Meskoć

Bapla oṛaḱre jo̠kho̠n jãwãe koṛa aćtet́geye enejoḱa-

Mit́ṭen pagla garo̠d re jo̠to̠ pagla ko e̠nejoḱkan tahẽkana. Khạli mit́ṭen pagla do̠ e̠kkal nijhume duṛuṕ hape akana. Ḍaktor do̠ uni pagla ńeltey hudiskeda, pase̠će phạriạu akana nui do̠. Onatey kuklikedea-

Ḍaktar: Jo̠to̠ ko enejoḱ kana, bogete ko rạskạjoṅ kana, ar am do̠ cedaḱ bam enejoḱ kana?

Pagla: Haere ḍaktar am do̠m gadha kana se̠ cet́? Bapla oṛaḱre jãwãe beṭa do̠ tis hõko enejoḱa se̠ cet́?

Ḍaktar: Am do̠m jãwãe kana?

Pagla: Hẽ̠ hẽ̠, jãwãe kạnạń. Do am hõ se̠nkate eneć joṅme.

Gopal Do̠ Aćren Jãwãe Go̠mkete Dulạṛede Kana

Ato-paṛare bogete aema hoṛaḱ gharońjkore hopoera-jãwãe go̠mket́ peṛaḱ ko he̠ć akana. Ona ńelte Gopal ren oṛaḱ hoṛ do̠ Gopale metadea, Am do̠ cet́ lekan hoṛ kanam! Jãwãe ạguge bam roṛ baṛaeda. Bar serma hoyena, e̠nre hõ mit́ dhao gan hõ jãwãe do̠ bam ạgu legaledea?

Ać bạhuaḱ katha ańjo̠m kate Gopal do̠e me̠nkeda, Jãwãe ạgu do̠ ko̠m katha kana! Tinạḱ kho̠ro̠c lagaḱa lạime se̠? Gopal aḱ katha ańjo̠mte ać bạhu do̠e me̠nkeda, ńelet́meạń am do̠ bhage hisạbiạ hoṛ kanam tho̠. Raj oṛaḱ kho̠n unạḱ kạuḍi -poesam ạguyeda, iń do̠ cet́ katha hõ ar bạń ańjo̠ma. Teheń-gapa bhitrire jãwãe bam ạgulekhan iń do̠ baba oṛaḱiń calao joṅa.

Gopal do̠e hudis baṛaket́a, niạ dhao do̠ jãwãe baṅ ạgukate upạige bạnuḱanaṅ. Ona iạte ạyuṕ bela do̠ jãwãe ante oṛaḱteye he̠ćena. Jãwãe ạgu tayom amdaj mit́ cando hoyoḱ kana. Jãwãe do̠ ho̠ńhar oṛaḱ bạgikate calaḱge bae re̠be̠n kana. E̠nte duṛuṕ duṛuṕ nonkan bhage bhage jo̠maḱ do̠ okarey ńamkea?

Jãwãe koṛa do̠ hanhartet́e metae kana, nonḍe he̠ćkate ạlińaḱ hoṛmo do̠ jaoge mońj akantạlińa, onateleń menet́kana ar thoṛa gan dinliń tahẽ nõḱlenge. Jãwãe aḱ katha ańjo̠m kate hanhartet́ do̠ ạḍitet́e kusiyena. Uni do̠e menkeda, tinạḱ din monama unạḱ dinge tahẽnoḱme. Ho̠ńharme ma nit banar tite kạuḍiye ạguyet́ kan. Henda baba, ma am do̠ tahẽnme.

Hanharea waḱ gapalmarao ańjo̠mte Gopal do̠ mon monte e̠kkale edreyena. Baṅ ar baṅ. Jãhã lekatege, jãwãe do̠ kol kae hoyoḱa, baṅkhan puńji jarwa akat́ kạuḍi hõ bhaṅgao hoyoḱtińa. Jãwãe ạsul se̠ hạti ạsul!

Mon monte bud khaṭao kate jãwãeye metadea, henda jãwãe noa atore ạḍi kajak kombṛo ko upel akana. Nõḱõe limu darem ńelet́ kan, noare hajar hajar limu jo̠ḱ rehõ iń do̠ okte nạpit́re o̠ho̠n ńe̠l ńama. Ạkhriń lekhan jaoge poesa hoekoḱa honaṅ.

