Teheń do hoyoḱ kana 3 May ar Dhạrti Sạdhin Soṅbad Mãhã (World Press Freedom Day). Soṅbad do hoyoḱ kana, sạriaḱ tumạloḱ joto le̠kanaḱ, one oka do electronic lekate manwako soṅge jopoṛao tahẽn. Ona soṅgete chapa katet́ sodoroḱ kan soṅbad, news letter, puthiko, leaflet selet́ arhõ eman teaḱ. Noako kan gea manwako ṭhen so̠ho̠r seṭeroḱ se jopoṛao reaḱ pạhiltet́. Ar dhạrti reaḱ joto disom ren manwa koge ạḍi tạṅgi reko tahena khoborko baḍae lạgit́, je̠mon bhageaḱ, muskilaḱ, rạskạ reaḱ, culturko selet́ eman teaḱ. Nãhãḱ jugre manwako mõdre topol tahẽn lạgit́; soṅbad, magazine, internet, television, radio, fm, YouTube selet́ cinema. Noako do ạḍi maraṅ ar usạra khoborko em hạṭiń reaḱ horkana. Tinre abo jotoko tv re kho̠bo̠r se apnaraḱ khusi sana lekan serialko se radio re khobor, sereń, naṭika, thuthi selet́ emanteaḱ nit hạbić te bańcao menaḱa eken manwako lạgit́ ge.   

Goṭa Dhạrtire nit hạbić te ạḍi bhage kạmi doe kạmi kana chapa khobor ar electronic khobor sećte. Noako hortedo boge bạṛić selet́ ae̠ma mońj sikhạuna hõbo ńam akada se bon ńama. Onka ge Baṅgladisom rehõ aema judạ judạ magazineko, news letterko ar soṅbad selet́ online news hõ ehoṕ akana. Santali Magazineko reaḱ ńutum do̠ hoyoḱ kana; Peṛa-hor, Juḍạsi Jharna, Aṛaṅ, Tabitha Soṅbad, Kukmu……. selet́ emanteaḱ. 

Onako modre nãhãḱ jugre ạḍi soros bar goṭen santali online news portal menaḱa. Mit́ do The Santals Times (santalstimes.com) ar dosar do̠ Santali News 34 (santalinews24.com). Ạḍi khạndri hudis katet́ online news seć lekate santalkoaḱ boge bạṛić, lai-lagcarko, kobitako, sereńko, khoborko, eneć-sereńko, khoborko, aema lekan sikhnạtko selet́ ạḍi aema bhage kạmi do̠ ehoṕ katet́ toṅge calaḱ kana.

The Santals Times do e̠tohoṕ akana calaoen serna 2020 reaḱ 9 August mãhnạ khon. Santals times re disom ren Santal ko abo bon ol daṛeaḱa aboak mon ontor kathako, duk-bhabnako, rạskạ joṅaḱko. Noa mit́ serma auri seṭeroḱ rege aema mońj khobor, sikhnạt, hoṛmo hạṭiń, kudumko, ạri-cạliko selet́ lai-lagcar te ạḍi bhage doye kạmi eda. Onkage teheń bon aṭkar daṛeaḱ kana je, online news portal sećte santalko talare ạḍi aema uskur se cehaona ko ńam eda. Noa tedo sikhnạt, rạskạjoṅ, baḍaejoṅ, jopoṛao tahẽn lạgit́ santal koaḱ ạḍi maraṅ platform/oloḱ ṭhạ̃i kana. Onate delabon the santals times re jạruṛ kaete abo santal koaḱ sạri kathako sodor lạgit́ ol mabon. Enḍekhan disom ren hoṛko ṭhen abo santal koaḱ katha, ạri-cạli, lai-lagcar, eneć-sereń, sikhnạtko selet́ ạidạri hameṭ lạgit́ disom sorkar ar goṭa dhạrtiren aboaḱ aṛaṅ tebon sodor daṛeaḱa.   

America disom ren mare President Abraham Linkon doe men akada; soṅbad tumạl koaḱ kạmi do̠ hoyoḱ kana hoṛkoaḱ sạriaḱ soṅbad, khobor, jạruṛko selet́ emanteaḱ gũṭ kathako ạḍi sontor selet́ sorkar bahadur ṭhen seṭer jạruṛa. Nonka ạḍi alga bon bujhạu daṛeaḱa je; disomre soṅbad sạdhin menaḱa se baṅ ar disom hoṛaḱ hõ hudis ganḍon, roṛ reaḱ ạidạri hõ menaḱa se baṅ.

