon nonḍe khon ạdibạsi gobesok ko benao rakaboḱ. Enḍekhan tayom daram akoaḱ ạri-cạli, legcar  reaḱ khạṭi itihãs baḍae ńamoḱre maraṅ dạyike dohoe daṛeaḱ. Inạ chaḍa hõ seṭer akan pạṭhuạko, birbanṭako, sãota/somaj lahantiren kạmiạko cultural Academy khon krisṭi/legcar rạkhi jogaore jaoge olaḱ ko oḍokte ṭikạu tahẽn. 

Aṭhwar hiloḱ (11 September) Naogaon jilạ reaḱ Mohadevpur Ḍakbaṅglo maṭhre hoe purạuena ạdibạsi jạti-gosṭhikoaḱ 27 naḱ kạhtur karam po̠ro̠b. Noa Karam po̠ro̠b akhṛare aema lekan jại-gosṭhiren koṛa-kuṛiko eneć seren durạṅateko umjhạulena. Enhiloḱ aema lekan ạdibạsi jạti-gosṭhiko noa karam po̠ro̠b akhṛareko selet́lena. Orao, Munda, Santal, Mahato selet́ arhõ eṭaḱ eṭaḱ jạtiren ko. Akhṛare selet́len ạdibạsi ko apan ạpin saj-sapaṕ, horoḱ bandenaḱteko sajao saṕṛaolena.

Jatiyo ạdibạsi porisod reaḱ bondoboste hoe purạuen karam po̠ro̠b akhṛae uḍhạukeda  Uttam Kumar ADC sthanio sarkar bibhag. Karam po̠ro̠b akhṛare manotan peṛa hisạbte selet́e tahẽkana Alhaj Chalim Uddin Tarafdar Selim MP. Jatiyo adibasi porisod bibhag committee sangothonik sompadok  Noren Chondra Pahan aḱ ạḱyurte akhṛare bises peṛa tahẽkana Naogaon ren Polis supar Md.Rasidul Hoqe, Upạjilạ Chairman Ahsab Habib Bhodan, Ar Upạjilạ nirbahi ạpiser Md. Abu Hasan.

Eneć sereń ko são são gapalmarao ko hõ hoyena. Karam po̠ro̠b akhṛa babot galmaraokedae, Jatiyo Kendrio Committee ren sabha mukhiạ, Mn,Robindronath Soren, Initiative For Social change ren maraṅ ạyurić Anik Asad. Birbanṭa Altaful Hoqe Choduri Arab, Rajshahi University Folklore bibhga ren Assistant professor Amirul Islam Kanak, Teacher’s Training College ren Profesor Biswajit Benarjee Rajib, Kendrio Committee ren adviser Devasish Pramanik (Debu).

Inạ chaḍa hõ Mohadevpur upạjilạ bibhạg ren sadharon sompadok Yogesh Orao aḱ bondoboste eṭaḱ ko modre kathak ko roṛkeda, Kendrio Committee ren bharapon sadharon sompadok Gonesh Mardi, Sangothonik sompadok Bimol Chondro Rajoar, Daptor sompadok Suvash Chondro Hembrom, adviser Adv. Sahid Hasan Siddiqui Sopon, Joynal Abdul Mukul, Journalist ar filmmekar Azadul Islam Azad, jilạ Awami league sodosso Ajit Kumar Mondol, Upạjilạ vice chairman Onukul Chondra Saha Budu, Raogaon union porisod ren Professor Ariful Rahman Arif, upạjilạ committee ren sabha mukhiạ Dilip Pahan, Kendrio Chatro porisod  ren sabha mukhiạ hõ selet́e tahẽkana. Ạḍi rạskạ salaḱ noa Karam po̠ro̠b ko manao purạukeda.

Sonot sostor re ol akana, Aboren Probhui meneda, Isor dulạṛem ar am aḍepaseren hoṛ dulạṛem. Moseak puthire Israel ren hoṛ ko lạgit́ aema niạm menaḱa. Galatiko 3: 16 -22, Noa kạli reak ́jos katha do hoyoḱ kana ,Israyel ko saṕṛao ar mạsiak hijuk lạgit́ lại doho akana. Onate aboaḱ jion rehõ pạhil re do Isor ar dosaraḱ do abo aḍepaseren hoṛ laha idi kom metaḱme ogradhikar emakom. Ar okaṭak ạn abo lạgit́ em akan ona do purạpuri babo manao daṛeaḱa. Eken Jisu mạsige ạn do batao are manao daṛeaḱa.

