Pfizer reaḱ arhõ 6 lakh 25 hajar 950 doge ko̠ro̠na ṭikạ do̠ disomte hećena. America kho̠n Covax Fesilities hotete ńamakan niạko ṭikạ Sombar ńindạ Emirates Earlicense reaṅ mit́ṭen uḍauḱ gạḍite Hazrat Shahjalal Antorjatik bimanbondor re hećena. Ṭikạ hećen reaḱ babotre baḍae ocokeda Sastho ar Poribar kollan montronaloy ren mit́ officer. Uni do̠e me̠nkeda, Sombar ńindạ 11 baja 20 miniṭ okte niạko ṭikạ do dhakare hećena.

Source: Bangladesh pratidin

Rạmjit ar Jhade do mit́ atoren kanakin. Rạmjit do ḍher dhao rel gạḍireye deć nạ̃wạ̃i akana. Ar relgạḍi hõ tanmane ńel akat́a; Ar Jhade do baṅ. Eken nase nase hoṛko ṭhene ańjom baṛa akat́a. Mit́ din Jhade do Rạmjite metadea, “Henda ho relgạḍire do bhala cet́ leka ạikạuḱa?”

Rạmjit- Ạḍi mõńj ạikauḱa. Khub ãṭ gạḍi calaoḱre hõ, dećkoḱ jokheć do unạḱ tạpis calaḱkan bam ạikạua. Khiṛki mohnḍam beṅget́le khan dareko ar oṛaḱko dạṛet́ leka ńeloḱa. Menkhan dareko, oṛaḱko ma ńir ruạṛkan. Jhade- Mase arhõ rel gạḍi reaḱ lại idiạń talaṅme. Ạḍi hahaṛa ańjomoḱ kana. Nun maraṅ iń harayenre hõ cedaḱ co relgạḍi bạń ńel akat́.

Rạmjit- Relgạḍi do mit́ṭen do baṅ kana. Boń boń ạḍi utạr gạḍiko toṅgea. Moṭa moṭa mẽṛhẽt́ sikṛiteko toṅgea. Ạḍi mõńj bạḱkuṕaḱ menaḱa. Tinạḱ gạḍi jạruṛa, inạḱko toṅgea. Oka do mõṛẽ gel khon hõ bạṛtige. Mimit́ gạḍi do mit́ṭen hopon oṛaḱ leka. Mit́ kandhagea. Cak do eken mẽṛhẽt́ kana. Ar mẽṛhẽt́ cetante calaḱa, ona mẽṛhẽt́ doko metaḱa rel mẽṛhẽt́. Onate gạḍi ńutum hõ hoe akana “ relgạḍi”. Oka oka cãk calaḱa, ona onate goṭa soṛoḱge rel mẽṛhẽt́ko bạisạu idi akat́a. Laha utạrre do kol oṛaḱ menaḱ. Kol oṛaḱ do Iṅrạjiteko metaḱa “ińjin”. Ińjin ṭhenge caḱlaoić doe tahẽna. Caḱlaoić do Iṅgrạjiteko metaea “ ḍraebhar”.

Ińjin motote do baṅ calaḱa. Daḱ reaḱ bhap ar koela reaḱ daṛetege. Ona kol oṛaḱrege daḱ ar koela bhorao lạgit́ jaega menaḱa. Uni ḍraebhar do koelae jol ocokoa ar daḱ do loloḱa ar bhapoḱa. Mit́ṭeć gol gol jeleń moṅgra coṭ ̣seć menaḱa. Onatege bhap ar dhũạ̃ oḍokoḱa. Tayom utạr kandhare do tạḱnkhiyiće tahẽna. Iṅgrạjite uni doko metaea, “ gard”. Siń marsal lạgit́ do barea jhạnḍi tahẽntaea; araḱ ar hạriạṛ. Tinre gạḍi thiroḱa unre oka do mit́ ghạṛi gạḍi khone ãṛgona ar baṅkhane dećkoḱgea, ar laha seće  beṅget́ baṛaea. Ar mit́ṭeć oḱroṇaḱ tahẽntaea. Tinre gạḍi laṛao hoyoḱa, unre uni garḍ do hurlạia jhạnḍi uni ḍraebhar seće hurlạia. Ḍraebhar do Iṅjine peṭergoda, ar kĩkĩṛ marte saḍea. Lutur hõ tiṅgit́koḱtama. Ona saḍe doko metaḱa “siṭi”. Siṭi lekange gạḍire deć akako doko bujhạua nitoḱ gạḍi laṛaoḱa.