Omorto Sen hoe nonkae men akada; soṅbad sećte oka asol kathako hijuḱ, onate disom sorkar aḱ ge boge se bhạlại hoyoḱa. Soṅbad re noa do ạḍi sạriaḱ je, sorkar judi kajak ạn ạrikoe doho lekhan, eken disom hoṛ moto do ńutre bako tahẽna, bickom disom sorkar ṭhen hõ ạḍi ae̠ma jạruṛ kathako baṅ seṭeroḱa.  

1948 serma re 19 reaḱ dharare nonkan katha lại pasnao akana je, kathako, lai-lagcarko em hạṭiń do hoyoḱ kana Manwakoaḱ ạidạri. Calao parom akan 1997 serma khon UNESCO do jao serma ge, ‘Guillermo can no world press freedom prize’ ko em ạgu eda, onako soṅgoṭhon manot lạgit́ okoe do soṅbad sakam reaḱ sạdhin rukhiạ se muskil re paṛao akanko. Noa man manot do̠ uni ńutum teko doho akada.

Onate delabon abo joto santalko apnaraḱ aṛan, lai-lagcar, sikhnạt, ạri-cạli, khoborko lại pasnao lạgit́ mit́ te bon kạmi lekhan, ạḍi usạrate Baṅgladisom selet́ goṭa Dhạrtire̠ abo santal koaḱ jotoaḱ bon tul rakab ma mit́ jomokte. Sạdhin soṅbad bańcao tahẽna, sạriaḱ sodor re santalaḱ aṛaṅkoe chapae tabona the santals times ar nonkate abo santal manwa koaḱ jotobon tul rakab ma disom ar dhạrti ren manwako ṭhen.          

Jhaṛgram Jilạ re moṭre ponea Bidhan sabha kendro- Nayagram, Gopibollobpur, Jhaṛgram ar Binpur. Menkhan Jhaṛgram Loksabha kendro re eae goṭen Bidhan sabha kendro menaḱa. Ona ko do̠- Nayagram, Gopibollobpur, Jhaṛgram, Goṛbeta, Salbo̠ni, Binpur ar Bandoan. Niạ dhao niạ joto kendro rege Trinomul Congress ko̠ daṛe akana bhoṭre. Ona eae goṭen kendro modre 04 re ge santalko jitạu akana Trinomul Congress kho̠n. Bidhansobha ren nawa jitạu akan M.L.A ko̠ do̠ ko̠ hoyoḱ kana- Jhaṛgram re pạhil dhao leka  Birbaha Hansda, Nayagram re tesar dhao lekae pass keda Dulal Murmu, Binpurre Debnath Hãsda, Bando̠an re dosar dhao lekae daṛeyena Rajiblocon Soren.

Bạkuṛa Jilạ reaḱ ponea ason modre ạdibạsi soṅrokhito ason hoyoḱ kana Ranibãdh ar Raipur Bidhansabha.  Nonḍe kho̠n kin jitạu akan Mritunjoy Murmu ar Jotsna Marḍi. Purulia jilạ reaḱ Manbajar kho̠ne jitạu akana lahaten Rasṭromo̠ntri Sondharani Ṭuḍu.

Niạ bho̠ṭ re daṛe akan Sanam Santal M.L.A ko lạgit́ Santals times seć kho̠n taheyena aema manot johar. Sanam santal ko lahanti lạgit́ mit́ kate ko̠ kạmiya mente niạ Baṅlgadiso̠m ren Santal ko ko asjoṅoḱ kana.

Source-Internet

Lạṭu-lạṭu so̠ho̠r bajar,

Dolan oṛaḱ do̠ o̠ko̠eaḱ?

Po̠rjạt peṛa,

Dekoaḱ-dekoaḱ !

Haṭ baṭ,

Bạnij be̠par do̠ o̠ko̠eḱ?

Deko peṛa,

Jạnum jhạṇṭiaḱ-jhạṇṭiaḱ !

