No̠a mit́ṭen siropa lạgit́  bar gel irạl (28) se̠rma tạṅgire̠ ko̠ tahẽkana Argentina. Sạrige, 1993 se̠rmare Copa American siropa ńam tayom Argentina jãhãn International shiropa bako̠ ńam akada. Bissocup hijuḱkan tahẽna, ar copa hõ, calao paromoḱkan tahẽna. Me̠nkhan Argentina koaḱ tạṅgi do̠ baṅ cabaḱkan tahẽna. Mucat́re 28 serma tayom ona tạṅgi se̠ koyoḱ hor re ko̠ tahẽkan do̠ mucạ́tena. Argentinako̠ jitạuena jãhãn International turnamate re̠aḱ siropa. Lionel messi mucạt́re ti tey saṕ keda mit́ṭen International siropa. 2014 sermare Bissocup re̠ do̠l ko̠ Finalre̠ bae rakaṕ daṛeaḱ koa. Inạ tayom uniaḱ barea copa-siropa re̠aḱ kukmu do̠ losoponḍo akantaea. Me̠nkhan teheń America re̠aḱ mit́ṭen akhṛa re̠aḱ siropa  jitạu kate ạḍi ãṭ do̠e landakeda.  Argentina supporter  ko̠ ạḍi rạskạ salaḱ no̠a khiloḍ ko̠ ńelkeda. Messi do̠ no̠a trophy saṕ kate manao kedae siropa jitạuen re̠aḱ gorob. Argentina re̠aḱ ona namḍaḱ Akhasi nil-ponḍ jạrsi horoḱ kate teheń ạḍiko̠ rạskạḱ kana Argentina do̠l ko̠.

Mit́ṭen ato ṭolare ạḍi maraṅ mit́ṭen hesaḱ dare tahẽkana. Ar ona darere ạḍi mońj mit́ṭen Loboḱ kõḱ doe tahẽnkan tahẽna. Onka lekage uni Loboḱ kõḱ do dinạm ạyuṕ jokheć jombi lạgit́ ṭola barhete ạtińe calaḱkan tahẽkana. Dinạm hiloḱge uni Loboḱ kõḱ do ạḍi ńindạ dhạbić ạtiń baṛakate arhõ acaḱ ona tahẽn ṭhạ̃itey ruạroḱkan tahẽkana. Ar onka lekage dinạm din jombi lạgit́ ạtińte doe calaḱ kan tahẽkana . Ar mit́din do ńelme one okare ạtiń ar jombi lạgit́e calaḱkan tahẽkan onḍe do mit́ṭen gate doe ńam kedea.

Ar uni acren gateaḱ ńutum do hoyoḱ kantaea Lạlu seta.

Menkhan Loboḱ kõḱ do okarey ạtiń ona jaegare do aema ghas gajaṛ ar daḱ tahẽlena ar ona soṅgete thoṛa puṭhi ar ruḍgu hako hõko tahẽkana. Ar ona iạte unkinaḱ gate do thoṛagan sạṅgiń sạṅgiń rege tahẽkan tạkina. Menkhan  tin okte daḱ cabaena ona jaega reaḱ ado onḍege mit́ṭhećkin ńapamena ar ńapam tayom ạḍikin rạskạena ente aema din tayom dokin ńapamena.

Onka lekage uni Loboḱ kõḱ do acren eṭaḱ boeha ar miserako hõ ać soṅge ạtińtey idiket́koa ona jaegate. Ar inạ tayom Loboḱ kõḱ do acren gate  Lạlu seta soṅge aćren boeha miserakoe ńapamket́koa. Menkhan Lạlu seta do Loboḱ kõḱ ren boeha ar meserako ńelte acaḱ monre ạḍi lobh ar laloj hećadea. Ar onka lekage mit́din do Loboḱ kõḱ gateren mit́ boehae galmaraoade tahẽkana ar galmarao galmaraotege uni Lạlu seta do ńelme Loboḱ kõḱ ren gate goć kedea are jom kedea. Noa ńelte Loboḱ kõḱ do ạḍiye bhabnaena are rangaoena. Inạ tayom jojom  huḍạr Lạlu seta bạgikate acaḱ oṛaḱtey ruạṛena boeha ar miserako soṅge.

