Ko̠ro̠na: Lockdown ar Aodhan

Ko̠ro̠na do̠ arhõ Baṅgladiso̠m re̠ ạḍi ãṭ bạṛti akana. Gaḍa daḱ ạtuḱ kan le̠ka Ko̠ro̠na ńame̠t́ koa arko gujuḱ kana. Ce̠kate̠ nonka hoyoḱ kana ar ce̠t́ kana aso̠l karo̠n do̠. Nonkan o̠kte̠ arhõ ruạṛ hijuḱa do̠ babon asjo̠ṅ kan tahẽ kana, se̠ ko̠yo̠ḱ ho̠r re̠hõ babon tahẽ kana. Noa Ko̠ro̠na le̠kan maraṅ mũhin o̠kte̠ re̠ lạgit́ Baṅgladiso̠m re̠n Santalko jo̠to̠ se̠ć te̠ sapṛao̠ akan me̠naḱ bo̠na? Sapṛao̠ me̠naḱ bona katha disạ uihạr ruạṛ ke̠dạń abore̠n Mano̠tan Kamel Murmu, the santals times re̠n onoliạ aḱ Ko̠ro̠na Virus Aodhan Sereń;

Dhạrtire̠ Ko̠ro̠na, Diso̠mre̠ Ko̠ro̠na, Ko̠ro̠na Virus heć akana-2

Noa Virus te̠ din hilo̠ḱ dayage o̠hae̠re̠

Hajar hajar hoṛko-2 gujuḱ kana-(2)

Ebhe̠noḱbon boe̠ha aodhano̠ḱbon

Jagwaroḱbon boe̠ha-2 So̠nto̠ro̠ḱbon-(2)

Ko̠ro̠na rog te̠ harkhe̠t ar saset kate̠t́ gujuḱ re̠aḱ ho̠ṛ so̠ṅgkha do̠ ạḍi ce̠tan se̠ć rakaṕ calaḱ kana. Calaoe̠n March cando 8 tạrik khon nit hạbić te̠ re̠aḱ report se̠ć te̠ ńe̠l akana (Prothom Alo, April 10, 2021) moṭre̠ 77 manwa do̠ ko go̠ć akana. Ar nãwã te̠ko ńam akana mõṛe̠ hajar pe̠ sae ponge̠l pe̠ (5,343). Me̠nkhan April 11, 2021 do̠ mo̠ṭre̠ 78 manwa do̠ ko go̠ć akana ko̠ro̠na khạtirte̠. (Sonali Songbad, April 11, 2021) ar teheń do̠ arhõ ce̠tan 83 ho̠ṛko go̠će̠na. O̠ka do̠ e̠toho̠ṕ khon teheń hạbić te̠ jo̠to̠ khon ce̠tan. Te̠sar din re̠aḱ report se̠ćte̠ ńe̠lo̠ḱ kana dinạm din ge ko̠ro̠na te̠ gujuḱ re̠aḱ soṅkha do̠ dhe̠r calaḱ kana.   

Calao̠e̠n se̠rma 8 march diso̠m re̠ pạhil ko̠ro̠na rog te̠ ńam akan re̠aḱ kathae̠ so̠do̠r akada sarkar bahadur. Paro̠m calao̠ akan May cando re̠aḱ adha ạdhi khon bạṛti rog ńam e̠ho̠ṕ akana. August cando re̠aḱ te̠sar hapta hạbić rog ńam akan do̠ ko tahẽ kana barge̠l (20) percent ce̠tan. Inạ tayo̠m nãwãte̠ ńame̠t́ ko ho̠ṛ soṅkha do̠ ko tho̠ṛa calao̠ e̠na.  

O̠nka le̠ka June khon e̠ho̠ṕ kate̠t́ August hạbić pe̠ cando ko̠ro̠na rog te̠ko jạbun akana ạḍi bạṛti. Inạ tayo̠m November ar December cando tho̠ṛa bạṛti tahẽ kan re̠hõ tayo̠m te̠do̠ latar se̠ć ge tahẽ kana. Calaḱ kan se̠rma re̠aḱ March cando arhõ e̠hoṕ akana do̠sar dhapte̠. Pạhilaḱ khon niạ baraḱ te̠do̠ ạḍi bạṛti ko̠ro̠na rog te̠ko jạbuno̠ḱ kana. Talamala se̠ć do̠ nãwã te̠ ạḍi tho̠ṛa ho̠ṛ ńame̠t́ kote̠ ae̠ma mo̠ńj do̠ tahẽ kana ar diso̠m re̠ rugiko hõko tho̠ṛa hijuḱ kan tahe kana. Me̠nkhan March cando khon arhõ ạḍi bạṛti ko̠ro̠na te̠ko jạbuno̠ḱ kante̠ ho̠ṛ so̠ṅkha hõko bạṛti akana.  

Bar ṭhạ̃i khon bạṛti ko̠ro̠na do̠ pasnaoḱ kana. O̠nate̠ abo jo̠to̠ Santal ho̠po̠nko de̠bon so̠nto̠ro̠ḱ ma no̠a bar ṭhạ̃i khon sahaṛakai tahẽn lạgit́. Pạhilaḱ do̠ ho̠yo̠ḱ kana Haṭ bajar ar Do̠saraḱ do̠ hoyoḱ kana ho̠ṛko de̠jo̠ḱ bus gạḍi ko khon ge bạṛti ko̠ro̠na do̠ pasnaoḱ kana se̠ ko̠ro̠na rog ko ńame̠t́ koa me̠nte̠ diso̠m sorkar bahadur doe̠ baḍae̠ oco akat́ koa (IEEDCR). Noako din re̠ baḍae̠o̠ḱ kana; bajar ar ho̠ṛko de̠jo̠ḱ bus, rail gạḍiko khon 61 percent ko̠ro̠na rog ko ńam e̠da. O̠na chaḍa manwa koaḱ sabha, seminar, he̠lme̠l khon 35 percent pasnaoḱ re̠aḱ bo̠to̠r me̠naḱa. Noako ṭhạ̃i chaḍa hõ manwa koaḱ jaro̠waḱ, dho̠ro̠m o̠ṛaḱ, daṛan, bapla se̠le̠t́ e̠man te̠aḱ taṛho̠aḱ khon hõ ko̠ro̠na pasnaoḱ kana me̠nte̠ IEEDCR doe̠ hudise̠da.    

