Sedae jugre kathae nonka hoelena, baṅma, mit́ṭen tili haṛam dạuṛạre sunum jạluạ sajaokate atote ạkriń lạgit́e calaḱ kana. Ado̠ calaḱ jo̠khe̠ćge mit́ṭen ho̠ṛe ńamkedea, ado̠e metae kana, Henda ho,iń ṭhen gutim tahẽkoḱa? Ado̠e me̠nket́a, Hẽ̠ e̠nte̠m do̠ho̠ń khan do̠ń tahẽna. Ado̠e me̠nket́a, E̠nḍekhan de̠, noa sunum dạuṛa dipiltińme; noa dipil reaḱ do̠ nãhãḱ bar ana poesań emama. Ado̠e me̠ket́a, Acha bogege, e̠nḍe̠khan iń dipiltama. Khange sạri ado̠e dipilket́taea; ado̠ calaḱ tuluć uni ho̠ṛ do̠ ho̠r ho̠rteye hudis idiyet́a, je bar ana poesa nãhãḱe emańa; mit́ anate do̠ khorcań kirińa; inạ do̠ nãhãḱ iń jo̠ma ar mit́ ana sarejo̠ḱa; inạte do̠ sim iń kirińkoa; ado̠ eṅga iń do̠ho̠koa, ado̠ko belea arko busạḱkoa; ado̠ko haralenkhan kalo̠ṭ do̠ eṅga iń do̠ho̠ idikoa ar sạnḍi do̠ń gayakoa, ado̠ onko gaya do̠ harakate cạcạr anateń ạkrińkoa; ona poesate ado̠ me̠ro̠m iń kirińkoa, khange me̠ro̠mko busạḱlenkhan do̠ pạṭhi do̠ eṅga iń do̠ho̠koa ar boda do̠ń kạsikoa, ado̠ onko kạsi ạkrińkate ona ṭakate do̠ gại iń kirińkoa; ado̠ gạiko busạḱlenkhan bạchi mĩhũ do̠ puńjigeń do̠ho̠koa, ar ḍaṅgra do̠ń ko̠ṭe̠ćkoa; ar ado̠m ḍaṅgra do̠ do̠ń ạkrińkoteń ṭakaea, ar ado̠m ḍaṅgrate do̠ bitkil iń kirińkoa; ado̠ onko bitkilko busạḱlenkhan kaḍa ho̠po̠n do̠ bạḍgeń do̠go̠koa, ar kaḍa ho̠po̠n do̠ harakateń ko̠ṭe̠ćkoa, ar jumi bạṛi kirińkateń sioḱa; ado̠ cas bas hoeyena me̠nkhan do̠ń bạhujońa, ado̠ gidạr pidạrko hoyoḱtińa; ado̠ko haralenkhan ghuṭ ghuṭko ńir baṛaea; ado̠ khange iń do̠ kạmi khon iń hẹć go̠doḱa, ado̠ dạtạuni baṛakate do̠ń duṛuṕ thirkoḱa, ado̠ gidrạkoko metańa, Ma baba, daka jo̠m lạgit́ ạbukoḱme; ado̠ un jo̠khe̠ć bo̠ho̠ḱ iń ruku go̠da ariń me̠na, Ũhũḱ, ũhũḱ, bań jo̠ma ya. Onka hudis baṛakate ado̠ ũhũḱ ũhũḱ̃e me̠n jo̠khe̠ćge sunum dạuṛạ do̠ bo̠ho̠ḱ kho̠n ńũr go̠t́ena, sunum ṭhili hõ posaḱ ge̠je̠r go̠t́ena. Khange ado̠ uni tili do̠ haṛame ruhet́ go̠t́kedea, Durre̠, cet́ leka mạńjhim dipil akat́a? Sanam sunumem loksanket́tińa mit́ poesa reaḱ hõ ạurilań ạkrińrege. Am do̠ jo̠to̠ sunumem hirićket́a, mit́ poesa hõ o̠ho̠lań e̠mlema, arhõ bickom nawa sunum reaḱ dam nit́gelań ạgumea.

Ado̠ khange uni ho̠ṛe me̠nket́a, Nawa sunum reaḱ dam do̠ o̠ho̠lań e̠mlema. Am do̠m me̠net́a, je̠ ạḍi utạr sunumem loksanket́tińa, me̠nkhan amaḱ khon do̠ ińaḱge bạṛti loksan akantińa. Khange ado̠ uni tili haṛam do̠e hạriạ̃ busiạyena. Ado̠ khange bogetekin jhogṛayena. Khange ado̠ uni ho̠ṛe me̠nket́a, Alom ruheda onka do̠, bana ho̠ṛaḱlań hisạblegi. Judi amaḱ ḍheroḱ khan, e̠nḍe̠khan ona reaḱ dam ińiń emama; ar judi ińaḱ ḍheroḱ khan, e̠nḍe̠khan ona reaḱ dam ạikhạ emạńme.