Cecet́aḱ do noage, Dulạṛiạ boeha ar miserako noa dhạrti jion khemaore kạmikore ar daṛankore mońj gatekobon gatekoa ar bạṛićte pereć akan gateko do bon bạgiakoa.

Father Bonifas Murmu do̠ ko̠ro̠na ajaṛ re̠ jạbunkate teheń 10/07/2021 tarik ạḍire̠ Isor hirlạre̠ do̠e jirạuena. Uni do̠ 1955 sermare Rajshạhi jilạ, Godagari upạjilạ re̠aḱ Borgachi (kạnhupaṛa) atoreye janamlena. Apat́ ńutum  do̠  Andrias Taracad Murmu. Unko̠ do̠ turui (6) boeha ko̠ tahẽkana. Pe̠a (3) kuṛi ar 3 (pea) koṛa boeha. Boeha ko̠ modre  Father Bonifas Murmu do̠ maraṅ utạriće tahẽkana. Uni do̠ ko̠ro̠na ajaṛrey jạbunen o̠kte pạhilre Sant Vincent Haspatal re̠ ko̠ro̠na cikit́sae hataoet́ tahẽna. Me̠nkhan ar hõ mońj cikit́sa ńam lạgit́ Dhaka re̠aḱ Sant Jho̠n Mery Viyanni Haspatal re̠ ko̠ idilidea. Ar o̠nḍege teheń ạḍire Probhuraḱ hoborreye jirạuena. Uni do̠ 66 se̠rma umerrene tahẽkana. Father Bonifas Murmu do̠ acaḱ gharoṅjren boeha ko̠  sãote aema pe̠ṛa ko̠ ar dulạṛiạ ko̠e bạgiat́koa. Isor uniaḱ atma sulukrey do̠ho̠ema.

Daḱge jho̠mo̠r jho̠m,

Ghane kajak ghane ko̠m,

Ghane ṭipir-ṭipir,

Ghane jhipir-jhipir.

Daḱge jho̠mo̠r jho̠m,

Ghane kajak ghane ko̠m,

Ghane ho̠e huḍur,

Ghane reaṛ rabaṅ ṭukur.

Daḱge jho̠mo̠r jho̠m,

Ghane kajak ghane ko̠m,

Cạriạ kona daḱge daḱ,

Ceṛem- ceṛem ḍubạ daḱ.

Daḱge jho̠mo̠r jho̠m,

Ghane kajak ghane ko̠m,

Ghane ṭipạḱ ṭo̠ṛo̠ḱ,

Ghane ṭho̠p-ṭho̠p jo̠ro̠ḱ.

Daḱge jho̠mo̠r jho̠m,

Ghane kajak ghane ko̠m,

Ạndhi tuphante ho̠ṛmae ko̠clo̠n,

Ghane Yas ghane saeko̠lo̠n.

Ko̠ro̠na  teṅgo daram lạgit́ mit́ṭenge alga upại menaḱa ar o̠na do̠ mask ho̠ro̠ḱ. Bajare̠ aema lekan mask ńamoḱ kana. Teheń gapama ho̠ro̠ḱ bandenaḱ são milạu kate mask ko̠ ho̠ro̠ḱeda. Me̠nkhan aema ho̠ṛge mask do̠ bako ho̠ro̠ḱeda. Ar o̠ko̠e ko̠ horo̠ḱeda onko̠ mo̠dre ado̠m ho̠ṛ do̠ o̠ktere̠ kewa ar o̠ktere do̠ lutur sãote ko̠ ṭińkạrkaḱ kana. Ado̠m ho̠ṛ do̠ mit́ṭen maskge begor saphate ghane ghane ko̠ ho̠ro̠ḱet́ kana.  Baḍaekaḱabon Baṅma, Surgical mask mit́ dhaoge beboharoḱa. Ar kicrić re̠aḱ mask do̠ thoṛa din bebohar daṛeaḱbon. Me̠nkhan ho̠ro̠ḱ tayom saphae jạruṛa.