Pạhil do bại bạiteye calaoa. Inạkate doe usạra idia, Ar ona moṅgra khon dhũạ ar bhap ạḍi tạpis khuṭlạu oḍokoḱa. Ar nonka saḍea, khoko khoko, khoko khoko, khoko khoko……Tinạḱ usạra gạḍi calaḱa, saḍe hõ unạḱge usạraḱa. Okare gạḍi teṅgoe hoyoḱ, ona khon thoṛa laha ńoḱ khon ḍraebhar do bại bạite gạḍi doe ṭạhri idia. Gạḍi thiroḱ tora o gạḍire deć akanko doko bidnạḱ godoḱa. Gạḍi teṅgoḱ thạ̃i do Ingrạjiteko metaḱa “ sṭeson”. Ńindạ lạgit́ do mit́ṭen diuhe tahẽntaea. Onarege araḱ, hạriạṛ, sasaṅ- daḱ kãc menaḱa. Onkage tinre gạḍi laṛao hoyoḱa, unre, ona hạriạṛ kãce marsala are hurlạia.

Sṭeson ṭhen gạḍi seṭeroḱ jokheć hoṛ do thoṛa pharak ńõḱregeko teṅgona, Ente ạḍi tạpis hoe ṭhelao hijuḱa. Gạḍo bhitri seć or aderoḱ lekam ạikạua. Jhade- Relgạḍire eken hoṛko dejoḱa? Rạmjit- Hoṛ mako dejoḱge onko chaḍa gại ḍaṅgra, merom, sadom eman janwar hõko deć idikoa. E Jhade – Baṅko don ãṛgona? Rạmjit- Baṅ, onkoaḱ kandha do mẽṛhẽt́ pińjrạ reaḱ kana. Jomaḱ hõ onḍege ader akoa.

Jhade- Ar cet́ko lade idia?

Rạmjit- Ciṭhiko, kaṭko ar emanteaḱ jinis ko lade idia. Sedae do taṛamte ạḍi sạṅgiń calaḱ hoyoḱ kan tahẽna, ar ạḍi laṅga harontem tioga. Nãhãḱ do relgạḍi menaḱte sạṅgiń sạṅgiń ạḍi usạram sen daṛeaḱa, ar sạṅgiń sạṅgiń reaḱ ciṭhi hõ ńam godoḱ kana.

Jhade- Inạgelaṅ galmaraoa. Oka hiloḱ relgạḍiń ńel enhiloḱ beste doń baḍae daṛeaḱa.

Tumạl- Ạkil Ḍahar, pạhil hạṭiń

Calaḱkan sermare cikit́sa bigganre Nobel puruskar kin ńamkeda America ren David Julius ar Lebanon ren Ardem Patapoutian.

Lo̠lo̠-reaṛ soṅ ar jaḱte lo̠lo̠ reaṛ aṭkaroḱ jontro abiskar akat́ iạte unkin do̠ cikit́sa bigganre nobel puruskar 2021 ko emat́kina.

Source: Bigganchinta

Iń Bebenaoić do jotoaḱge;

Ṭhosoḱ mõńj sirjontae sanam sećre.

Coṭ phaelaore ńelkom ma ipilko,

Ah! Dulạṛet́ko mẽt́kintabon.

Adomko huḍiń, adomko hapṛaḱ

Ar kạṭić kạṭićko cumkạḱ cumkaḱ.

Tinạḱ mõńj hõko liplipạuḱ kan,

Gidrại thiroḱ kan onko ńelte ma.

Jhalkaoḱ siń cando ma ńeleme se

Cet́ m̃ońj ho gol-sona cakta leka.

Ńindạ cando do ńindạ lạgit́ge,

Hẽ, hoṛko rạskại dulako kana.

Hisit́ hisit́ hoye hoe ocoyet́

Ar hoṛmotabone juḍasiyet́;

Ńũi daḱ hõ coṅ mõńjge rilạmala,

Sapha ar sebelgey imạń kana.

Jomaḱ ńũaḱ isin aroe lạgit́

Seṅgel benao hõe cet́abon kana.

