Rajshahire̠ Ạdibạsi kuṛi jormoṭte̠ bạṛije (Dhorson) re̠aḱ kurumuṭu

Rajshahi jilạ Godagaṛi upojilạre̠ are̠(9) kilạs paṛhao̠ḱ mit́ ạdibạsi kuṛiaḱ hoṛmo jormoṭ bạṛić ocoḱ re̠ye̠(dhorson) paṛao̠ akana. Sunicar 10 October tayo̠m be̠la amdaj 3 baja o̠kte̠ upojilạ re̠aḱ Gogram union Baliạḍaṅga atore̠ no̠a ghoṭna do̠ hoe̠ akana.

Henostarey paṛao̠e̠n kuṛi gidrạwaḱ o̠ṛaḱ do̠ o̠na Borgitola atorege mente̠ baḍae̠ akana. Hola ńindạ 9 baja o̠kte̠ uni kuṛi do̠ ar ać Baba- Go são̠ aḍe̠pase̠re̠n tahẽkate̠ Godagaṛi thanare̠ye ijạhar akada.

Ijạhar dạkhil se̠ćte̠ baḍae̠o̠ḱ kana, uni ạdibạsi kuṛi (14) hola tayom be̠la amdaj 3 baja oakte̠ o̠ṛaḱ khon praebheṭ(privet) paṛhao̠ḱ lạgit́ bạliạḍaṅ atote̠ mahasoe̠ o̠ṛaḱe̠ calaḱ kan tahẽkana, o̠na horre hoṛo khet pinḍhạre̠ Baliaḍaṅ atore̠n Alom Hossain re̠n koṛa Al- Amin do uni kuṛi eskar ńamkedete̠ jormoṭte̠ bạṛić kạmie̠ (Dhorson) lạgit́e̠ kurumuṭuet́ tahẽkana, menkhan uni kuṛiaḱ kạumạu hohore̠ aḍepaserenko ńir heće̠n khan Al-Amin doe daṛ keda.

Godagari thanare̠n daroga(OC) Khairul Alom doe meneda mamla ol caṛhao̠ re̠aḱ kạmi calaḱ kana(report ol hạbić) uni dusiić sabe re̠aḱ hõ kurumuṭu do ̠e̠hoṕ akana.

Mamla e̠m tayom uni ạdibạsi kuṛi ar gharońj re̠n sulukre̠ko tahẽ daṛe̠aḱ ar uni dusi hoṛ usạra giriptare lạgit́ mit́ hokum e̠m hoe akana mente̠y lạikeda Rajshahi Otirikto pulis super Ifte Khayer Alom

Source: Jonojatir Kontho-11.10.2020

Hạnḍi ńũ re̠aḱ bhạlạite̠t́-3

Iń kumạṅ Mo̠ṅgla Hasdaḱ tho̠ṛae̠ ńũ lase̠rle̠n tayo̠m guhuṛ guhuṛ se̠reń iń ańjo̠m kedere̠ń kuliledea, ce̠t́e̠m sereńe̠da! Niạbar do̠ tho̠ṛa muruk te̠ye̠ sereń ke̠da are̠ lại ạdińa-

‘Hạnḍi tạṛi ńũ te̠

Baro̠ bighạ so̠mpotim bho̠rnake̠da.

Bulmam ce̠tao̠e̠n, hudis ạcure̠n

Po̠ṭo̠r ṭo̠ya le̠kam uḍạu baṛae̠.’