Be̠go̠r tolop te̠ me̠naḱ ko Juạn Juạniko ar din kạmi kate̠t́ jo̠jo̠m kanko Santal ho̠po̠nko lạgit́ ạḍi ne̠hõr tahẽn kana, diso̠m talare̠ laha akan Mano̠tanko ṭhe̠n, je̠mo̠n apnar ṭhạ̃i khon abore̠n ho̠ṛko lạgit́ go̠ṛo̠ bon e̠m hạṭiń daṛe̠aḱ. O̠na se̠le̠t́, diso̠m sarkar bahadur ṭhe̠n hõ kho̠jo̠aḱbon  do̠hoe̠a je̠mon do̠ abore̠n santal ho̠po̠nko noako harkhe̠t sạse̠t dinkore̠ jo̠maḱ ko ńam. Baṅgladiso̠m re̠n Santalko ae̠ma le̠kan okulạn me̠naḱ tabona, e̠nte̠ re̠hõ noako din re̠ pạhil do̠ hoyoḱ kana ko̠ro̠na le̠kan máraṅ mũhin muskil khon abo santal ho̠po̠nko rạkhi jogao̠ko lạgit, apnar ṭhạ̃i khon de̠ aboaḱ so̠no̠t tibon lahae̠ te̠ suluk re̠ santalko bon tahẽ daṛe̠aḱ.   

Darakan 14 tạrik April cando khon 7 din lạgit́ ạḍi kajak lockdown e̠hobo̠ḱ kana me̠nte̠ diso̠m sarkar doe̠ ro̠ṛ sạḍe akada. Diso̠m re̠n national comiṭi koaḱ so̠po̠lha se̠ go̠ṭawaḱ do̠ 14 din lockdown tahẽn jạruṛa. Calao̠e̠n se̠rma do̠ lockdown se̠ć le̠ka tege ko̠ro̠na te̠ gujuḱ do̠bon ro̠pha ruạṛ le̠da, me̠nkhan niạ dho̠m do̠ tho̠ṛa hõ gujuḱ re̠aḱ percent do̠ bako ko̠mo̠ḱ kana. Din hilo̠ḱ ge̠ko bạṛti calaḱ kana. O̠nate̠ diso̠m sarkar bahadur do̠ ạḍi kajak lockdown e̠mo̠ḱ lạgit́e̠ go̠ṭa akada. Niạ dho̠m do̠, e̠ke̠n ạḍi jạruṛ se̠ba chaḍa jo̠to̠ aḱ ge bo̠nd tahẽna. Office, kacari, garme̠nts ko hõ bo̠nd tahẽ̠na.

Chapainawabgonj jilạ re̠aḱ Amnura aḍe̠pase̠ re̠ ae̠ma Santalko se̠le̠t́ ạdibạsi ho̠ṛko baso̠ḱ kana ar dinạm din ge ae̠ma santalko se̠ ạdibạsi ho̠ṛko Amnura Lutheran Mission Hospital ho̠ṛmo ce̠tanre̠ treatment do̠ ko hatao̠ e̠da. Nonkan mũhin muskil re̠ Hospital re̠n Dactor Suvas Chandra Sarker ar Simion Kisku so̠ṅge ạḍi jeleń ko̠ro̠na babo̠t galmarao̠ hoye̠na.  Unkinaḱ katha ạḍi so̠nto̠r te̠ noa huḍiń hospital re̠ rugikole̠ treatmente̠t́ koa. Nit hạbić te̠ santal se̠ ạdibạsi ko mo̠dre̠ ko̠ro̠na do̠ baṅ ńe̠l ńam akana. E̠nre̠hõ jo̠to̠ko so̠nto̠rte̠ tahẽn lạgit́ so̠po̠lhako e̠mako ho̠yo̠ḱ kana.  

Baḍae̠ abon je̠ diso̠m re̠ lockdown calaḱ kana o̠na te̠ ho̠ṛmo̠ hạṭiń ar ko̠ro̠na khon sahaṛakae ạḍi jạruṛa. Me̠nkhan re̠ṅge̠ć diso̠m hisạb te̠, santalko se̠ din kạmi kate̠t́ jo̠jo̠m kanko lạgit́ do̠ ạḍi haro̠n ho̠yo̠ḱa. E̠nte̠re̠hõ ho̠ṛmo̠ hạṭiń be̠s te̠ do̠ho kate̠t́ bańcaoḱ re̠aḱ asjo̠ṅ nirik lagao̠ abona. Diso̠m re̠n jo̠to̠ Santalko mask ho̠ro̠g tabonpe̠, o̠kte̠ nạpitre̠ ti sạbun saphaḱ tabonpe̠, bạṛti ho̠ṛko ṭhe̠n je̠mo̠n babon calaḱ, bahre̠re̠ auṛiaḱ baṅ tahẽ kate̠t́, o̠ṛaḱ re̠ tahẽn tabon pe̠. O̠nkate̠ je̠mo̠n huḍiń Baṅgladiso̠m re̠ jo̠to̠ Santalko se̠le̠t́ diso̠m ho̠ṛko suluk ar nirại te̠bon tahẽ daṛe̠aḱ.