Meskoć

(1)

Daktar: Ma lại me cet́ hoeakan tama?

Rugi: Besgodeńme, ar baṅ khan 10 miniṭ porgeń gujuḱa.

Daktar: Tobe khan do 20 miniṭ tayomiń hijuḱ kana.

(2)

Mahasoe : Mase cunḍạ daḱre tahẽn nonkan moṛẽ goṭen jiwianaḱ ńutum lạime.

Cunḍạ: Mahasoe, Ro̠ṭe̠, ro̠ṭe̠ ać gogo ać baba, ro̠ṭe̠ren kuṛi boeha ar ro̠ṭe̠ okoye dulạṛi uni.

Baṅgladisom

Baṅgladisạm ạḍi mońj

Ńeloḱ bagan leka

Ona talare menaḱ bona

Abo baha leka.

Menaḱ bona hindu camar

Ar hõ muslạ ar hõ kamar

Ar hõ aema jạti.

Hiskạ bạḍae bạgikate

Tãhẽnabon mit́ sate

Mońjge milạuate

Jomabon ńuyabon

Disạm talarege

Disạm tabon dulạṛabon

Mone jiwitege.

Katha Ar Kạmi

Som do ać gogowaḱ kạumạu hoho ar ṭhelao te oṛgo poṛgoye don beret́ena. Met́ itkit́ itkit́ te beṅget́ marsal reaḱe kurumuṭu keda. Menkhan oṛaḱ bhitrireye tãhẽkante ạḍi ńut geye ńelkeda. Hudisanae siń cando jạniće hạsurena; menkhan acka pạchim khon purub nakha utạr serma re maḱ paṛaḱ ket́ lekae bijli ar sãote serma oṛejoḱ leka ạdị caraṭ huḍur te somaḱ dhiri lekan hoṛmo reho thoṛa botor rumuń doe aṭkar keda. Ạḍi usara barhe te don oḍoḱ kate eṅgattet́ ńelkedea ạḍi hare phare mucạt́ jion re kaḍa koḍo gunṭhi capo capote sahan sakam koe ader kana. Ać gogo do Some metadea; Ma beṭa ạḍi usạra oṛaḱ reaḱ cal ko do ńel jut kate tol keṭejme. Ar baṅkhan teheń hoe daḱte rohoṛ mat́ sakam leka sanam cal reaḱ ṭinkoe oṭaṅ idia. Usạra calte dejoḱ men oṭo kate Som ać gogo do ḍãṛok akat́ko merom ạguye calaoena.

Aṛisoḱ tulućge Som do oṛaḱ reaḱ chapra ṭin ko reaḱ bata ar khunṭi ko tol jujute ehoṕena. Totol tulućge uni do pea ać dada takowaḱ katha koye disạ hudiseda. Som ren pea ać dada tako bahre re bhage cạkri ko kạmiyeda. Onko do jaoge chuṭi re era hopon ko soṅge kate oṛaḱ heć kate gogo towa dareko golpo mạluṅ oṭokaya je, noa mare oṛaḱ rạput́ kate iṭạte maraṅ bakhol oṛaḱ bon benaoa. Ar hana noa aema lekanaḱ ko cekaya mente gogoko eṛe oṭokaea. Noako sanam katha do Som aema din khon geye ańjom ạguyeda menkhan kạmi do nit hạbić bae ńel leda. Som ać baba do joto gidrạ oloḱ paṛhao cet́ oco kate onkoaḱ daṛe jom laharege noa dhuṛi dhạrti ye bạgi oṭowada. Ona iạte oṛaḱ redo Som ar ać gogo tạkin moto gekin tahẽna. Som do ạḍi hare phare oṛaḱ reaḱ hana nawa tol jujute dhurạu akana; ackage pạchim utạr kona khon maraṅ hoe ar ona soṅge dhuṛi oṭaṅ hećente goṭa dhạrti ye ńut cabakeda. Botorte Som do cuṭiạ leka oṛaḱ bhitriteye bolo bayena.

Ackage Som do ać gogo ye disạ kedea, merom ạguye calaolena menkhan nit hõ bae ruạṛ akana. Som doe hudis keda jạnić hana kulhi mucạt́ senaḱ jahaeaḱ oṛaḱ kore geye umul akana. Adha ghonṭa gan hoe daḱ thir tayom Som do oṛaḱ khon oḍokente kuḍạm seće ạcurena, maraṅ oṛaḱ reaḱ kuḍạm cal doe hoe ńurhạ akada ar cal reaḱ aema ṭin do banuḱe ńelkeda. Onako bạgi oṭo kate Som do ać gogo sendraye oḍok calaoena. Kulhi mucạt́ Sokol takowaḱ oṛaḱe tioḱket́ khan mutul khon pea merom hopon doko raḱ daram adea. Menkhan ar barea buḍhi merom ar ać gogo tako do ko okayena?