No̠a sereń re̠aḱ bhe̠d se̠ khandrite̠t se̠ndrań e̠ho̠ṕe̠na. Baṅgladiso̠m re̠aḱ bạrin ar utạr nakha jilạko̠re̠ santal ho̠po̠n ko̠aḱ ae̠ma ae̠ma so̠mpoti eṛe o̠co̠ḱ re̠aḱ maraṅ e̠ṭke̠ṭõ̠ṛe̠ kana hạnḍi do̠. Jạnum jhạnti deko̠ pe̠ṛa do̠ e̠kal se̠taḱ ạyuṕ ko̠ hiri lebo̠nre mo̠ne̠ jiwi do̠ lạbit́ go̠do̠ḱ tabo̠na. Pe̠ṛaḱ abo̠n, o̠nko̠ tuluć jo̠m-ńũ e̠dabo̠n to̠be̠ e̠ke̠n abo̠ko̠aḱ ghạro̠ńj ko̠rege. Jo̠m-ńũ do̠ bạṛti kaete̠ tạṛi-hạnḍi, pạurạge. Gharo̠ńj re̠aḱ muskilre̠ rin dhar lạgit́ hõ̠ kạudi e̠mo̠ḱ e̠kal geko̠ khaṛa go̠do̠ḱa. Mo̠ne̠r katha ma mo̠n regeye̠ re̠be̠t́ akat́, rin re̠aḱ jhạlire bo̠lo̠kate̠ algatege aosan e̠mo̠ḱ hõko lại sadego̠da. Me̠ne̠k unạḱ do̠ ce̠daḱe̠m guni bhạbiḱ kana, amaḱ khe̠t-baṛge tho̠ṛam e̠mạń khange rin do̠ń me̠tao̠ gidikaḱa. Ganḍra le̠ka rubuḱ rubuḱ ghạrõńj, so̠maj re̠aḱ bisi jaṅko̠ rạput́ akada, sanam so̠mpoti ho̠e̠ le̠ka o̠ṭaṅ caba akan tabo̠na. Santal ho̠po̠nko̠ me̠ne̠da, no̠a kando̠r re̠ ale̠aḱ jumi tahẽkana! No̠a baṛge do̠ So̠ko̠l go̠ṛo̠mba tako̠aḱ kana. Mit́ piṛhi hõ̠ ạuri paro̠mo̠ḱ rege ako̠aḱ khe̠t baṛge re̠ nito̠ḱ do̠ kamlako̠ khaṭao̠ḱ kana. Haere santal ho̠po̠n, haere santal so̠maj!

Abo̠ko̠ren juạn ko̠ṛa-kuṛi ko̠hõ ne̠be̠tar ma hạnḍi, tạri pạurạ bo̠ge teko̠ kusiaḱ kan. So̠ho̠rae ar e̠man po̠ro̠bko̠re naṅgraha ko̠re kho̠nko̠ so̠ho̠r se̠ṭe̠r le̠nre̠ o̠raḱ ko̠ca geko̠ o̠yo̠ṅ baṛaya. Kubrạj ar Sunil do̠ mit́ ato̠re̠n kanakin. Mit́ dhao̠ Kubrạj ar Sunil do̠ so̠ho̠rae re̠ o̠ṛaḱkin he̠ćle̠nre̠ Kubrạjre̠n mamo̠te̠t́ tako̠ ṭhe̠n pe̠ṛaḱkin ãṛgo̠e̠na. Naṅgraha re̠kin tahẽna ar po̠̠ro̠̠b kana bạṛti rạskạjo̠ṅ lạgit́ge hạnḍiko̠ do̠ho̠akada. Juạn ko̠ṛa mo̠ṭo̠r cycle re̠kin co̠ghaye̠nte̠ giṛ giṛạu calao e̠nakin. Bo̠gete̠ko̠ jo̠m ke̠da, ńũ ke̠da arko̠ rạskạe̠na. Ńuhum ńuhumko̠ bidake̠t́ kina, bidaḱ lahare̠ bar bạṭi kate̠ se̠be̠l hạnḍi ko̠ calat́kinre̠ po̠yo̠ṛ po̠yo̠ṛkin ńũ go̠t́kada. Kubrạj do̠ mo̠ṭo̠r cycle start go̠t́ke̠da ar de̠će̠nte̠ ṭipạ ṭape̠kin mo̠hnḍae̠na. Hudiń ḍahar kho̠n district ro̠ad re̠kin rakaṕ go̠t́e̠na. Bul akankin tahẽkante̠ so̠jhe do̠ bạkin calao̠ daṛeaḱ kana. District ro̠ad te̠do̠ o̠na district kho̠n raj naṅgraha calaḱ night co̠ach e̠ne̠geko̠ aṛaḱgo̠t́ akada. Ńuhum ńoḱ tahẽkante̠ ar Kubrạj do̠ ḍhe̠rge bulakane̠ tahẽkante̠ ro̠adrege samna sạmni tạpińena. Night co̠ach do̠ calao̠ paṛo̠me̠n re̠hõ mo̠ṭo̠r cycle ro̠ad kho̠n o̠ṭaṅe̠nte̠ Kubrạj ar Sunil do̠ accident te̠ ạḍikin ghạle̠na, e̠nte̠ bana ho̠ṛaḱge mit́go̠ṭaṅ kate̠ jaṅga do̠ ge̠je̠re̠n tạkina. Ho̠spiṭal te̠ko̠ idike̠t́ kina, tho̠ṛa din tayo̠m do̠kin ro̠phae̠na me̠nkhan le̠ḍha ge taṛam do̠kin eho̠̠ṕke̠da. Gate ar pe̠ṛako̠ ṭhe̠n kho̠n ańjo̠me̠na ḍherge bulkin tạhẽkante̠ no̠nkan accident do̠ ho̠eakana. Pase̠ćre̠ pase̠ć baṅkin bulko̠ḱ khan o̠ho̠ge muskil re̠kin
paṛao̠ko̠ḱa.