Lạṭu-lạṭu uḍạuḱ jahaj,

Kạl kạrkhana do̠ o̠ko̠eaḱ?

Deko pusi,

Po̠rjạt peṛawaḱ-peṛawaḱ !

Hạṭiạ bạṭiạ,

Mela ṭhela do̠ o̠ko̠eaḱ?

Ho̠ṛ kuṛi koṛa,

Santal ho̠po̠naḱ-ho̠po̠naḱ !

Ạisạ bhiṛạ kaḍa ro̠po̠ḱ,

Bo̠l e̠ne̠ć do̠ o̠ko̠eḱ?

Ho̠ṛ ho̠po̠n,

Santalaḱ-Santalaḱ !

Do̠ṅ e̠ne̠ć,

lagṛẽ̠ e̠ne̠ć do̠ o̠ko̠eaḱ?

Santal ho̠po̠n,

Ạdibạsiaḱ-ạdibạsiaḱ !

Haere Santal,

Ńu matal do̠ o̠ko̠eaḱ?

Santal ho̠po̠n baro̠ jạtaḱ-jạtaḱ !

Image Source- From Imternet

Teheń do̠ hoyoḱ kana May cando re̠aḱ 1 tạrik ar noa din do̠ ạḍi bise̠s mãhã kana; one̠ o̠ka do̠ ko me̠taḱ kana Go̠ṭa Dhạrti re̠n Kạmiạ koaḱ Mãhã! Baṅgladiso̠m re̠ mit́ cando re̠aḱ Lockdown do̠ calaḱ kana. Noate̠ ạḍi ae̠ma re̠ṅgeć, nacarko, nindạnko, nalhate̠ jo̠jo̠mko, gạḍi calao̠ko, huḍiń lonbonko do̠ maraṅ mũhim re̠ko paṛao̠ akana. Sisirjạuić ṭhe̠n ạḍi ãṭ aṛaṅte̠ koe̠joṅ hoyoḱ kana, je̠mon usạrage arhõ mo̠ńj din bon ńel tiyog.

Nesaḱ jos katha do̠ hoyoḱ kana; “Kạmiạić-Mạlik mit́ katet́ disom bon benao rakaba Mojib bosrsho re” Jao serma ge noa mãhã do̠ ko manao ganao ạguyeda. Dhạrti reaḱ aema disom rege kạmiạ ko do̠ ạḍi jomokte̠ noa dinko manao ganaoa. Baṅgladisam se̠le̠t́ 80 goṭen disom re noa din re̠do̠ sarkaraḱ chuṭi me̠naḱa. Ar e̠ṭaḱ disom re do nit hạbić te̠ sarkar bahadur do̠ bae he̠tawaḱ kana.

Teheń khon 135 serma laha 1886 reaḱ teheń le̠kan din re Amerika reaḱ Sikago naṅgrahare he markeṭ meshakar reko goć oco akan koaḱ atma se jiwi calao akanko lạgit́ mit́ uihạr lạgit́ noa mãhã do̠ manao hoyoḱ kana. En hiloḱ do goṭa din re Irạl 8 ghanṭa kạmi ạidạri lạgit́ joto kạmiạko do̠ He Markeṭ Meshakar re̠ko jarwa mit́ le̠na. Onkoko be̠ṛhaete̠ eset́ akat́ko Police sipạhi ar palṭonko mit́ be̠gor opromić aḱ boma te̠ police do̠ kạmiạ ko ce̠tan re̠ bạnduk ṭhuṭhuko lagao e̠na. Onkate̠ amdaj 10-12 hoṛ kạmiạko ar police sipạhiko goć oco le̠na. 1889 serma do̠ Phorashi Biplob seć le̠kate sae serma re Paris do̠ dosar goṭa dhạrti re̠ pạhil koṅgresh ko hoe̠ ocole̠da.   