Ar hoṛo eman casbas lạgit́

Bud ar akel doe emabon kana.

Em akawadińae soros mẽt́kin.

Ar mẽt́ pipnikin, bạń cubạgoḱa;

Em akawadińae mũ ar luturkin,

Alaṅ hõe emdińteń roṛet́a.

Tikin ar jaṅgakin, hoṛmo ińaḱ

E benaoket́te iń ạsul daṛeaḱ.

E gidrạko Isor joharaepe;

Uniaḱ mạhima sabasipe.

Sahebgonj Bagdah Farm reaḱ jumi do̠ aleren ạgil hapṛamkoaḱ sompotti kana. Ale do aleaḱ sompotti ruạṛle hataoa. Aleaḱ sompottire jãhã lekanaḱ EPZ ge bale kho̠jo̠ḱ kana. Ar noa do̠ aleaḱ hok reaḱ dạbi kantalea. Ale do̠ ạn birud jãhãn kạmi hõ bale kạmi akat́a ar baṅle kạmia. Aleaḱ noa lạṛhại se daṅga do̠ ạgil- hapṛamkoaḱ sompotti ruạṛ hataojoṅ reaṅ lạiṛhại kana. Bańcao tahẽn lạgit́ hõ noa lạṛhại do̠. 2016 serma 6 November Shymol Hembrom, Mongol Mardy, Romesh Tudu noko pe hoṛko gur ocolena. Ale do̠ onkoko gur ocoakan reaḱ bicạrle khojkana. Ạḍi usạrage Sahebgonj Bagdah Farm reaḱ cas abadet́kan pea jumire EPZ benao lạgit́ hudis hoeakan ona do̠ bond hoyoḱa ar aleren ạgil- hapṛamkoaḱ sompotti sarkar do̠ aleye e̠m ruạṛalea. Noa do̠e me̠nket́a, Sahebgonj Bagdah farm ren Bhumi Uddhar Songram Committee ren sabha mukhiạ Philimon Baskey.

Sahebgonj- Bagdah farm bhumi uddhar Songram Committee Gobindogonj, Gaibandha bo̠ndo̠bo̠sre Sunibar (2 October) 2021 tikin 12 baja kho̠n Kaṭamoṛ toṭhare mit́ bạisiko hoe ocoket́a. Noa lahare Joypur- Madarpur- Dinajpur Dhaka maraṅ ḍahar se̠ćteko mit́teko hohokeda (michil).

Sahebgonj- Bagdah farm bhumi uddhar committee sabha mukhiạ Dr. Philimon Baskey aḱ ạḱyurte kathae ro̠ṛkeda jatio ạḍibạsi porisod ren central committee ren Presidium member Ad. Bablu Robidas, sadharon sompadok Sobin chondro munda, Treasurer Sudhir Tirkey, Doptor sompadok Subhas Chondro Hembrom, Rajsạhi bibhạg ren Sngothonik sompadok Noren chondro Pahan, ar totho ar gobesona sompadok Manik Soren, Rangpur sodor upạjia committee  sadharon sompadok Bimol khalko, Nawabgonj sabha mukhiạ Bablu Tudu, Bodorgonj ren Dr. Shymol Tudu, Maraṅ somaj sebok Surjo Hembrom, Sadharon sompadok (bharapon) Rezzul Korim Master, Sangothonik sompadok Sowpon Sheik, são- sangothonik Sompadok Sufol Hembrom, Gaibandha jilạ bar Association ren sadharon sompadok Ad- Sirazul Islam Babu, Gaibandha Samajik songram porisod member socib Jahangir Kobir Tonu, Manobadhikar kormi Shah Momin Jinnah, Sondha Malo, Mathias Mardy, Cittoronjon Pahan, Mamlabạdi Thomas Hembrom Uttor Bongo Forum, Dinajpur Shymol Mardy, Sahebgonj- Bagdah farm bhumi uddhar songram committee sã goṛoić Treasurer. Noa sabha do̠e ạyurkeda Priscilla Murmu.    

Sahebgonj- Bagdah- farm bhumi uddhar songram committee reaṅ benar ante bo̠do̠bo̠s akan bạisi se̠ sabhare Rajshahi, Naogan, Dinajpur ar Gaibandha ṭotharen ạdibạsi santal ạḱyurko selet́ mońj mońj sãotako ren aema hoṛge selet́ko tahẽkana.   