Ińaḱ ńe̠lre̠ ae̠ma Santal ho̠po̠nko̠ ńu bulkate̠ accidentte̠ ako̠aḱ mo̠ńj ho̠ṛmo̠ko̠ ko̠mjuri akan tako̠a. Juri pạri ko̠aḱ bhinạ-bhini ho̠e akana, go̠ć-go̠po̠ć ho̠e akana. Haere Santal bo̠eha, haere Santal ho̠po̠n delabo̠n hạnḍi-tạṛi, pạurạ kho̠nbo̠n ńir pharako̠ḱa.

Suluk re Nobel siropa (Nobel Prize) ńamkeda Dhạrti Jo̠m-ńũ Kạmi ho̠ra são̠ta (United Nations World Food Programme)

Go̠ṭa Dhạrti re reṅgeć birudre lạṛhạire̠ maraṅ dạyike̠ hatao̠e̠t́ te 2020 se̠rma re̠aḱ No̠bel siropa (No̠bel Prize) ńamkeda Dhạrti jakat ‘ Dhạrti jo̠m-ńu kạmiho̠ra’ (WFP). So̠ko̠lbar 5 ho̠ṛ re̠aḱ mit́ co̠mmittee do̠ mano̠t re̠aḱ niạ siropako̠ jạhirke̠da. Po̠dartho̠ (physics), Ro̠sayo̠n (Chemistry) Ran-murgạn (Cikitsa), kạuḍi (Eco̠no̠mics), O̠no̠l niạko do̠ Suiḍe̠n diso̠m kho̠n jạhiroḱa. Eke̠n suluk re̠aḱ siropa do̠ No̠rway diso̠m O̠slo̠ naṅgraha kho̠n jạhiroḱa.

No̠rwegian no̠bel co̠mmittee ko̠ baḍae o̠co̠ḱ kana, re̠ṅge̠ć lagae̠re̠ ar lạṛhại te̠ laṅga akan ṭo̠ṭha re̠ suluk nirại hara rakaṕ lạgit́ ar reṅgeć je̠mo̠n lạṛhại re̠ khanḍa bhanḍa hisạbte̠ je̠mo̠n bako̠ o̠na kạmi lạgit́ niạ sãõ̠ta do̠ 2020 se̠rma re̠ Suluk re̠ no̠bel siropa ko̠ e̠mae̠ kana. No̠rway re̠n no̠bel co̠mmittee re̠n mukhiạ Berit Reiss-Andersen niạ se̠rma suluk re̠ siropako ńamet́ koaḱ ńutum. Ko̠ro̠na khạtir niạ dhạo ạḍi ke̠̠ṭe̠ć mana tahẽkana. Unie̠ me̠nke̠da- Dhạrti Jo̠m-ńu Kạmi ho̠ra sãota do̠ suluk re̠ niạ siropa e̠mae̠ re̠aḱ lạgti do̠ ho̠yo̠ḱ kana go̠ṭa dhạrti re̠n lakh lakh manwa ko̠ re̠ṅge̠ć ar jo̠m-ńu re̠aḱ o̠kulạn kho̠n bańcao̠ ko̠ lạgit́ ạḍíe̠ kạmi akada.

