17 Cando Tayom Jhicyena Iskul

Ko̠ro̠na mãhãmạri khạtir calaoen serma reaḱ 17 March khonaḱ disạm reaḱ jo̠to̠ Skul college do̠ bond tahẽkana. Me̠nkhan 17 cando tayom teheń kho̠n Skul- College reaḱ duạr jhić akana. Skul- College calaḱ lạgit́ sanam pạṭhuạ gidrạko tạṅgi se̠ koyoḱ horreko tahẽkana. Unạḱ din kho̠n uihạr ar tạṅgire tahẽkanaḱ do̠ teheń sumạr akana.

Teheń kho̠n Disạm reaḱ Primary, Secondary ar High Skul ãṭre menaḱ sikhnạt gãota kore jo̠to̠ lekanaḱ hoṛmo hạṭiń reaḱ ạnko manao salaḱ kelas do̠ eho̠ṕ akana. Onate ạḍi rạskạ ko ạikạuet́ kana pạṭhuạ gaidrạko. E̠nte teheń do̠ mimit́ gate ko são ńapam ńepel do̠ hoyoḱ kantakoa.

Me̠nkhan jo̠to̠ pạṭhạu gidrạko mask ho̠ro̠ḱ kate ar Mahasoe koaḱ batlao lekate kelasteko bo̠lo̠yena.

Source: Bangladesh-protidin

Migrain (Bo̠ho̠ḱ haso) Hoelen Khan Cet́ Cet́ Ko Cekae Hoyoḱa

Migrain bo̠ho̠ḱ haso babotre sontor tahẽn reaḱ hapta 2021 ńutumte SKF bo̠no̠do̠bo̠s akan bises akhṛa ‘Bo̠ho̠ḱ lạgit́ Bo̠ho̠ḱ Haso’ reaḱ mõṛẽaḱ porbo reaṅ bisoi tahẽkana Migraine reaḱ cikit́sa ar ona kho̠n bańcao ńam. Un hiloḱ peṛa hisabte seṭere tahẽkana National Institute Of Neuroscience And Hospital reaḱ Neurology bibhag ren sãoten professor Dr. Abu Nayim. Noa akhṛa do̠e ạyurleda Sushmita Shruti Chowdhury.

Aema lekan Bo̠ho̠ḱ Haso:

Dr. Abu Nayim do̠e baḍae ocokeda, Mẽt́ cetan khon dạbi dhạbić noa bhag do̠ bo̠ho̠ḱ kana. Ar bo̠ho̠ḱ tahẽlen khan bo̠ho̠ḱ haso do̠ tahẽngea. Me̠nkhan jãhãtin jãhãtinre niạ bo̠ho̠ḱ haso kho̠nge mẽt́, lutur ar sinus reaḱ muskil hoe daṛeaḱa. Pạhil porjai reaḱ bo̠ho̠ḱ haso re jãhãn karontet́ge baṅ sendra ńamoḱa. Ar 95 percent bo̠ho̠ḱ hasoge nonkanaḱ bo̠ho̠ḱ haso kana. Ar 2-5 percent re ńe̠loḱ kana, Bo̠ho̠ḱ haso são mẽt́, lutur ar mũ do̠ jopoṛao menaḱa. Noa ko bo̠ho̠ḱ haso reaḱ 70 percent arhõ ạḍi cintạ kho̠n hõ hoyogo̠ḱa. Noa do̠ko metaḱ kana Tension Headache. Ar 30 percent do̠ hoyoḱ kana Maigrain bo̠ho̠ḱ haso.

Cekatebo̠n bujhạukea je okṭaḱ bo̠ho̠ḱ haso kana:

Ạḍi aṭ cintạte bo̠ho̠ḱ haso (Tension Headache) do̠ mit́ talaoge hasoa. E̠ṭaḱ seć Migraine bo̠ho̠ḱ haso do̠ jãhãtinre hasoa. Haptare bar din, pe din; mas re bar din, pe din. Metaḱme bo̠cho̠rre mit́ dhao hõ hoe daṛeaḱa. Ar cintạte bo̠ho̠ḱ haso (Tension Headache) do̠ cando hạsurlen khange haso hõ ḍher idiḱa. Migraine reaḱ haso do̠ nonka ạikạuḱa, menkeam bo̠ho̠ḱ bhitrire okoe coṅ cet́teko hạnet́ kana. Pulse sãote noa haso hõ tal milạu kate rakaṕ daṛeaḱa. Ar Tension Headache do̠ ạḍi kajaḱgea. Bo̠ho̠ḱ ạcur daṛeaḱa, dudṛumge ạikạuḱa. Beć beć aṭkaroḱa. Setoṅ reaḱ rãt baṅ sahaoḱa, Katha roṛre hõ muskil hoe daṛeaḱa.