Inạ tayom 1890 serma khon do̠ Sikago naṅgrahare̠ onako birudre̠ teṅgo daram (protibad) re̠aḱ go̠ṭa dhạrti re̠ manao lạgit́ kathae lại jạhir (Prostabona) ke̠da Remond Labine. 1891 serma go̠ṭa dhạrtire do̠sar koṅgresre noa ńum uduḱ katha akhṛa lekate̠ (anusṭhanik) selet́ aṅgoc hoy ena. Niạ tayom tege 1894 serma May Mãhã re̠ lạṛhại hoe̠ le̠na. Inạ tayom 1904 serma Amosṭarḍam naṅgraha re̠ go̠ṭa dhạrti jarwaḱ re̠aḱ mit́ ńum uduḱ (prostabona) do em hoyena. O̠na prostab re tãhe kana din re 8 ghonṭa kạmi somoe̠ lạgit́ ạidạri hatao̠ ar disom re suluk tahe̠n lạgit́ goṭa dhạrtire̠ 1 May do gapalmarao, seminar, mit́ jomokte̠ hoho (michil), mit́te̠ taṛam (ovajatra) ko selet́ eneć sereńko hõ jemon hoyoḱ. Ar noa dinre je̠mon mit́ṭen kạmiạić hõ bako kạmi ma. Sobhiyat, Chin, Kueba selet́ dhạrti re̠aḱ aema disomge May mãhã do̠ ạḍi khandri mane selet́ko manao ganao eda.

Menkhan baḍae kaḱ mabon je, America ar Canada re̠ do September cando Kạmiạkoaḱ Mãhã do̠ ko manao eda. Ona disom ren kạmiạko re̠n ạyurko do̠ Kạmiạkoaḱ ńindạ ko manao eda. He Market re goć-gopoć tayom America disom ren un okte reye tãhekan President Grovar Klivalnd doe hudis leda Pạhil May cando jãhãnaḱ hoe̠ oco lekhan do̠ pase̠ć gulmalko hoe daṛeaḱa. Onate̠ 1887 serma khonge uni do Ńindạ ak re somorthiho kạmiạkoaḱ mãhã manao lạgit́ seć geye tãhe lena.       

Ce̠t́ le̠ka menaḱ koa Santal jạtire̠n kạmiạko? jotoko ge ạḍi be̠ste bon baḍaea je, santalko ạḍi bạṛtige nalha jojom hoṛ kanabon. Mit́ se̠ć te̠ do ạḍi bhạgan kan geabon e̠nte̠t́ Bible rebo ńe̠l le̠khan ạḍi pusṭạu te ol me̠naḱa; Coṭren uḍạuḱ ko beṅget́ akope̠, bako era, bako ira, ar murạikore̠ bako sõćjoṅa; e̠nrehõ apere̠n serma Babae ạsulet́ koa. Ape̠ do̠ onko khon baṅ do̠ bape̠ soros? (Holy Bible; Mathae 6:26)  

Inạḱ kạmi soṅgete ạḍi jopoṛao me̠naḱa Santal, Kolhe, Mahali selet́ Baṅgaliko. Kạmi oktere̠ ạḍi sor khoniń ńe̠l akat́ koa Santal hoponko. Teheń noa Kạmiạ koaḱ Mãhã re̠ bar gạkhuṛ maejiu kinạḱ katha doń baḍae ocobona;

Rajshahi jilạ, Godagạṛi Upojilạ reaḱ Dogachi Ato ren Miru Soren, umer do̠ amdaj 55 le̠ka. Ạḍi tho̠ṛa somoe re ae̠ma utạr galmarao hoye̠na korona babot, jom ńu babo̠t ar aćaḱ gharońj. Aćre̠n oṛaḱ ho̠ṛ do pe̠ serma laha re noa dhuṛi dhạrti doye̠ bạgi akada. Ạkinaḱ noa gharońj re̠ pea kuṛi ar mit́ ko̠ṛa. Apnaraḱ jumi jaega do̠ bạnuḱa, eken nalha tumạl kạmi kate̠t́ jo̠jo̠m hoṛ kanako. Kukli tãhe kana Miru ṭhe̠n; ce̠t́ le̠ka me̠naḱ pea lockdown ar teheńaḱ bises mãhã re̠ do̠? Uniaḱ roṛ ruạṛ do̠ tahẽ kana; lockdown karonte̠ ạḍi muskil re̠ me̠naḱ lea. O̠ṛaḱ re̠aḱ jo̠maḱ male̠ jo̠m cabake̠t́. Nito̠ḱ do̠ hoṛo ko ge̠t́ e̠hoṕ akana ar o̠nakote̠ jãhã le̠ka din do̠le̠ khe̠mao idi eda. Ar bises mãhã babot do̠ ce̠t́ iń me̠na; sạpṛi bagwan kore̠le̠ kạmi e̠da, goṭa din re̠ e̠ke̠n bar (200) sae kạuḍi kate̠t́ ko e̠male̠ kana. Inạ hõ bam kạmi le̠khan bam ńama. O̠nate̠ inạ kạuḍi kate̠t́ gele̠ kạmi kana.  