Tinre abo do hor kore nacar hoṛ bon ńel koa unrege dulạṛ uduḱ lekan mãyã aboaḱ ontor re baṅ tahẽna. Onate Jisu aćren celakoe metat́ko tahẽkana bhạgạngea ona mẽt́kin do okaṭaḱ te amem ńelet́ arem ańjomet́. Aema nạbi ar raj ko ńeńel sana tahẽlen tako rehõ bako ńel ńam daṛeada ar ańjom sana tahẽkan rehõ bako ańjom ńam daṛeada.

Abo dobon bhạgạngea , ente Masiak bhage sombat bo ańjomeda ar uniak kạmi hobon ńel ńameda. Teheń aboaḱ aema atore se manḍer re aema reṅgeć nacar hoṛ menaḱkoa. Onko do ạḍi haron kosṭo re menaḱkoa . Ente onkoaḱ do jãhãn dhon dạulot do bạnuḱtakoa kạmi hõ bako ńameda. Karon onko do bahre seć khon jãhãn support do bạnuḱtakoa.  Niạ ko oktere am ar ińaḱ dạyik do cet́ kana. Eṭak ko daya ar goṛo emako hoyoḱtabona.

Isor do khạṭige aboe daya are goṛowabon kana. Ar abo do eṭak nacar hoṛ babo goṛo daṛeako kana. Nonḍe bo ńela eṭak ko goṛo lạgit́ aboaḱ tire okto do bạnuḱanaṅ. Ar eṭak hoṛak muskilaḱ ko ańjom reaḱ okto hõ bạnuḱtabona. Ạn re ol bạnuḱa je eṭaḱ ko bam daya daṛeakoa. Ar mit hoṛem dayawae khan okoe hõ bako manamea. Onate niạ halot oktere abo do eṭak ko ṭhen Isorak dulạṛ uduḱ reaḱ ạt menaḱtabona. Noa chaḍa kate rehõ aboaḱ gharońj, abo aḍepaseren hoṛ, ar oporom ko ṭhen Isorak dulạṛ uduk reaḱ maraṅ ạt menaḱtabona. Onate noa ạt kạmirebon lagaoma ar ạḍepaseren hoṛko apnar lekabon dulạṛkoma.

Sokolbar (09 September) din bhor Chapainawabgonj sodor, Amnura reaḱ Tabitha Foundation ńutuman besarkari unnoyon songstha reaḱ gel mõṛẽ (15) serma manot hoyena.

Noa manot akhṛare são sabha mukhiạ Mn.Robindronath Hembrom aḱ ạḱyurte maraṅ peṛa hisạbte selet́e tahẽkana Rev.Suban Kisku, ar ona sãote selet́e tahẽkana Mn.Hingu Murmu. Tabitha Foundation ren Maraṅ Mukhiạ Mn.Stephen Soren doe menkeda je, Noa Tabitha Foundation do 2008 serma khon noa ṭothare kạmi kana. Sãota/somaj re tayom akan reṅgeć-nacar santal hoṛko talare jaoge kạmi idikana. Jemon santal hoṛ aloko tayomoḱ ma, oloḱ-paṛhaoḱ ar joto sećte jemonko laha daṛeaḱ. Noa lạgit́te sikhnạt, Sanitation ar hoṛmo joton ko babotre ạḍi jhũk ar kurumuṭute kạmieda. 

Onka leka noa songstha ren  Program Coordinator Mn.Shamson Soren hõe lại sodorkeda, Tabitha Foundation do korona okte sodor upạjilạ reaḱ ạdibạsi nibạsi se boskotiạ ṭoṭhare korona babotre cehaona, korona ṭikạ hatao lạgit́te bin kạuḍite Online registration kateć tikạ hataore udgạu ko lekan kạmi ko doe kạmi akada.

Ente un maraṅ mũhĩn korona okte santal hoṛko são sãote eṭaḱ eṭaḱ jạti-gosṭhiko talare aḍepase mimit́ ṭoṭhare hoṛko talare mask-e em hạṭiń akada. Noa songstha reaḱ  gel mõṛẽ (15) serma manot ńutumte akhṛare songstha ren joto kạmiạko selet́ko tahẽkana. Ạḍi rạskạ salaḱ napaete Tabitha Foundation reaḱ gel mõṛẽ (15) serma manot hoyena.   