Am do̠ baba noa limu dare se̠n nońjoraḱme hãḱ. Jo̠to̠ okte nońjor baṅ kate, cando hạsur tayom thoṛa nońjoraḱme hãḱ hại. Marsal ko ạ̃ṛićkate bar-pe din onte dare sećem nońjor lekhange sạrige kombṛo do̠m saṕ daṛeaea.

Ho̠ńhartet́a katha ańjo̠mte jãwãe do̠e menkeda, am do̠ cet́ge alom bhabnaḱa baba, ińge hãḱ kombṛo do̠ń sabegea. Un hiloḱ cando hạsur okte Gopal do̠ oṛaḱ bhitri bo̠lo̠kateće menkeda okayenam, teheń do̠ e̠kkal lać mońge bạń ạikạuda. Okaleka co̠ jut bạń ạikạuda, bogete bhaṭbhuṭ saḍe kantińa. Dare kho̠n barea limu go̠t́ ạgukate so̠rbo̠t́ benao go̠lạńme se̠. Oṛaḱre ar jãhãn marsalaḱ baṅ tahẽkante Gopal ać bạhu do̠ kãṛãṅ kãṛãṅ ńutrege limu ạgui senena. Uni jãwãe koṛa do̠ kombṛo saṕ lạgit́ tạṅireye tahẽkana. Kombṛo me̠nte hanhartet́e hạṛub go̠lkedea.

Kikiạu ańjo̠mte Gopal do̠ soṅge soṅgeteye bạti marsal ante dạṛ ạgukeda. Un okte hõ e̠kkal jãwãe koṛa ma hanhartet́e hạṛub akadea. Gopal ona ńelltey menkeda, Nõḱõe noa amaḱ monre tahẽkana jãwãe. Mucạtre hanharmegem hạṛubkedea.

Gopal ren bạhu do̠ lajaote dakae oṛaḱ se̠će mohnḍayena, jãwãe koṛa hõ ạḍitet́e lajao paṛayena ar ńindạge hońhartet́aḱ oṛaḱe bạgiada. Gopal do̠ raskạte pinḍạre duṛuṕ kate thamakur jo̠jo̠me ehoṕena.

Teheńaḱ E̠neć-khilạḍko

Criket

Becetan-19 Bissocup Final

Bharot-England

Ạyuṕ 7:00 baja okte

Star Sports 1,Gazi Tv re ńe̠loḱa.

PSL

Islamabad United-Lahore Qalandars

Dhinạṅ 3:30 miniṭ

T-Sports channel re.

Phuṭbol

Bangladesh Premier League

Mohamedan-Sheik Rasel

Dhinạṅ 3:00 baja okte

T Sports youtube re ńel ńamoḱa.

Spanish La Liga

Celta Vigo-Rayo Vallecano

Ńindạ 12:00 baja okte ehoboḱa

T-Sports Channel re ńel ńamoḱa.

Manao Ganao Ḍherena:13 Dopha Batlao Ko Jạrikeda

Ko̠ro̠na virus birudre teṅgo daram lạgit́ calaḱkan manao-ganao 21 February dhạbić ḍher reaḱ Sarkar do̠e niṭ akada. Noa babotre parwana so̠do̠r akana. Parwanare me̠n akana, Noa manao-ganao do̠ 7 February kho̠n 21 February dhạbić calaḱa. Niạ lahare, calaoen 21 January 5 dopha manao-ganao jạri hoelena. Ona do̠ 6 February dhạbić calaḱ reaḱ katha tahẽkana. Niạko din bhitritege manao-ganao reaḱ okto do̠ ḍher são sãote bar dopha manao-ganao sudhrạu lekateko so̠do̠r akada.

Barea chukti do̠ noa kana:

Sãota se̠ dho̠ro̠m akhṛakore mit́ sãe (100) hoṛ kho̠n bạṛti hoṛ baṅ jarwaḱ hoyoḱa. Noako ṭhãikore tinạḱ hoṛ seledo̠ḱko monejoṅ onko sanamko ko̠ro̠na ṭikạ reaḱ certificate se̠ 24 ghonṭa bhitrire PCR Certificate ạgui hoyoḱtakoa.
Jo̠to̠ skul-College bond tahẽna

Ar inạ chaḍa hõ Ge̠l mit́ dopha batlao se hukum ko tahẽkana, ona do̠ noage:

Dokan, Market ar bajar re kiriń-ạkhriń ar hotel selet́ okare do̠ bạṛti hoṛko jarwa onḍe do̠ mask horoḱge hoyoḱa. Baṅ khan ạuṛiaḱte ạn lekate sạjại re paṛaḱ hoyoḱa
Office-Adalot selet́ oṛaḱ bahre kore hõ Mask beohar lagaoḱa.
Restaurent re duṛuṕ kate jo̠m ar girạbasoḱ lạgit́ hotel re tahẽnoḱ lạgit́ hõ ṭikạ certificate uduḱ jạruṛ kana.
12 kho̠n cetan umerren jo̠to̠ Skul-College ren pạṭhuạ gidrạko Sikkha Montronaloy niṭ akat́ tạrik tayom̠ ṭikạ certificate begor sikhạt gãotakore bako bo̠lo̠ḱ ocoḱa.

5. Biman ghạṭi, sạmudar ghạṭi ko re Screening soṅkha ḍher hoyoḱa. Port kore jahaj do̠l ko jahaj bahre hijuḱ okte manao-ganao ko emoḱ hoyoḱa.

Re̠l gạḍi, bus ar lonch kore thoṛa hoṛko de̠ćkoa. Jo̠to̠ gạḍi caḱlaoko se̠ go̠ṛo̠ko ṭikạ hatao hoyoḱtakoa.
Bides kho̠n hijuḱan hoṛko ko̠ro̠na ṭikạ reaḱ certificate uduḱ hoyoḱtakoa ar Rapid Antigen Test hoyoḱtakoa.
Hoṛmo hạṭiń reaḱ mitmit́ ạn-ạriko manao selet́ mask beohar se̠ horok lạgit́ jo̠to̠ mosjid kore sontor ko hoyoḱa. Jilạ prosasok ar upạjilạ nirbahi officer noa do̠ko ńel oroma.
Disạm ren jo̠to̠ hoṛko ko̠ro̠na ṭika ar buster doge hatao lạgit́ sastho ar poribar kollan montronaloy jạruṛaḱ porcar se̠ onkan ạt ko hatao hoyoḱtakoa. Noa babotre totho somprocar montronaloy aḱ goṛo hatao hoyoḱa.
Ko̠ro̠na rog din dinte bạṛti calaḱkate jo̠to̠ lekan akhṛako bond do̠ho̠e hoyoḱa.
Jãhã ṭoṭha kore muskil dosa ńellen khan un okte sthanio prosason se̠ aḍepase prosason re jopoṛao menaḱko são galalmarao kate noa reaḱ be̠bosta hatao hoyoḱa.

Sikhnạt Ṭhaõnako Reaḱ Chuṭi Bar Hapta Ḍheroḱ Kana: Sikhnạt Montri

Disạmre ko̠ro̠na khạtir calaoen 21 January kho̠naḱ 6 February dhạbić jo̠to̠ Sikhnạt Ṭhaõnako bond menaḱa.

Me̠nkhan ko̠ro̠na rog pasnaoḱ baṅ hapeḱkante 6 February kho̠naḱ ar mit́ dhao metaḱme bar hapta lạgit́ Sikhnạt ṭhaõnako reaḱ chuṭi ḍheroḱ kana me̠nte Sikhnạt Montri Dipu Moni do̠e lại lahakeda.

Mit́ṭen Bạihạṛ Goḍowaḱ So̠ho̠r Calaḱ Reaḱ Kạhni

Daharte calaḱ okte bạihạṛ ren goḍo são so̠ho̠r-bajar kho̠ne he̠ćakan mit́ṭen gate são ńapam hoeyentaea. So̠ho̠r ren gate ńelkate bạṛhạṛ goḍo ạḍi ãṭe kusiyena. So̠ho̠r ren gate do̠ ạḍi napae ar hoṛmoangey ńeloḱ kana. Uniaḱ acar beohar, roṛ-landa hõ e̠kkal judạge. Aema din tayomkin ńapam akanate bạihạṛ goḍo do̠ so̠ho̠r ren gate aćaḱ oṛaḱ peṛaḱe nẽota kedea. Bạihạṛ goḍo do̠ e̠kkal bạihạṛrege mit́ bhugạḱrey basoḱ kan tahẽkana. Niṭ akat́ dinre so̠ho̠r ren goḍo do̠ uni bạihạṛ ren goḍo ṭhen peṛaḱe calaoena.