Dhạrti jakat sãota do̠ ạḍi gurutto̠purno̠ são̠ta kana nia WFP. Manwa ko̠aḱ ạidhạri rukhiạre ạḍi jạruṛ kạmie kạmiyeda niạ são̠ta do̠. Manwa ko̠aḱ jo̠m-ńu do̠̠ ạḍi jạruṛ kana bańcao̠ḱ lạgit́. Go̠ṭa dhạrti re̠ 2019 sermare̠ 88 go̠ṭe̠n diso̠mre̠ 10 kạruṛ ho̠ṛ jo̠m-ńu re̠aḱ go̠ṛo̠e̠ e̠m akat́ ko̠a niạ são̠ta. Dhạrti jo̠m-ńu kạmiho̠ra do̠ Dhạrti jakat re̠aḱ jo̠m-ńu go̠ṛo̠ e̠m babo̠t mit́ dạr kana. Niạ re̠aḱ maraṅ kạmi ho̠ra ṭhại re̠aḱ o̠ffice do̠ Itạli re̠aḱ Ro̠m re̠.

HSC re̠ GPA-5 ko ńama jãhãeko

Bạtil hoe akana niạ se̠rma re̠aḱ HSC biḍạu. No̠a lạgit́ JSC ar SSC biḍạu re̠ ńam akat́ jo se Nombor ce̠tanre̠ tojbij kate̠ HSC re̠aḱ Jo se result do̠ em hoyogoḱa. Niạ dhao do̠ baḍaena okoeko JSC ar SSC banar biḍạu rege GPA-5 ko ńam akat́ onko do̠ HSC re̠hõ inạ mit́ jo̠ geko ńameda. Calaoe̠n bud hiloḱ diso̠m re̠aḱ siknạt board pahṭa khon no̠a katha do̠ baḍae̠ ńam akana.

Biḍạu e̠moḱ gidrạko ce̠t́ dharare̠ no̠a goṛ nomborko ńama ona goṭae̠ lạgit́ ce̠tan hudạre̠ dupuṛuṕ kankoante̠ mit́ komiṭi be̠nao̠ hoyoḱa. Onko komiṭire̠n koaḱ tojbij ar ńeljut dharate̠ be̠gor biḍạu emtege jo do̠ jahiro̠ḱa. Okoe̠ko mit́ se bar bisại re̠ phel kate̠ arhõ biḍạu emo̠ḱ lạgit́ko sapṛao akana onko kodo̠ Auto Pass ko ńama.

Diso̠m jakat siknạt board re̠n sabha mukhiạ Md. Jiaul Hauqe doe̠ me̠ne̠da je, okoe pạṭhuạ gidrạko ISC ar SSĊ re̠ GPA-5 jo̠ me̠naḱ tako onko do̠ GPA-5 ko ńam daṛeaḱa, ar mit́ se bar bisai re̠ ko phel akat́ biḍạu e̠mo̠ḱ lạgit́ ko sapṛao̠ akan ko do̠ onako bisạire̠ pass kako te̠ sanam GPA te̠ onkoaḱ jo̠ se Result do e̠m hoyoḱa.

Uni do̠ arhõe̠ menke̠da Latar biḍạu kore̠ kom GPA ko ńam akat́ pạṭhuạ gidrạ kodo̠ no̠a HSC biḍạu re̠ arhõ bhage jo̠ ńam re̠aḱ as do̠ tahen tako gea, no̠a iạte̠ pass kako re̠hõ GPA nombor do̠ komge tahena, Menkhan sanam lekan goṭawaḱge siknạt montronaloe re̠aḱ calao banao̠ komiṭiaḱ tojbij dharate̠ hoe purạuḱa.

Niạ dhao̠ HSC ar ona orasora biḍạu re̠ 13 lakh 65 hajar 689 biḍạu e̠moḱ pạṭhuạ seledo̠ḱ re̠aḱ katha tahẽkana. Onko modre̠ nãwãnko do̠ 10 lakh 79 hajar 181 hoṛ ar marenko do̠ 2 lakh 66 hajar 208 hoṛko kanako,.