O̠koe do̠ Migraine bo̠ho̠ḱ haso ńam daṛeakoa:

Jãhãe hoṛkoaḱge Migraine hoe daṛeaḱa. Emanteaḱ bo̠ho̠ḱ haso leka maejiu ko bạṛti Migraine ńamet́koa. 16 bo̠cho̠r kho̠n e̠hoṕ kate 45 bo̠cho̠r dhạbić noa bo̠ho̠ḱ haso do̠ tahẽ daṛeaḱa. Nia laha- tayomre hõ hoe daṛeaḱa. Bạṛtikaete ńe̠logo̠ḱ kana, gogo-babawaḱ tahẽkana. Onḍe kho̠n hõ hoe daṛeaḱa.

Migraine karonaḱte cet́ jãhãn muskilaḱ hoe daṛekea:

Baṅ, Cintạ reaḱ jãhãn karonge bạnuḱa. Secondary bo̠ho̠ḱ haso hoelen khan thoṛa cintạ reaḱ kangea. Me̠nkhan pạhilaḱ re cintạ reaḱ karonge bạnuḱa. Cedaḱ je̠, Bo̠ho̠ḱ kho̠n ehoboḱ kan bo̠ho̠ḱ haso do̠ bo̠ho̠ḱ reaḱ cet́ hõ bae loksana. Mẽt́, mũ ar lutur kho̠n ehoboḱ bo̠ho̠ḱ haso thoṛa sensitive. Lahate ko dharonaet́ kan tahẽna Migraine são Stroke reaḱ gạhir sompok menaḱa. Me̠nkhan, khond-rond (Gobesona) kate jãhãn pormange baṅ ńam akana. Migraine reaḱ cikit́sa lekhan mońjoḱa. Me̠nkhan aema o̠kte baṅ mońj utạroḱa. Aema din ran jo̠jo̠m joyoḱa. Migraine re mẽt́ tayom nakha hasoa. Aema hoṛ do̠ mẽt́ ren dactor ṭhenko senoḱa. Cosma ko ho̠ro̠ga. E̠nre hõ thoṛa do̠ mońjoḱ, nirdae do̠ baṅ mońj uṭaroḱa.

Migraine reaḱ cikit́sa:

Diagnosis ocoe hoyoḱa. Inạ chaḍa hõ gharońj reaḱ nagam tahẽn khan, jo̠to̠ cinhạko milạu kateć ale do̠ thoṛa ranle e̠mogo̠ḱa. Mone re do̠ho̠e hoyoḱa, Cando re judi bar-pe dhao nonka ạḍi kajaḱ bo̠ho̠ḱ haso hoyoḱ, e̠nḍekhan e̠ṭaḱ ran do̠le emakoa. Haso e̠hoṕ torage ran jo̠m lekhan unạḱ do̠ baṅ hasoa.

Maejiu kodo̠ cet́ lekate Migraine ko sambṛaoa:

Bhạrti hoṛmo tahẽn o̠kte Migraine do̠ sabhabik ghoṭna kana. Arhõ ale Migraine reaḱ oka lekan ranle emako, ona do̠ bhạrti hoṛmo tahẽn o̠kte emoḱ baṅ ganoḱa. Nonḍe mit́ṭen hạsi reaḱ ghoṭna menaḱa. O̠koe koaḱ do̠ laha kho̠naḱge Genuine Migraine tahẽn, bhạrti hoṛmo tahẽn o̠kte ona do̠ 50 percent belare do̠ mońjoḱa. Ar o̠koe koaḱ Migraine reaḱ nagam banuḱ, Onkoaḱ 16 percent belare do̠ bhạrti hoṛmo okte Migraine hoyoḱa. Arhõ gidrạ janam tayom mońjoḱa.

O̠koeaḱ ghane ghane Migraine hoyoḱ, uniaḱ judi Tension Headache hoyoḱ, unre?

Mit́ hoṛaḱ nonkan bar lekan bo̠ho̠ḱ haso hoe daṛeaḱa. Unre okako ran do̠ bar lekan hasorey kạmia, onkan rangele emakoa. Migraine bo̠ho̠ḱ haso me̠naḱtae rogi do̠ sabhabik leka bako kạmi daṛeaḱa. Je̠mon Skul, College se̠ Office calaḱ, oloḱ paṛhaoḱ- noako baṅko daṛeaḱa.

