Rajshahi Go̠dagaṛi Upojilạ re̠n diso̠m phurgạliạ (Muktijodha) Susil Soren (75) aḱ mucạt́ bidạ do̠ diso̠m re̠aḱ man mano̠t emkate̠ ko to̠pakeda. Mo̠ṅgo̠lbar se̠taḱ 10 baja tala Upo̠jilạ re̠aḱ Pạkṛi Uniaon re̠aḱ Bạuṭia ṭo̠ṭhare Narayo̠npur ato̠ re̠ apnar o̠ṛaḱ samaṅre̠ Kako̠nhaṭ Police To̠do̠nto̠ Kendro̠ren mit́ do̠l gạkhuṛ palṭonko̠aḱ se̠ṭe̠rte̠ diso̠m re̠aḱ man mano̠t se̠le̠t́ ko to̠pakedea.

Niạ o̠kte̠ o̠nḍe̠ se̠ṭe̠re̠ tahẽkana Upojilạ Nirbahi Officer (UNO) Md. Alomgir Ho̠ssain, dạyik ńam akanić Mukti Joddha Co̠mmander Asok Kumar Cho̠wdhury, Pakṛi Union ren Muktijoddha Co̠mmander Ishahak, Kako̠nhaṭ Police To̠do̠nto̠ Kendro̠ re̠n In charge Police Inspecṭo̠r Abdul Lotif no̠ko̠ chaḍa hõ̠ aḍepase̠re̠n ae̠ma hoṛ ar pe̠ṛa pạrbhạko jarwale̠na.

Bir diso̠m phurgạliạ (Muktijodha) Susil So̠ren do̠ Narayo̠npur ato̠ren Maraṅ So̠ren re̠n gidrạe tahẽkana. Calao̠e̠n so̠mbar ńindạ 2 baja tala se̠ć aćaḱ o̠ṛaḱ rege sanamko bạgi kate̠ jaejuge̠ jirạue̠na diso̠mre̠n nui birbanṭa gidrạ do̠.  Uni do̠ ae̠ma din kho̠n ge sãhẽt́ re̠aḱ ko̠sṭo̠ ro̠g te̠ye̠ jạbun akan tahe̠na.

Gujuḱ o̠kte̠ Susil So̠ren do̠ aćren e̠ra, mit́ ko̠ṛa ar mit́ kuṛi gidrạ ar go̠ṛo̠m gidrạko̠ são ae̠ma ńe̠pe̠l pe̠ṛa ar uni dulạṛe̠de ho̠ṛe̠ bạgi o̠ṭo̠waḱkoa.

Upo̠jilạ Muktijodha Co̠mmanḍer Muktijodha Saṅsad se̠ć kho̠n uniaḱ gharońjren ko̠ ṭhe̠n 5 hajar ṭaka ko̠ e̠m calat́ko̠a ar ạḍi bhabnako̠ so̠do̠rke̠da.

Diso̠m phurgạliạ (Muktijodha) Susil So̠ren do̠ e̠ke̠n abo̠ Baṅgladiso̠m re̠n mano̠tan gidrạ e̠skar do̠ baṅ bicko̠m sanam Santal Jạtiạri ko̠ren go̠ro̠be̠ tahẽkana.

Teheń do̠  go̠ṭa dhạrtire ‘Global Day of Prayer for Santals’ mãhã mano̠toḱ kana.

Hope for Santals reaḱ kurumuṭute pạhil dhao̠ leka India, Nepal, Bhuṭan ar Baṅgladeshren Santalko lạgit́ ko̠ejo̠ṅ din ‘Global Day of Prayer for Santals’ do̠ manao̠ḱ kana. ‘Hope for Santals’ reaḱ lekha lekate Bangladesh 6,35,000 (Turui Lak Pe gel Mo̠ṛe Hajar), India 75,95,702 (Eyae gel Mo̠ṛe Lak Are̠ge̠l Mo̠̣ṛẽ Hajar Eyae sae bar), Nepal 42,000 (Po̠ngel Bar Hajar), ar Bhuṭan diso̠mre 5,300 (Mo̠ṛẽ Hajar Pe sae) Santal ho̠po̠nko giro̠bạsi akana. Jo̠to̠ko̠te do̠ 80,78,700 (Irạlgel Lak Eyaegel Irạl Hajar Eyae sae).