Bis ńũtey goćena Go̠dagaṛi ren Santal kuṛi gidrạ

Rajshahi jilạ Go̠dagaṛi re mit́ santal kuṛi gidrạ bis ńũtey goćena. Gharo̠ńj re̠aḱ muskil do̠sa karo̠nte̠ uni do̠ no̠nkae̠ kạmi akada me̠nte̠ baḍae̠ akana.

Teheń se̠taḱ ber 11 baja se̠ć police do̠ uni gidrạwaḱ mạ̃ṛi thana teko ạgu akada. Go̠će̠n gidrạ waḱ ńutum do̠ Bithi Hembro̠m (14). Uni Go̠dagạṛi Upo̠jilạ re̠aḱ Mohonpur Union Bạuṭia ato̠ren Nores Hembro̠m re̠n kuṛi gidrạe̠ tahẽkana.

Baḍae̠yo̠ḱ kana- Baba, gogo bako tahẽkan tạkin te̠ Bithi ar uni kho̠n kạṭić kuṛi bo̠e̠ha mit́ tekin tahen kan tahẽna. Gharo̠ńj re̠aḱ re̠ṅgeć, o̠kulạn khạtir unkin gidrạ do̠ iskul hõ̠ baṅkin calao̠ daṛe̠ akada. Apnar o̠ṛaḱ re̠ge nui kuṛi gidrạ ghãs go̠ć bise̠ ńũle̠da ackage. O̠na baḍae̠ kate̠ ato̠re̠n ho̠ṛko uni gidrạ o̠na aḍe̠pase̠ re̠ me̠naḱ sastho complex re̠ko̠ ạtkir idiledea. O̠nḍe̠nić do̠cto̠r uni ńe̠l baṛakate̠ go̠će̠nae̠ me̠nte̠y baḍae̠ o̠co̠ke̠t́ ko̠a. Ato̠ re̠n ho̠ṛko lạie̠da Bithi Hembrom re̠n go̠ baba do̠ tho̠ṛa se̠rma laha bana ho̠ṛ bapla kate e̠ṭaḱ re̠kin bạgiaḱ kinạ. Nukin gidrạ do̠ o̠na tayo̠m ać talaba ṭhe̠nkin tahẽn kan tahẽna. Me̠nkhan ackage teheń so̠ko̠lbar se̠taḱ be̠la bis ńũ kate̠y go̠će̠na Bithi Hembrom. Niạ gho̠ṭo̠na khạtir Go̠dagaṛi thana ren O̠ffie incharge (OC) Khairul Islam e lạie̠da nui santal kuṛi gidrạwaḱ mạ̃ṛi do̠ mo̠ena to̠do̠nto̠ lạgit́ Rajshahi Meḍical College Ho̠spiṭal tele ko̠l akada. Ar niạ gho̠ṭo̠na khạtir Thanare̠ mit́ bạ̣ṛić gujuḱ re̠aḱ mamla o̠l lạgit́ko saṕṛao̠ḱ kana.

Bạhukuṛi ko̠nac (Rape) do̠s khạtir mit́ ạdibạsi ho̠ṛaḱ Jabo̠cjibo̠n jail

Joypurhat Sadar Upojilạre Madhobpur ato̠ren mit́ bạhukuṛi ko̠nac (Rape) do̠s khạtir Josep (48) ńtuman mit́ hoṛ Jabocjibon Karadonḍo (ać aḱ jion reaḱ mucaḱ din dhạbić jehal reaḱ ray) ko emaoakadea. Gurubar (07 O̠cṭo̠ber) ạyuṕbela Joypurhaṭ Nari o Shishu Nirjatjaon Domon tribunal ren Biḱcạrić Rostom Ali niạ raye emkeda.

Sạjại ńamić Josep do Madhobpur ato̠ren Thạkurer ren hopon kanae.