Moṅgolbar (06 September) Maraṅ montri Shekh Hasina do̠ Bharot disomren President Draupadi Murmu sãoe ńapamena. Un jokhen unkin do banar disom babotre aema kathakokin galmaraokeda. Baṅgladisom ren maraṅ montri Shekh Hasina do Sombar (5 September) mõṛẽ din reaḱ so̠pho̠r re Bharot disome sen akana.

Onka leka calaoen hiloḱ ạyuṕ ber Maraṅ montri Shekh Hasina do Bharot disomren Pororastro montri Dr.S Jaishankar são mit́ bạisi/meeting re duṛuṕena. Ona duṛuṕre  hõ Rohinga ar Rakhaine babotrekin galamarao baṛakeda.

Inạkate (6 September) khon Bharot disom ren Maraṅ montri Narendra Modi ar Baṅgladisom ren Maraṅ montriwaḱ bạisi/meeting do ehoṕ akana. Enhiloḱ  tikin ber New Delhi reaḱ “Hyderabad House” re noa bạisi ehoṕ akana.

Enhiloḱ setaḱ ber Rastropati/President bhobon rege Narendra Modi do Maraṅ montri ataṅ daram kedea. Ado ona duṛuṕ se bạisi re Baṅgladisom ren Maraṅ montri doe menkeda Bharot disom do aleren gate peṛa kana. Ente tinre noa Bharot disomiń hijuḱ ạḍi rạskạ doń aṭkara. Cedaḱje, bạṛtikaete 1971 serma reaḱ maraṅ lạṛhại reaḱ katha ko disạ hijuḱa. Cet́ leka unre Bharot disom do Baṅgladisome goṛawade tahẽkana mente. Abo talare mońj sompok do menaḱa. As menaḱa niạkin disom talare arhõ tayom daram mońj sompok benao rakaṕa. Inạ chaḍa aema lekan bisoi ko babotre unkin talare galmarao hoyena.

Ạdibạsi mit́ maejiu Keya Nokrek Sthanio sarkar jilạ porisod election re teṅgo lạgit́doḱ kana. Sherpur jilạ, Nalitabari  thana reaḱ Andharupara atoren Nalitabari Tribal Chairman Copendra Nokrek ren kuṛi Keya Nokrek aćtet́ge lại sodorkeda.   

Nebetar re Nalitabari  upạjilạ reaḱ Durniti Domon Commission re Durniti birud re mit́ sodosso ar Bongobondhu Sikha ar Gobesona Porisod ren Joint Secretary hisạbte kạmi kana. Sherpur jilạ re election do bar bhagte bhag akana. Onka leka Keya Nokrek do aḱ ward no.2 tabere seledoḱ lạgit́. Ar 2 no. ward reaḱ tabere menaḱa Nalitabari, Nokla ar Jhenaigati thana menaḱa.

Nalitabari ar Jhenaigati lekan ṭoṭhare jitlen re ạdibạsi são jopoṛao menaḱ joto lekan kạmire kạmia mente lạikeda. Arhõe menkeda, noako ṭoṭhare ạdibạsi jạti-gostḥi sikhnạt ar cultur sećte ạḍiko tayomgea. Onate darakan dinre sãotare lahanti lạgit́te nawa-hudis ko ante kạmia. Ente rasṭro re ạdibạsi modre ạḱ́́yurko bako tahẽlen khan, ạdibạsi koaḱ muskilanaḱ ko tis hõ sarkar ṭhen ohoge seṭeroḱa. Enḍete nonkan muskilanaḱ ko cabae se mimạṅsa lạgit́ge election re teṅgona.

Election re  teṅgo reaḱ mucạt tạrik do 15 September. Inạkate teṅgo akan candidate ko bachao kate 26 September do mimit́ ko protik se cinhạ ko emakoa. Jotowaḱge ṭhik tahẽn khan 17 October, setaḱ ber 9:00 baja khonaḱ tikin ber 2:00 baja dhạbić EVM bhańjte bhoṭ hatao reaḱ goṭa akana.