‘Hope for Santals’do̠e meneda Santalko Iso̠r khon saṅgińre menaḱ ko̠te nijo̠r do̠sa re menaḱ ko̠a. O̠nate teheń O̠cṭo̠ber 6, 2020 mãhãredo̠ bạṛtikaete santal ho̠po̠nko lạgit́ ko̠ejo̠ṅ lạgit́ go̠ṭa dhạrtiren Santalko ṭhen nẽho̠r ko̠ do̠ho̠akada. Baṅgladesh kho̠n Mr. Eno̠s Hembro̠m, Mrs. Mo̠njulika So̠ren, Mr. Philip Murmu ar Dr. So̠hel Marandi To̠pu, Nepal kho̠n do̠ Bisho̠p Jo̠seph So̠ren jo̠po̠ṛao̠e tahen reaḱ katha menaḱa. Delabo̠n abo̠n ho̠ Santal bo̠eha miserako lạgit́ Iso̠r baba ṭhenbo̠n bintiema. 

Dinạjpur nạṅgraha reaḱ Jabed International Abasik Ho̠ṭel re lạṭghạṭi bạrić kạmi do̠ste ho̠ṭelren manager ar ho̠ṭel re kạmiạ kin 2 hoṛ salat́ 2 joṛa kuṛi-ko̠ṛako saṕket́koa Ko̠to̠wali thanaren police.

04 O̠cto̠ber Ro̠bibar tikin ber ṅagraha reaḱ Bahadur bajar ṭo̠ṭha re Jabed Super Markeṭ reaḱ 3 talale Jabed International Abasik Ho̠ṭelre lạṭghaṭi lekanaḱ bạrić kạmi ko ạyur khạtirte  o̠nko do̠ko saṕo̠co̠yena.

Saṕo̠co̠akan ko kuṛi koṛa do̠ko ho̠yo̠ḱ kana- Parbo̠rtipur Upo̠jilạ reaḱ Ramcandro̠pur ṭo̠ṭharen Mo̠fej  kicrić bepariạ ren  ko̠ṛa Baccu Ali Limo̠n (27), o̠na Upo̠jilạ renge  Simul jhuṛi santal ato̠ (ho̠ṛ at̠o) ren Alberikus  Hasdaḱ ren ho̠po̠nera Lo̠ta Hasda (20). Kaharo̠l Upo̠jilạ reaḱ Ucitpur ṭo̠ṭheren Mijanur Rahman Asik (28), o̠na Upo̠jilạren kuṛi Tania Mo̠ho̠nto (18).

O̠nko̠ chaḍa ho̠ Ho̠ṭel Manager Abdur Rahim Rakib (40), ar ho̠ṭel ren kạmiạ Faruk Ho̠sen (28).

O̠na gho̠ṭo̠na do̠ police inspecṭor Md. Ziaul Haque baḍae o̠co̠ḱ kana- o̠ko̠ kho̠bo̠r ńamkate ṅagraha reaḱ Bahadur bajar ṭoṭha re Jabed Super Markeṭ reaḱ 3 talale Jabed International Abasik Ho̠ṭelre lạṭghaṭi lekanaḱ bạrić kạmi ko ho̠yo̠ḱ kana. Niạ o̠kte police aḱ mit́ do̠l calao̠ kate 2 jo̠ṛa kuṛi-ko̠ṛa ar ho̠ṭel manager ar kạmiạić ko gereptar ket́ koa.  Niạ gho̠ṭo̠na aňjo̠m tayo̠m ho̠ṭel mạlik são jo̠gajo̠g reaḱ kurumuṭu lenre uni do mo̠bile pho̠ne call bae saṕakada.

Tumạl- Dinajpur News

Hudiń hudiń kho̠n aboaḱ siknạt do̠ eho̠boḱa. Abo sanamko ge gidrạ kho̠n gebo̠n cet́ ago̠akada puthi reaḱ siknạtko ar o̠na do̠ aboren siknạt Guru ṭhen kho̠nge. Joto manwakoá jion rege Guru se Mahasoeaḱ ạḍi dạyik do menaḱa. Ente hudiń umer re onkgema ti sapaṕkate bud akelko cet́ abokana.

Sạrige Mahasoe se guru do̠ ạḍi mano̠tan ho̠ṛkanako gãota ar sãotako̠re. o̠nko̠aḱ udo̠ḱ dahartege sanamko hiḍiń gidrạ kho̠n hara buruḱ dhạbić ko taṛameda ar sanakoaḱ bud akel hudis bundis daṛe janamo̠ḱ kana. Siknạt Guru do̠ ạḍi bhạlaianićko hoyoḱa. O̠nko redo̠ nãwã hudis ar akel reaḱ jaṅ aboreko era o̠nage mit́ din o̠mo̠n kate hara buruḱa. Sanamko bo̠ge bạṛićko o̠ro̠ma. O̠nto̠r re dulạṛ ar so̠ro̠s akel ko danaboa.