Kicrić re̠aḱ mask cet́leka saphakate ghane ghane ho̠ro̠ḱ hoyoḱa:

• O̠ṛaḱte ruạṛ kate baber, fitạ se̠ rabbar band sap kate mask tut́ hoyoḱa, mask do̠ baṅ jo̠ṭet́ hoyoḱa. Inạ tayom sạbun daḱre ạruṕ saphae hoyoḱa. Daṛeaḱ khan setoṅre tase ro̠ho̠ṛ lagaḱa, enḍekhan mask do̠ saphaḱa. Lo̠lo̠ daḱ ar buluṅ daḱre mask lo̠lo̠ daṛeaḱabon. Inạkate setoṅre tase ro̠ho̠ṛ hoyoḱa.
• Lo̠ho̠ḱ mask do̠ alobon ho̠ro̠ḱ ma. No̠ate rog ńam re̠aḱ bo̠to̠r menaḱa.
• Ro̠ho̠ṛlen khan mask do̠ iron hoyoḱa
• Sapha haron baṅ kate Surgical mask bebohar daṛeaḱbon. No̠a ko̠ ho̠ro̠ḱ se̠ bebohar tayom giḍikaḱ hoyoḱa.
• Bahre seć calaḱ o̠kte bagre barea mask do̠hoe jạruṛa. Ho̠ro̠ḱ akat́ mask jãhã karonte bạṛićlen khan se̠ lo̠ho̠t́len khan soṅge torao akat́ o̠na mask bo̠n ho̠ro̠ḱ daṛeaḱa.
• Mask sapha kate ho̠ro̠ḱ hoyoḱa. Baṅ khan mạilạ se̠ baṅ sapha akat́ mask bebohar talate ko̠ro̠na rog são aema lekan rogtebon jạbun daṛeaḱa.

Sanam Santalko̠ de̠labn no̠ako̠ manaote̠ ko̠ro̠na lekan maraṅ rog kho̠n rukhiạ bon ńama.

Source: Sonali songbad

Mãhãmạri ko̠ro̠na viruste jạbun kate calaoen 24 ghonṭare̠ goṭa disạmre̠ arhõ 8 hajar  bar sãe turui gel are (269) hoṛko̠ goćena. Niạ o̠kte ko̠ro̠na re jạbun akan hoṛkoaḱ sȯ̠nkha do̠ 4 kạruṛ 54 hajar 244. International (Antorjatik) porisȯ̠nkhan website worldmater kho̠n ńam akan Lukhibar  setaḱ re̠aḱ kho̠bo̠r lekate , niạ okte ko̠ro̠na kho̠n ko̠ pharnao akana 3 lakh 67 hajar 347 hoṛko̠. Nãwãte jạbun akan ar gujuḱ sȯ̠nkha banar milạu kate 18 kạruṛ 58 lakh 22 hajar 579 manwako̠ hoy akana. Moṭre gujuḱ so̠ṅkha 40 lakh 17 hajar 208 manwako̠ do̠ ko̠ goć akana. Ko̠ro̠na kho̠n ko̠ pharnao akan moṭ sȯ̠nkha 17 kạruṛ 77 hajar 830. Ko̠ro̠na rog te bạṛti hoṛko̠ jạbun akan disạm do̠ Juktorasṭro. Me̠nkhan calaoen 24 ghonṭa re̠ bạṛti hoṛko̠ gujuḱ kan disạm do̠ Latin America re̠aḱ disạm Brazil. Niạ okte ona disạmre 1595 hoṛko̠ goćena. No̠a ko̠ Disạmre̠ moṭ gujuḱ sȯ̠nkha 5 lakh 28 hajar 611 hoṛko̠. Calaoen 24 ghonṭare Juktorastrore̠ 244 hoṛko̠ goćena. Moṭ gujuḱ sonkha hoy akana 6 lakh 21 hajar 843 hoṛko̠. Niạko̠ dinre̠ arhõ ko̠ro̠na rogte jạbunkate calaoen 24 ghonṭare goć akan hoṛkoaḱ sȯ̠nkha 817. Moṭ gujuḱ sȯ̠nkha 4 lakh 5 hajar 57 hoṛko. Ko̠ro̠na te̠ jạbun ar gujuḱ sonkha ạḍi usạra bạṛti kan disạm ko̠ modre hoyoḱ kana Argentina, Colombia ar Indonesia. Calaoen 24 ghonṭare no̠a pe disạmre  456, 559 ar 1 hajar 40 hoṛko̠ goć akana.  Baṅgladisạ mre̠ hõ ko̠ro̠na rog ạḍi ãṭ bạrti pasnao akana. Worldmater re̠aḱ ona tạlika lekate Baṅgladesh do̠ nitoḱ 29 number re̠ menaḱa. Dinạm dinge ko̠ro̠na rogte gujuḱ re̠aḱ sȯ̠kha do̠ ḍher idiḱ kana.  Disạmre̠ nit hạbićte gujuḱ kan hoṛkoaḱ sȯ̠nkha do̠ 15 hajar 593. Ar nãwãte ko̠ro̠na rogte jạbun akan 9 lakh 77 hajar  468 manwako̠ ńamakana.