Ona ṭhạ̃i re merom dạ̃ṛok ko tãhẽkan onte ge uni do senoḱe dhurạuena; Ackage Som do ać gogoe ńel kedea pinḍhạ latarre meromaḱ dạ̃ṛok baber teye jhạli guṛdạu akana. Jãhã seṭer kateye ńelkedea ać gogo do ạḍitet́ liṭạṕ liṭạṕ hũs ge bạnuḱtaea. 9/10 moka pharak re unkin merom eṅga hõkin goć akana. Som do met́ daḱ joroḱ tuluć ać gogo ye hobor rakaṕ kedea. Ar ato re bolo kate joto hoṛte haspatal ko ạtkir kedea, gạḍi cetan re joha capo kate Som do guni bhạbiḱe lagaoena. Hudis kedae bạṛti katha roṛ baṅ kate thoṛa kạmige budan hoṛaḱ ạkil do. Uni do ać dada takowaḱ kathage ghane ghạṛić disạ heć adea ar met́ daḱ jot́ jot́te ać gogowaḱ jạpit́ akat́ met́ seće beṅget́ hape keda.

Jisuaḱ Dulạṛ

Iń do jisuń dulạṛede kana.

Onare bạnuḱ jãhãn mana.

Leḍha ṭhunṭạ ar kãṛã,

Jisue hoho abon kana.

Onate sanam boeha misera,

Jisu dulạṛ tahẽn tabon ma.

Hindu, boddho, muslạ kristan,

Jisue dulạṛet́bon kan.

Jisue dulạṛet́bon kana,

Onare banuḱ jãhãn mana.

Meskoć

Mahasoe: class re gidrạe kuliet́koa….

Mase lại pe Cyclone do cet́ ko metaḱa?

Cunḍa do: hante nate koyoḱ got́ kate usạra tinguyenteye menkeda. ‘Mahasoe, Cyclone do hoyoḱ kana emon mit́ṭen loan okaṭaḱ te saikel kiriń ńamoḱ.

Akbor

Sedaere Humayũn ńutuman mit́ṭen Tuṛuk raje tahẽkana. Humayũn raj goć tayom aćren hopon Akbore rajena. Unre uniaḱ umer do gel pe serma tahẽkana. Akbor ren guru do Baeram Khãye tahẽkana. Uni ṭhenge Akbor do jotowaḱ reaḱe cet́ana. Akbor do gidrạgeye tahẽkante, aćren guru Baeram Khã do raj- kạmiye calao goṛowae kan tahẽkana. Menkhan Baeram Khã do Akbor tuluć ạḍi jut bae beboharlet́a. Akbor doe sẽṛayena, ar aćtege raj kạmi calao lạgit́ hõe lekena. Menkhan Baeram Khã do raj kạmi Akbore aṛaḱ utạrae do baṅ sanaledea.

Akborren go ar Baeram latarren sordarko hõ Baeramaḱ bebohar ńelteko ạṛisena, ar bako sahao daṛeat́a. Onate Akborko metadea, jemon raj kạmi do aćtegeye calao. Menkhan Baeram aṛag lạgit́ bae rebenlena. Mucạt́re doko aṛaḱ ocokedegea. Onate Baeram do ạḍiye raṅgaoena, ar Akbor ṭhen khone calaoena.

Baeram Khã do Akbor tuluć lạṛhại lạgit́ aema hoṛe juṭạuket́koa. Menkhan Baeram Khã do ekalteye bhagao utạrena, ar koejoṅ hoṛ leka Akbor ṭhen ikạ koye senena. Menkhan Akbor do Baeram aćren guru kanae mente ona do bae hiṛińlaḱa. Ać upạrteye lagaolenre hõe manotkedea. Ar Baeram do jãhãṭaḱ lạṭu kạmigeye kusiat́, Akbor do ona kạmi Baeram emae lạgit́e goṭakeda. Menkhan Baeram do okaṭaḱ kạmi hatao lạgit́ hõ bae rebenlena. Onḍe khon Mokka naṅgrahataye senoḱ jokhen, horre Aphgan jạtko goćkedea. Akbor do ạḍi dilgạṛiạ, khaṭoya ar daṛean raje tahẽkana, Hindu hõ onkageye dulạṛet́ko tahẽkana. Banar jạtrenge sulukteko tahen, ona reaḱ ạḍiye kurumuṭuyet́ tahẽkana. Akbor do mõṛẽ gel serma raje calaolet́a.

Boeha Dulạṛ

Pạhil tirem janamena

Hoyenam manwa

Ańjomedam roṛ landa

Eken nãwã nãwã.

Setaḱ ạyuṕ gogo aṛaṅ

Boeha dulạṛ rạskạ

Bại bại tem hiṛiń keda

Ehoṕ kedam hiskạ.