Teheń 05 october goṭa dhạrtire siknạt mãhã hisạbte mano̠toḱ din kana. Niạ dinre  dhạrtiren sanam siknạt Guru lạgit́ Santals Times seć khon tahen kana aema aema mano̠t johar ar sarhao.

Noakhali reaḱ Begumganj Upojilạ ren mit́ maejiu kicrićko bhanḍuṛkate ạḍi bạṛić ko kocloṅ reaḱ ghoṭona re Dhaka ar Narayanganj khon hoṛko gereptar akat́ kina RAB.

Niạ bhitrere Narayanganj kho̠n gereptar akan hoṛ ṭhen barhe diso̠m reaḱ seṅgẽl sar ko ńam akada mente RAB ren mukhiạ Ashik Billah baḍae o̠co̠akana.

Hola calaoen ńindạ noa gho̠ṭonare jopoṛao so̠ndeho̠te 2 ho̠ṛko gereptar kate court hotete police tire 7 din reaḱ remand ko ardas akada. Sareć ko hõ gereptar reaḱ ko kurumuṭu kana RAB ar Police aḱ.

Koclo̠ṅ re paṛaoić maejiu do calao̠en ńindạ gereptar akan 2 hoṛ o̠na ghoṭona tuluć jopoṛao tahen reaḱ katha police baḍae o̠co̠akat́ ko̠a. sarećko hõ saṕko lạgit́ police ko kurumuṭu kana.

Police ko baḍae ocoḱ kana je mit́ cando̠ laha Upojilạ ren mit́bar koṛa uni maejiu ko ko̠clo̠ṅ ledea. O̠na ghoṭo̠na reaḱ vedio muṭhạnputhire (facebook re) pasnao tayo̠m aema ho̠ṛ ko aema lekan  raṅgao kathako galmara arko ro̠ṛkeda o̠na ghoṭona reaḱ biḱcạr ko dạbiakada.    

Tayo̠mte police ona video ńelte o̠na gho̠ṭo̠na são jo̠po̠ṛaoko ko saṕ akat́ko̠a. o̠na tayo̠m  Begumganj thanaren OC niạ babot ạḍi usạra bebo̠sthae hatao reaḱ hukume emleda. O̠na video ńelte uni maejiu hõ aćren bo̠eha ṭhen ko sendra ńamkedea.

Teheń No̠akhạli Sadar Ho̠spital re uni maejiuaḱ do̠cto̠ri biḍạu hoyoḱ kana.

Niạ gho̠ṭona reaḱ video jemo̠n ar alo̠ko pasano o̠na lạgit́ police neho̠r ko do̠ho̠ akada. Ar jahae jo̠di o̠nae pasnao uni do̠ pornography ạn ho̠tete sa̠jạie ńama menteko husiạr akat́koa.

Tumạl -BBC

Teheń goṭa diso̠mre Jatiạri Viṭamin ‘A’ plus campaign -2020 eto̠ho̠ṕakana.

04 October khon 17 October 15 maha hạbić niạ campaign do̠ calao̠ḱa mente Sastho  ar Poribar Kollan Mo̠ntri  Zahed Malik Jatiạri Viṭamin ‘A’ plus campaign -2020 ńutumte kho̠bo̠riạko baḍae o̠co̠ mit́ dupuṛuṕre niạe baḍae o̠co̠akana. Niạ kạmiho̠ra re  diso̠m ren 6 cando̠ khon 59 cando̠ umerren 2 ko̠ṭi 20 lakh kạtić gidrạko viṭamin A capsule ko jo̠m o̠co̠koa.

.Viṭamin A capsule jomte gidrạko ạndhạuạ ro̠g ko teṅgo̠ darama ar hoṛmo napaete haraburuḱa. Niạ chaḍa hõ jotolekan gujuḱ khon gidrạko 24%, ham ro̠g te gujuḱ 50% ar dairia karon 30% gujuḱ thoṛaea.

Niạ Viṭamin A plus capsule do 6 cando̠ kho̠n 11 cando̠ umerren gidrạ do̠ nil ro̠ṅ capsule (1 lakh IEU) ar 12 cando̠ kho̠n 59 cando̠ umerren gidrạko do̠ araḱ ro̠ṅ capsule (2 lakh IEU) ko ńama.

Ko̠ro̠na khạtir niro̠po̠n ho̠ṛmo̠ tahen ạn ạriko manaoganao kate ge gidrạren baba go̠go̠ ako̠ren gidrạ viṭmin A capsule jo̠m o̠co̠ko lạgit́ niṭ akan ṭhạireko ạgukoa. O̠nko gidrạ niạ capsule jo̠m o̠co̠ko lạgit́ Niropon hoṛmo joton kạmiạko (sastho̠kạmi) dạyikko purạua.