Sawalia se̠ (bokta) do̠ko me̠nkeda, Sahebgonj Bagdah farm ṭoṭha kho̠n EPZ benao talate ạḍibạsi laga ńir ocoḱ reaḱ mit́ maraṅ hudis-cintạ hoeakana. Noa pea cas- abad jumire ạḍi utạr jo̠maḱ upjạ kana. Sahebgonj Bagdah farm reaḱ noa jumire EPZ baṅ hoyoḱma. Hoṛmore mit́ phoṭa mãyãm tahẽn dhạbić ale do̠ aleren ạgil-hapṛamkoaḱ sompotti ruạṛle hataoa. Saṭ marte Gobindogonj Sahebgonj Bagdah farm cas-abad hasa se jumire EPZ benao reaḱ prokolpo bạtilkate 2016 serma reaḱ 6 November reko gur ocoakan pe ạdibạsi santal gharońj selet́ gur ar hạn ocoakan jo̠to̠ gharońrenko lek lekate khoti purun reaḱ hõko dạbikeda sawaliako.

Tumạl- Ipnews

Ńelme se ona ḍoṅ ḍoṅ catom leka do cet́ dare kan baṅ! Buṭạ ṭhen ma ạḍi moṭa. Ar bại bạite coṭ seć do nanha idigea. Ona do tale darege. Noa dare do onkage ạḍitet́ ạḍi usula. Ḍạr do bạnuḱa. Haṛamaḱ sakam do latar seć lạṛkujoḱa, ar baṅ haṛamaḱ do coṭ sećge sojhekoḱa.

Baṅ ḍạroḱre hõ sakam do lạṭu lạṭua. Nawanaḱ do ạpạṛi leka oḍokoḱa, sikuṕ bini lekage. Sakam do jeleń jeleńgea, ar sirkote jeret́ mit́ akana. Haraḱ sãote onkage or sikuṕ bini leka bại bạite pasaṛoḱa. Hara mucạt́-kate ma cap capayenge. Sakamtet́ do bạgṛạ mucạt́re sakamoḱa. Bạgṛạ do nalagea; aṛe aṛete do kata ḍaṭa leka menaḱa. Geget́ hõ geget́gea. Jãhãtis tale sakam bạgṛạre saṕkatem tul lega akat́a? Geget́ leka ạikạuḱa. Kạṭić kạṭić gidrạ botorlen khan cet́ leka eṅgat se apatreko hạṛuṕ jaladoḱa onkage sakam do bạgṛạre tire leka darere hạṛuṕ akana. Ohom or chaḍaolea; khạjuk baṅ sea akan khan.

Tale sakamte biniko benaoa, ar pạṭiạ hõko galaṅa. Gidrạ̣ko do pepṛẽt́ hõko benao eneća, ar saḍe hõ bejãeko ocoea. Cet́ leka saḍea? Pẽ… se baṅ? Sakam goćlen khan sahan lạgit́ko tioḱjoṅa. Sakamte jãhãtis bagwan hõko eṭeda ar kumbạ hõko daba. Jo hõ baṅ kạṭića. Unạḱ usul khon bohoḱre ńuram khan bohoḱ posaḱkoḱtama. Balelen khan, aćtege ńuroḱa; adom hoṛ do ńindạ hõ ńindạ tale bele lạgit́ tale dareko horhokaḱa. Gabetet́ko copoć joma. Copoć jokheć ḍaṭare ganthar do bogete sogeḱa. Gabetet́ do roḍoćkate holoṅ são mesalkateko piṭhạia, unre ona piṭhạ doko metaḱa,  “tale piṭhạ”. Daka sãote hõko mesala unre doko mena, “tale daka”.

Berel tale jo bhitrire rasa tahena, ona rasare leńjer ńõḱ khuṛus khuṛus guli tahena, ona hõ bejãe sebela, ona do bhạti kana, ona doko metaḱa, “tale bhạti”, ar rasatet́ doko siṛuba, heṛemgea. Poṭkoć jaṅem maḱ paṛaḱket́a, ar bhitritet́re ona bhạtige unre do judạge sebela. Gidrạ do ạḍiko kusiaḱa; ńam baṛaeako. Daretet́ do paṛaḱkate oṛaḱreko lagaoa.