Hoṛmo khaṭaoḱ são sãote Migraine reaḱ sompok:

Ạḍi cintạ tahẽlen khan, jạpit́ ko̠m hoylen khan, mit́ sańj baṅ jo̠m lekhan, ackage bạṛti hoṛmo khaṭao lekhan Migraine hoe daṛeaḱa. Migraine kh̠on sạṅgińre tahẽn lạgit́ hoṛmo ar mo̠n niropon do̠hoe jạruṛa. Jaoge hoṛmo khaṭao, taṛam, bhańjao (beyam) jạruṛa. Migraine do̠ bo̠ho̠ḱ hataṅ reaḱ ruạ kana. Hataṅ reaḱ cet́ hõ bae loksana. Cikit́sa lekhan aema okte mońj hõ mońj ho̠do̠ḱa. Me̠nkhan mońj hõ baṅ mońj daṛeaḱa. Baṅ mońj lenkhan sambṛaote do̠hoe hoyoḱa. O̠kte nạpitre jạpit́ hoyoḱa. O̠kte nạpit́re jo̠m hoyoḱa. Daḱ ńũi lagaoḱa. Ar ona sãote thoṛa hoṛmo bhańjao kate apnarte napae tahẽn jạrura. Migraine se̠ bo̠ho̠ḱ haso do̠ jãhãn maraṅ muskilaḱ cet́ hõ baṅ kana.

Source: Prothom alo

Messi Do̠ ‘Sona ren Jel’ Lekanae

Lionel Messi lekan sukạr (superstar) do̠ setoṅ din re̠ be̠go̠r ucạṛte do̠l reko ńam akadea PSG. Argentina superstar lạgit́ Champion League re kukmũ reko matao akana phorasi club. PSG Messi ko ńamkedete aema po̠rho̠ ko ńamet́kana maṭh bahreko rehõ. Barcelona ren sạbik ạḱyuriće selet́en tayom khonge league 1 ren brand value reaṅ aema lahanti hoy akana.

Metaḱme, Messi ko ńamkedete ko monejoṅ kana baṅma ‘Sona ren Jel’ ko ńam akadea. PSG ar Messiwaḱ kago̠j-ko̠lo̠mte chukti oktege Argentina Superstar aḱ ńutum ol menaḱ Jạrsi mit́ ghuṛitege ạkhriń cabayena.

Niạ ko din talatege PSG seć kho̠n eneć lạgit́ Messi ko o̠jo̠ḱ kedea. Jel, Cricketer leka namḍak jo̠to̠ gãota são chukti hoy akantaea PSG waḱ. Cricketer ko são pe serma reaḱ oka chukti, ona kho̠n PSG dharonaet́ kana 25-30 Milion Euro do̠e kạmai joṅa

Source: Bangladesh protidin

Chin Kho̠n 54 Lakh Sinopharm Ko̠ro̠na Ṭikạ Do̠ Hećena

Chin kho̠n kirin akan Sinopharm reaḱ arhõ 54 lakh ko̠ro̠na ṭikạ disạmre hećena. Hola Sokolbar tala ńindạ 12:45 baja okte mit́ṭen uḍạuḱ gạḍite noa ṭikạ do̠ Dkaka reaḱ Hazrat Shahjalal Antorjatik Bimanbo̠ndo̠rre hećena. MNC&H ren Line Director Dr. Md. Shamsul Hoqe noa ṭikạ hatao se̠ ataṅ lạgit́ bimanbo̠ndo̠r rey tahẽkana. Niạ dhao do̠ 54 lakh 1 hajar 350 doge ṭikạ do̠ hećena.

Source: Banglar Jonopod

TINẠḰEM HO̠ṄGO̠RA?

E̠ am Lo̠ṅgra,

Tinạḱem ho̠ṅgo̠ra?

Ato tamma Mo̠ṅgra,

Bikạuḱ kanem ḍaṅgra.

E̠ am Lo̠ṅgra,

Tinạḱem ho̠ṅgo̠ra?

Bạgiyme ṭhạurạ,

Bạgiyme pạurạ.

E̠ am Lo̠ṅgra,

Tinạḱem ho̠ṅgo̠ra?

Metamkanko bhạṛuạ,

Bikạuḱ kanem bhạluạ.

E̠ am Lo̠ṅgra,

Tinạḱem ho̠ṅgo̠ra?

Era uru dinko e̠ge̠ra,

Jhogṛale̠nrem ge̠ge̠ra.

E̠ am Lo̠ṅgra,

Tinạḱem ho̠ṅgo̠ra?