Niạ Baṅgladiso̠mre aema santal, o̠rao, mahali, koḍa, kolhe ar hõ aema jạtren ạdibạsi ho̠ṛko menaḱko̠a, o̠nkoren gidrạko ho̠ niạ viṭamin A capsule jo̠m kho̠n bako e̠ṛnoḱa menteko asjo̠ṅ kana.

Teheń BTV re̠aḱ khoborre̠ uchạne̠na Ṭhạkurgaon jilạ re̠aḱ sodor Rahiman Union Krisnopur Ạdibạsi atore̠ Upojilạ ḍanṭao̠ Thakurgaon sodor hote̠te̠  hoe̠ purạue̠n 10 go̠ṭẹć adha dolan o̠ṛaḱ.5 go̠ṭeć Ḍhokoć kol, 5 go̠ṭen dolan Ṭạnḍite̠ o̠ṛaḱ (Latrine), o̠na são̠te̠ Ạdibạsi santal koaḱ Krisnopur Ạdibạsi Iskul lạgit́ 3 adha dolan o̠ṛaḱ. Manotan Maraṅ Montri aḱ sandes hisạbte̠ Maraṅ Montriaĺ Mahal khon ńam akan kạuḍite̠ no̠a kạmi do̠ hoe purạue̠na. Upojilạ Ḍanṭao̠ pahṭa seć khon BTV ae̠ma sarhao̠, ar mońj kạmiho̠ra re̠aḱ khobor uchạn ńutumte̠ hõ ae̠ma johare̠ e̠mae̠ kana.

Calao̠e̠n se̠rma Upojila ̣ Nirbahi Officer do̠ no̠a atoe̠ hiri leda unre̠ phaelao̠ se̠rma latarre̠ cet́ joṅ kan santal Ạdibạsi gidrạko lạgit́ Iskul ar O̠ṛaḱ re̠aḱe mit́ khojoḱaḱe̠ kol le̠da Maraṅ Montri Mahalte̠.

Ńum uduḱ gano̠ḱa niạ se̠rma hõ Nirbahi Officer Abdullah-Al-Mamun do̠ no̠a Ạdibạsi santal ko lahanti jionre̠ seṭẹrko lạgit́ arhõ 11 go̠ṭe̠n adha dolan o̠ṛaḱ be̠nao̠ kate̠ e̠mako re̠aḱ mit́ ardas Maraṅ Montriaḱ mahal teye̠ kol akada.

2019-2020  Se̠rmare̠n UEFA EUROPA League bạchri sirạ khilạḍiạ hisạbte̠ye̠ bachao̠e̠na Inter Milanre̠n Striker Romelu Lukaku. 27 se̠rma umeran nui be̠lgian khilạḍiạ do̠ Bruno Fernandes ar Ever Banega  tạkin tayo̠m otokate̠ no̠a siro̠pae̠ hame̠ṭ ke̠da. Niạ ghalo̠ḱ pon dhao̠ bạchri sirạ siro̠pae̠ hame̠ṭ ke̠da UEFA.

Sokol hilo̠ḱ nion re̠ sapr̠ao̠ le̠n UEFA  EUROPA league Group draw  akhṛare̠ Lukaku do̠ bạchri sirạ khilạḍiạ hisạbte̠ko jạhir kedea. Lukaku re̠n são̠tenić khilạḍiạ Eden Hazard calao̠e̠n se̠rma no̠a siro̠pae̠ ńam leda. EUROPA League Knockout akhṛare̠ Inter re̠aḱ turui go̠ṭe̠n gatere̠ goal re̠aḱ gorobe̠ hameṭ leda Lukaku, joto mit́re̠ uni do̠ eae go̠ṭẹne goal leda ar goal lạgit́ go̠ṛo̠e̠ e̠mleda barea. Sanam mit́ kate do̠ Inter re̠n hũyạte̠ go̠ṭa mạusum mit́kate 34 e goal akada.

Calao̠e̠n Mạusum re̠ Group akhṛa rẹak khilạḍre̠ 48 club re̠n Coachko te mit́ṭe̠n gão̠ta (Board) be̠nao̠ hoelena. São̠reko tahẽkana Europe re̠n Sports Media Group re̠n bachao̠ akan 55 khoboriạko ar EUFA rạsiạ  Diso̠mre̠n mit́ hoṛ kate̠t́ bachao̠ akan hor̠aḱ Vote.O̠na gão̠tare̠n (Board)  sanamko do̠ akoaḱ kusi leka pea khilạḍiạ koaḱ ńutumko bachao̠ daṛeaḱa. Onko modre̠ pạhilić do̠e̠ ńama 5 point dọsarić do̠ 3 point te̠sarić do̠ 1 point. Tobe coachko do̠ jahan vote do̠ bako e̠m daṛeaḱa.