Ado̠ khange sạri uni tiliye me̠nket́a, Acha bogege, malaṅ hisạba. Ar uni tili tho̠ bae baḍaelaḱa, je nui ho̠ṛ do̠ nonka onkae hudis akat́a me̠nte. Ać do̠e bujhạuet́a, je nui ho̠ṛ ma e̠ke̠nnaḱgeń ạgulede, cet́ hõ tho̠ bạń ńe̠llet́aea, ado̠ cet́e hisạb ocoḱ lạgit́?  Ado̠ uni tiliye me̠nket́a, je, ińaḱ do̠ bar ṭaka reaḱ sunum tahẽkantińa, arm it́ ana reaḱ jạluạte̠t́ ; noam loksanket́a; den, bar ṭaka mit́ ana e̠moḱme. Ado̠ uni ho̠ṛe me̠nket́a, Acha, ado̠ ińaḱ iń lạiama, ona hisạbtińme. Khange ado̠ uni ho̠ṛ do̠ poesa ńam khone e̠ho̠pket́a, poesa khon do̠ sim, sim khon do̠ me̠ro̠m, ado̠ o̠ne̠ cet́ lekae hudis ạgulet́, arc et́ lekateye baḍhao ocoket́ , ar cet́ leka ro̠ṛkate ona sunum dạuṛại ńurhạ posaḱ ocoket́tae. Onako jo̠to̠e lại cabawade khan, uni tili haṛam do̠e landa go̠t́ket́a; ado̠ ghạṛi ghạṛige muluć muluće landayet́ kana. Ado̠ onka lekate jo̠to̠ kathae lại cabaket́ khan do̠e me̠nket́a, Ma se̠ bhala, o̠ko̠eaḱ ḍher loksanentalaṅa? Khange ado̠ uni tili haṛame me̠nket́a, Iń do̠ń hisạbket́talaṅa, je bana ho̠ṛaḱ somangea, bana ho̠ṛaḱ bara bạrige loksanentalaṅa. Cet́laṅ cekaea?  Amge ado̠ bana ho̠ṛaḱem loksanket́ khan, cekaealaṅ nitoḱ do̠? Ma bogeyentalaṅa. Ado̠ muluć muluće landakatekin apan ạpinena.

Ado̠ onate nit hạbić Ho̠ṛ ho̠po̠nko me̠na, Tili jo̠ṛ leka alom aodaea, o̠ho̠m le̠ṭe̠ćlea.

Source: Santal Folk Tales

Gaibandha Gobindogonj-Dinajpur reaḱ kaṭamoṛ ṭoṭhare Santalkoaḱ jumire orthonoitik oncol ( kạuḍi oncol) baṅ hoe ocoe lạgit́ 19 August lukhibar manobbondhon, ar sabha do̠ hoe purạuena. Madarpur kho̠n Ạdibạsi santalko do̠ bikhob michil ( mit́te teṅgo daram) oḍoḱ kate aema ḍahar kore ạcur baṛakate ona sabhare ko selet́ena. Sahebgonj Baghdapharm bhumi Udhar Songram committee ren sabha mukhiạ Dr. Philemon Baske aḱ ạyurte sabhare mit́ bar kathako roṛkeda, Sahebgonj Baghdapharm bhumi udhar songram committee ren bharapon sadharon sompadok Rezaul Korim Master, soho sangoṭhonik sompadok Sufol Hembrom, soho Treasurer Pricilla Murmu, Bhumi udhar songram committee ren matha Sopon  Shekh, Kerina Hasda, Nurul Hazi, Thomas Hembrom, Sucittra Murmu Trisa, Sodosso Moynul Hoqe ar Olivia Hembrom seṭere tahẽkana.

Sawaliạ do̠ko me̠nkeda, 2016 serma reaḱ November re santalko upạr un ok̠teren MP Principal  Abul Kalam Azad, Mohimagonj Rangpur Cinikol ren MD selet́ Sthanio Prosasonaḱ goṛote polis koaḱ umuloḱ thạ̃ire sthanio se̠ ona ạḍe̠pase̠ re̠n sontras ( uchur) ko do̠  ạḍi bo̠to̠r ko jhapṭaoena. Ar tahẽn oṛaḱre seṅgel, jinisko rạput, luṭpaṭ kedako.  Noa ghoṭnare pe̠a santalko goć ocoakana ar aema santalko akham kate teheń hõ jion jińgiko khemaoet́kana. Noa okte mit́ṭen sarthonesi se̠ abge ṭoṭha phad kate Bengalikoaḱ bapa purkhạ casa abad jumire EPZ se̠ orthonoitik oncol (Kạuḍi oncol) lạgit́e  goṭa akada.

Sawaliạ do̠ko me̠nkeda,  Ale do̠ Ạdibạsi- Bengaliko do̠ pe̠a santalkoaḱ mãyãmte hamet́ akan bap-dada aḱ casa bad jumire lahanti ńutumte pe̠a casa bad jumi bạbilonḍ kate birodhi  roṛakan prokolpo cetanre birudre ạḍi bạṛićko dusạukeda. Onko do̠ arhõ ko me̠nkeda, Maraṅmontri lại jạhir akat́ leka pe̠a cas abad jumi  bạbilonḍkate jãhãnaḱ tear se̠ mit́ inchi abad jumi hõ baṅ bạgiat́ hoyoḱa. Ale do̠ ạdibạsi santalkoaḱ noa sạriaḱ reaḱ dạbite jo̠to̠ko goṛo gopoṛo lagit́le  metako kana.  