Tumạl- Ạkil Ḍahar, pạhil hạṭiń

                                             Meskoć

                                                  (5)

Gidrạ: Baba Iń do̠ Iskulte do̠ bạń calaḱa,

Baba: Cedaḱ bạbu cedaḱ bam calaḱa,

Gidrạ: Ente bare, aleren mahasoe cet́ge bae daṛeaḱa jo̠to̠ge aleye paṛhao ocolea.

                                                    (6)

Mahasoe barea gidrạ aema kurumuṭu kate rehõ unkin asketiạ gidrạ cetat rehõ/ hisạb do̠ bạkin cet́leda,

Mit́din unkin gidrạ ul dare rekin deć kate ulkin tiạḱkan tahẽkana, un okterege ńelme uni mahasoe onḍem seṭer got́ena, Ado̠ gidrại metat́ kina, Iń pea ul emạńben, Gidrạ do̠ pea ul kin emadea, Arhõ uni mahasoe do̠e metat́kina, Den barea ul emạńben, Unkin do̠ arhõ barea ulkin emadea.

Niạ dhao uni mahasoe do̠e metat́kina, Nitoḱ lạiben se iń ṭhen tinạḱ ul menaḱa? Ṭhik takrege e̠ṭaḱ gidrạ do̠e me̠n go̠t́keda E ya alom lạia, nonkate oṅko/ hisạbe cet́ alaṅa.

Mit́ṭen raje tahẽkana ar uniren mit́ṭen sipạhi. Uni sipạhi do̠ pạcri duạr ṭhene pahraea; ado̠ jãhãe ho̠ṛ jãhãnaḱ ạkriń lạgit́ raj ṭhenko ạgui khan do̠e metakoa, Noa jinis tinạḱ damoḱtapea, ona reaḱ adha dampe emań khan, e̠nḍe̠khan raj ṭhen bhitri mo̠ho̠lteń bo̠lo̠ ocoapea; ar bape emań khan do̠ o̠ho̠ń bo̠lo̠ ocolepea. Ado̠ cekaeako be̠cara? Re̠ṅge̠ć ho̠ṛ bako ạkrińle khan ma din gujrạn baṅ calaḱtako. Ado̠ khange adha damko go̠ḱaea, to̠be̠ko bo̠lo̠ḱa. Nonkage uni sipạhi do̠ je kichu o̠nḍe̠ calaḱ ho̠ṛ do̠, sanam ho̠ṛgeye onkakoa. Ado̠ khange mit́ dhao do̠ mit́ṭen kẽ̠oṭa maraṅ utạr hakoe jhạlikedea; ado̠e me̠nket́a, Nui hako do̠ raj ṭhen iń ạkrińea, ḍher dam nãhãḱ hoyoḱtińa. Onka bundis baṛakate uni kẽ̠oṭa do̠e idikedea. Ado̠ ona pạcri duạr ṭhe̠ćren sipạhi do̠e metae kana, Okatem bo̠lo̠ḱ kana bin hukumte do? Hape teṅgonme. Ado̠ uni kẽ̠oṭa do̠e me̠nket́a, Raj ṭhen hako ạkrińe lạgit́ iń bo̠lo̠ḱ kana.

Ado̠e metadea, Nui hako tinạḱe damoḱtam, ona reaḱ adha dam emańme. Cet́ kichu ona do̠ bam baḍaea? Nun din khonem ạguyet́kore hõ̠ bam baḍaea? Ạnạṛiḱ kangeam? Khange ado̠e me̠nket́a, E̠ baba, baḍae do̠ń baḍaegea, me̠nkhan, bana am ṭhen iń ne̠hõ̠roḱ kana, niạ dhao do̠ ikạkańme. Nui hako reaḱ purạ dam ińge hatao ocoańme; alo onka do̠m pajhetińa; ikạkạńme baṛe̠. Jãhã hiloḱ iń ạguleko khan do̠ unre do̠ń emamgea, o̠ho̠ń e̠ṛe̠mea; me̠nkhan niạ dhao do̠ ikạkạńme. Me̠nkhan sipạhi do̠ bae ańjo̠mlet́taea; unạḱe ne̠hõ̠renre hõ̠ bae ikạledea. Ado̠ khange uni kẽ̠oṭa ać mo̠ne̠reye bujhạu baṛaket́a, Judi nui hako bạń ạkrińle khan do̠ nãhãḱe seaḱtińa. Nonka hudis baṛakate ado̠ bạpuṛićkate adha dame go̠ḱadea. Khange ado̠ bhitri mo̠ho̠lte raj ṭhene bo̠lo̠yena. Ado̠ raje kuli kedea, Cele ho, okatem he̠ć akana? Ado̠e me̠nket́a, Hakoń ạgu akadea; nui hako reaḱ dam emańme. Ado̠e metadea, Nui hako do̠ tinạḱem damea? Ado̠ uni kẽ̠oṭae me̠nket́a, Iạ raja saheb , nui hako reaḱ dam do̠ mit́ sae ṭheṅga dal.

