Sạri Gho̠ṭna umul pańja kate̠ go̠lpo̠ Dulạṛ do̠e̠ kãṛãgea

Ạḍi ae̠ma din re̠aḱ katha, Baṅgladiso̠m sạdhine̠n se̠rma bạrin ṭe̠hanḍ re̠ do̠rloe̠ hoe̠le̠na. Santal ho̠po̠n ko do̠ jo̠m ńu ṭhik le̠ka baṅ milạu ako kante̠ bajar kạmi lạgit́ge Dulạṛ takoaḱ gharo̠ńj hõ e̠ṭaḱkoaḱ gharo̠ńj le̠kage so̠ho̠r bajar re̠ko giro̠bạsie̠na. Nito̠ḱ Dulaṛaḱ ume̠r do̠ 21 hoe̠ akan taya ar ać didi Phulmoni do̠ bar bo̠cho̠re̠ lạṭugea. Go̠ baba re̠n bar boe̠ha kuṛi ge gidrạ do̠. Huḍińić do̠ So̠namoni ge me̠nkhan jo̠to̠koge dhe̠rko ce̠re̠ć le̠dea dulạṛ me̠nte̠, ar unkhon ge Dulạṛ geye̠ bahnaye̠na.

Dulạṛ do̠ ńe̠lo̠ḱ te̠ e̠se̠l ar usul ńõḱe̠ tahẽkante̠ aḍe̠pase̠ re̠n ko̠ṛa kodo̠ ho̠ṛ aṛe̠ se̠ ato daṛan re̠ Dulạṛ tako se̠ć do̠ko hiri to̠rae̠ gea. Atore̠n mukhiạ ko do̠ ko bujhạuakat́a, dare re̠ jo̠ tahẽ̠n khan ḍhe̠lak do̠ jãhãe̠ baṅ jãhãe̠ ko capadgea. Dulạṛre̠n ać nanare̠n talaić ko̠ṛa bapla re̠ banar boe̠ha ge tale̠ṭo̠la te̠do̠kin se̠ṭe̠rle̠na. Dulạṛre̠n ać baba Ḍạmru ar gogo Makae̠ do̠ tho̠ṛa ro̠so̠posokin ruạḱ kante̠ baplare̠ baṅkin calao̠le̠na. Dulạṛ do̠ nonḍe̠ ge Kạnhu so̠ṅgeye̠ oporomle̠na, baplare̠ hõ pante̠te̠ e̠ne̠ć saṕkate̠ boge̠te̠kin e̠ne̠ćle̠na. Kumạte̠t́ ar Hato̠mte̠t́ do̠ Kạnhu so̠ṅge Dulạṛaḱ he̠ṛage̠sa dhe̠r baṅkin kusi le̠na, me̠nkhan tho̠ṛa do̠ mon re̠kin kukmu le̠t́gea, Dulạṛ so̠ṅge Kạnhu doe̠ jurikoḱgea. Bapla khunṭi ạuriko tut́ hạbić Kạnhu do̠ udhuṛ dhupuṛe̠ kạmi ke̠t́a, baṅdo̠ bhala rạskate̠, baṅdo̠ Dulạṛ so̠ṅge tho̠ṛa ko̠yo̠ḱ ńapam ar ro̠ṛ aste̠. Mõṛe̠ siń mõṛe̠ mãhã rạskạ paro̠me̠n tayo̠m do̠ Phulmoni ar So̠namoni do̠kin ruạṛ he̠će̠na ako o̠ṛaḱte̠.