Source: IP News

Ko̠ro̠na mãhãmạri khạtir 2021 serma reaḱ Secondary School Certificate (SSC), Higher School Certificate (HSC) ar ona man reaḱ biḍau e̠moḱ koaḱ practical khata jomae lạgit́e batlao akadae Secondary ar High School Sikhnạt Board. Moṅgolbar (17August) Board reaḱ Website re noa batlao e̠m akana. Secondary ar High School sikhnạt board ren ạyurić S M Amirul Islam me suhi akat́ mit́ dharwạḱ  re me̠n akana, Ko̠ro̠na khạtir calaoen serma reaḱ SSC se̠ ona man reaḱ ar HSC se̠ ona man ren biḍạu e̠moḱkoaḱ do̠ khạli bachao akat́ bisoi cetanre bidạu do̠ hoyoḱ takoa, onka leka bachao akat́ bisoi reaḱ practical khata se̠ note book do̠ hatao jạruṛa. Arhõ me̠n akana, SSC se ona man ren bidạu e̠moḱ gidrạko do̠ akoaḱ bachao akat́ jo̠to̠ bisoi reaḱ khaṭote e̠makan puthi reaḱ sucire  ulek akan practical reaḱ jãhãṭaḱ barea practical khata (note book) tear kate nij nij sikhnạt gãotare jomae hoyoḱtakoa. Onka lekage HSC se̠ ona man reaḱ biḍạu e̠moḱ gidrạko do̠ akoaḱ bachao akat́ bisoire  jo̠to̠ ciṭhi o̠po̠l  (protipotro) lạgit́ puthi reaḱ sucire ulek akan practical reaḱ barea kate khata jomae hoyoḱa. Noa ko talare hõ jãhãe sikhnạt gidra 2021  serma reak khaṭote e̠makan puthi reaḱ suci lekate protipotro re barea kho̠n bạṛti practical reaḱ kạmi purạu akat́  e̠nḍe khan hõ ona  practical khata se̠ note book joma daṛeaḱako.

Source: BSS News

Mit́ṭen koṛa do̠ ạḍi sạṅgińreye tahẽkana. Khange bạhui dạṛket́tae khan uni koṛa do̠ bạhu pańjage nạihạrteye mohnḍayena; me̠nkhan bir ho̠rteye calaḱ kan tahẽkana. Ado̠ ho̠r aṛerege, kathae, mo̠ro̠n aṛaḱ nạ̃ṛĩye ńel ńamket́a. Ado̠ mo̠ne̠ mo̠ne̠teye me̠noana, Noa mo̠ro̠n aṛaḱ do̠ bań jo̠ma; e̠nte noań jo̠mle khan do̠, nạihạrteń calaḱ kana, ado̠ nãhãḱ o̠nḍe̠ oka laćre daka do̠ń jo̠ma. Onae niṭoante mo̠ro̠n aṛaḱ do̠ bae jo̠mlet́a. Ado̠ o̠nḍe̠ kho̠nge nạihạrte do̠e mohnḍa idiyena; ado̠e se̠n tioḱket́a nạihạr do̠. Ado̠ parko̠mko beladea; ado̠e duṛuṕena. Ado̠ tho̠ṛa ghạṛi tayo̠m khange daka utuko tearket́a, ado̠ uni ar uniren baho̠ńharte̠t́ ado̠ daḱko taṅat́kina. Ado̠ uni se̠n akan    koṛa do̠ daka utu ńe̠lte ạḍige  ele mo̠ne̠re rạskạ he̠ćadea, ạḍi garteye landaket́a. E̠nte aṛaḱgeye disạ maṛaṅket́a. Ado̠ uni baho̠ńhartet́ landa ańjo̠mkate ạḍiye edreyena. E̠nteye me̠nket́a, Nui ho̠ṛ do̠ dakale e̠m akawadea, ado̠ okaṭaḱe rạskạyente nonka do̠e landaket́a? Uni se̠n akan koṛa do̠ ona daka thoṛa hõ bae jo̠mlet́a. Ado̠ bhageteye thapakedea, are metadea, Am sala do̠, jivi bańcao lạgit́ co̠ṅ dakale e̠m akawat́mea, ado̠ cadaḱem landaket́a? Ado̠ bae jo̠m ocoadea, thapa ńirkedeae. Ado̠ ruạṛ jo̠khe̠n inạ mo̠ro̠n aṛaḱgeye joharat́a, are me̠nket́a, Lahare noań jo̠mle khan pase̠ nonka do̠ o̠ho̠ hoelena. Onate, kathaeko me̠na,  jãhãtegem calaḱ judu ho̠rre mo̠ro̠n aṛaḱem ńamle khan; do̠m jo̠met́gea; e̠nteko me̠na, Candoe edrena baṅ jo̠mle khan; ado̠e me̠na, Am do̠ tin maraṅ ho̠ṛ kanam? Cedaḱ mo̠ro̠n aṛaḱ do̠ bam jo̠mlaḱa? Onate mo̠ro̠n aṛaḱ do̠ko jo̠mgea.