Bharo̠t re̠aḱ dilhire̠ mit́ṭe̠n kisạ̃ṛ ho̠ṛe̠ tahẽkana. Se̠taḱre̠ be̠re̠t́kate̠ jahae̠ge pạhilre̠ uniye̠ ńapam le̠khan, go̠ṭa din re̠hõ uni ho̠ṛ do̠ jãhãn jo̠maḱ baṅ juṭạuaya. Mit́ ho̠ṛ bar ho̠ṛ pasnao̠ḱ pasnao̠ḱte̠ mit́ din diso̠mre̠n cacalao̠ić so̠mraṭ ṭhe̠n hõ katha do̠ uḍạu calao̠e̠na. So̠mraṭ do̠ no̠a katha ańjo̠m kate̠ tho̠ṛae̠ hahaṛa e̠na ar biḍạu ạukạu lạgit́e̠ hudis kada. Hudis ar cintạ le̠kage mit́ din uni kisạ̃ṛ ho̠ṛ mạnik chand ko saṕ ạgu kedea so̠mraṭ o̠ṛaḱte̠. Do̠sar hilo̠ḱ se̠taḱre̠ je̠mo̠n so̠mraṭ são̠te̠ pạhilre̠ ńapam hoe̠ daṛe̠aḱ. E̠kalte̠ se̠taḱre̠ge so̠mraṭ so̠ṅge mạnikchandaḱ ńapam hoe̠ go̠t́e̠na. Ńapam tayo̠m so̠mraṭ do̠ uni aṛaḱ kae re̠aḱe̠ hukum ke̠da ar hudiso̠ḱe̠ e̠ho̠ṕe̠na ńe̠lle̠ge̠ń teheń ce̠t́ hoyoḱa. Se̠taḱ re̠aḱ taṛam mucạt́ kate̠ baskeaḱ jo̠m lạgit́ jo̠to̠ko toe̠nat ke̠da ar o̠na o̠kte̠ re̠ge mit́ṭe̠n go̠lam do̠ dạṛ he̠ćkate̠ye̠ lại adea amre̠n o̠ṛaḱ ho̠ṛ do̠ bogete̠ bo̠ho̠ḱ hasoe̠de kana. So̠mraṭ do̠ e̠kal bạe bilo̠m le̠da, jo̠m bạgi kate̠ye̠ dạṛ idike̠da. Hukum ke̠dae̠ nitge je̠mo̠n kobirajko ho̠ho̠ae̠. Kobiraj hoe̠ he̠ć go̠t́e̠na ar ran re̠he̠t́koe̠ e̠madete̠ye̠ be̠s go̠t́ e̠na. So̠mraṭ do̠ jo̠jo̠m te̠bil khone̠ ńir he̠ćakana, nito̠ḱ jo̠maḱ kodo̠ re̠aṛ caba akana. Go̠lam kodo̠ do̠sar dhao̠ jo̠to̠aḱ jo̠maḱko lo̠lo̠ do̠ṛha ke̠da. Me̠nkhan jo̠m o̠kte̠ paro̠me̠nte̠ so̠mraṭ do̠ ạḍi garte̠ lać haso rakaṕgo̠t́ adea. Arhõ kobiraj ko baḍae̠ ocokede̠a, he̠će̠nte̠ ńe̠l barakate̠ye̠ me̠tadea, teheń do̠ go̠ṭa din ar jãhãn baṅ jo̠m-ńuge bhagea. Lać hasote̠ye̠ jạbun akan so̠mraṭ doe̠ lại adea, ce̠t́ amdo̠m me̠ne̠t́a, iń ma co̠ enan se̠taḱ khonge ce̠t́ hõ bạń jo̠m akat́! E̠nre̠hõ teheń do̠ jãhãnaḱ alom jo̠ma me̠tadeae̠ kobiraj do̠. Baḍae̠ sanakedea kobiraj do̠ ce̠daḱ se̠taḱ do̠ bam jo̠m akada! Amdo̠ khạṭige tho̠ṛa ran e̠mamtege hoyoḱa o̠nka me̠nkate̠ nạṛi rane̠ jo̠m ocokedea. Lać haso thire̠n tayo̠me̠ disạ ke̠t́a uni mạnikchandaḱ katha. Disạke̠t́ tayo̠m bo̠ho̠ḱ do̠ ạḍige lo̠lo̠e̠n taya. Se̠taḱ be̠re̠t́ to̠rage uni bạṛić mo̠nan kisạ̃ṛ ho̠ṛaḱ mẽ̠t́hań ńe̠lle̠t́ tege pase̠ć se̠taḱ re̠aḱ jo̠m do̠ baṅ hoe̠ akantińa. E̠ke̠n se̠taḱ do̠ go̠ṭa dinge bạń jo̠m ńam le̠da!