Teheń Budhbar (7 July) setaḱ 9:15 baja okte ackage Dhạrti do̠ laṛaoena. Rajdhạni Dhaka nagraha chaḍa hõ Rangpur, Mymensingh, sylet bibhag re̠ dhạrti laṛaoen ko̠ aṭkar  akada, Dinajpur ar ona aḍe pase ṭoṭha ko̠ re̠ hõ no̠a do̠ hoy akana. Ona do̠ amdaj 6 second tahẽkana. Pạhilre bạibạite  hoylenre̠ hõ tayomte 5.3 matra re̠aḱ ạḍi kajaḱ do̠ laṛaoena. O̠koe do̠ un  okte atet́re ko̠ tahẽkan unko̠ do̠ beret́kate oṛaḱ kho̠n bahrete ko̠ odokena. Lockdown baṅ manao kate bo̠to̠rte hoṛko̠ ḍahar reko̠ pheḍena.. No̠a dhạrti laṛao do̠ Bharot re̠aḱ Meghalaya Rasṭro  Lukkhipur kho̠n 7 kilometers dạkhin ar hasa latar 20 kilometer bhitrire̠ kho̠n ehoṕlena. Onka le̠ka Bangladesh (weather) abohaoa odhidaptor  re̠n abohawabid Bojlur Rosid do̠e baḍae oco keda, Dhạrti laṛaoen ona re̠aḱ matra do̠ rikhṭer scale re̠ 5.3 tahẽkana. No̠a e̠hoṕ akan ṭhạ̃i do̠ Asam re̠aḱ Lukhipur kho̠n. Dhaka kho̠n 242 kilometer utạr nakha re̠ no̠a do̠ menaḱa. Arhõ Markin bhutatik Songstha (USGS) website re̠ me̠nakana, No̠a do̠ ehoṕ kana Asama r Meghalaya Rasṭro re̠aḱ so̠r ṭoṭha ko̠ kho̠n.

Sahẽt́ bondoḱ le̠kan tiebreaker re̠ jitạu kate Copa America re̠aḱ final re̠ nischin kanako̠ Argentina. Niṭ́ akat 90 minit re̠aḱ khilạḍ re̠ 1-1 gol te̠ dro hoyena.  Inạ tayom khilạḍ do̠ tiebreaker re̠ calaoena. O̠nḍe Argentina re̠n bo̠l sasaṕić (golkipar) Martinez Colombia re̠aḱ pe̠a phanda bo̠l do̠e tarhaokeda . O̠na sãote 3-2 golte Colombia hirạu kate Copa America Finalre̠ re̠ rakaṕena Lionel Messi re̠n do̠l Argentina. Final re̠ Brazil birudre̠ khilạḍoḱa ko̠ Argentina . Teheń Budhbar (7 July) Baṅgladisạm re̠aḱ okte do̠ setaḱ 7 baja kho̠n khilạḍ do̠ ehoṕ akana. Aema khilạḍ dulạṛ hoṛ ko̠ niạ final khilạḍ haparaore Messi ar Neimar aḱ do̠l re̠aḱ soros khiḷḍ ńel lạgit́ ko̠ tạṅgitaṛaḱre menaḱkoa.