Ujạṛo̠ḱkan gại goṛa,

Ańjo̠mmese thoṛa.

Mit́ṭeṅ Pạtiạr Seta

Mit́ hoṛren ạḍi dulạṛiạ setae tahẽkana. Ạḍi ãṭe bolaolena. Uni hoṛ jãhã sećgeye calaḱ, seta hõ uni sãoteye calaḱa. Uni hoṛ do dokandare tahẽkana. Mit́ din uni hoṛ sadomre dećkate mit́ jaegateye senena. Uni seta hõ aćren kisạṛ sãote tayom tayomteye dạṛ idiket́a. Uni hoṛ ruạṛ jokheć, mit́ thạilạḱ ṭakae ạgu darayet́ tahẽkana. Tarasiń okte tahẽkana, ar ạḍi setoṅena.

Ado hor aṛe reaḱ mit́ṭen dare buṭạre sadom khone ãṛgoyena, are jirạuena. Unre uni do ona ṭaka thạilạḱ otreye dohoket́a. Jirạuen khane arhõ sadomreye dećena, ar sadome kamsaokede, Menkhan ona ṭaka thạilạḱ doe hirińket́a. Seta doe bujhạuket́a, ińren kisạ̃ṛ do noa thạilạḱ doe hiṛińket́a. Khange seta do ona thạilạḱ gerkate iḱdiye ṭesṭaket́a.

Menkhan bae daṛeat́a. Inạḱtege ḍher saṅgiń aćren kisạ̃ṛ doe calaoena. Seta do aćren kisạ̃ṛ tioge lạgit́ ạḍi ãṭe dạṛket́a, ar ạḍi ãṭe bhoḱ idiket́a mit́ ghạṛi khangeye ńir tioḱkedea, ar ạḍi ãṭ unre hõe bhoḱket́a. Menkhan uni hoṛ do setawaḱ bhoḱ bae hetaoat́a. Seta doe ńelket́a, nitoḱ ińren kisạ̃ṛ do bae ruạṛa, ona iạte sadomge ạcur ruạṛe lạgit́ sadomaḱ jaṅgae hạmbuṛ urićket́a. Uni hoṛ doe bujhạuket́a, setoṅ iạte jạnić nui seta do ackae bhaloḱena. Jivet́iń dohole khan ḍher hoṛe loksankoa.

Ona iạte uni hoṛ uni setae ṭhukedea. Bạpurić seta ạḍi ãṭe raḱket́a, ar ona dare buṭa ṭhengeye ńir ruạṛena. Menkhan uni hoṛ doe sen idiyegea. Thoṛa sạńgińe senen khan, ṭaka thạilạḱ doe disạket́a. Ado ekalte sadome ạcurkedea, ar ons dare buṭạ ṭhene seṭer got́ena. Unre uni dulạṛiạ seta do ona thạilạḱe burum loṭom akat́ tahẽkana, ar aćren kisạ̃ṛaḱ jinis rukhiạket́taea.

Uni seta do aćren kisạ̃ṛe ńelkede khan, canḍbole ṭhepe ṭhepeket́a. Uni hoṛ do sadom khon usạrae ãṛgoyena, ar aćren dulạṛiạ setae hạṛuṕkedea, ar mẽt́ daḱ joroyentaea.

T-20 Bissocup Lạgit́ Baṅgladisạm ren Do̠lko Lại So̠do̠rket́ko

Darakan 17 September kho̠n hoyoḱ lạgido̠ḱkan T-Twenty Bissocup lạgit́ Baṅgladisạm ren do̠l ko lại so̠do̠r akat́koa. Ge̠l mõṛẽ (15) member ren ạḱyurić ko do̠ho akadea Mahumudullah Riyadh. Teheń Lukhibar tikin 12 baja tayom Mirpur Shere baṅgla Criket Studiom re Press Conference kuṭhri re bo̠ndo̠bo̠s akat́ sombad sonmelonre Bissocup do̠le lại so̠do̠rket́koa maraṅ khelwaṛ bachaoić Minhazul Abedin Nannu. Ar uni salaḱ arhõ eṭaḱ baṛ hoṛ khelwaṛ bachaokin Habibul Basher Sumon ar Abdur Razzak. Calaoen bar pe cando kho̠n okoe do̠ jatiyo do̠l reaḱ T- Twenty series ko e̠neć akan, Onko mo̠d kho̠n 15 goṭen khelwaṛ ko bachao ńam akana. Onḍe do̠ Mahmudullah Riyadh chạda hõ gạkhur khelwaṛ hisạbte Mushfiqur Rahim, Sakib Al Hasan tako hõ me̠naḱkoa se̠te̠laḱ khạtirte.