Source: Santal Folk Tales

2022 Sikhnạt serma ren  Bidisiạ pạṭhuạ gidrạko sikhnạt  goṛoko e̠makoa HongKong City University. Noa Biswabidaloy do̠ HongKong reaḱ Coulonre me̠naḱa. Sikhnạt goṛo do̠ bar lekate e̠mogo̠ḱa. Mit́ do̠ jo̠to̠ khorca arm it́ do̠ thoṛa  khorca e̠moḱ reaḱ bebostha hoe akana. Ardas tayom aema gunko lekate goṛo e̠moḱ lạgit́ pạṭhuạ gidrạko bachaokoa. Baṅgladisạm selet́ goṭa dhạrtiren pạṭhuạ gidrạko noa sikhnạt goṛo ńam lạgit́pe ardas daṛeaḱa. Bidisiạ pạṭhuạ gidrạ ko do̠ Graduation ar Degree program lạgit́pe ardas daṛeaḱa.  Gagoj menaḱtako pạṭhuạ gidrạko do̠ darakan 15 November bhitrire ardas e̠moḱ hoyoḱa.   

Ạt  Se Subitạko-

• Sikhnạt goṛo  reaḱ man do̠   1,80,000 HongKong Dolar, Campus re tahẽn, Bạrsik Tuition Fee ar Jion jiṅgi reaḱ khorca lạgit́ e̠moḱ hoyoḱa.
• Jo̠to̠ tuition fee, sikhnạt bạrsik tuition fee khorca hõ ńamoḱa.
• Onka leka latarre em akan oprom khon bhurti akan sikhnạt lạgit́ jao serma 30,000 HongKong Dolar goṛo hisạbte ńamoḱa.
• Sikhnạt reaḱ kuṛại bạrsik tuition fee adha baṅ khan jotoge onḍe kho̠n ńamo̠go̠ḱa.

Ardas lạgit́ do latare lo akan gun tahẽn lagaoḱa.

City University  lạgit́ ardasre pạṭhuạko niṭ akat́ thoṛa man purun lagaoḱa. Ardas e̠moḱkoaḱ do̠  High Skul Certificate tahẽn jạruṛa.

• Ardas emoḱko do̠ thoṛa Accademic Record ar ạyur reaḱ gun uduḱ hoyoḱa.
• Ardas  ko e̠m pạṭhuạko do̠ Hong Kong City University re graduation course lạgit́ bhurti hoyoḱtakoa.

 Ardas reaḱ niạm: Noare click hoyoḱa.

(https://www.cityu.edu.hk/sds/web/studentlife_scholarships_esfns.shtml). 

Source: Prothom alo

Moulvibazar Srimongol re Garo  kuṛi gidrạ konac kede babotre  baḍae ńam akana. Uni kuṛi gidrạ do̠ 7 clas rey paṛhaoḱ kana. Nitoḱ uni kuṛi gidrạ do̠ So̠do̠r Hospitalre cikit́sa okte menaea. Noa ghoṭna do̠ Lukhibar (12 August) ńindạ upạjilạ reaḱ Kalapur Union, Fulchora Garo Atore. Ghoṭna ghoṭaoen torage onko uni kuṛi gidrạ gharonjrenko do̠ Union porisod (UP) chairman ar thana polis ko baḍae ocoket́koa.  Baḍae ńam akana, uni kuṛi gidrạ do̠ Giasnogor Sent Meris Brother Skul ren 7 clas ren pạṭhuạ gidrạ kanae. Skul bond khạtir  uni kuṛi gidrạ do̠ oṛaḱregeye tahẽnkan tahẽna. Oṛaḱ reaḱ jạruṛaḱ jinisko hatao khạtir ako oṛaḱ aṛe dokan calaḱ hijuḱ hor aṛere Lebu bagan ren mạlik Faruq são uniaḱ oprom do̠ hoyentaea. Faruq do̠ uni kuṛi gidrạ mit́ṭen mobile phone do̠e kirińadea. Noa Mobiletege unkin do̠ kathakin roṛet́kan tahẽna.   Me̠nkhan ghoṭna hiloḱ uni koṛa do̠ ńindạ 2 baja okte phone kate acaḱ phone ruạṛ hataoae me̠nte bahre seće hoho oḍoḱkedea. Ar un okte ḍahar aṛe ńutre uni kuṛi gidrại konac kedea. Tayomte ato hoṛko uni koṛako eset́kede khan acaḱ  honḍar gạḍi hõe ńir bạgiada are dạṛkeda. Assistant Sub- Inspector  (ASI) Sarwar Hosain do̠e baḍae ocokeda, Uni do̠ ghoṭna ghoṭaoen dosar  hiloḱ thanatey  ạgukeda. Uni kuṛi gidrạ do̠ sanamaḱ do̠e lạiakadea. Me̠nkhan olaḱte do̠ jãhãn nạlisaḱ do̠ baṅ ńam akana. Union Porisod Chairman Mojibur Rahman Mujul do̠e me̠nkeda, ‘ Uni kuṛi gidrạ ren babage noa ghoṭna do̠e lại akadińa.  Iń do̠ noa mimaṅsa reaḱiń kurumuṭuida. Assistant Sub Inspector Of Polis (ASP) Sohidul Hoqe Munsi do̠e me̠nkeda, ‘ Noa babotre thoṛań hudisoḱ kana. To̠be uni kuṛi gidrạaḱ gharońj seć kho̠n jãhãn ạn reaḱ goṛo bako khoj akada. Unko ko me̠nlekhan ale do̠ jo̠to̠ seć kho̠n goṛole emakoa.