Nari o Shishu Nirjatjaon’ domon Tribunal sarkari ukil special ukil Advocate Firoja Chowdhari niạ ray reaky khobor e nischit akada. Mamla reaḱ ol re baḍaeoḱ kana – 2007 serma re aḱ 18 January ńindạ josep do uni bạhu kuṛi racatey oḍoṅlenre joidikate konac (rape) ledea. Tayomte begor disạ obostha rege aḍepaseren ho̠ṛko do uni bạhu kuṛi onḍe kho̠nko baňcao kate Jilạ so̠do̠r ho̠spiṭal reko̠ bhurti kedea. Uni bahu kuṛi do̠ 24 January mit́ṭen e mamlakeda ar ona mamla reaḱ charge sheet 19 February court re ko dạkhil keda. Mucạt́ re 6 hoṛaḱ go̠ha lekate sariaḱ pormante teheń niạ ray ko emkeda. Ray em okte do̠si ho̠ṛ do̠e dạṛakat́te uniren so̠r pera ar gharo̠nj renko samaṅre ray paṛhao ańjo̠maḱ ko̠a.

Niạ serma HSC biḍạu baṅ ho̠yo̠ḱa: Siknạt Mo̠ntri

Ko̠ro̠na virus khạtir niạ dhao reaḱ Higher Secondary Certificate (HSC) ar o̠na man reaḱ eṭaḱ biḍạu do baṅ hoyoḱa. No̠ko̠ biḍạu em pạṭhuạko̠aḱ jo̠ do̠ JSC ar SSC biḍạu reaḱ jo̠ cetan to̠jbickate emo̠go̠ḱa. Hijuḱkan December cando̠ niạ kạmi ko̠ puṛạua.

Teheń Gurubar O̠nline kho̠bo̠riạ ko̠ são̠ Siknạt Mo̠ntri Dipu Muni niạ katha ko̠e baḍae o̠co̠akana.

Siknạt Mo̠ntri 2020 serma reaḱ HSC biḍạu hatao̠ baṅkate eṭaḱ lekate o̠nko̠ mullayo̠n ko̠a. Niạ dhao̠ren HSC biḍạu em gidrạko̠ ar hõ barea biḍạuko em ago̠akada. O̠nko̠aḱ JSC ar SSC biḍạu reaḱ jo̠ ńelte niạ dhao̠ reaḱ HSC biḍhạu reaḱ jo̠ do̠ niriko̠ḱa. O̠ko̠e ko̠ SSC pas tayo̠m (Science khon Commerce se Humanities) re ako̠aḱ paṛhao̠ḱ reaḱ ko̠ pherao̠ akada o̠nko̠aḱ mullayo̠n lạgit́ mit́ gạkhuṛ do̠l bandhao̠ ho̠yakana. O̠nko̠ do̠ o̠ne apnar paṛhao̠ḱ kan bibhag ko̠ bo̠do̠l akat́ ko̠aḱ biso̠i ko̠ ńela.

HSC pas tayo̠m maraṅ siknạt hatao̠ o̠kte cet́ ho̠yo̠ḱa no̠nkan kukli ledere siknạt Mo̠ntri menkeda Maraṅ siknạt hatao̠ bho̠rti re cet́ ho̠yo̠ḱa se cet́ leka kate o̠na do̠ nit baṅ men baṅ gano̠ḱa. Tayo̠m daram galmarao̠ kate ṭhikoḱa cet́ lekakate gidrạ ko̠ko bhurtiḱa mente.

HSC biḍạu hatao̠ reaḱ katha tahekan niạ serma April cando̠ reaḱ pạhilre. Menkhan o̠na laha ge ko̠ro̠na khạtir ko̠ hape keda. Niạ dhao niạ biḍạure 13 lakh kho̠n ho̠ ḍher pạṭhuạ ko o̠ṅso̠ṅkea.