Mit́ Noṅjorte Baṅgladisạm ren Bissocup Squad-

Mahmudullah Riyadh (Ạḱyurić), Sakib Al Hasan, Mushfiqur Rahim, Sowmo Sarkar, Liton kumar Das, Nayim Sekh, Afif Hosen,Kazi Nurul Islam Sowhan, Shamim Hosen Patwari, Mostafizur Rahman, Taskin Ahmed, Md. Saifudddin, Soriful Islam, Sekh Mehedi Hosen ar Nasum Ahmed.

Source: Sonali Songbad

Internet Be̠go̠r Google Drive Beohar

Markin Search Giant Google akoaḱ Storage seba google drive do̠ internet begor beohar reaḱ phaeda do̠ko ạgukeda. Cedaḱ je̠, phone se̠ internet baṅ tahẽlenre hõ Offline re Google Drive re do̠ho akan nothi se̠ chubi jhićkate ńe̠l reaḱ ạt menaḱa. Ne̠ so̠do̠r akan mit́ṭen Blog post re Tech Giant gaota do̠ noa katha ko baḍae ocokeda. Aso̠kaete PAN card, Voter card se̠ Driving Lisence lekan nijaḱ kago̠j (file) , Office reaḱ PDF file chaḍa hõ jạruṛaḱ ko Google Drive re do̠hoḱa. Je̠mon jạruṛ okte ona ṭuṅ ghuṛite ńe̠lgo̠ḱ.

Me̠nkhan digital nothi se̠ kago̠j okte maraṅ muskil do̠ noage, Internet bego̠r beohar reaḱ jãhãn upạige bạnuḱa. Aema okte sạṅgiń ṭoṭhako re Network ṭonṭate muskilre paṛaoḱ hoyoḱ kana. Noa muskil cabae lạgit́ge nãwã Projukti ( Technology) do̠e ạgukeda. Noa iạte Google do̠e baḍae ocokeda, nit kho̠n Offline rehõ Google Drive re PDF file, Office reaḱ jạruṛaḱ kago̠j ko ńe̠l ńamoḱa. Arhõ baḍae ńam akana, Drive re digital file khạli save lekhange noa phaeda do̠ baṅ ńamoḱa. Internet bond tahẽn okte Google Drive re digital nothi se̠ file ńe̠l jo̠khe̠n jo̠po̠ṛao menaḱ nothire ‘ Right Click’ kate ‘Available Offline’ option re Click hoyoḱa.

2019 serma kho̠n nãwã projukti reaḱ mo̠ho̠ṛa ko calaokeda Google. Aema hatao Milan hoṛko selet́lena ona mo̠ho̠ṛa re. Onare po̠rho̠ ńam tayom niạ dhao sanamko lạgit́ ạguyena se̠ so̠do̠rena noa projukti.

Source: Korotoa

Ho̠ṛ Ar Kulại Reaḱ Katha

Sedae jugre do̠, kathae, ho̠ṛ hõ kulại ṭhenko jo̠m ocoḱ kan tahẽkana. Ado̠ onka tahãn tahẽnte, kathae, mit́ din do̠ mit́ṭen ho̠ṛ do̠ Ṭhạkur ṭhen aro̠joḱe calaoena. Ado̠e metae kan, E̠ Thạkur baba, am ṭhenge mit́ṭen aro̠joḱ lạgit́ iń he̠ć akana. Ado̠e metadea, Cet́ ạrij kantama? Lạime. Ado̠e me̠nket́a, Noko kulại jạtge ạḍi bạṛićko noksanet́lea. Huḍiń janwarko hoeyena, sakam latarre hõko okokoḱ kana, ado̠ bale ńe̠l ńam ho̠tet́koa. Acka mạrko jo̠m go̠t́et́lea. Lạṭu janwar khan do̠, ńe̠l daram go̠t́kotele ńir sajoṅa. Noko kaṭić janwar do̠ bale ńe̠l daram ho̠t́ daṛeako kana, onate am ṭhen aro̠joḱ iń he̠ć akana. Ma dayakate ańjo̠mkatińme.