Teheńaḱ mãhã ńutumte̠ johar kathakin em hạṭiń akada President Md. Abdul Hamid ar Prime Minister Shekh Hasina.

President do̠ aćaḱ johar katha re̠ye̠ roṛ so̠do̠r oco akada; Covid-19 rogte jạbun akan got̠̣a dhạrtige ạḍi mũhim re̠ye̠ paṛao akana. Baṅgladisom re̠hõ corona virus do̠ ạḍi ãṭ te̠ye̠ ghạr akat́ bona. O̠nate̠ ạḍi mũhim rebo paṛao akana lonbon protisṭhanko se̠le̠t́ diso̠m re̠n din kạmi kate̠t́ jo̠jo̠mko. Nonkan mũhim halo̠t te̠ disom sorkar do̠ disom ren manwako soṅge tãhe kate̠t́ go̠ṛo̠ e̠moḱte ạḍi ãṭ te̠ye̠ kurumuṭu kana. Kạuḍi se̠ćte̠ babon tayomoḱ lạgit́ sorkar bahadur do̠ bises mit́ pekeje ro̠ṛ so̠do̠r akada. Onkate̠ covid-19 re̠aḱ maraṅ mũhim re̠hõ Baṅgladisom do̠ laha se̠ć laha idiḱ tabona. Iń do̠ sorkar se̠le̠t́ silpo prothisṭhan re̠n mạlik ko hõ din kạmi kate̠t́ jo̠jo̠m kan ho̠ṛko goṛo ako lạgit́ iń nẽhor ako kana.

Prime Minister Shekh Hasina hõ kạmiạkoaḱ noa mãhã re̠ aćaḱ jo̠har katha re̠doe roṛ saḍe akada; May mãhã do̠ go̠ṭa dhạrtire̠n kạmia̠ koaḱ mit́ mon, mit́ aṛaṅ re̠aḱ maraṅ nṣmuna kana. Noa disạ uihạr maṛaṅ mãhã re go̠ṭa dhạrtire̠n joto kạmiạko lạgit́ iń se̠ć khon tãhen kana ae̠ma Jo̠har. Prime ministerye me̠ne̠t́ kana; Go̠ṭa Dhạrtire̠ he̠ć bolo akan maraṅ rog khon sahaṛakai se te̠ṅgo ke̠ṭe̠joḱ lạgit́ aleren sorkar do̠ din kạmi kate̠t́ jo̠jo̠m kan manwako soṅge tãhe kate̠t́ jo̠maḱ ko e̠mako se̠le̠t́ ae̠ma le̠kan kạmi hora do̠ye purạu e̠da. Disom re̠n sarker bahadur do noa mũhim khon rukhiạ lạgit kạmiạ koaḱ mạhnạ lạgit́ 8 hajar 600 kạruṛ ṭaka boraddo em hoe̠ akana.

(Prothom Alo, 1 May 1, 2021)       

Naogaon re̠aḱ Sapaharre̠ Hasa-Jumiko re̠aḱ bene-bạiri kakhante̠ mit́ Ạdibạsi gharońj cetanre̠ ạdi be-bạṛić gańjon sãote̠ tehen oṛaḱ rạput́ giḍi ar luṭpaṭ re̠aḱ aroj(Obhijog) rakaṕ ńam akana.

Ona muskil gańjon re̠y paṛao̠ akanić do̠ saṛokḍaṅga atore̠n ạdibạsi Kạrlus Murmure̠n oṛaḱ hoṛ Selina Baski(45) aḱ thanare̠ dạkhil akat́ ijạhar khonaḱ baḍaeoḱ kana, Ona atore̠n Mostakim re̠n hopon Abdul Sobhan Ali, Mojaffor Alire̠n hopon Atabur Rahman, Mujibur Rahman, ar Gupinath re̠n hopon Bạjun ar Julhai ren hopon Lelku Hasa-Jumiko re̠aḱ gulmal se bene-bạiri khạtirte ḍher din khonaḱ onko do aema botor ko uduḱako kan tahekana.