Ado̠ khange raje me̠nket́a, Henda kẽ̠oṭa, cedaḱ onka do̠m dame kana? Nonkan dam do̠ nun jug iń hoyoḱ kana, me̠nkhan bań ańjo̠m akat́a. Onate ạḍi hahaṛań ańjo̠met́ kana. Mase̠ noa reaḱ bhe̠d bhaṅgaoańme. Noa do̠ cet́ lekan dam kana? Ado̠e lạiae kana, Noa reaḱ bhe̠d do̠ noa kana: jãhãe ho̠ṛge jãhãnaḱ ạkriń lạgit́ am ṭhenle hijuḱ khan, uni pạcri duạrren sipạhi do̠ bae bo̠lo̠ ocoalea. Ado̠e metalea, Noa jinis tinạḱ damoḱtape, ona reaḱ adha dam emańpe, e̠nḍe̠khan iń bo̠lo̠ ocoapea. Onkae metalea; ado̠ adha damle go̠ḱaea, to̠be̠ e̠ne̠ć am ṭhenle bo̠lo̠ daṛeaḱ kana. Ar teheń hõ̠ adha dam ạuriń go̠ḱae hạbić do̠ bae bo̠lo̠ ocoań kan tahẽkana, onate onka do̠ń dam akadea; mit́ sae ṭheṅgam dalliń khan, e̠nḍe̠khan ona reaḱ adha, bar isi ge̠l ṭheṅga do̠ unim dalea.

Khange ado̠ noa kathae ańjo̠m cabaket́ khan, raj do̠e raṅgaoente uni sipạhige mit́ sae bẽ̠te dalkedea, ar cạkri khon hõ̠e barkhas utạrkedea.  

Tumạl- Santal Folk Tales

Darakan Sunibar (2 October) kho̠n primary reaḱ tesar ar ponaḱ kelas ren pạṭhuạ gidrạkoaḱ haptare mit́ din bo̠do̠lte bar din kate kelas hatao hoyoḱa. Nãwã somoysuci lekate, tesar kelas ren pạthu gidrạkoaḱ kelas do̠ Robibar ar Lukhibar, Ar ponaḱ kelas ren pạṭhuạ gidrạkoaḱ do̠ Sunibar ar Budhbar kate kelas hoyoḱa. Budhbar (29 September) Prathomik sikkha odhidoptor do̠ nãwã somoysuci do̠e so̠do̠r akada.

Inạ chaḍa hõ Moṅgolbar do̠ pạhil kelas ren ar Sombar do̠ dosar kelas ren pạthuạ gidrạkoaḱ kelas hoyoḱa. Mõṛẽaḱ kelas ren pạṭhuakoaḱ do̠ lahate lekage din hiloḱ kelas hoyoḱa. Mõṛẽaḱ kelas ren pạthuạkoaḱ do̠ ṭifin tayom hoyoḱa. Ar eṭaḱ kelas ren pạṭhuakoaḱ do̠ setaḱ bela kelas hoyoḱtakoa.  

Tumạl- Sonali sangbad

Taṛam do̠ jo̠to̠ kho̠n alga hoṛma bhańjao (biyam) kana. Jo̠to̠ umer ren hoṛko lạgit́ ạḍi jạruṛaḱ hõ kana. Me̠nkhan tin ghạṛić taṛam hoyoḱa se̠ taṛam reaḱ speed cet́ hoyoḱ jạruṛ, ona babotre ḍher hoṛge babon pusṭạua. Hoṛmo bhańjao hisạbte taṛam reaḱ po̠rho̠ do̠ cet́ kana ar tin ghạṛić taṛam lekhan po̠rho̠ ńamoḱa ona babotre baḍae ocoakada phaysiotherapy  consultant  Umme Sayla Rumki.  Din hiloḱ taṛam lekhan koṛam reaḱ ruạ, Diabetes, jaṅ khoy (Osteoporosis) rog reaṅ jiwi ko̠ṭo̠ḱ ko̠m ńõ̠go̠ḱa. Din hiloḱ taṛam lekhan  jel sir reaḱ daṛe ar sahao daṛe bạṛtiḱa. jaṅ reaṅ goṭhon hõ keṭećjo̠ḱa.  