Ado̠ Ṭhạkure me̠nket́a, Acha bogege. E̠nḍe̠khan phalna din hiloḱ setaḱre he̠ć go̠doḱme, ar kulạiren so̠rdar hõ e̠n hiloḱ do̠ń maṅgaoea. Am hõ inạ din hiloḱ do̠ ạikhạ hijuḱme. Ado̠e me̠nket́a, Acha bogege. Khange ona din tioḱen khan sạri setaḱreye calaoena, ar kulại hõ tinre co̠e se̠n akan. Khange ado̠ bana ho̠ṛkin se̠n ńapamena. Ado̠ Ṭhạkure kuliyet́kina, Henda ya kulại, ańjo̠met́ kanań, baṅma, ạḍi bạṛić am do̠m jo̠met́koa; sạri se̠ nase? Ado̠ kulạiye me̠nket́a, Okor ba? Iń do̠ bań jo̠met́koa; akoge aleko jo̠met́lea. To̠be̠ bam jo̠met́koa. Ado̠e me̠nket́a, Baṅa. Ado̠ uni ho̠re kulikedea, Henda ya manwa, sạri, kathae, ape do̠ kulạipe jo̠met́koa? Ado̠e me̠nket́a, Okor ba? Ale do̠ bale jo̠met́koa. Akoge bogete ale manwa jạtko jo̠met́lea. Ado̠ Ṭhạkure me̠nket́a, Kulại ar manwa, bana ho̠ṛ iń kuliyet́bena. Bana ho̠ṛgeben hunḍạ baṛeḱ kana. O̠ko̠e hõ baben kạbulet́a. Mit́ṭen bicạr hoyoḱtabena; ạikhạ ona kạmiben, onarege abenaḱ do̠ phanḍaoḱtabena. Ado̠ bana ho̠ṛkin me̠nket́a, Acha, ma hukumạlińme.

Ado̠ kulạiye metadea, E̠ ya kulại, am do̠ kitạ ho̠rho̠ iń metam kana. Judi noa bochor dinte kitạ sakamem ho̠rho̠ ńũrket́a me̠nkhan, amgeko jo̠mmea. Onkae metadea. Ar uni ho̠ṛ hõe metae kana, E̠ ya manwa, am iń metam kana. Ado̠e me̠nket́a, Ma ro̠ṛme. Am do̠ korkoṭ sakam ho̠rho̠eme. Judi onam ho̠rho̠ ńũrket́a me̠nkhan, kulạiyem jo̠m daṛeakoa; ar bam ho̠rho̠ ńũrle khan, e̠nḍe̠khan ape manwa do̠ kulại ṭhenpe jo̠m ocoḱa. Niạ bo̠cho̠r mo̠to̠rege bana ho̠ṛ ho̠rho̠ ńũrben. Kalo̠m niạ cando niạ din hiloḱ ona reaḱ sakam ạguạńben, ar ona sakam iń ńe̠ltabena; sạrigeben ho̠rho̠ ńũr akat́a se̠ baṅ, onań ńe̠ltabena. Ma am do̠ inạ dare, ar nui do̠ hane hana dare, ma tikin khonge ho̠rho̠eben. Ona sakam ńũr tora baṛe̠ ạgu go̠dben. Jãhã hiloḱge ńũroḱ, unrege ạgu go̠dben. Ar bicạr do̠ noa cando noa din hiloḱ iń bicạrtabena. Inạge katha do̠; ma calaḱben. Ado̠kin calao baṛayena, apan ạpin ho̠rho̠kin dhurạuena.