So̠mraṭe̠ hudis ke̠da no̠nkan ho̠ṛaḱ jiwe̠t́ tahẽ̠n re̠aḱ ạidạri do̠ bạnuḱa. E̠kkal khaṛa geye hukum ke̠da, d̠o nitge uni mạnikchand saṕ ạgue̠pe̠ ar ṭaṅgao̠kate̠ go̠ć giḍikae̠pe̠. So̠mraṭaḱ hukum ńamkate̠ unire̠n palṭo̠n kodo̠ bako bilo̠mle̠da, tho̠ṛa tayo̠mge o̠ṛaḱ te̠ko se̠ṭe̠re̠na. So̠mraṭaḱ parwana ńamkate̠ mạnikchand doe̠ asbasao̠ cabae̠na, ce̠t́e̠ ce̠kaya me̠nte̠. Mạnikchandaḱ jo̠ṛ hat ar palṭo̠n koaḱ ti-jaṅgare̠ye̠ giḍi chaḍao̠e̠n re̠hõ bako batao̠le̠t́a, saṕ ạgu kedeako. Hijuḱ horre̠ Birbo̠l so̠ṅge ńapam hoye̠ntaya, mạnikchand do̠ ńam to̠rage uniaḱ jaṅgaye̠ hạṛuṕ ke̠t́ taya are̠ me̠tadea, ma jãhã le̠katege bańcao̠ín me̠. Ińre̠n bạhu ar gidrạ pidrạ koaḱ do̠ ce̠t́ hal hoyoḱ takoa? Birbo̠l do̠ palṭo̠nko ṭhe̠n khon tho̠ṛa ko̠ca se̠će̠ idi kedea are̠ me̠tadea, alo̠m bo̠to̠ro̠ḱa. Arhõ tho̠ṛa khae̠ kho̠e̠ate̠ luturre̠ ce̠t́koco̠e̠ lại adea, ar tayo̠m te̠do̠ palṭo̠nko ṭhe̠ne̠ jimạ kadea. Palṭo̠n kodo̠ ṭaṅgao̠ kate̠ go̠je̠ ṭhạ̃i re̠ko idi kedea, go̠je̠ lahare̠ mạnikchandko kuli kedea, amaḱ jãhãn mucạt́ sana me̠naḱtama? Mạnikchand doe̠ me̠nke̠da, mano̠tan so̠mraṭ bharo̠tte̠sho̠r Akbo̠r sãote̠ mit́ dhao̠ ńapamo̠ḱ sanaediń kana. No̠a kantińgea ińaḱ mucạt́ sana do̠. Ańjo̠m kate̠ so̠mraṭko baḍae̠ ocokedea, so̠mraṭ do̠ he̠će̠nte̠ uniye̠ kulikedea ce̠t́ lạgit́ gujuḱ lahare̠ iń ńe̠ńe̠l sanake̠t́ mea? Mạnikchand do̠ tikin jo̠ṛhat kate̠ye̠ me̠tadea, mo̠haraj so̠mraṭ, sạrige ce̠t́ be̠re̠t́ kate̠ pạhilre̠ ińaḱ mẽ̠t́hãm ńe̠lle̠t́ te̠ go̠ṭa din ce̠t́ hõ bam jo̠m daṛeakada? O̠na raṅgao̠ te̠ge ce̠t́ amdo̠ ṭangao̠ kate̠ iń go̠je̠ re̠aḱ e̠m hukum akada?

So̠mraṭ do̠e̠ me̠nke̠t́a, iń mo̠to̠ do̠ baṅ, jãhãe̠ge se̠taḱ re̠ pạhil amaḱ mẹ̃t́hã ko ńe̠l akat́, jo̠to̠ ho̠ṛkoge go̠ṭa din upạs kate̠ khe̠mao̠ khe̠mao̠te̠ko gujuḱ kana. Am le̠kan bạṛić mo̠nan, ce̠hrawan ar — ho̠ṛaḱ jiwe̠t́ tahẽ̠n do̠ ińaḱ raj re̠ baṅ ge baṅ ạidạri bạnuḱtaya. Mạnikcand do̠ mirluṅe̠nte̠ bhabna salaḱe̠ me̠nke̠da, khạṭige mo̠haraj, teheń iń do̠ pạhil amaḱ mẽ̠t́hãń ńe̠l akada, ar o̠nate̠ nito̠ḱ ińdo̠ gujuḱ hoyoḱ kantińa. Se̠taḱ be̠re̠t́ to̠ra amaḱ mẽ̠t́hãń ńe̠l akada, o̠nate̠ judi ṭangao̠kate̠ gujuḱ hoyoḱ tiń, no̠a do̠ ce̠t́ le̠ka hoe̠e̠na?