Pạhil Siknạt (Primary) Iskul re ko hatao ko̠a 32 hajar Mahaso̠e

Baṅgladiso̠m sarakaraḱ Sarkari Primary School re 32 hajar 577 goṭen são go̠ṛo̠an Mahaso̠e hatao reaḱ ko go̠ṭakeda Pratho̠mik ar Go̠no̠sikha Mo̠ntro̠nalo̠y. Niạko hudạre Prak- Pratho̠mik (Pạhil siknạt laha cet́) lạgit́ 25 hajar 630 ho̠ṛ ar Pratho̠mik (Pạhil siknạt) lạgit́ são kạmiạ mahaso̠e hudạre 6 hajar 947 go̠ṭen mahaso̠e ko hatao ko̠a. Pratho̠mik Sikkha O̠dhido̠pto̠r do̠ Pratho̠mik ar Go̠no̠sikha Mo̠ntro̠nalo̠y niạ kho̠bo̠r ko so̠do̠r akada

Pratho̠mik ar Go̠no̠sikha Mo̠ntro̠nalo̠y ren maraṅ so̠cib Md. Akram Al- Ho̠ssain e baḍae o̠co̠akana- ạḍi usạrage niạ Ho̠ṛ hatao̠ reaḱ Niyog so̠do̠r sakam ko jaṛia.

Ar ho̠ baḍae akana baṅ ma 2009 kho̠n 2019 serma hạbić Sarkari Primary School re 1 lak 97 hajar 864 go̠ṭen mahaso̠e ko hatao akat́ ko̠a. Mujib serma re jo̠to̠ sunno̠ po̠d (hudạ) re mahaso̠e hatao̠ reaḱ katha tahe kan re hō niạ ko̠ro̠na khạtir baṅ ho̠ylena. To̠be September cando̠ re Ko̠ṭa do̠ho̠kate Primary School ren mahaso̠e hatao̠ reaḱ go̠ṭa akana. Niạre 60% maejiu, 20% herel hopon ar 20% sarkari primary school ren nukri kanko̠ren gidrạko lạgit́ ko̠ṭa do̠ho̠ reaḱ ho̠ ko pro̠stab akada. Primary ren mahaso̠e koaḱ to̠lo̠b 13 graḍe hoy akan khạtir niạ katha se prostab do̠ em akana.

Diso̠m ren Ạyurić aḱ hukumaḱ lekate 13 grade dhạbić to̠lo̠b ho̠ylen khan o̠nako ho̠ṛ hatao re do̠ jahan ko̠ṭa baṅ tahena no̠nkan go̠ṭawaḱ menaḱ te ko̠ṭa ko bad leda. Niạ laha Muktijo̠dha, Khudro̠ nri-go̠sṭi, Ansar-VDP, Pro̠tibo̠ndhi ar Jilạ ko̠ṭa ko do̠ho̠yet́ tahena. To̠be 14 kho̠n 20 grade dhạbić ho̠ṛ hataore no̠a ko ko̠ṭa do̠ tahena.

Jo̠to̠kho̠n mucạt́ 2018 serma reaḱ 30 july são mahaso̠e kạmiạko hatao reaḱ biḍạu do hatao̠lena. O̠na biḍạure 55 hajar 295 ho̠ṛ ko daṛelena ar kạmireko̠ hatao ket́ ko̠a 18 hajar 147 ho̠ṛ. Niạ laha 2014 serma reaḱ hapelet́ biḍạu hō hataolena ar o̠nare daṛelena ko 29 hajar 555 ho̠ṛ. Niạ mo̠dre kạmireko hatao ket́ koa 9 hajar 767 ho̠ṛ.

T O̠ P O̠ L

Hape hape duk do̠

Aṛerem teṅgo̠ḱkan

Hara – hiri jiwi

Taṛam ḍahar re

Acka ge thiro̠ḱ mo̠n.

ạṛić eṭaḱ bhabna ge

Bhiṛkạuae ạḍi jhạl hante

Eṭaḱ bilạn seć.

Serma ipil bhitri re

Co̠ko̠ o̠na as

Ar bae gupiete

Mo̠n o̠nto̠r do̠e hapeḱ

Dhasaḱ bo̠hel jo̠to̠ kukmu kumbạ.

Serma – tapaṕ kate juạn bayar

Uḍạu calaḱako̠ ạḍi jhạl

Bar dinaḱ no̠a

Helmel hulạs re

Rạskạ hutạs mo̠n .

So̠ – baha nạṛi re

An – mo̠na ko̠ḱam hahaṛa te .