Bạihạṛ ren goḍo do̠ aćren gate peṛaye lạgit́ jo̠to̠waḱe toenat akat́ tahẽkana. Uni do̠ aćren gate moṭor ar guhum anaje jo̠m ocokedea. Ạḍi haron-kosṭo salaḱ noakoe joara akada. Nonkan mońj jomaḱ uni bae jo̠m ńama. Me̠nkhan cet́e cekaea aćren gate nẽota akadea. Arhõ so̠ho̠r ren gate kanae. Onḍe do̠ tinạḱ bhage bhage jo̠maḱ co̠e jo̠m baṛae. Uni ńelrege bujhạuḱ kana.

So̠ho̠r ren goḍo do̠ thoṛa jo̠m kate thotnae gotekeda. Noa ńelkate bạihạṛ goḍo do̠e kulikedea cekayema gate? So̠ho̠r ren goḍo do̠e roṛ ruạṛadea, amaḱ jo̠maḱ do̠ oho̠ge sebel kana, onatege am do̠m rohoṛgea. Dela iń sãote so̠ho̠r. Onḍe sen katećem ńela cet́lekale jo̠m ńũia. Aćren gate ṭhen nẽota ńam kate bạihạṛ goḍo ạḍitet́e rạskạyena. Rạskạ monantege un okte uni goḍo sãoe calaoena so̠ho̠rte. Thoṛa din calaḱ calaḱte kin seṭerena. Ạḍi maraṅ oṛaḱrey tahẽna gatetae. Ona ńelte bạihạṛ goḍowaḱ mẽt́ ma jalaḱ-juluḱ cabayentae.

Mo̠n mo̠nte bạihạṛ ren goḍo do̠e kurudade rehõ nonḍey ạgukede khạtir sarhaoe emadea. Nia dhao do̠ bạihạṛ ren goḍo peṛa se̠ jo̠m ocoye reaḱ pạli. Ńindạ lạgit́ onkin do̠ o̠t regekin tạṅgikeda. Hoṛko he̠ćkateć ko jo̠m idikeda. Ar inạ tayo̠m so̠ho̠r ren goḍo do̠ mit́ bhugạḱte jo̠maḱ oṛaḱe idikedea gatetae. Unkin bana hoṛge table cetanrekin duṛuṕena. Uni bạihạṛ ren goḍo do̠ tis hõ nonkanaḱ jo̠maḱ mẽttege bae ńelakat́ tahẽkana. Uni do̠e menkeda, Am do̠ sạri kathagem menakada, aleaḱ jion reaḱ dosa ma ạḍi bạṛić. Iń hõ noa so̠ho̠r-bajarrege baṅkhan tahẽn lạgit́iń hijuḱa. Noa katha auri roṛ mucạtrege table ma laṛaoḱ lagaoen. Ar duạr khonaḱ mombạti tire saṕkate goḍo saṕ lạgit́ hoṛ ma oṛaḱko boloyen. Unkin do̠ jãhã lekate bhugạḱre bolokate kin bańcaoena.

Noa dosa ńelte bạihạṛ goḍo do̠e menkeda, Baṅ, so̠ho̠r reaḱ mońj se̠ bhage bhage jo̠maḱ reaḱ ińaḱ jạruṛ bạnuḱa. Jiwi ṭonṭa reaḱ bo̠to̠r re baṅ tahẽkate bạihạṛre tahẽnge bogea. Onḍe do̠ nonkan mońj jo̠maḱ bạnuḱa sạrige, me̠nkhan bo̠to̠r reaḱ hõ jahan karon bạnuḱa.

Arhõ Ḍher Daṛeaḱa Sikhnạt Gãota Ko Reaḱ Chuṭi

Ko̠ro̠na mahamạ̃ri kabja re do̠hoe lạgit́ nãwãte Sikhnạt gãota ko reaḱ chuṭi ḍheroḱ kana se̠ 6 February tayo̠m kelas ehoboḱa ona baḍae joṅ lạgit́ dhãoṛa dhạuṛi re menaḱkoa pạṭhuạ gidrạ ar baba-gogo ko. Cedaḱ je̠, niạ lahare hõ mit́ lagamte mit́ serma tala sanam skul-College ko bond tahẽkana. Skul- College bond menaḱ khạtir noa babotre aema lekan gapalmarao ko calaḱ kana. Noa gapalmarao talatege cinhạ ńamakana, calaḱkan noa chuṭi do̠ arhõ mit́-bar hapta ḍher daṛeaḱa. Ar Pạṭhuạ gidrạko ko̠ro̠na ṭikạ ạḍi usạra emako lạgit́ Sarkar do̠ ṭikạ hapta do̠hoe reaḱe guni-bhạbiḱ kana.