Daṛan kanam oloṅ pholoṅ

Jom ńuedam pạrwạ hạnḍi

Oṛaḱ duạr bạgi kate

Bạihạṛ getam ṭạnḍi.

Hanko ńelkom aḍe gate

School teko calaḱ kan

Puthi khata hobor kate

Oloḱ geko sẽṛa kan.

Hạnḍi pạrwạ bạgi kate

Puthi khata sabme

Oloḱ paṛhaoḱ sẽṛa kate

Santal somaj ạyur me.

Hạnḍi pạrwạ bis kana

Eken menaḱ jala

Boeha dulạṛ joṛao kate

Gathao me somaj mala.

Daraekan 2 Disember Kho̠n HSC Biḍạu Eho̠bo̠ḱa

Disember cando reaḱ 2 tạrik kho̠n gel mit́ (11) goṭen sikhnạt board re Higher Secondary School Certificate (HSC) biḍạu do̠ eho̠bo̠ḱa. Sikhnạt Montri Dr. Dipu Moni do̠ kho̠bo̠riạ (Sambadik) ko noa kathae lại so̠do̠r akat́koa.

Nia dhao HSC bidạu re 13 lakh 99 hajar 690 goṭen pạthuạ gidrạ bidạu ko ema. Noko modre koṛa koaḱ soṅkha 7 lakh 29 hajar 738 ar kuṛikoaḱ soṅkha 6 lakh 69 hajar 952.

Meskoć

(3)

Sunil: lahate iń do gaḍa hoń paera parom daṛeaḱ kan tãhẽkana ya lạlu.

Lạlu: noa do jahan bepar kana.

Sunil: cet́ hõ bam moneyeda ya lạlu?

Lạlu: iń ma ona khon lạṭu gaḍa begor paerategeń parom daṛeaḱ.

Sunil: cekate ya?

Lạlu: cedaḱ ya! lạukạ re dećkate.

(4)

Mit́ gidrạ ran jomge bae joma. Ado eṅgattet́ do lạḍu bhitri re tablet bhorao kate jom lạgit́e metadea jomme ar ać do daḱ lui senena. Heć kateye kulikedeya,

Henda Beṭa, lạḍu dom jom keda?

Gidrạ: Hẽ go jom doń jom keda, tobe jaṅ doń giḍikada.

Bhul Re Hõ Apnaraḱge Ṭhik Metaḱ Me

Mit́ṭen hoṛ aṛe re ạḍi maraṅ baṛe dare tãhẽkana. Ona darere do judạsi reaṛ umul tãhẽkante; ona dare re aema lekan cẽṛẽ hook asrayoḱ kan tãhẽkana. Mit́ din ona dare buṭạre mit́ Muslạ ar mit́ Hindu hoṛ kin duṛuṕ jirạu akan tãhẽkana. Ona jokhećge mit́ṭen cẽṛẽ do ona darereye raraḱkan tãhẽkana. Ar ona ańjomte Muslạ do Hindu hoṛe metae kana, mase ańjom me tinạḱ mońj mońj nui cẽṛẽye raraḱkan. Nonkae raḱeda “ Allah Rasul Khoda”.

Menkhan Hindu hoṛ doe menkeda baṅ onka do bae raḱeda monte ańjom me nonkae raḱeda “ Hore Krisno Radha”. Unkin hoṛ do ạḍi ãṭkin kạphariạḱ kan okterege ona dare ṭhene hećena Peaj – rạsun ạkhirinić mit́ bebosa hoṛ. Uni do bar hoṛaḱ kạphạriạḱe kuli ket́kina. Ado uni peaj mạrij bebosa hoṛe metaḱkina aben do bana hoṛge baben ańjom ṭhik daṛeaḱ kana. Uni cẽrẽ do nonkae raḱeda “ Peaj – Rạsun – Ada”. Nitoḱ onko pe hoṛ bhitrire rẽ ạḍi aṭ kạphạriạḱ ko lagaoena. Ṭhik ona okterege ona horte ona disạm ren hopon rạhire dećkatey calaḱkan jokheć ona dare ṭhene heć sorena ar onko ko kạphạriạḱ kane ańjom ket́kote rạhi got́koe teṅgo ocoket́koa.

Are kuliket́ koa cet́ lạgit́pe kạphạriạḱ kana? Rajaren Hopon onko pẽ hoṛaḱ joto kathae ańjom ket́ takoa. Onkoaḱ katha ańjomkate Raja hopone metaḱ koa; Ape joto hoṛge hoṛge uni cẽṛẽaḱ raḱ bape bujhạu ṭhik daṛeyaḱkana. Uniye metaḱkoa cẽṛẽ do noṅkae raḱeda “ Tora tin jon gadha”. Ado mase lại tabon pe uni cẽṛẽ do cet́ lekae raraḱ kana? Onate sạraḱ begor baḍae te babon kạphạriạḱ ma.