Source: Adivasi News

Sedae do̠, kathae, Ho̠ṛ ho̠po̠n ạḍi lelhako tahẽkana, ar deko ho̠po̠n do̠ ạḍiko bo̠to̠rako kan tahẽkana. Ona pạṛiạrege, kathae, uni lelha ho̠ṛ hõ̠e tahẽkana. Ado̠ mit́́ṭaṅ goḍa tạnḍireye sioḱ kan tahẽ̠kana, ar uni sioḱ ṭhe̠n ho̠r do̠ docaṅgagea, o̠nḍe̠ do̠ barea ho̠r hạṭiń akana. Ado̠ mit́ṭaṅ Deko ho̠r ho̠rteye he̠ćena uni ho̠ṛe sioḱ kan ṭhen. Ado̠ khangeye kuliyede kana, Hã hõ, mạńjhi,ye rasta kidhar jaega? Aur ye rasta kidher jaega?

Ado̠ khange uni ho̠ṛ do̠e haemoekaṭena, ado̠e me̠nket́a Nui Dekoge cet́e me̠net́a? Nui ḍaṅgra ińren, nui ḍaṅgra ińren! Tis eṅgate amren ḍaṅgra do̠le ạgu akat́kina, onate onka do̠m metań kana? Khange ado̠ uni Deko do̠ o̠ṇḍegeye duṛuṕena, ar ona kathage ghạṛi ghạṛiye kuliyede kana, ado̠ bae bujhạuet́ khan, ar baṅkhan kãṛã ho̠ṛe kuliyede kana, Henda mạńjhi, noa ho̠r do̠ okate calaḱa, ar noa ho̠r do̠ okate? Ado̠ ona katha do̠ bae bujhạuet́a. Ad̠o ghạṛi hõ̠ ghạṛiye me̠net́a, Tis amren ḍaṅgra do̠le ạgu akat́kina?

Nui ma jom daka kane, ar nui ma jạituk kane. Tis amaren do̠le ạgu akat́kina? Khange arhõ̠e kuliyede kana, Hã hõ, mạńjhi, ye rasta kidher jaega? Ado̠ khange uni ho̠ṛe me̠n go̠da, Nui ma jo̠m daka kane, ar nui ma jạituk. Ado̠ khange uni Deko hõ̠ bae bujhạuet́te ghạṛi ghạṛigeye kuliyede kana. Khange ado̠ uni ho̠ṛ do̠ be̠bạṛiće bo̠to̠roḱ kana; ado̠ ać mo̠nereye me̠njoṅ kana, Durre̠! Niạ sorkore o̠ko̠e hõ̠ bạnuḱkoa.

Nui Deko do̠ dhorage nãhãḱ teheń do̠e dal go̠jeńa. Me̠n iń e̠m dapo̠ṛaea: Ar uni ho̠ṛ do̠ kala hõ̠e kala machangea. Ar noa hõ̠e bujhạuket́a, paset́ nuiren ḍaṅgrage jo̠m daka ar jạituk do̠ko e̠m akawat́le, pase̠ne ńe̠l oromket́kin. Onka bujhạu baṛakate ado̠ banar ḍaṅgrae aṛaḱketkina, ar ona joteteye joṛaoket́kina; ado̠e laga go̠t́adea are metae kana,Nukin idi dapor̠kinme. Enan khon eṅgateye ạṛi laṛaokidińa, iạ Dekoge. Ma idi dapoṛkinme. Ado̠ khangeye laga idiade khan, nui Deko hõ̠e bujhạu go̠t́ket́a, baṅma, Nukin ḍaṅgra do̠ ińgeye emań kana.

Khange ado̠e beret́ go̠t́ente unkin ḍaṅgra do̠e laga idiket́kina. Tho̠ṛa sạṅgiń hạbić do̠ be̠ṅge̠t́ ruạṛ be̠ṅge̠t́ ruạṛtegeye lagaket́kina; ado̠ birre danaṅ ńõ̠ḱen khan, ạḍi ãṭ ado̠e khudạuket́kina. Ar uni ho̠ṛ do̠ o̠ṇḍegeye duṛuṕ jhạpuṅ thirena. Ado̠ ona jo̠khe̠ćge uniren eṅgat buḍhi baskeaḱ daḱ mạnḍiye ạguadea. Ar uni buḍhi hõ̠e kạligea. Ado̠ daḱko dạtạunikoe emadea; uni koṛa hõ̠e dạtạuni hutum baṛaen khan, daḱ mạnḍiye emadea. Ado̠ un jo̠khe̠ć uni koṛa do̠ eṅgatte̠t́e lạiae kana, E̠ go̠, okaren Deko co̠e hećlen; ado̠e me̠net́a, kathae, Nukin ḍaṅgra do̠, mạńjhi, ińren kanakin. Cedaḱpe ạgu akat́kina? Nukin do̠kin ińren kana.Ar iń do̠ń metae kana, Amren do̠kin baṅ kana, Deko, mit́ do̠e jo̠m daka kana, ar mit́ do̠e jạituk kana.