Co̠lo̠nti (bisesoggo) ko meneda, Noa rog do̠ arhõ bar hapta ḍher chạplạu daṛeaḱa. Noa babotre Montronaloy ar Madhomik ar Uccho sikkha Odhidaptor (Mausi) kho̠n baḍae ńamoḱ kana, ko̠ro̠na reaḱ ne̠betar reaḱ hal se̠ dosa Sarkar do̠e ńel jut́et́ kana. Ko̠ro̠na ajar baṅ ko̠m ńõḱlen khan calaoen serma leka nẽs hõ dhap dhapte ḍher idiḱa Sikhạt gãotako reaḱ chuṭi hõ.

Madhomik ar Uccho sikkha Odhidaptor ren ạḱyurić (Madhomik Biddaloy) Oddhapok Belal Hosen do̠e menkeda, Nonkan muskil dosa metaḱme ko̠ro̠na baṅ ko̠m ńõḱlen khan Skul-College do̠ o̠ho̠ jhićlena. Onate Online te kelas ehoṕ akana. Hoṛmo hạṭiń reaḱ sanamaḱ ạn-ạriko manao ganao selet́ Assignment kạmi hora arhõ ehoṕ lạgido̠ḱ kana. 2022 serma ren SSC ar HSC pạṭhuạ gidrạ koaḱ assignment ehoṕ lạgit́ maṭh porjạire batlao kol hoeakana.

Nachol Re Mõṛẽ Goṭen Hindu Gharońjren Hoṛko Laga Ńir Reaḱ Ko Kurumuṭuieda

Chapainawabgonj reaḱ Nachol re mandhas metaḱme khe̠mota menaḱtako nonkan hoṛko hotete mõṛẽ gọtẹn (5) hindu gharońj ren hoṛko laga ńir ocoḱkana. Oṛaḱ-duạr rạput́ se̠ dhaṅdhaser ar laga ńir ocoḱkan mõṛẽ goṭen gharońj ren hoṛko se̠ć kho̠n Mithun Mahali ren koṛa Meghu Mahali calaoen 31 January Nachol thanarey nạlis akat́a.

Nachol ṭoṭha reaḱ Konnanogor Hindu ṭola reaḱ bapa phurkạ okto kho̠naḱ girobas akan mõṛẽ gharońj ren hoṛko se̠ć khonaḱ Sri Meghu Mahali, aḍepase ren gur akan Rashid Singh ren koṛa Lutu Singh, Gur akan Muharram Singh ren koṛa Biren Singh, ar aćren boeha Dhiren Singh do̠e baḍae ocokeda, Konnanogor mouza hal 1 no: khotian reaḱ 140 dag reaḱ 0.12 akor jumire onko pe̠a baba hoṛ do̠ oṛaḱ- duạr benao katećko girobasoḱ kana. CS ar SA record re oṛaḱ do̠ ulek menaḱ akada.

Aḍepase 137 no: dag do̠ 0.36 akor khanḍ se̠ poriman sompot do̠ pukhri hisạbte CS, SA ar RS record rehõ tahẽkana. Menkhan Sarkar bhul kho̠bo̠r e̠mkate ar eḱṛe katha jạhir kate oko okte 1981 serma re Konnanogor ato ren Abdul Korim ren koṛa Ershad Ali bo̠ndo̠bos jo̠ṅana. Me̠nkhan un okte hõ Ershad Ali do̠ be̠cas se̠ be̠jaega hoṛ do̠ bae tahẽkana. Barabar 137 no: dag hõ pukhri tahẽkana. E̠ḱre goha katećge ona ṭoṭha reaḱ 68 no: dag reaḱ ḍahar hõe bondobosket́a. Tayom daram 68 dag re Karigori Skul benao okte e̠kkal ḍher okoć kạuḍi do̠e hataoket́a. Nebetar ma e̠kkal oko okote 140 dag reaḱ 0.12 akor jumi bo̠ndo̠bo̠s hatao khạtir 100 serma kho̠n ko basoḱ kan mõṛẽ goṭen hindu (adibạsi) reṅgeć-nacar gharońjren hoṛko ackage akoaḱ bhiṭạ kho̠n laga ńir reaḱe kurumuṭueda.