Source: Pothmatimes

Sarkare lại so̠do̠r akda Lockdown re̠aḱ o̠kte do̠ arhõ eyae (7) din ḍher hoy akana. Darakan 14 July hạbić lockdown o̠kte Bank re̠aḱ kạmihorako̠ mit́ ghonṭa ḍher re̠aḱ goṭa akadae baṅgladeh Bank. Darakan 8 July kho̠n setaḱ 10 baja kho̠n tikin 2:30 hạbić lo̠nbo̠n do̠ calaḱa. Teheń moṅgolbar no̠a babotre̠ hukum do̠e e̠mkeda baṅgladesh Bank. No̠a hukumre̠ me̠n akana, ko̠ro̠na virus birudre teṅgo daram lạgit́ sarkari manao ganao re̠aḱ o̠kte do̠ darakan 14 July hạbić ḍher hoy akana. Hapta re̠aḱ chuti Sokolbar ar Sonibar chaḍa hõ 11 July Robibar hõ Bank do̠ bond tahẽna. Lo̠nbo̠n re̠aḱ tayom daram kạmiko̠  sạutạu lạgit́ Bela 4 baja hạbić Bank jhić tahẽ daṛeaḱa. Niạ re̠ arhõ me̠n akana, laha re̠aḱ ciṭhi re̠ ulek akan bibhag chaḍa hõ hoṛmo joton ko̠ manao ganao kate  thoṛa hoṛko̠ talate bank jhic daṛeaḱa. No̠a lahare haptare̠ po̠n dinBank jhić re̠aḱ (Sokolbar, Sunibar ar Robibar ) hukum e̠mkate 30 June circular do̠e jạri akada Bangalesh Bank. O̠nate̠ sanam Santal boehape baḍae ocoḱ kana je̠ Bank do̠ bond tahẽna ar o̠kte̠ nạpit́re̠ no̠a do̠ jhićjoḱa.

Source: Banglar Janapad

Baṅgladisạm re̠ 1 July  kho̠nge nãwã se̠ bahre kho̠n ạgu akan jo̠to̠ lekan Mobile Phone (Smartphone/ Botam phone ) ko̠ re̠aḱ ol caṛhao hoyoḱa me̠nte Baṅgladesh Telejogajog Niyontrok Soṅgstha – BTRC do̠e lại so̠do̠r akada. Niạ o̠kte o̠kako̠ Mobile phone mạsul eḱṛe kate binho̠k upại te se oko katet́ ạguḱ kan ona do̠ bondo̠ḱa. Eken caloen cando 30 june hạbić Baṅgladisạm re̠aḱ Mobile Network re̠ beoharoḱ kan mobile ko do̠ hikạhok upại te se̠  oko kate kiriń akan sanam lekan  mobile seṭ  do aćtege ol caṛhaoḱa. Niạ tayom okote kiriń se ko̠mṛo mobile hatao ar dokan kho̠n ho̠ begor registration akat́ mobile hatao lekhan onare do sim se network bae kạmiya. Me̠taḱme mobile phone bondoḱa. BTRC re̠n maraṅ ayurić Shamsul Alom do̠e so̠do̠r akada onko̠ do̠ pạhilte eken  baṅ registration akanaḱ  phone birudre jạruroḱ bebosthako̠ hataoa. Onate abo bo̠n beboharet́ kan mobile do registration lagaoabo̠na. Ente niạ reaḱ registration somoe do pe cando̠ ńamoḱa; ona tayo̠m sanam begor registration aḱ mobile do apanaạpni bondo̠ḱa.

Cet́ lekate mobile seṭ bon registration a?

Mobale phone kiriń se̠ hatao lahare̠ ona do̠ olcaṛhao se̠registrationgea se baṅ ona mońjte ńel hoyoḱa. Me̠nkhan ona phone registration baṅ khan baṅ kiriń hoyoḱa. Ar jaha leka kiriň tayo̠m oṛaḱ ạgu kate ńelle khan ona̠ reaḱ registration do̠ bạnuḱa, enḍekhan o̠na do̠ ruạṛkaḱ lagaoḱa. Uni ạkhriń dokandar bae hataole khan BTRC baḍae ocoko hoyoḱa. Tahole onkoge no̠a birudre bebosthako̠ hataoa.