No̠a katha ańjo̠m kate̠ so̠mraṭ doe̠ te̠ṅgo thire̠na. Me̠tadea amaḱ katha mit́se̠ć khon do̠ ṭhikgea. Do̠ calaḱme̠, amaḱ gujuḱ re̠aḱ hukum doń bạtil ke̠da. Me̠nkhan amaḱ bo̠ho̠ḱre̠ no̠nkan ake̠l do̠ ce̠kate̠ he̠će̠na? Mạnikchand do̠ so̠mraṭe̠ me̠tadea, hijuḱ o̠kte̠ Birbo̠l sãote̠ ńapam hoe̠le̠na, unige la̠i laha adiń tahẽkana. So̠mraṭ do̠ muluć muluć landa ate raj bakho̠l se̠će̠ monḍae̠na.

Teheń do̠ Mano̠tan Mahatma Gandhi aḱ 151 se̠rma janam mãhã kana. Uniaḱ aso̠l ńutum do̠ ho̠yo̠ḱ kana, Mo̠ho̠n das Ko̠ro̠m chand Gandhi. 1869 se̠rma re̠aḱ do̠sar October Gujraṭ re̠aḱ Pobondor re̠ uni doe̠ janam le̠na. Ar go̠ṭa dhạrtire̠ teheńaḱ din do̠ Ohingsha mãhã hisạb te̠ko manao̠a.

Mahatma Gandhi doe̠ ho̠yo̠ḱ kana Bharot disạm sạdhin lạṛhại rẹn maraṅ ho̠r uduḱíć, o̠na se̠le̠t́ dho̠ro̠m re̠ ạḍi gạkhuṛ leader. Go̠ṭa dhạrtire̠, manwakoak purgạl (sạdhin) ar ạidạri hame̠ṭ lạgit́ uni ṭhe̠n khon ạḍi ae̠ma udgạu ńamo̠ḱa.

Gandhi do̠ Bharot diso̠m ar go̠ṭa dhạrtire̠ Mohatma (Maraṅ Atma) se̠ Baba ńutumte̠ko baḍae akadea. Bharo̠t diso̠m sarkar do̠ uni manoti lạgit́ te̠ Jạtiạri re̠n Baba Me̠nte̠ko manaea. Uniaḱ dhạrti jiṅgi ar hudisko khon aema le̠kan siknạt bon hame̠ṭ daṛeaka.

Do̠sar October do̠ uniaḱ janam mãhã kan te̠ go̠ṭa bharo̠t diso̠mre̠ Gandi Joyonti hisạb te̠ko mano̠t se̠le̠t́ko manao̠ ganao̠e̠da. 2007 se̠rma re̠aḱ 15 June do̠ United Nation sabha do̠sar 2 october International Ohingsha Mãhã hisạb te̠ko lại pasnao̠ akada/ ḍharwạḱ akada. UN re̠aḱ jo̠to̠ diso̠m re̠nkoge no̠a din do̠ mano̠t se̠le̠t́ ko manao̠ ganao̠ lạgit́ko mit́ mon e̠na.

Siknạt te̠ pe̠re̠ć akan Brithis re̠n A̠n be̠pari hisạbte̠ dạkhin Africare koclonoḱ kanko bharo̠t re̠n ho̠ṛkoaḱ ạidạri hatao̠ lạgit́ pạhil andolon/lạṛhại doe̠ e̠ho̠ṕ akada Gandhi, pạhil uniaḱ Ohingsha sulukte̠ hame̠ṭ lạgit́ ae̠ma le̠kan monsubạ ko doe̠ e̠m le̠da. Bharo̠t diso̠m te̠ ruạṛ he̠ć kate̠ uni do̠ mit́ bar re̠ṅge̠ć ore̠ćko, cas-baso̠ḱ ho̠ṛko, ar din kạmiạko soṅge kate̠ discrimination/boisommo kor hatao̠ ar ae̠ma le̠kam koclonko khon upkạrko lạgit́e̠ lạṛhại le̠na.