Khange ado̠ ho̠rho̠ ho̠rho̠te ḍe̠ke̠ sanam ce̠ḍe̠yentakina, e̠nre hõ baṅge ńũroḱ. E̠nre hõ kathae, bạgi do̠ bakin bạgiaḱ kana. Kulại hõ jãhãe ho̠ṛe ńamle khan do̠e metakoa. Dose̠ ya, uni manwa ńe̠l ạgulepe, bhalae ho̠rho̠ ńũrket́a se̠ baṅ. Khanko ńe̠l ạgukedege, ado̠ko he̠ć ruạṛenge, ado̠e kulikoa, Cele ya, ho̠rho̠ ńũrket́ae? Ado̠ko metaea, Baṅa ya, bae le̠ṭe̠ć daṛeaḱ kana. Ado̠e metakoa, O̠ko̠e baḍae, nãhãḱe ho̠rho̠ ńũrket́a me̠nkhan, abo do̠ko jo̠mbongea. Ar judi iń nãhãḱ iń ho̠rho̠ ńũrket́a me̠nkhan, onkobo jo̠mkoa. Ado̠ ako jạt onkae galmaraoakoa. Ar uni ho̠ṛ hõ jãhãeko ać ṭhenko se̠nlen khan do̠e metakoa, Dose̠ ya, uni kulại ńe̠l ạguyepe , bhalae ho̠rho̠ ńũrket́ae se̠ baṅ? Ado̠ko metaea, Bae le̠ṭe̠ć daṛeaḱ kana. Ado̠e metakoa, O̠ko̠e baḍae, judi uniye ho̠rho̠ ńũrket́a me̠nkhan do̠ abo manwa do̠ko jo̠mbongea; ai iń baṛe̠ń ho̠rho̠ ńũrle khan, e̠nḍe̠khan onkobo jo̠mkoa. Ado̠ sạri onka jidạ jid ho̠rho̠tegekin tahẽyena. Ado̠ sạri bo̠cho̠r din tiogoḱ dela dili khange korkoṭ sakam do̠ ńũr go̠t́ena. Khange ado̠ uni ho̠ṛe rạskạ go̠t́ena; ado̠ halaṅkate ona sakam do̠ Ṭhạkur ṭhene idi go̠t́ket́a. Ado̠ uni kulại hõe ho̠rho̠ bhagaoen khan, mocateye ge̠r topaḱket́a are idiket́a . Ado̠ Ṭhạkurkin metae kana, Nõḱõe baba, liń ho̠rho̠ ńũr ạguket́a; ńe̠ltalińme. Khange ado̠ bana ho̠ṛaḱ sakame ńe̠lket́tạkina. Ado̠ kulạiye metae kana, Am do̠ bam ho̠rho̠ ńũrlet́a; amaḱ do̠ baṅ sạbudoḱ kana. Ado̠ kulạiye me̠nket́a, Baṅa, baba, ho̠rho̠ ńũr akat́geań.

Ado̠ Thạkure me̠nket́a, Baṅa, bam ho̠rho̠ ńũr akat́a. Am do̠ bhiṭuạḱ ṭhen mundhi do̠ okor ńe̠loḱ kana? Ar nuiaḱ sakam bhiṭuạḱ, ńe̠lme cet́ leka ńe̠loḱ kana. Amaḱ do̠ okor onka do̠ ńe̠loḱ kana? Am do̠m ge̠r topaḱ akat́a; ṭhik se̠ baṅ? Ado̠ uni kulại do̠ cet́ hõ bae me̠n daṛeat́a, tiruṕ hapeyenae. Ado̠ paha tulạmte jaṅgae malaoket́taea are bho̠radea, are metadea, Am do̠ń bho̠ram kana; teheń khon do̠ o̠ho̠ko tioḱ daṛelema. Ar am do̠m haraoente manwa ṭhenem jo̠m ocoḱa, jãhãregeko ńumme se̠ ape jạtko, laga lagateko go̠ćpea, ar go̠ćkate apeaḱ do̠ moela hõ moelako jo̠mtapea, e̠nte am do̠ onkań sarapam kana.

Ona iạte ale ho̠ṛ ho̠po̠n do̠ kulại reaḱ do̠ nit dhạbić moela hõ moelale jo̠met́takoa; onkoaḱ do̠ bale giḍiyet́a, jo̠to̠le suṛe jo̠met́takoa.

Source: Santal Folk Tales

Ạdibạsiko ren Ạyurić Sagram Mạjhiwaḱ Gur Mãhã Disạ Ruạṛ

Sagram Hasda ( Mạjhi) do̠ ạdibạsiko bańcao reaḱ kukmũye uduḱat́koa soman hasaren girobas akan Santal, Urao selet́ aema adibạsiko. Santalko ren nui maraṅ ạyurić do̠ 1901 se̠rmare Rajshahi jilạ, Godagaṛi upạjilạ reaḱ Malkomola ńutuman ṭolare (Ne̠be̠tar do̠ uniaḱ ńutum lekate ‘Sagram Paṛa) rey janam akana. Ako ṭola khon amdaj 20 kilometer sạṅgiń re menaḱ skulrey paṛhaoḱ kan tahẽkana. Baḍae ńam akana, Secondary biḍau e̠moḱ laharege paṛhaoḱ do̠e bạgi akada.

Nunạḱ sạṅgiń hor calaḱ hijuḱ oktere ạdibạsiko lạgit́ thoṛa kạmia mentey aṭkarkeda. Rajnoitik gharońjre bae janam akan rehõ, ạdibạsi hoṛkoaḱ duk-kosṭo ńe̠lte Rajnitigey bachaoana. 1954 sermare hoylen bachao tot́ ( nirbacon) re Juktofront khon bachao ocolena ar Member Of Lagislative Assembly. Rajshahi Sagorpaṛa re 1956 sermare bạisạuleda ‘ Sagram Majhi Adibasi Chatrobas’. 1 January 1957 sermare 40 ṭaka reaḱ bhaṛa oṛaḱre 19 pạṭhuạkoante noa hostel do̠e ehoṕleda. Aćaḱ noa kukmũ lekate benao akan hostelre tahẽkate aema ạdibạsi koṛa siknạt ko hamet́jo̠ṅ akana ar akoaḱ jionre marsal do̠ bamber akana.

