Baṅladiso̠m re̠aḱ KO̠RO̠NA Hạli So̠mbat
Bharo̠t re̠aḱ pạchim baṅgla le̠ka Baṅladiso̠mre̠ arhõ covid-19 ajar nãwãte̠ chạplạuḱ re̠aḱ ko o̠nmane̠da diso̠mre̠n budạnko. Niạ lạgit́ ạḍi kajak husiạr ar niro̠po̠n ho̠ṛmo̠te̠ tahẽ̠n niạm ko manao̠ lạgit́ ko me̠n akada.
Covid-19 jạtiạri Kạrigo̠l so̠so̠lha koaḱ gapalmarao̠ dupuṛuṕ mucạt́re̠ Robbar ńindạ mit́ so̠mbat re̠ niạ kathako baḍae̠ ocoakana.
O̠na committee re̠n Mukhiạ Professor Dr. Mohammad Sohidullah aḱ kol so̠mbatre̠ ko me̠n akada, do̠sar dhao̠ le̠ka diso̠mre̠ ko̠ro̠na ajarte̠ jạbuno̠ḱ re̠aḱ bo̠to̠r me̠naḱa. E̠nte̠ nit do̠ ae̠ma diso̠m re̠n ho̠ṛ hijuḱ calaḱko e̠ho̠ṕe̠na. Ae̠ma diso̠m são̠ ge jo̠po̠ṛao̠ do̠ṛhao̠ḱ kana. Me̠nkhan ho̠ṛko modre niro̠po̠n ho̠ṛmo̠ tahẽ̠n lạgit́ sapha sạphi bako tahẽ̠n kana se̠ so̠nto̠r bako tahẽ̠n kana. Niạko karonte̠ arhõ ko̠̠ro̠̠na ajarte̠ jạbuno̠ḱ re̠aḱ ãc ńe̠lo̠ḱ kana.
Diso̠m re̠ do̠sar dhao̠ niạ ro̠gte̠ko jạbunle̠n khan o̠na te̠ṅgo daram lạgit́ sanam le̠kan be̠bo̠sta hatao̠ re̠aḱ so̠lha sarkarko e̠m akadea covid-19 jạtiạri so̠po̠lha committee. Niạ committee ko̠ro̠na ro̠g biḍạu lạgit́ bạṛtiko me̠ne̠da je̠mon tinạḱ usạra daṛe̠aḱ unạḱ usạra ge bo̠gea.
Calao̠e̠n tho̠ṛa hapta khon ko̠ro̠na ajarte̠ jạbuno̠ḱ ho̠ṛko tho̠ṛa akanre̠ hõ ạḍi napae̠ do̠ bạnuḱbona.
E̠nre̠hõ sarkar haspatal kore̠ ko̠ro̠na re̠aṅ gitićaḱ ko (bed) khạliye̠da, o̠ka ko haspatal re̠ ko̠ro̠na rugiko bako bhurtiye̠t́ko o̠nako haspatal do̠e̠ bond eda sarkar. Me̠nkhan nit hõ ae̠ma rugi kodo̠ko ḍhe̠ro̠ḱ kana. Do̠sar dhao̠ ko̠ro̠na ro̠g chạplạu são̠ são̠ o̠na ro̠g cinhạu lạgao̠ḱa usạra ar cikitsa e̠mako lagao̠ḱa.
Ar hoṛko ce̠hao̠na e̠mako lagao̠ḱa so̠nto̠r tahẽn lạgit́. Bahre̠ diso̠̠m khon he̠ć akan ho̠ṛko Haspatalre̠ se̠ o̠ṛaḱre̠ (home quarantine) re̠ do̠ho̠ ko lagao̠ḱa. Baḍae̠joṅ: niạ ko̠ro̠na ajar te dhạrtire jotokhon bạṛić dosare do̠ko paṛaolena America ar France.
Baṅgladiso̠m re̠aḱ nit o̠bo̠sta napae̠ me̠naḱ re̠hõ darae̠kan ãghãṛre̠ bạrić hoe daṛe̠aḱa me̠nte̠ko amdaje̠da niạ so̠po̠lha committee. Baṅgladiso̠mre̠ pạhil ko̠ro̠na saṕ ńamle̠na 08 march ar pạhil niạ ro̠gte̠ko go̠ćle̠na 18 march. Ho̠la Robbar dhạbićte̠ niạ ko̠ro̠na ajarte̠ ko go̠ć akana 4 hajar 939 ho̠ṛ ar niạ ro̠gte̠ko jạbun akana 3 lakh 48 hajar 926 hoṛ.
Pạhil se̠ć niạ karonte̠ be̠s ke̠ṭe̠ć manao̠ ganao̠ tahẽkan re̠hõ nitoḱ do̠ dhe̠rge ḍhilạu akana. Ar de̠jo̠ḱ gạḍi kore̠ hõ ae̠ma ho̠ṛ re̠t́te̠pe̠t́ ko de̠jo̠go̠ḱ kana. Tinạḱ din calao̠ḱ kana unạḱge sanam le̠kan niro̠po̠n ho̠ṛmo̠ tahẽn ạn do̠ bako manao̠e̠da diso̠mre̠n ho̠ṛko ar ko̠ro̠na ro̠g me̠naḱa se̠ baṅ o̠na re̠aḱ biḍạu hõ bako biḍạu ocoye̠da.