Onkań metadea; ado̠ e̠nre hõ̠ bae bataoet́a, no̠ṇḍegeye duṛuṕena. Ado̠ ạḍiye jidket́ khan do̠ raṛakateń joṛa go̠t́adea. Khange ado̠ uni eṅgat buḍhi do̠e me̠net́a, O̠ko̠e baḍae , bạhu, bạhuge e̠nteye sajao go̠t́adińa, baṅdo̠e buluṅat́, baṅdo̠ baṅa; e̠nte re̠t́re do̠ bae emadińa. Tin dhao uni koṛae  ro̠ṛet́a, un dhaoge nui e̠ṅgat buḍhi hõ̠ ona kathageye ro̠ṛet́a. Ghane hõ̠ ghaneye me̠net́a, O̠ko̠e baḍae , bạbu, bạhuge e̠nteye sajaoadińa, baṅdo̠e buluṅat́, baṅdo̠ baṅ. Ma enkate baṛe̠ jo̠mkaḱme. Khageye jo̠m cabaket́ khan do̠ bạṭi celaṅkoe sajaoket́te O̠ṛaḱteye hećena.

Ado̠ uni buḍhiren haṛamtet́ do̠ oṛaḱ mutul se̠nre toke lahaḱ kan tahe̠kana. Ado̠ buḍhi do̠ se̠ṭe̠r torage haṛamte̠t́e lạiae kana, Bạbu teheń do̠ bogeteye ruhet́kidińa. Bạhuge e̠nte daḱ mạnḍiye sajaoadińa, baṅdo̠e buluṅat́ baṅdo̠ baṅ, re̠t́ hõ̠ bae re̠t́ go̠t́adiń khan. Onate bogeteye ruhe̠t́kidińa. Khange uni haṛame ro̠ṛ go̠t́ket́a, O̠ko̠e baḍae, toktam co̠ṅ ukhuṛtam co̠ṅ. Ar se̠ uni haṛam hõ̠e kalagea. Ado̠ onka uni buḍhi do̠ ạḍiye lại baṛayet́a. Khange ado̠ uni haṛam do̠ ạḍi garteye ro̠ṛ go̠t́ket́a, Ho̠ko̠ baḍae, toktam co̠ṅ ukhuṛtam co̠ṅ. Iń do̠ alom ạṛisińa.

Khange ado̠ uni buḍhi do̠ kiminte̠t́ ṭhene calaoena, ar uni kiminte̠t́ hõ̠e kạligea; ado̠ pinḍareye taḱkoe kan tahẽ̠kana. Ado̠ unit ̣hen se̠nkateye lạiae kana, Henda bạhu, daḱ mạnḍi do̠ben buluṅat́a se̠ baṅa? Teheń do̠ koṛa bogeteye ruhet́kidińa; re̠t́re hõ̠ baben kolat́liń khan, sabaḱtegeye jo̠mket́a. Ońa kathage he̠ćkate ạpumliń lạiae kan khać do̠ uni hõ̠ ruḱhet́geye chuṭạuḱ kana.

Ado̠ uni kiminte̠t́ do̠e ro̠ṛ go̠t́ket́a, O̠ko̠ baḍae , go, cet́ leka co̠liń takoyet́, ḍambaḱ co̠ṅ ḍomboḱ co̠liń cuṛa doroḱkaḱ kana. Onka lekate onko kạli kala ho̠ṛren ḍaṅgrakin calaoena, huni eṭagaḱ ro̠ṛ khan, nhui do̠ eṭagaḱ. Onka lekate onko ho̠ṛ do̠ko re̠ṅgećena.

Source: Santal Folk Tales 

2022 serma ren HSC pạṭhuạ gidrạkoaḱ pạhil hapta reaḱ Assignment do̠ so̠do̠rena. Secondary ar Higher education odhidaptor (Mausi).  Robibar (15 August) mõṛẽaḱ hapta reaḱ assignment so̠do̠r hoeakana. Teheń (16 August) kho̠n Higher Secondary Certificate (HSC) pạthuạ  gidrạkoaḱ mõṛẽaḱ hapta reaḱ assignment kạmihora eho̠bo̠ḱ kana. Assignmentre me̠n akana, 2022 serma reaḱ HSC pạthuạ gidrạkoaḱ mõṛẽaḱ hapta reaḱ assignment so̠do̠rena. Ko̠ro̠na virus khạtir calaoen amdaj mit́ serma tala khon sikhnạt gãotako bond menaḱa. Noa o̠kte pạṭhua gidrạko do̠ sikhnạt kạmiko são jopoṛao tahẽn lạgit́ 6 class kho̠n 9 class ren pạṭhuạ gidrạko lạgit́ hõ assignment so̠do̠r akana. Noare arhõ me̠n akana, assignment hotete pạṭhuạ gidrạkoaḱ hameṭ akat́ siknạt reaḱ jo̠ do̠ mulại hoyoḱa. Hạṭiń akan puthi reaḱ suci lekate jao hapta reaḱ assignment tear hoeakana.