Ghoṭna dinre̠ calaoen 24 April setaḱ amdaj 11 baja seć bạiri nakhare̠n onko hoṛko do̠ ạḍi be-aini lekate̠ mit́ jumte ̄elina baskiaḱ oṛaḱ teko boloyena ar ona ona oṛaḱre̠n sanamko de- mạriạ dal-dalte̠ oṛaḱ khon ko oḍok ket́koa, ona oktere onko do̠ ḍaku leka gharońj re̠ak sanamaḱ jạruṛ jinisko tawaḱ- dal rạput́ keda, ar mãt́ ar ṭinko do̠ luṭ kateko idi keda.

Jãhãn upạiko baṅ ńamkate ona  ạdibạsi gharońjre̠n hoṛko do̠ ona rạput́ oṛaḱ rege enhiloḱ do ko tahe aṅgaye̠na, amdaj ńindạ 12 baja seć ar hõ onko bạiri hoṛko do̠ onko c̃tanre̠ jhãp em lạgit́ko kurumuṭukeda.

Noa oktere̠ Gogo cetanre̠ jhãpko emket́ nelte unire̠n kạṭić gidrạ Pronob Murmu doe laha hećen te̠ onko hamlako do̠ uni hõ ko dal kedea, Noa ghoṭnare̠ paṛao akan maejiu Selina baski do̠ Nij thanare̠ onko bạṛić hoṛko cetanre̠ mit́ olaḱte̠ lạlise samaṅ ket́te̠ thana pulis do̠ ona ṭhạ̃iko ńel- ạribạndhi keda. Noa re̠aḱ khạṭi nạṭi sendra re onko ńum-uduḱ  hoṛko são jogajog re̠aḱ kurumuṭure̠ Ataur Rahman re̠n Hopon Khorsed doe men akada je, noa hasa- jumi do akoaḱ kana mente̠. Noa Sompotti kakhante̠ banar pãhṭa khonge adalotre̠ mamla do calaḱ kana. Noa ghoṭonare̠ tojbij kate̠ ńamoḱ ạn lekate̠ bicạr do̠ hoyoḱa mente Thanaren OC Tarekur Rahman Sarkar doe baḍae oco akana,

Source-Talktimes24

Korona re̠aḱ Muskilaḱ thoṛagan boge ńoḱlen khan darae kan 23 May khon Diso̠m re̠aḱ sanam sikhnạt gãotako(School) jhijoḱa. Sikhnạt gãotako jhij re̠aḱ do̠ Laha tenaḱ goṭawaḱge nit hạbić hõe doho ạgu akada. Ona lekage sanam Sikhnạt gãotako sanam lekanaḱ kạmiko calao̠ lạgit́ hukume em akawat́koa.

Teheń Lukhibar 29 April mit́ Virtual ropoṛ re̠ noa kathae lại keda Sikhnạt Montronaloe ren  Madhomik ar Ucco sikkha Bibhag ren (Mausi) Socib Md. Mahbub Hossain.

Socib doe menkeda Korona bhitrire̠ sikhnạt re̠aḱ kạmiko calao idi lạgit́ abo do̠ Television, Online ar Radio re̠ kilạs uchạn hoelena. Ona são-sãote̠ madhomik ren pạṭhuạ gidrạko oṛaḱrege Assignment re̠aḱ kạmiko em hoyoḱ kana.

Sikhnạt socibe menkeda, Disom re̠aḱ noa hal re̠aḱ boge hoe len khan daraekan 23 May khonaḱ sanam sikhnạt gãotako Iskul Kolej ko jhij kaḱ hoyoḱa. Aleaḱ noa lahare̠ oka goṭawaḱ tahẽkan ona goṭawaḱ do nit hõ jiạṛ tahẽna. Ar noako kạmi purạu lạgit́ sikhnạt gãotako ṭhen em hoe kana.