Tin okto taṛam jạruṛa:

Dinạm din komkate 30 miniṭ taṛam jạruṛa. Diabetes rogiko do̠ inạ oktete 40 kho̠n 45 miniṭ taṛam hoyoḱ jạruṛ kantakoa.  Bhạrti ho̠ṛmo̠ tahẽn okte pạhil pe̠ cando 15 miniṭ kateć, dosar pe cando 20 miniṭ kateć ar mucạt́ pe cando do̠ 10 miniṭ taṛam jạruṛa. To̠be̠ okoekoaḱ umer 40 bo̠ho̠r kho̠n cetan ar aema din kho̠naḱ jãhãn hoṛmo bhańjao se̠ hoṛmo khaṭao são jo̠po̠ṛao bạnui, onkan hor̠ko do̠ taṛam lahare bissegoggo aḱ solha hatao hoyoḱtakoa. Arhõ e̠ṭaḱ se̠cbon ńe̠lle khan, Okoekoaḱ hor̠mo̠ reaḱ o̠jo̠n ḍherge, onkoko hõ taṛam e̠hob lahare stretching kate, jel reaḱ sir jirạu ńõ̠ḱ hoyoḱtakoa. Baṅkhan stretching babotre baḍae hataojo̠ṅ lạgit́ physiotherapy koaḱ solha hatao hoyoḱa.

Jãhãe hoṛkoge hoṛmo se̠ć kho̠n napae tahẽn lạgit́ haptare ko̠mkate 150 miniṭ taṛam hoyoḱtakoa. Haptare 30 miniṭ kate 5 din hõ bon taṛam daṛeaḱa. Okto baṅ tahẽlen khan dinre 10 miniṭ kate pe̠ dhao taṛam lekhan hõ hoyoḱa.

Jogging:

30 miniṭ taṛam tayom 10 miniṭ jogging daṛeakabon. Jogging reaḱ bhe̠d do̠ mit́ jaegare teṅgo kate pạhilre jo̠jo̠m jaṅga, inạ tayomte leṅga jaṅga tulkate do̠n hoyoḱa. Jogging lạgit́ ạḍi maraṅ jaega reaṅ jạruṛ do̠ bạnuḱa. Oṛaḱre jãhã ṭhen mit́ jaegare teṅgu kategebon jogging daṛeaḱa. Pạhilre do̠ bại bạite , inạ tayom do̠ usạra usạra.  Okoe koaḱ do̠ bạṛti o̠jo̠n onko do̠ pạhilre adha miniṭ kate jogging ako. Inạkate hoṛmo reaḱ halot bujhạu kate bại bạite okto do̠ bạṛti idiy hoyoḱa.

Taṛam calaḱ lahare:

Taṛam okte sukrạj (aramdayok) cạṭki ho̠ro̠ḱ hoyoḱa. Ho̠ro̠ḱ bande̠ kicrić hõ thoṛa sukrạj ar ḍhilạṅ dholoṅ ńõ̠ḱ ho̠ro̠ḱ jạruṛa. Setoṅ kho̠n e̠raṅoḱ lạgit́ setaḱ paha- poho okte ar ạyupbela cando hạsur tayom taṛam lạgit́bon oḍok daṛeaḱa. Taṛam tayom thoṛa stretching jaruṛa; je̠mon jaṅga kạṭuṕ cetanre teṅgolen khan tayom reaḱ jel sir ko hasua. To̠be̠ o̠jo̠n ko̠m lạgit́ taṛam se̠ jogging do̠ aso̠laḱ baṅ kana. Balance thik do̠ho̠e jạruṛa. Niạm kate niṭ akat́ oktere hoṛmo reaḱ kelori hisạbte jo̠m hoyoḱa.

Source: Ajkerpatrika