Haere diglạ ḍigli dhuṛi dhạrtire

khange hudis ruạṛạń

Mo̠ha – muhim renaḱ katha,

O̠ka reba bạṛić menaḱ

Mit́ mit́te jo̠to̠

Duk do̠ jarwaḱ

To̠ro̠ć to̠pa seṅgel leka

Mo̠n o̠nto̠r do̠ lo̠ḱ.

Jiwi alae̠ do̠ baṅ go̠ć akadeako Gho̠ṛaghaṭren Campa Ṭuḍu, Dạbi ać Babawaḱ

Dinạjpur Ghoṛaghaṭ Upojilạ reaḱ kucerpaṛa atore̠n Go̠nes Ṭuḍure̠n hopone̠ra Campa Ṭuḍu do̠ bis ńũte̠ do̠ bae go̠ć akana. Bicko̠m uni do̠ko go̠ć akadea me̠nte̠ ać Baba Go̠nes Ṭuḍu robibar Ghoṛaghaṭ press club re̠ khobriạko ṭhe̠n no̠nkae dạbi akada.

Go̠nes Ṭuḍu aḱ sakamre o̠l akan katha ko do̠ kho̠bo̠riạ ko̠ samaṅrey paṛhao̠ ke̠da aćre̠n lạṭu ko̠ṛa gidrạ Biplob Ṭuḍu. O̠na o̠l akan kathare̠ me̠naḱa je̠ ho̠po̠n kuṛi gidrạ Campa Ṭuḍu so̠r ṭo̠la Kucerpaṛa Hafej Abdur Rahman re̠n ho̠po̠n Ruhul Amin ae̠ma le̠kan bo̠to̠r uduḱ kate̠ uni são̠ arhõ̠ ho̠ṛko niạ Campa Ṭuḍu ḍahar kho̠nko̠ ạtkir kedea. Niạ gho̠ṭo̠na re̠aḱ biḱcạr lạgit́ Ghoṛaghaṭ Thanare mamla le̠da Campa Ṭuḍure̠n apatte̠t́ Go̠nes Ṭuḍu. O̠na tayo̠m police ae̠ma jaegare̠ to̠las kate̠ uni kuṛi gidrạ se̠ndra ńamkate̠ ać baba ṭhe̠nko jimạ kade̠a. Inạ po̠r ar hõ tho̠ṛa din tayo̠m o̠nko ho̠ṛ ge uni gidrạ ạtkirkate dusiko o̠kore̠ko tahẽkana, niạ gho̠ṭo̠na niạ police court re̠ niạ reaḱ lạlis kago̠j jimạ akada. Calao̠e̠n 6 September Gho̠ṛaghaṭ Upojilạ re̠aḱ so̠do̠r ho̠spiṭal re bho̠rti akan ar cikitsa hatao̠et́ko se̠ndra ńamledea police. O̠nḍege uni kuṛi gidrạ do̠e go̠će̠na. Ạtkir lede ho̠ṛ Rahul Amin ar uni gharo̠ńjren ho̠ṛko̠ do̠ ko lại baṛaeda baṅma uni Kuṛi gidrạ do̠e apnarte̠ye̠ goć (attoho̠tta) akana.

Menkhan Campa Ṭuḍu re̠n Baba ar gharo̠ńj re̠nko me̠ne̠da ale̠aḱ pạtiạu ale̠re̠n kuṛi gidrạ tishõ̠ apnarte̠ do̠ bae̠ gujuḱa (atto̠hotaea) uni do̠ ko go̠ć akadea. Ar mo̠care bis dulkate ko lại baṛaeda baṅma bis ńutey go̠će̠na ale̠re̠n gidrạ do̠.Onko go̠go̠ćko dusian ho̠ṛge ar hõ̠ mamla rakaṕ lạgit́ nanaparkan bo̠to̠rko uduḱako kana. o̠nko̠ do̠ niạ re̠aṅ hikạho̠k bicạrko dạbie̠da me̠nte̠ kho̠bo̠riạko ṭhe̠n kuṛi gidrạ re̠n ać babae so̠do̠rke̠da.

Tumạl- The Daily Karatoa 05/10/2020