Mobile seṭ registrationa se̠ baṅ algate o̠na bujhạu re̠aḱ upại:

Mobile phone re̠ jahaṭaḱ sim chạlu kate phone re̠aḱ message option re̠ senkate KYD<Space> mobile phone seṭ re̠ 15 digiṭte IMEI  number ol lagaḱa. Inạ tayo̠m noa do̠ 16002 numberre kul hoyoḱa. Khan o̠na mobile phone do̠ registration gea se̠ baṅ message re̠ baḍae ńamoḱa. Mobile phone reaḱ IMEI number baḍae tahẽlen khan Dial option calakate *#06# lin lekhange IMEI number ńamoḱa. Inạ chaḍa hõ mobile box re̠  mit́ṭen stikar re̠ no̠a ol tahẽna. neir.btrc.gov.bd web link re̠ calaokate sitizen portal ar mobile operator customer care centre re̠ hõ no̠a seba bon ńam daṛeaḱa.

Baṅ beoharoḱkan mobile phone registration hoyoḱa?

Jãhãeaḱ aema phone me̠naḱ ar oka do̠ baṅ beboharoḱkan khan ona do aćtege olcaṛhaoḱa se Auttomatically registration hoyoḱa. Ona phonre mucạt́ okaṭaḱ sim beohar hoelena onage registration hoyoḱa. Onka lekhan ona phonre̠ eṭaḱ ńutuman sim baṅ caluḱa.

Mit́ṭen mobile re̠ bạṛti sim beohar hoyoḱgea?

Registration akan sim Mobile re̠ chạlu lekhan mobile seṭ do̠ ona ńutumte auttometically registrationoḱa. O̠na phone rege eṭaḱ sim beohar le̠khan ona hõ registration jạruṛa. Jãhãeaḱ bạṛti sim aćaḱ ńutumte registration me̠naḱ khan uni do̠ mit́ṭen registration akat́ mobile phone re̠ jo̠to̠ sim do̠e laṛcaṛ daṛeaḱa.

Phone ạkhriń se̠ jãhãe e̠mako khan se Mare phone kirińlekhan do…..

 Jãhãe acaḱ registration akat́ mobile seṭ eṭaḱ hoṛe emako khan, se ạkhrińe menjoṅle khan se̠ eṭaḱ hoṛko beoharakat́ seṭ kirińe me̠nlekhan ona seṭ do̠ nãwã okeye hataoa khạṭige uniaḱ ńutumte registration jạruṛa. Okoe laharei beohar akat́ uniaḱ NID card re̠aḱ mucat́ ponea nombor koe daṛeaḱa ko̠. Nombor milạu len khan ar sim ar seṭ registration hoylen khage nãwãte registration hoyna ar o̠na do̠ laṛcaṛ daṛeaḱa.

Bahre Disạm kho̠n phone kiriń ạgule khan se̠ dan ńamlekhan…

 Bahre kho̠n ạguḱ phone se̠ dan hisạbte ńamakan phone re̠ Baṅgladisạm re̠aḱ sim beohar lekange ona do̠ olocoloḱa. Ar unre mobile sms te baḍae ńamoḱa amaḱ sim do̠ registration me  Onḍe website re̠ link e̠m hoyoḱa. Onare click kate jạruṛaḱ kho̠bo̠rko̠ te ona do̠ registrition lagaḱa.

Mobile seṭ at́ se̠ chingạu ocolenkhan…..

Jãhãeaḱ phone se̠ kombṛo len khan BTRC niạm lekate ona bondoḱ reaḱ katha. Me̠nkhan noa bisoi do̠ pe̠ cando re̠aḱ taṅkhire̠ me̠naḱa ona lahare do̠ okaṭaḱ phonege bondo re̠aḱ upại bạnuḱa. Ona lahare jopoṛao me̠naḱ customer care re̠ phone at́ se̠ kombṛo akan lại lekhange amaḱ oprom lekate ona phone ko̠ bondoea eṭaḱ hoṛ je̠mon aloko  beohar daṛeaḱ.

Courporate seṭ ar sim  re̠ cet́ hoyoḱa?

Courtporet sim se̠ okako̠ sim re̠aḱ registration bạnuḱ onako̠ re̠aḱ hõ galmarao calaḱ kana. Pe̠ (3) cando talare no̠a ko̠ goṭaea. Ona laha hạbić jãhãege jãhãṭaḱ seṭre jãhãṭaḱ sim ko̠ beohar daṛeaḱa.

No̠a so̠mbad  talate SantalsTimes seć kho̠n sanam Santal Boeha miserape̠ udgạu ocoḱkana ape̠ do̠ ạḍi usạra apeaḱ phone registration tabo̠npe.