Sri Meghu Mahali calaoen 31 January jumi eḱṛe bạṛić hoṛkoaḱ dho̠mo̠ḱ ar jiwi ṭonta bo̠to̠rte Konnanogor ato ren gur akan Abdul Korim ren koṛa Akbor Ali Master ar Abdul Latif, Gur akan Ershad Ali ren koṛa Ashraf Ali ar Alomgir Honer birudre Nachol thanarey nạlis akat́a. Ar no̠te aḍepase Ancer Ari jumi eḱṛe bạṛić hoṛkoe manalet́kote nui hõ gujuḱ reaḱ bo̠to̠r ko uduḱakadea. Noa birudre Ancer do̠ Nachol thanarey GD akada. Arhõ no̠te bo̠to̠r dosare menaḱko gharońjren hoṛko se̠ć khonaḱ jilạ prosasok ar bạṛti (otirikto) jilạ prosasok Chapainawabgonj, Upạjilạ nirbahi Officer Nachol barabar bo̠ndo̠bo̠sto̠ bạtil lạgit́ eardas akada.

Meskoć

Skulte seṭeroḱ bilo̠m reaḱ karontet́-

Mahasoe: Cekate am do̠ Skulte hijuḱem bilo̠m keda?

Bablu: Sign khạtirte Mahasoe.

Mahasoe: Cet́ reaḱ sign?

Bablu: Hane̠ je̠ ol akan tahẽkan, ‘Lahare Skul, Bại bạite calaḱme’.

Be̠le Ạkhriń Koṛawaḱ Kukmu Rạput́ena

Mit́din hiloḱ albudạha metaḱme be̠buj Sujon mit́ṭen Be̠le khạclạḱ bo̠ho̠ḱre dipil kate oṛaḱ se̠ne calaḱkan tahẽkana. Oṛaḱ calaḱ okte mo̠ne mo̠netey hudiset́ tahẽkana, Noa bele ạkhriń kateć ạḍi kisạ̃ṛ se̠ daman hoṛe hoyoḱa me̠nte.

Uni do̠ arhõe hudiset́ tahẽkana, Oṛaḱ idi tayo̠m noa be̠le kho̠n sim ho̠po̠nko hoyoḱa, onko ho̠po̠n ko haraḱa. Onko sim arhõ aema ko be̠lea. Un okte ona bele ko ạkhriń kateć ạḍi kisạ̃ṛ ho̠riń hoyoḱa. Inạ tayo̠m ạḍi maraṅ oṛakiń benao rakaba. Onḍe do̠ aema golam-golamini ko tahẽnoḱa. Okoe do̠ aćaḱ oṛaḱ reaḱ sanamaḱ ko kạmia arko ńel juta. Inạ tayo̠m jãhã maraṅ oṛaḱ ren kuṛi ńelte rajan-bajane baplayenge nahaḱ.

Be̠le ạkhriń koṛa Sujon do̠ arhõe hudisket́a, bapla tayo̠m uni do̠ ponea gidrạren babae hoyoḱa. Inạ tayo̠m onko gidrạ koe hara-burukoa. Oloḱ-paṛhaoḱe cet́ ocokoa. Onko do̠ lạtu lạṭu ko cạkri-bạkriya. Inạ tay̠om onko aćren gidrạko do̠ maraṅ cato̠r se̠ oṛaḱ ren kuṛiye bạnij ạguakoa. Onko ren mit́ okte gidrạko hoyoḱtakoa. Un okte uni do̠ onko gidrạkoren go̠ro̠m babaye hoyoḱa. Aćaḱ ho̠bo̠rre duṛuṕ kate go̠ṛo̠m gidrạkoe jo̠m ocokoa. Un okte uniaḱ do̠ ạḍi rạskạwanaḱ jion hoyoḱtaea.

Noako hudis hudisteye calaḱ kan tahẽkana. Mit́ okte ackage ḍahar lo̠so̠t́re jaṅga ma leńjet́entae. Uni ma e̠kkale bhindạṛ go̠t́ena. Bhindạṛ são sãote aćaḱ bo̠ho̠ḱre dipil akat́ khạlạḱ reaḱ be̠le ma ńurhạ rạput́ metaḱme e̠kkal ge̠je̠r cabayena. Bele ạkhrińić Sujonaḱ kukmu hõ rạput́ cabayentaea.