Ohogeń Leṭećlea

Ohogeń leṭećlea,

Caḱ onka dom roṛet́a

Hoṛko daṛeaḱgea

Caḱ am bam daṛeaḱa?

Leṭejre hõ baṅre hõ,

Kurumuṭuime arhõ,

Mit́ dhaore baṅre hõ

Leṭejam sae dhaore tho!

Ohogeń leṭećlea,

Onka bam roṛ baṛaea;

Asket lelha gidrạge,

Bạnuḱtaea cet́ dhejge.

Iń doń ńelet́me kana,

Onkan gidrạm baṅ kana;

Cedaḱ adom monea,

Ohogeń leṭećlea.

Daḱtem bololen nạ̃hi

Paeraḱ cedam hako sik,

Mit́ bar dhao gurlen nạ̃hi!

Taḱṛam cedam hoṛ sik,

Khaṭaolen bam caṭaoa?

Casle nạ̃him arjaoa.

Ma tobe nit moneme

Alom hapeḱ dhurạuḱme.

HSC Form Purun Reaḱ Okto Arhõ Ḍherena

2021 serma ren HSC pạthuạ koaḱ form purun reaḱ okto do̠ 31 October dhạbić ḍher hoe akana. Ona sãote fee e̠m sod reaḱ okto hõ 2 November dhạbić ḍher hoe akana. Niṭ akan okte nạpitre jopoṛao akan siknạt gaota ren pạthuạko form baṅko purun daṛeaḱ khan noa reaḱ dạyik do̠ ona siknạt gaota ren Maraṅ mahaose ge hatao hoyoḱ taea.

Calaḱ kan serma reaḱ Higher Secondary School Certificate (HSC) biḍạu do̠ Disember cando reaḱ 2 tạrik kho̠n ehoboḱa ar biḍạu mucạdo̠ḱa Disember cando reaḱ 30 tạrik.

Tumạl- Korotoa

Rạskạ Do Mońj Bagane Lagaokeda ( Dosar Porbo)

Daḱ kedae, Ạḍi ãṭe daḱ keda. Tinrey daḱ keda unre Rạskạ do itạ ko baganrey erkeda. Daḱ iạte uniaḱ cas do haraentaea. Rạskạ do bagan babotre puthiye paṛhaokeda. Puthire olakan tahẽkana:

Lembo ar papita bhage jo kana. Am do lembo ar papita reaḱ gạchi sarkari bagan khonem hatao daṛeaḱa. Sumie menkeda, “ Alaṅ do lembo ar papita jạriṛalaṅ kana. Alaṅ do daḱlere lembo ar papitalaṅ rohoea. Alaṅ do apnaraḱ baganre lembo ar papitalaṅ rohoea. Am do sarkari godam khon lembo ar papita ạguime.” Rạskạ do sarkari baganteye calaoena. Rạskạ do baganren bạbuye metadea, “ Iń do mit́ṭen lembo ar pea papita reaḱ gachi jạruṛạń kana. Iń do daḱ lekhan lembo ar papita rohoe iń menet́ kana.”

Rạskạ do sarkari bagan khon lembo ar papita reaḱ gạchie kiriń ạgukeda. Sumie menkeda, “ Iń do oṛaḱ pheḍre lembo reaḱ dareń rohoea.” Rạskạ do ar hõ puthiye paṛhaokeda. Puthire ol akan tahẽkana:

Lembo reaḱ dare oṛaḱ pheḍre rohoeme. Oṛaḱ reaḱ mạilạ daḱ lembo darere dulme. Lembo dare lạgit́ do mạilạ daḱ ạḍi bhagea. Bar moka osar ar bar moka khạndri ghaḍlaḱ laeme. Joto dare lạgit́ bar moka khạndri ar bar moka osar ghaḍlaḱ besa. Jote dare lạgit́ bar moka khạndri ar bar moka osar ghaḍlaḱ benaome. Noako ghaḍlaḱre sea akan khot ar hasa ubme. Ghaḍlaḱre dare rohoeme. Ona iạte Rạskạ do bar moka osar ar bar moka khạndri ghaḍlaḱe lakeda. Uni do oṛaḱ sorre ghaḍlaḱe benaokeda. Uni do ghaḍlaḱre sea akan khot ar hasae uṕkeda. Uni do ghaḍlaḱre lembo reaḱ dareye rohoekeda. Uni do lembo darere mạilạ daḱe dulkeda. Uniye menkeda, “ Oṛaḱ reaḱ’ mạilạ daḱte noa lembo dare haraḱa.”

Uni do pea papita dare hõe rohoekeda. Uni do pea ghaḍlaḱe lakeda. Noako ghaḍlaḱ do bar moka osar ar bar moka khạndri tahẽkana. Uni do ghaḍlaḱre sea akan khot ar hasae uṕkeda. Ona tayom uni do dareye rohoekeda. Uni do darere mạilạ daḱe dulkeda. Uni do papita darere oṛaḱ reaḱ mạilạ daḱe dulada. Ona do haraena. Daḱte papita dare do ạḍi haraena. Rạskạwaḱ baganre mońj lembo ar papita tahẽkana. Rạskạ ar Sumi do ạḍi ḍher papita ar ḍher lembokin jomkeda. Aḍepaseren hoṛko Rạskạwaḱ mońj bagan ko ńelkeda. Aḍepaseren hoṛko lembo ar papita reaḱ dare ko ńelkeda. Aḍepaseren hoṛko menkeda,

Rạskạwaḱ bagan do ạḍi mońja.

Uniaḱ lembo dare do ạḍi mońja.

Uniaḱ papita dare do ạḍi mońja.

Uniaḱ bagan do mońjgea.

Rạskạ doe husiạr gea.

Uni doe paṛhao daṛeaḱ kana.

Paṛhaote uni do mońj kathae cet́keda. Abo hõ bon paṛhaoḱa. Abo hõ husiạr hoṛbon hoyoḱa.

Source: Husiạr Rạskạ, tesar puthi