Bharo̠t diso̠m re̠ak National Kongresh re̠aḱ dạyik se̠ ạyur lạgit́ Gandhi do̠ go̠ṭa bharo̠t diso̠m re̠ re̠ṅge̠ć je̠mon baṅ tahe̠n, Maejuiko sạdhin e̠mako, jo̠to̠ jạtko talare̠ dupulạṛ, lạṭu kạṭić jạtko talare̠ be̠gar je̠mon baṅ tahe̠n, jạtiạri ko kạuḍi se̠ć te̠ hõ je̠monko lahanti daṛe̠aḱ se̠le̠t́ ae̠ma le̠kan boge kạmiko hoyoḱ lạgit́e̠ ḍhạrwạḱ le̠da. Me̠nkhan no̠ako motlob se̠ jo̠s do̠ tahẽ kana Bharo̠t diso̠m do̠ bidạsi aḱ koclon khon rukhạ lạgit́. 1930 se̠rma Gandhi do̠ buluṅ re̠aḱ kor birud re̠ 400 kilomiter (248 mile) jelń ḍanḍi buluṅ Kuckawaje ạyur le̠da. One̠ o̠ka do̠ 1942 se̠rma Engraj sasokko ce̠tanre̠ samna sạmni Bharo̠t aṛaḱ re̠aḱ lạṛhạie̠ e̠ho̠ṕ le̠da. Uni do̠ ae̠ma o̠kte̠ ae̠ma le̠kan karonko te̠ ae̠ma dhom Dạkhin Africa ar Bharo̠te̠ko jail ledea.

Mahatma Gandi do̠ jao̠ o̠kte̠ rege Ohingsha motobad ar sạriaḱ re̠ dhir pure̠ tahẽ kana. Uni do̠ ạḍi sadharon dhạrti jiṅgi tahẽ kan taya ar mit́ ṭe̠n Ashrom doe̠ be̠nao̠ le̠da. Uniaḱ ho̠ro̠ḱ bandeko do̠ tahẽ kan taya Bharo̠t re̠aḱ Nagam Dhuti ar Sal, o̠ne̠ o̠ka do̠ apnar te̠ko be̠nao̠e̠t́ tahẽna. Uni do̠ ạḍi jãhã le̠kae̠ jo̠m ńue̠t́ tahẽna, bạṛti ge tahẽ kana aṛaḱ sakamko. Mucạt́ umẹr re̠do̠ ạḍi bạṛti jo̠ jiniskoe̠ jo̠m akada. Attosuddhi/sạriaḱ ar protibad lạgit́ upạs do̠ tahẽ kan tahẽna.               

Mahatma Gandhi aḱ eae goṭe̠n Dangers to Human Virtue kathako;

Pạhilaḱ:  Wealth/ Dhon Dạlạt – without Work; Kạmi be̠go̠rte̠ tis hõ Dhon Dạulạt do̠ babon hame̠ṭ joṅ daṛeaḱa.

Do̠saraḱ: Pleasure/ Rạskạ – without Conscience; Mo̠ńj hudis be̠go̠r tis hõ dhạrti jiṅgi re̠ Rạskạ babon ńamjo̠ṅa.

Tesaraḱ: Knowledge/Siknạt – without character; Boge cạl-colon be̠go̠r tis hõ mo̠ńj siknạt babon hameṭ daṛeaḱa.

Ponaḱ: Business/Lonbon – without ethics; Noitik se̠ sạriaḱ be̠go̠r bhage lonbonić do̠ babon hoe̠ daṛeaḱa.

Moṛeaḱ: Science/Akel – without humanity; Bhage hudis, siknạt, ạkelko be̠go̠r manwa gun se̠ science pańja do̠ muskil gea.

Turueaḱ: Religion/ Dho̠ro̠m – without sacrifice; dho̠n bo̠do̠l dho̠ro̠m do̠ baṅ ńamo̠ḱa. Bicko̠m dho̠ro̠m pańja lạgit́ do̠ apnar baṅo̠ḱ (tag) jạruṛa.    

Eaeaḱ: Politics/Rajniti – Without principle; Niti/sạriaḱ be̠go̠r tis hõ mittṭen bhage ạyurić se̠ politician do̠ bam hoe daṛeaḱa.

Mahatma Gandhi aḱ no̠a o̠lo̠ḱ se̠ć te̠ń disạ keda Baṅgladesh Santal Researcher & Columnist Manotan Mithusilak Murmu khon o̠l akan puthi “Mahatmar Gandhir Purbo sadhok Jisu Khristo” sạrige sạriaḱ ar dho̠ro̠m be̠go̠r te̠ tishõ bhage ạyurić do̠ babon hoe̠ daṛeaḱa. O̠ne̠ o̠ka do̠ Mahatma Gandhi khon cecet́aḱe e̠mabon kan.