Ḍạmru ar Makae̠ do̠ bajar re̠aḱ drain se̠ nala ko sapha kate̠ Phulmoni ar So̠namoni tạkin o̠lo̠ḱ paṛhaoḱ re̠aḱ sana tahẽkante̠, laṅga re̠ṅge̠ć be̠go̠r jo̠m ńu kate̠hõ jhũk kin taṛam lahale̠na o̠lo̠ḱ paṛhao̠ḱ re̠. Kuṛikinaḱ kurumuṭu ńe̠lte̠ e̠ṅgat-apat do̠ dare re̠ nãwã sakam sage̠no̠ḱ le̠kage monre̠ as re̠aḱ darere̠ sakam halae̠le̠n tạkina. O̠nako dinre̠ge tale̠ṭo̠la re̠n Kạnhu do̠ baplaḱ lạgit́ raibariće̠ kol kedea. Sonamoni do̠ ać khon lạṭuić kuṛi tahẽ̠n tuluć baplaḱ do̠ bae̠ hẽḱ le̠da. Kumạt ar hato̠mte̠t́ do̠ noa khoborkin ańjo̠m ke̠t́ khan hako pako kin ńir he̠će̠na. Girhạt koko me̠pe̠ne̠na, ce̠t́bon ce̠kaya. Hato̠mte̠t́ doe̠ so̠do̠rke̠da, Kạnhu doe̠ mo̠ńj ko̠ṛa kana, atore̠n e̠ṭaḱ ko̠ṛa le̠ka labaḱ cabaḱ hõ bae̠ ro̠ṛ baṛaya. Bako kisạṛ re̠hõ bo̠cho̠r jo̠m le̠ka ho̠ṛo̠ do̠ ho̠yo̠ḱ takoa, e̠nte̠ pe̠ dhao̠ge ho̠ṛo se̠ pho̠so̠l do̠ ko upjạua. Kumạte̠t́ doe̠ me̠nke̠da, pase̠ć Dulạṛ doe̠ kusi gea, me̠nkhan Phulmoni geye̠ cintạyae̠ kana. Laha tayo̠m hudis ar ganḍo̠n kate̠ jo̠to̠kote̠ geko go̠ṭa ke̠da, raibarić je̠mo̠n bon ho̠ho̠ae̠. Kạnhu ar Dulạṛkin kusi gea, tobe̠ ce̠daḱ bapla do̠bon bilo̠ma! Pase̠ć tayo̠m daram nonkan jãwãe̠ koṛa baṅ milạuabon. Dulạṛre̠n go-baba do̠ mit́ dhapkin lahaḱ kan khan bar dhapkin tayo̠mo̠ḱ kana. Sonamoni ko hoho adea arko kulikedea, Dulạṛ mae̠ biṭi ce̠t́ am do̠m kusigea? E̠nte̠ amaḱ go̠ṭa le̠kage ale̠ do̠ am lạgit́le̠ hudis daṛeaka. Hato̠m se̠ć ko̠yo̠ḱ ke̠t́te̠ bo̠ho̠ḱe̠ ḍubuḱ ḍubuḱ ke̠da, Kạhnu do̠ e̠naṅ khonge Dulạṛ gharọńjre̠ rakaṕe̠ lạgite̠ chaṭpaṭaḱ kana.

Katha do̠ sạriạu calaoe̠na, Kạnhu hõ inạko dinre̠ge bajar re̠aḱ ṭeksu officere kạmiye̠ ńamgot́ ke̠da. Banar gharo̠ńj ge ar bako tạṅgi le̠da, ạḍi rạskạ ar jakjo̠mo̠k ge bapla do̠ hoe̠ purạule̠na. Kạnhu do̠ o̠ka bhaṛa o̠ṛaḱ re̠ye̠ tahẽ kan, o̠nḍe̠ khon jo̠to̠ mo̠ṭra ko do̠ Dulạṛ takoaḱ o̠ṛaḱ te̠ye̠ ho̠bo̠r ạguke̠t́ taya. Hońrarte̠t́- hanharte̠t́ bana ho̠ṛge jãwãe̠ ko̠ṛa kin ne̠hõr ade̠ tahẽkana je̠mon ako são̠te̠ge bapla tayo̠m do̠kin tahẽn. Kạnhure̠n go-baba hõkin rạskạle̠n gea, e̠nte̠ ona gharo̠ńj re̠ mit́ go̠ṭaṅ hõ he̠re̠l ho̠po̠n do̠ bạnuḱkoa. Sạrige ạḍi rạskạ ar mo̠ńj dinko khe̠maoe̠t́ tahẽkana. Tho̠ṛa din tayo̠mge Dulạṛ doe̠ lạiat́ koa, nãwã pe̠ṛa doe̠ se̠ṭe̠ro̠ḱ kana, nonkan kho̠bo̠r ńam kate Phulmoni hõ e̠kal bo̠kot kuṛiye̠ hạṛuṕ kedea. Mo̠nre̠ye̠ gunạne̠na, bapla ạuri ho̠yo̠ḱ hạbić gidrạ são̠tege o̠kte̠ doe̠ laga paro̠m daṛe̠aḱa. Aćge dhe̠re̠ cintạ keda, ko̠ṛae̠ hoe̠le̠n khan se̠ kuṛie̠ hoe̠le̠n khan ce̠t́ ńutum do̠ho̠e̠ lạgit́e̠ po̠ramo̠s ạkina. Baṅko batao̠le̠ re̠hõ ać do̠ aćaḱ go̠ṭaakat́ ńutumte̠geye̠ ho̠ho̠aya. Bokot kuṛire̠n gidrạ lạgit́ ar ce̠t́ koe̠ ce̠kaya, nana hunạr kukmu gaḍare̠ye̠ paera baṛae kana.