Source-Sonali /JR

Meskoć

Sedae reaḱ katha, Badsa Akboraḱ raj do̠ṅgolre mit́dhao thoṛa sado̠m bepariko bololena. Mit́ bar katha tayom Badsa do̠ onko ṭhen mit́ṭan Ạrbi sadome kirin kedea. Uni do o̠nkoe metaḱkoa nui sado̠m lạgit́ mit́ṭan ayo̠ sadom aguạńpe. Bepariko do bhabna salaḱ ko roṛ ruaṛadea, Mo̠haraj niạ serma do o̠nkan mońj jạtren ayo sado̠m do̠ bale ńam akat́koa. Menkhan am judi 15 hajar kaudim emaale khan tobe thorale kurumuṭu daṛekea.

Badsa do̠ unkoaḱ kho̠joḱaḱ leka kạuḍiye emat́koa.Onatayo̠m mit́ bo̠cho̠r paro̠men reho beparikoak jahan tewan do̠ baṅ ńam lena!

Ṭhik o̠nako o̠kterege Badsa do mit́ṭan parwanae oṅḍoḱ keda, ‘Ińaḱ rajosṭi elakare menaḱko Lo̠ṛo hoṛkoaḱ tạlikạ benaome.

Bar hapta tayo̠mge Birbo̠l do̠ mit́ṭan tạlika benao kate raj doṅgol teye calao̠ena emaya mente. Hahaṛa katha do̠ no̠age kana, pạhilrege Badsa Arborak ńutum o̠l akana!

Badsa do̠ thoṛae asbasaoenteye mengot́ keda, Birbo̠l noa do cet́ kana?

Birbo̠l do̠ mạhir macha teye menkeda, ‘nonkan hoṛ do loṛo bankhan cele ko metakoa, o̠ko̠e do̠ baṅ ńel sạṅgiń diso̠mren hoṛko ekal algatege lahare nunạḱgan kạudiye cal akat́ko; bae baḍaya o̠nkoaḱ ńutum, tewan se jahan o̠po̠ro̠m hõ?

Menkhan o̠nko bepari do paseć re paseć ko ruạṛ hijuḱ! So̠do̠m niye ko heć lenre cet́ hoyoḱa?

Hujur, o̠nkage judi hoe lenkhan unre amak ńutum kạtić kate o̠nkoaḱ ńutum iń bạesạua landa tuluće jobab adea.

Ho̠la 26 april setaḱ bela Dinạjpur  jilạ Parbortipur upojilạ reaḱ Baroko̠na atoren barea maejiu salet́ 3 hoṛ ko dal jokho̠m akana mente baḍae akana.  Dal akat́ ko̠ bańcao kate Holdibaṛi Sastho Complẹx re  cikitsa hatao lạgit́ ko bhorti akat́ koa. Niạ gho̠ṭ̣ona do̠  jumi-jaiga niạ mare bạire  reaḱ lasaṛhet́ te hoy akana mente  baḍaeyoḱ kana.  Niạ ghoṭo̠na reaḱ bicạr ńam mit́ mamla em lagit́ko saṕṛaoḱ kana. 

Dal jom kate akham akan ko̠ do̠ ko hoyoḱ kana barokona atoren Resko̠ Mardi ren lạṭuić kimintet́ Seuli Murmu, kạṭićić hopontet́ Raphayel Marḍi. ar uniren bhạcạt kuṛi Eva Marḍi.

Resko Marḍi baḍae ocoḱ kana oṛaḱ reaḱ jumi jaega reaḱ muskilaḱ khạtir noko juni hunḍạrko do̠ laha khon ko taṛaḱ akan tahekana ar ińren gidrạ dal goje lạgit́ ge niạ ghoṭona do̠ ạḍi buj salat́ ko koraoakada. Niạ babot Jatiyo Adibasi Poriso̠d ren ạyurić (chairman) Mn. Robidronath Soren doe lạikeda baṅ aema ḍher din laha khon ge noa gharońj renko sao deko jumi hunḍarkoaḱ mit́ mnuskilaḱ do̠ calaoḱ kana. Noko do̠ reṅgeć nacar santal hoṛ kanko khạtir hikạ hok bica̠r bako̠ ńameda. Uni do̠ niạ ghoṭona reaḱ hikạ hok biḱcạre kho̠j akada. Ar ona salat́ noko gharońj aḱ jion jiṅgi reaḱ nirapotta hoe dạbi akada sarkar ṭhen.