Source: Bd-  pratidin   

Sedae jugre, kathae, mit́ṭen atore mit́ṭen kuiri ar mit́ṭen nạ̃u unkin  do̠ oḍok duạr oṛaḱ  tahẽkantạkina. Uni kuiri do̠ khub kisạ̃ṛe tahẽkana, ar uni nạ̃u do̠ re̠ṅgećgeye tahẽkana. Khange ado̠ nạ̃u do̠ ać mo̠ne̠ mo̠ne̠teye me̠njoṅa, Durre, nui kuiri do̠ cekate baṅ nonka do̠e kisạ̃ṛ akan, ar ale do̠ cekatele re̠ṅge̠ć akana? Ale do̠ cele, noko leka do̠ bale kạmi kan co̠ṅ cet́ co̠ṅ, onate nonka do̠le re̠ṅge̠joḱ kana. Ado̠ onka leka uni nạ̃u do̠ mo̠ne̠reye hudis baṛajoṅa. Ado̠e me̠nket́a, Ne̠s do̠ bhala ale hõ̠ noko lekagele kạmi legaea; bhala hoyoḱa se̠ baṅa; bhala ona reaḱ tak iń biḍạua. Ado̠ mit́ din do̠ ako oṛaḱren sanam ho̠ṛ ạyuṕ jo̠khe̠će galmaraoat́koa; Ne̠s do̠ o̠ko̠e hõ̠ alope kuṛhiạḱtabona! Kurumuṭutebon kạmia. Nõ̠ḱõ̠e      kạmibo ḍhil idiyet́tebo re̠ṅge̠joḱ kana. Ado̠ń me̠tabon kana, ne̠s do̠ jidạ jidbo kạmia. Bhalabon ńe̠la, hoyoḱtabona se̠ baṅ. Khange ado̠ sanam ho̠ṛko me̠nket́a, Acha bogege. Ado̠ sạri khange uni nạ̃u do̠ e̠n hiloḱ khon do̠ cun thamakur jo̠m lasaṛhẽ̠te onko kuiri oṛaḱte do̠ dinạmgeye calaḱa; cun thamakur ać ṭhen tahẽnre hõ̠, e̠nre hõ̠e calaḱgea. Oka ma ako oṛaḱre se̠ṅge̠l  tahẽnre hõ̠, e̠nre hõ̠ hukạ ńũi lạgit́ se̠ṅge̠l ko̠e onko oṛaḱteye calaḱa, ar oka do̠ e̠ke̠n ajaregeye calaḱa. Me̠nkhan uni do̠ e̠ke̠n ajare se̠ cun thamakur jo̠m do̠ bae calaḱa, tãhã uni do̠ katha cecet́e calaḱa. Uni do̠ ać mo̠ne̠reye me̠na, Bhala teheń do̠ oka kạmi reaḱe batlaoakoa. Ado̠ okakoe batlaoako, onkage ać hõ̠ ao̠ oṛaḱre hećkate akorenkoe batlaoakoa. Ar ạyuṕ jo̠khe̠ć hõ̠ onkogeye ate̠n baṛakoa; bae gitić ho̠doḱa; onkoe ańjo̠m jagakoa, e̠nḍe̠ ane̠ć ać do̠e jagaḱa. Ar tinre kaḍa ḍaṅgrako aṛaḱkoa, unrege ać hõ̠e aṛaḱkoa, ar tin jo̠khe̠ć sioḱko joṛaoa, unrege ako hõ̠ko joṛaoa, ar oka berko aṛaga, inạ berge noko  hõ̠ sioḱko aṛaga. Ado̠ din hiloḱ onkage uni do̠ onkogeye ate̠n baṛakoa. Uni kuiri kisạ̃ṛ okakore sioḱe metako, ona ańjo̠mkate ać hõ̠ akorenkoe metakoa, ar oka hiloḱ okako itạko e̠r, ado̠ ako hõ̠ onako itạgeko e̠ra se̠ko apho̠ra; ar onko kuiri do̠ bako baḍae akadea, baṅma, nui nạ̃u do̠ aboaḱ batlao cet́te ać hõ̠e kạmi kana me̠nte. Me̠nkhan ḍher din tayo̠mko baḍaekedea, baṅma, aboaḱ batlaoaḱ kạmi ańjo̠mtege nui nạ̃u do̠e kạmi kana; ado̠ e̠nre hõ̠ cet́ hõ̠ bako metadea. Khange sạri ado̠ e̠n se̠rma do̠ uni nạ̃uaḱ cas hõ̠ khubge hoeyenta, jonḍra, bajra se̠ je̠ kichuye caslet́, jo̠to̠ge hoeyetaea. Ado̠ ạḍi rạskạkate rihṛạḱe bạndiket́a; Ado̠e me̠nket́a, Nõ̠ḱõ̠e  katha ar bud iń cet́ket́te abo hõ̠bo arjaoket́re; me̠nkhan iń do̠ katha ced do̠ o̠ho̠ń bạgilea. Ado̠e arjaoket́re hõ̠ onko oṛaḱte calaḱ do̠ bae bạgilet́a. Ado̠ Mag boṅga tioḱen khan, uni kuiri do̠e metat́koa, Ma ne̠tar do̠ ạkbo ro̠ho̠ea. Khange uni nạ̃u  hõ̠e ańjo̠mket́ khan do̠, ako oṛaḱte se̠nkateye metako kana, E̠ ya, ma abo hõ̠ ạk ro̠ho̠e lạgit́ si lạhudtabonpe. Khange sạri si lạhut́ket́teko ro̠ho̠eket́a. Ado̠ uni nạ̃u ma cas kạmi reaḱ mo̠ro̠m bae baḍae, arc as mae casket́; ado̠ onko kuiri kisạ̃ṛren cet́ lekako kạmi, ado̠ onko hõ̠ onkageko kạmia. Khange sạri tahẽn tahẽnte ado̠ ona ạk do̠ harayena, onkoaḱ hõ̠ ar nuiaḱ hõ̠. Khange ado̠ uni kuiriye me̠nket́a, Nui nạ̃u do̠ ya abo ańjo̠m ańjo̠mtegeye kạmi kan do̠; eṇgate bhala teheń do̠bo biḍauea. Khange ado̠ ạyuṕen khan, uni kuiri do̠e metat́koa, Eya guti kạmiạ, gapa do̠ ạk ãṛgo̠mkatabonpe. Khange ado̠ uni nạ̃u hõ̠e ańjo̠mket́ khan, aćren hõ̠e metako kana, E̠ ya, abo hõ̠ gapa do̠ ạk ãṛgo̠mkatabonpe; ado̠ Khange aṅgayen khan do̠, ãṛgo̠mko joṛao go̠t́ket́a; ado̠ ona hoe ạkge curmarko ãṛgo̠mket́a, sanamko ãṛgo̠m gitićket́a. Ar uni kuiri do̠ bae ãṛgo̠mlet́a. Khange ado̠ ạḍiko landawadea. Ado̠ inạ tayo̠m khange uni nạ̃uaḱ ạk do̠ mõṛã mõṛãyena se̠, ạḍi bạṛić candheṛ oḍokentaea; ado̠ ạḍi bạṛić hoeyentaea. Uni kuiriaḱ khon do̠ nuiaḱge so̠ro̠sentaea. Ado̠ inạkate mit́ din do̠ uni kuiriye galmarao kantakoa, baṅma, Gapa do̠ buṭbon e̠ra; ma ona buṭ bạndi bo̠go̠jte teheńre baṛe ata do̠ho̠kape; atale khan do̠, mit́ dhaote nãhãḱ janam go̠doḱa, ar bin atawaḱ do̠ baṅ batraoḱa. Gapa do̠ tinrepe ataea? Bilo̠moḱale nãhãḱ; ma teheńre baṛe ata do̠hokape. Ado̠ onka uni kuiri do̠ ạuṛiaḱgeye ro̠ṛket́a, ado̠e thirene.