Duṛuṕ din tiyo̠ḱe̠n khan bajar re̠aḱ mit́ hospital te̠ko ạtkir idikedea, ḍoctor do̠ biḍạu kate̠ye̠ ńe̠l ke̠da, Dulạṛaḱ ho̠ṛmore̠ me̠nae̠ gidrạ do̠ ṭhik position re̠do̠ bạnuya. E̠nhõ doctor bho̠rsae̠ e̠mat́ koa, kurumuṭuyae̠, je̠mo̠n mo̠ńj te̠ nãwã pe̠ṛa doe̠ se̠ṭe̠r daṛe̠aḱ. O̠peration theater te̠ko bolokedea, pe̠ ghanṭa doctorko kurumuṭu ke̠da, me̠nkhan Dulạṛaḱ obostha do̠ bạṛić se̠ćge bạṛić calaoe̠na. Mucạt́re̠ gidrạ ko bańcao̠ daṛe̠adea, me̠nkhan Dulạṛ do̠ mẽt́e̠ bo̠ndke̠da tire̠juge lạgit́ge. Kạnhu do̠ bo̠ho̠ḱre̠ ce̠ṭe̠r ńur ade le̠kae ạukạu ke̠da, ce̠kate̠ nãwã janam gidrạ doe̠ bańcaoe̠ya! Ato oṛaḱre̠ me̠naḱkin aćre̠n go-baba do̠ ce̠t́e̠ lại ạkina! Cando baba ce̠daḱ nun maraṅ duk do̠m ladeadińa, ce̠daḱ ce̠daḱ me̠nkate̠ ko̠ṛam ce̠ṭaḱ ce̠ṭaḱ te̠ye̠ ho̠mo̠r ke̠da. Me̠nakat le̠ka ‘obhaga jedike takai, sagor sukaeya jai’.

Phulmoni do̠ bokot kuṛire̠n gidrại ho̠bo̠rkedea, monre̠ye̠ go̠ṭa ke̠da, ińge̠ń hara burue̠ya. Nito̠ḱ Kạnhu do̠ huḍiń gidrạ lạgit́te̠ ae̠ma ae̠ma bhabnare̠ye̠ paṛao̠e̠na, ajnarte̠t́ Phulmoniaḱ jo̠ton, gidrạ jo̠m oco, ḍạbrạ ar ar e̠mante̠aḱ ńe̠lte̠ mo̠ndo̠ dhirpure̠n taya. Se̠taḱ re̠ office calaḱ ar he̠ć tayo̠m hõ gidrạ gate̠ye̠ ar siń ńindạ go̠ṛo̠-go̠po̠ṛote̠ gidrạ jo̠to̠n e̠kal banaho̠ṛ kin jhuke̠na. Tho̠ṛa din tayo̠m ge katha do̠ onḍoke̠na, Kạnhu do̠ Phulmoniye̠ dohoe̠de kana, noa do̠ ce̠kate̠ ho̠yo̠ḱa, uni mae̠ ajnarte̠t́ kan! Mit́ mo̠ca, bar mo̠ca te̠ge mạńjhi paranik ko ṭhe̠n hõ kho̠bo̠r do̠ se̠ṭere̠na. Jo̠to̠ suṭhik tayo̠m ge mạńjhi do̠ kulhi duṛuṕe̠ ho̠ho̠ ke̠da, mõṛe̠ mạńjhire̠n ho̠ṛ ho̠ko de̠lawat́ koa, cahe̠ nonkan bicạr do̠ baṅ ańjom akana. Santal somajre̠n guruko jo̠to̠aḱ ańjo̠mkate̠ bo̠ho̠ḱ do̠ kuḍbure̠n takoa. E̠nre̠hõ so̠majre̠n ho̠ṛko ãṭ te̠ko ro̠ṛke̠da, no̠a do̠ abo so̠maj re̠ tis hõ baṅ hoe̠ daṛe̠aḱa. Ko̠ṛa kodo̠ ạn le̠kate̠ so̠maj ṭhe̠n khon baḍae̠ sanake̠t́ koa, ma ape̠ guruko te̠he̠ńge no̠a phanḍao̠ ar lại saḍe̠ale̠pe̠! Tho̠ṛa gulmal hoye̠nte̠ so̠maj susạriạko go̠ṭake̠da, tayo̠m te̠ no̠a bicạr do̠bon phanḍao̠a.

Kạnhu ar Phulmo̠ni do̠ mit́ ńindạ gidrạwante̠ o̠ṛaḱ khonkin pharkao̠e̠na. O̠kate̠kin calao̠e̠n̠a, o̠kare̠kin kạmi kana, okoe̠ hõ ṭe̠wan bako e̠m daṛe̠ada. Kạnhu do̠ so̠maj ṭhe̠n kuliye̠ do̠ho̠le̠t́a, santal so̠maj re̠aḱ ạricạli le̠kate̠ ce̠t́ Phulmoni bạń do̠ho̠ daṛe̠aya? Diso̠m re̠aḱ ạn le̠kate̠ ce̠t́ nonkan bapla do̠ baṅ hoe̠ daṛe̠aḱa? Gulmalre̠ Kạnhuaḱ ae̠ma kathage baṅ pusṭạule̠ntaya. Ce̠t́ tobe̠ bon me̠ndaṛe̠aḱa, dulạṛ doe̠ kãṛãgea, se̠ kãṛãgea dulạṛ do̠!