Arhõ 1957 sermare Union Porisod re aḍe-pase (Sthanio Sarkar) goṭhon okte Chairman hudạre do̠e bachao ocolena. 1958 sermare aćaḱ kạmi ṭhạ̃i Program re Sastho Complaint Benaore gõrtõṛõć do̠e do̠ho akada. 1962 sermare Nap reaḱ center committee sodosso se̠ member po̠d do̠e ńamkeda, 1970 sermare do̠ nirbacon rey selet́lena. Me̠nkhan nirbaconre Awami League hoṛko ṭhene bhagao ocoena. Ar 1962 sermare Dhaka selet́ goṭa Baṅgladisạmre hulmal eho̠ṕen khan santal hoṛ, urao jạti-gosṭhiko modre aema do̠ disạm ko dạṛ bạgiada. E̠nrehõ Sagram Mạjhi do̠ sanam hoṛko dil ar sạhuse em akat́koa, janam disạm Baṅgladisạre ạidạri salaḱ girobasoḱ lạgit́e udgạuket́koa. E̠ken inạ mo̠to̠ do̠ baṅ 1974 sermare sạdhin Baṅglsdisạmre Program Union Porisod re Chairman po̠drey bachao ocolena.

1971 sermare maraṅ lạṛhại e̠hoṕen khan aema maejiu-baba hoṛko aḍepase disạmre asraiko hataokeda. Uni hõ mit́ okte simạna do̠e paromleda. E̠nre hõ thir se hape do̠ bae tahẽkana. Jo̠to̠ okte ạdibạsiko bujhạuako monejoṅleda, disạm do̠ rukhiại lạgit́e udgạu akat́koa. Acren kạṭić hopontet́ Sudhir Hasda (Mạjhi) hõ lạṛhại lạgit́e kulledea. Rajshasi jiwi buṭạrire hostel benao talate ạdibạsiko talare siknạt reaḱ diuhạ joloḱ iạte ạḍi ãṭe kurumuṭu akada. Uniaḱ nonkan kurumuṭu ar jhũḱ mon khạtir Godagari Upạjilạre ‘ Boṭtoli Adibasi Prathomik Biddaloy’ benao akana, Modhumath re benao akana Biṛla Prathomik Biddaloy. Inạ chaḍa hõ Sitolpur Ạdibạsi bo̠so̠ḱ kan ṭoṭhare ar mit́ṭen Skul do̠e benao akada, Ne̠be̠tar do̠ ona skul do̠ Sarkari kedako.

Arhõ Sagram Mạjhi do̠ aćren thoṛa gatiko joṛaokate un okte reaḱ Ojopaṛa ṭolare 1945 sermare benao rakaṕ kedae ‘ Panihar Public Library, Panihar ṭolare. Baḍae ńam akana nitoḱ ona library re pe ge̠l (30) hajar khon bạṛti puthi, magazine ko tumạl menaḱa. Disạm ren namḍak onoliạ, kobi, sãohet́ Gobesona koaḱ jạruṛaḱ ko jagaokate library do̠ calaḱ kana. Polli Kubi Josim Uddin, Kubi Bonde Ali Mia hõ niạ library member re tahẽkana. Unige pạhil ṭolare murukh je̠no aloko tahẽn ona reaḱ kạmikoe ạyurleda. Aḍepase reṅgeć nacar, murukh gharońj khon gidrạko saṕ ạgukate skulrey bhurti reaḱ bebosthaet́kan tahẽna. Rạsika ạdibạsiko lạgit́ 1976 sermare Baṅgladesh Betar Rajshahi khon akhṛa uchạn reaḱe bo̠ndo̠bo̠set́kan tahẽna.

1976 sermare 6 June khon sạbik lekate santal ar urao ko lạgit́ ‘ MADOL’ uchạn ehoṕena uniaḱ likho̠n go̠ṛho̠nte. Ạdibạsi koaḱ kạuḍi ar sãota lahanti lạgit́ uni do̠ ać apataḱ bhiṭa hõ Sarkar kuṭir silpạ benao lạgit́e aṛaḱade tahẽkana. Nagar sãota somaj do̠ Mr. Mạjhi do̠ Rajshahi ren gunan gidrạ hisạbteko cinhạ akadea.