Khange ado̠ uni nạ̃u hõ̠ onae ańjo̠mket́ khan, oṛaḱre se̠nkate ać hõ̠ buṭ bạndiye bo̠go̠ćket́a, are ata ocoket́koa. Khange ado̠ dosar hiloḱko e̠rket́a. Ado̠ uni kuiriaḱ do̠ mit́ sãote jo̠to̠ janam go̠t́entaea, ar uni nạ̃uaḱ do̠ jãhã kãhã mit́ bar janamena. Khange ado̠ uni nạ̃ue me̠net́a, Henda ho, amaḱ do̠ mit́ dhaote jo̠to̠ o̠mo̠n go̠t́entama, ińaḱ do̠ cekate baṅ o̠mo̠n cabalena? Ado̠ uni kuiriye me̠nket́a, E̠ ho, ale do̠ atakatele e̠r akat́a, onate janam go̠t́entalea. Ado̠ uni nạ̃ue me̠n go̠t́ket́a, Ale hõ̠le atalet́gea. Ado̠ kuiriye me̠ket́a, Pase̠ć ape do̠ atare bape batraolet́? Khub leka bape ata ro̠ṅgo̠ea? E̠ne̠ ńe̠lme, okako ro̠ṅgo̠lentape, inạge janamena, ar oka baṅ ro̠ṅgo̠len, ona do̠ baṅ janamlentapea. Ado̠ uni nạ̃ue me̠nket́a, Hẽ̠ ho, cele atarege ale do̠ bale ṭhiklet́a. Ado̠ oṛaḱre he̠ćkate ạḍi bạṛić kạhur mạhure ruhet́ baṛaket́koa. Ado̠ inạ mit́ baraḱgeye tahẽ ocoat́a. Ado̠ inạ buṭge, cet́ bȧ se̠, uniaḱ khon bạṛti hoeyentaea, ar e̠n jaṅkate hõ̠ nuiaḱge ḍherentaea. Khange ado̠ pe̠ pon sermatege uni kuiri khon do̠ nuige bạṛtiye kisạ̃ṛena, ar uni kuiri do̠e  hẽ̠ṭena. Onko lekate uni nạ̃u do̠e kisạ̃ṛlen tahẽkana. 

Source: Santal Folk Tales

Teheń do Baṅgla disom reaḱ jạtiạri Homor Bhabna(Shok) Mãhã. Boṅgo bondhu Shekh Mujibur Rahmanaḱ 46 aḱ  gujuḱ bạchri. Teheń noa din disạite Jạtiạriren Baba Boṅgo bondhu Shekh Mujiburaḱ citạr re baha malate manote samaṅ keda Maraṅ Montri  Manotan Shekh  Hasina. Teheń Aṭhoar din setaḱ 6 baja okte Dhanmonḍi reaḱ 32 nombor oṛaḱ ṭhen menaḱ Boṅgo bondhu Dinisạ Jadu ghor samaṅre Boṅgobondhuaḱ citạr re baha malate noa man- Manot doe samaṅ akada. Sanam kobon baḍae gea 1975 serma reaḱ 15 August Disomren ̌thoṛa Bạṛíć hoṛko tite Boṅgo bondhu do gharońj renko sãote ạdi ackageye ko goć ocolena.