Sikhnạt Montri Dipu Moni do̠e baḍae ocokeda darakan 12 September khon 2 October dhạbić disom reaḱ jo̠to̠ coaching centre ko bond tahẽna. Ente darakan 15 September khonaḱ Secondary School Certificate (SSC) ar ona man reaḱ bidạu do ehoṕ lạgido̠ḱ kana. Teheń Sombar (05 September) Socibaloy re mit́ dupuṛuṕ talate noa khobore baḍae ocokeda.

Baḍaeabon je, SSC bidạu do̠ jao sermage February cando ar HSC biḍạu do̠ April cando hoe baṛaḱa. Menkhan korona rog karonaḱ te noa bidạu ko okte nạpitre baṅ hoe akana se jãhãtinre bạtil akana. Nẽs reaṅ SSC ar HSC bidạu hõ niṭ akan oktere baṅ hoe akana. Ona iạte jãhãtinạḱge tayom akan rehõ darakan 15 September khon biḍạu ehoṕ lạgit́ niṭ akana.

Utarbongo Adivasi Forum Chapainawabgonj jilạren nãwã committee ko bandhaoket́koa. Darakan  pe̠ serma lạgit́te Luis Tudu sabha mukhiạ , Cornelius Murmu do sadharon sompadok ar mõṛẽ gel mit́ (50) goṭen sodosso koante Utarbongo Adivasi Forum ren nãwã committee ko bandhaoena. Sạnicar (03 September) tikin ber 2:30 baja okte Nachole Academy samaṅre nãwã committee koaḱ ńutume lại saḍekeda central committee sabha mukhiạ Hingu Murmu.

Utarbongo Adivasi Forum ren sadharon sompadok Adv.Probhat Tudu baḍae ocokeda, Utarbongo Adivasi Forum do gadel hoṛkoaḱ songothon, aṛaṅ ar dulạṛ reaṅ ṭhãona kana. Tayom akan jạti-gosṭhiko, ar hike-hok lekate laha calaḱ kana noa songthon. Arhõe menkeda je, Utarbongo Adivasi Forum 2012 serma khon Baṅgladisom ren adivasi ko são eṭaḱ joto jạti-gosṭhiko lạgit́te rasṭro re ạidạri bạisạu ar bańcao lạgit́te ḍabiko, mạnmi ạidạri rukhiạ adivasi/sonkhaloghu unnoyon songstha ar songothon são miljul se goṛo gopoṛote kạmi kạmite nit dhạbićte hoṛkoaḱ biswạs hameṭre jitkạr akana.

Jatio ar Antorjatik porjai re aema lekan manobadhikar se mạnmi ạidạri babotre seminar re Utarbongo Adivasi Forum ren sodosso ko chõnd se likhonet kana. Bangladisom reaḱ songbidhan re pe̠ (3) bhagre oka maraṅ niạmko cikhnạ menaḱ; ona reaḱ 38 no.article re noa songothon do bạisạu akana. Noa songothon reaḱ kukmu do hoyoḱ kana; manwa aḱ mạnmi ạidạri hameṭ. Joto lekan oṛ soṛ (samprodayikota) ar rasṭro birud kạmiko  khon pharakre tahẽkateć sarkari dol, birodi dol ar nagorik sãotaren ạḱyur se protinidhi ko são jaoge sompok dohoe, galmarao sabha, cepel sabha se seminer, aema lekan mãhã ko manao ganao talate adivasikoaḱ suk-duk reaṅ kathako kotripokho (authority) ṭhen seṭerkaḱ ar hike hok dạbire noa songothone kạmikana.   

Arhõe baḍae ocokeda, Utarbongo reaḱ 16 goṭen jilạre noa songothon reaḱ jilạ ar upajilạ bibhạg goṭhon reaḱ baco̠k menaḱa. Utarbongo reaḱ amdaj mit́ hajar adivasi songothon centre kana noa Utarbongo Adivasi Forum. Committee bandhao lahare eṭaḱ eṭaḱ ṭhạ̃i khon seṭer akan adivasi ạḱyurko niạ hạli re adivasi ko cetanre calaḱ kan, neṅghao,konac, jumi eḱṛe nonkanaḱ babotreko galmaraokeda. Un jokhen mit́ bar kathae roṛkeda, Luis Tudu, Khajina Besra, Stephen Tudu, Cornelius Murmu são selet́ akan arhõ eṭaḱko.