Covid-19 re̠aḱ pasnaoḱ teṅgo daram lạgit́ calaḱ kan manao-batao arhõ Mit́ hapta ḍher re̠aḱ goṭa hoe akana.Moṅgol hiloḱ (27) April noa re̠aḱ mit́ hokum sakam jạhiroḱ re̠aḱ katha menaḱa mentey baḍae oco akana Jonoporsason Proti-Montri Forhad Hossen. Hukum sakam jạhirlen khan daraekan 5 May Hạbić noa manao-batao do tahena.

Covid-19 re̠aḱ teṅgo daram lạgit́ calaoe̠n 14 April setaḱ khon Irạl (8) din lạgit́ ạḍi kajak Lockdown e̠hoṕlena. Lockdown re̠ 13 goṭe̠n ạn-ạriko manao̠ batao̠ lạgit́ sarkar pạhṭa seć khon unuduḱ em hoe̠ lena, Ona re̠aḱ okte hõ calaoe̠n bud hiloḱ (21) April tala ńindạ hạbíć tahẽkana.Tobe Korona re̠aḱ jãhãn bogeḱ lahanti baṅ ńellente ona re̠aḱ okte do̠ 28 April hạbić juṭić hoelena.

Source- Padmatimes

Kolhe ko ko ńamkeda ko̠ro̠na ajaṛ kho̠n sahaṛ akan tahen cehao̠na. Teheň  25/04/2021 setaḱ 10: 30 tala kho̠n ehoṕ kate 12 baja habić  Rajshahi jilạ  Godagari Upojila reaḱ mucạt́ simạna ato Babudaṅre hoyena nia cehaona seminar. Niạ seminar re Babudaṅ ar ona aḍepase ṭoṭharen pea atoren 37 goṭen pạthuạ gidrạko̠ selet́lena.

Ko̠ro̠na cehaona Seminar re johar katha ar niạ okte saphasaphi tahen , oloḱ paṛhaoḱ alo ḍheliseli nạko babote roṛkeda National Agency for Green Revolution (NAGR) ren manotan executive director Stephen Soren. Pạṭhuạ gidrạko̠ ar jarwa akan ko̠ ko̠ro̠na ajaṛ kho̠n sahaṛ tahen lạgit́ aboaḱ kạmiko̠ cetane galmaraokeda Kolhe ko kho̠n pạhil dhao̠ leka Nursing e paṛhao akan Hiramuni Tuḍu. Uni do̠ ako̠aḱ pạrsite ako̠ren hoṛko mońtey bujhaoat́koa niạ okte cet́ ko̠ cekae lagat́a mente. Enạ chaḍa ho̠ seminar re siknạt cetan katha roṛkeda ar video uduḱaḱ koa National Agency for Green Revolution (NAGR) ren program officer Prodip Hembrom. Semianr mucat́re jarwa akan sanam pạṭhuạko NAGR seć kho̠n sikhnạt ạyur lahantiy lạgit́ Khata, kolom, mask (moca poṭ̣omaḱ) ko em hạṭińaḱ koa.

Enạ chaḍa ho niạ iskul, kolege bondh tahen okte olo̠ṅ pholo̠ṅ daṛa baṛa baṅ kate ona okte kạmi apnarḱ paṛhaoḱ re emge lagtigetabona.  O̠nate 20 kuṛi gidrạko ṭhen baha-naksa gadle rog lạgit́  10 goṭen naksa gadle selại lạgit́ em hoyena. Niạ ko̠ selại kate Dhaka naṅgrahare ạkhriń reaḱ hudis menaḱtaea NAGR aḱ.

Niạ seminar re ar hõ selet́ ko̠ tahẽ kana Mn Markus Murmu, Accountant cum manager- Amnura Lutheran Mission Hospital.  Rev. Rajen Soren oko̠e do̠ aema serma kho̠n noko̠ kolhe ko̠ talare gãota lahanti lạgit́e kạmi kana.  Rumạli Hasda Kolhe ko̠ talare maeju ạyurić, NAGR ren kạmi sohot́ić Sumitra Murmu.